“Kev Txhawb Pab Dhau Los ntawm Los, Nrog Kuv Mus,” Liahona, Cuaj Hlis Ntuj 2020
Tej Ntsiab Cai txog Kev Txhawb Pab, Cuaj Hlis Ntuj 2020
Kev Txhawb Pab Dhau Los ntawm Los, Nrog Kuv Mus
Phau Los, Nrog Kuv Mus yuav ua li cas pab koj txhawb nqa lwm tus lub neej?
Qhov uas koj kawm vaj lug kub los ntawm Los, Nrog Kuv Mus yuav pab koj muaj cib fim txhawb pab lwm tus, tsis hais thaum koj nrog koj tsev neeg, koj qhia los sis kawm hauv ib hoob kawm rau Hnub Caiv Kev Kawm Vaj Lug Kub, los sis nyob ntawm tsev kawm ntawv, thaum ua hauj lwm, los yog nyob lwm qhov chaw. Kev qhia yeej tsis yog “kev coj Hnub Caiv txoj kev sib tham xwb; kev qhia yog kev muaj siab hlub txhawb pab lwm tus thiab foom koob hmoov rau lwm tus.”1
Kev Sib Raug Zoo nrog cov Tub Ntxhais Kawm Ntawv
Thaum twg Ofelia Trejo de Cárdenas raug hu qhia cov tub hluas ntxhais hluas nyob hauv nws pawg ntseeg hauv lub nroog Mexico City, nws xav tias qhov uas nws sib raug zoo nrog cov tub hluas ntxhais hluas hauv Hnub Caiv Kev Kawm Vaj Lug Kub yuav pab nws txawj qhia thiab txhawb nqa lawv.
nws hais tias, “Yog kuv tsis sib raug zoo nrog kuv cov tub hluas ntxhais hluas thiab lawv tsis paub tias kuv hlub lawv, tej zaum lawv yuav tsis ntseeg kuv thaum kuv qhia los yog thaum kuv ua tim khawv. Tej zaum lawv yuav xav tias kuv tsuas yog ib tug xib hwb uas qhia Hnub Caiv Kev Kawm Vaj Lug Kub xwb.”
Tiam sis Muam Cárdenas yuav sib raug zoo nrog lawv yog tias nws qhia ib zaug txhua ob lub lim tiam? Nws twb kawm ib txoj kev ua li ntawd los ntawm kev siv txuj ci technology. Nws thiab nws cov tub ntxhais kawm ntawv tau sib txuas lus txhua hnub thaum lawv siv ib qho app hu ua WhatsApp xa ntawv thiab sib tham. Txhua hnub ua ntej lawv kawm Hnub Caiv Kev Kawm Vaj Lug Kub, ib tug hauv lawv hoob xa ib nqe vaj lug kub los ntawm zaj lus kawm tom ntej thiab lawv tej kev xav txog nqe vaj lug kub ntawd rau txhua tus hauv lawv hoob. Tom qab lawv nyeem nqe vaj lug kub thiab tej kev xav ntawd, cov hauv hoob kawm qhia tias lawv xav li cas thiab.
Muam Cárdenas hais tias, “Thaum lawv nyeem nqe vaj lug kub, lawv xa ib lub ntsej muag zoo siab tuaj kom kuv paub tias lawv twb nyeem vaj lug kub ntawd thiab lawv tau xav txog nqe ntawd.” Txog sij hawm rau Hnub Caiv Kev Kawm Vaj Lug Kub ntxiv, cov tub ntxhais kawm ntawv twb tau npaj kawm lawm.
Kev sib koom txhua hnub li no tau pab ib tug tub hluas uas nws niam nws txiv tsis tshua muab siab rau ntseeg lub Koom Txoos.
Muam Cárdenas hais tias, “Kuv nyiam thaum kuv pom nws tuaj rau lub koom txoos vim kuv paub tias nws yuav tsum kov yeej ob peb yam teeb meem kom tuaj tau. Kuv paub tias tej nqe vaj lug kub thiab tej kev xav uas nws cov phooj ywg xa tuaj rau nws thiab tej nqe vaj lug kub thiab tej kev xav uas nws xa tuaj thaum txog nws lub sij hawm ua li ntawd los twb txhawb nqa nws ntau heev.”
Muam Cárdenas hais tias kev txhawb pab los ntawm cov vaj lug kub los tseem muaj tom qab nws zaj lus qhia thaum Hnub Caiv vim lawv sib tham txog vaj lug kub txhua hnub.
Nws hais tias, “Hais txog kuv txoj kev npaj los kuv yeej thov Vajtswv pab kuv cov tub ntxhais kawm ntawv. Tsis yog kuv xav txog lawv thaum Hnub Sunday xwb tiam sis kuv kuj xav txog lawv txhua hnub. Lawv txhua tus nyias muaj nyias tej kev xav tau. Txhua tus yog Vajtswv ib tug me nyuam. Kuv xav txog lawv thaum kuv npaj qhia lawv.”
Thiab thaum nws qhia lawv, nws cia li mloog—nws mloog nws cov tub ntxhais kawm ntawv thiab mloog tus Vaj Ntsuj Plig Dawb Huv.
“Tus xib hwb yog tus Ntsuj Plig,” es feem ntau nws hnov tau tus ntsuj plig los ntawm nws cov tub ntxhais kawm ntawv lub suab. “Kuv yuav tsum tsom ntoov vim tej yam uas lawv hais yog kev tshwm sim uas tus Ntsuj Plig pub rau lawv.”
Peb Hoob Kawm Yeej “Zoo Li Tsev Neeg Hmo Ua Ke”
Carla Gutiérrez Ortega Córdoba xav tias nws tau koob hmoov ua ib tug mej zeej hauv Muam Cárdenas hoob Hnub Caiv Kev Kawm Vaj Lug Kub vim tus xib hwb pab saib xyuas thiab txhawb pab lawv. Carla xav tias nws hoob zoo li no vim tus xib hwb ua ob pab yam, xws li:
-
Kev npaj: Kev qhia txog vaj lug kub thiab lawv tej lub tswv yim pab lawv npaj rau lub sij hawm kawm tom ntej. Nws piav tias, “Kev nyeem vaj lug kub txhua hnub pab txhawb nqa peb thiab pab peb kawm ntxiv.”
-
Kev koom tes: “Peb txhua tus hais lus. Qhov no pab kuv paub kuv cov phooj ywg hauv kuv hoob kawm, vim lawv yog kuv cov nus thiab cov viv ncaus.”
-
Kev hlub: “Niam Tais Cárdenas yeej tuav yus tes. Peb hoob kawm yeej zoo li tsev neeg hmo ua ke, uas muaj cov nus thiab cov viv ncaus. Yog ib qho tshwj xeeb.”
-
Tus Vaj Ntsuj Plig Dawb Huv: “Peb muaj kev kaj siab thiab kev zoo siab nyob hauv peb hoob kawm vim hais tias peb koom siab nrog tus Ntsuj Plig.”
-
Kev ua tim khawv: “Los, Nrog Kuv Mus tau pab kuv npaj ua tim khawv rau lwm tus mloog. Kuv paub txog Phau Ntawv Maumoos thiab phau Vaj Lug Kub Npaivnpaum zoo dua ntxiv. Qhov no pab kuv qhia rau lwm tus txog tej yam uas kuv kawm nrog kuv cov phooj ywg hauv tsev kawm ntawv thiab cov neeg uas nrog kuv ua hauj lwm.”
Kev Txhawb Pab Sab Ntsuj Plig
Thaum Greg thiab Nicky Christensen, los ntawm Kentucky, lub Teb Chaws Amelikas, nyeem txog Anplham txoj kev khi lus hauv phau vaj lug kub nrog nkawd peb tug tub, nyuaj rau nkawd piav txog qhov no rau lawv. Lawv tsev neeg txiav txim siab tias lawv txhua tus yuav kawm txog Anplaham txoj kev khi lus ntawm tus kheej ces lawv yuav sib tham txog tej yam uas lawv tau kawm.
Greg hais tias, “Cov me nyuam yeej hais tej yam zoo Wb tus me tub uas muaj yim xyoo kawm tias Anplaham lub npe yog Anplas ua ntej. Nws lub npe tshiab yog Anplaham vim nws tau cog lus rau tus Tswv tias nws yuav tso kev txhaum tseg thiab ua neej ncaj ncees. Kuv xav tsis thoob vim li cas nws txawj to taub qhov ntawd.”
Lawv txhua tus kawm ib yam tshiab thiab tau sib tham txog qhov uas Anplaham txoj kev khi lus yog dab tsi thiab vim li cas yog ib qho tseem ceeb rau Tsoom Haiv Neeg Ntseeg hauv Hnub Nyoog Kawg niaj hnub no.
Nicky hais tias, “Yav tas los peb tau cia txhua tus nyeem tej nqe vaj lug kub zuj zus thaum peb tsev neeg tau kawm vaj lug kub. Los, Nrog Kuv Mus pab yus muaj tus Ntsuj Plig thaum yus qhia. Nim no thaum peb kawm ua ke, tus Ntsuj Plig tshoov kuv lub siab me ntsis kom sib tham txog tej yam uas yuav pab wb tsev neeg.”
Txoj kev kawm Los, Nrog Kuv Mus tsis tau pab lawv tsev neeg xav kawm txog txoj moo zoo ntxiv xwb, tiam sis nws kuj tau pab Greg thiab Nicky txhawb pab nkawd cov me nyuam sab ntsuj plig.
Nicky hais tias, “Los, Nrog Kuv Mus pab kuv qhia kuv cov me nyuam. Nws kuj pab kuv kov yeej tej teeb meem uas tej lub sij hawm kuv cov me nyuam tsim. Kuv haj yam txawj mloog tus Ntsuj Plig, kuv mloog zoo ntxiv, thiab kuv tau txais kev tshoov siab tias kuv yuav ua li cas kom pab kuv txhua tus me nyuam.”
Greg nyiam qhov uas Los, Nrog Kuv Mus pab lawv tsev neeg sib tham txog txoj moo zoo ntxiv. “Wb cov tub nyias muaj nyias txoj kev paub txog txoj moo zoo,” nws hais.. “Los, Nrog Kuv Mus tau npaj ib txoj kev rau wb pab lawv txhua tus kawm raws li lawv xav tau. Qhov uas kuv pom lawv nyiam kawm txog txoj moo zoo thiab xav txog qhov uas lawv yuav ua li cas kom ua raws li txoj moo zoo hauv lawv lub neej yeej yog ib qho koob hmoov zoo kawg.”
© 2020 los ntawm Intellectual Reserve, Inc. Ceev txhua txoj cai. Luam tawm hauv Teb Chaws Amelikas. Pub luam tawm ua lus Akiv: 6/19. Pub txhais ua lus Hmoob: 6/19. Kev txhais Ministering Principles, September 2020. Hmong. 16724 295