“Ministering babaen ti Umaykayo, Sumurot Kaniak,” Liahona, Septiembre 2020
Dagiti Pagbatayan ti Ministering, Septiembre 2020
Ministering babaen ti Umaykayo, Sumurot Kaniak
Kasano a makatulong kenka ti Umaykayo, Sumurot Kaniak a makaaramid iti pagdumaan iti biag dagiti dadduma?
Kaduam man ti pamiliam, iti maysa a siled a pagklasean iti Sunday School kas mannursuro wenno estudiante, wenno iti pagadalan, pagtrabahuan, wenno sadino man a lugar, mangted ti panagadal iti nasantuan a kasuratan babaen ti Umaykayo, Sumurot Kaniak iti adu a gundaway tapno agminister iti dadduma. Ti panangisuro, “ad-adda pay ngem iti panangiturong iti maysa a panaglilinnawag iti Domingo; iramanna ti panagserbi [ministering] nga addaan iti ayat ken parabur kadagiti dadduma babaen ti ebanghelio.”1
Pannakaikonekta kadagiti Estudiante
Idi naawagan ni Ofelia Trejo de Cárdenas a mangisuro kadagiti young adults iti wardna iti Mexico City, nariknana a ti nasinged a pannakilangenna kadagiti estudiantena iti Sunday School ti mangpadur-as iti kabaelanna a mangisuro ken mangpapigsa kadakuada.
“No awan ti nasinged a pannakilangenko kadagiti estudiantek ken saanda a marikna ti ayatko, mabalin a saanda a mamati kaniak no mangisursuroak iti maysa a klase wenno mangibingbinglayak iti pammaneknekko,” kunana. “Mabalin a mariknada a maysaak laeng a mannursuro iti Sunday School.”
Ngem kasano a mapadur-as ni Sister Cárdenas ti kasta a pannakilangen no maminsan laeng a mangisuro iti tunggal dua a lawas? Nasarakanna ti sungbat babaen ti teknolohia. Iti panangusar iti mobile phone application WhatsApp, makakonektan iti mabiit isuna ken dagiti estudiantena babaen iti teks ken voice message. Itan, iti inaldaw sakbay ti sumaruno a lesson iti Sunday School, nangipatulod ti maysa a class volunteer iti maysa a bersikulo manipud iti dayta sumaruno a lesson nga addaan iti mainaig a bukod a kapanunotan. Kalpasan ti panangbasa iti bersikulo ken kapanunotan, sumungbat dagiti miembro ti klase iti bukodda a kapanunotan.
“No basaenda ti nasantuan a kasuratan, mangipatulodda iti maysa a naragsak a rupa tapno ammok a nagbasa wenno nagadalda iti nasantuan a kasuratan ken pinanunotda daytoy,” kuna ni Sister Cárdenas. No orasen para iti sumaruno a lesson iti Sunday, nakasaganan dagiti estudiante a makiraman.
Itay kallabes daytoy nga inaldaw a koneksion ti nangbendision iti maysa a young adult a saan nga aktibo iti Simbaan dagiti dadakkelna.
“Magustuak daytoy no makitak isuna nga umay iti simbaan gapu ta ammok a no umay idiay, nasken a maipasango iti sumagmamano a karit,” kuna ni Sister Cárdenas. “Awan duaduak a dagiti nasantuan a kasuratan ken kapanunotan nga impatulod dagiti kaklasena ken dagiti nasantuan a kasuratan ken kapanunotan nga impatulodna met ket nangpapigsa unay kenkuana.”
Kuna ni Sister Cárdenas a ti ministering babaen kadagiti nasantuan a kasuratan ket saan a manglapped kenkuana iti lessonna iti Sunday School ken iti inaldaw a koneksionna iti nasantuan a kasuratan iti klasena.
“Mairaman iti panagsaganak ti panangikararagko kadagiti estudiantek,” kunana. “Panunotek ida saan laeng nga iti Domingo no di ketdi pay iti inaldaw ti lawas. Addaan ti tunggal maysa iti naipangruna ken naiduma a kasapulan. Anak ti Dios ti tunggal tao. Panunotek ida kabayatan ti panangisaganak kadagiti lessonko.”
Ken no mangisuro isuna, dumngeg—agpada kadagiti estudiantena ken iti Espiritu Santo.
“Ti mannursuro ket ti Espiritu,” a masansan a mangngeganna iti timek dagiti estudiantena. “Nasken nga ikasok gapu ta ti isaoda ket ti paltiing nga it-ited kadakuada ti Espiritu.”
“Kasla Home Evening” ti Klasemi
Marikna ni Carla Gutiérrez Ortega Córdoba a nagasat isuna ta nagbalin a maysa a miembro ni Sister Cárdenas iti klase ti Sunday School gapu iti mangtartaraon ken agminministering nga aglawlawna. Pagarup ti Carla a bunga dayta nga aglawlaw ti sumagmamano a paktora, a pakairamanan ti:
-
Panagsagana: Ti panangibinglay kadagiti nasantuan a kasuratan ken kapanunotan ti mangtulong kadagiti estudiante nga agsagana para iti sumaruno a klase. “Ti inaldaw a nasantuan a kasuratan mangtaraon kadatayo ken mangpadakkel iti pannakaawattayo,” ilawlawagna.
-
Pannakiraman: “Agsaritakami amin. Daytoy ti mangpalugod kaniak a mangam-ammo kadagiti kaklasek a nasaysayaat, kas gagayyem ken kas kakabsat.”
-
Ayat: “Kibinennaka ni Sister Cárdenas. Marikna ti klasemi kas sardam iti pagtaengan, nga addaan iti sumagmamano a kakabsat a lallaki ken babbai. Naisangsangayan unay daytoy.”
-
Ti Espiritu Santo: “Addaankami iti makaay-ayo, agtutunos nga espiritu iti klasemi gapu ta addakami iti disposision a mangpalugod iti kaadda ti Espiritu.”
-
Pammaneknek: Tinulongannak ti “Umaykayo, Sumurot Kaniak nga agsagana a mangibinglay iti pammaneknekko. Naun-uneg ti pannakaammok iti Libro ni Mormon ken ti Biblia. Dayta ti mangpalugod kaniak a mangibinglay iti no ania ti masursurok kadagiti kaklasek iti pagadalan ken tattao a katrabahok.
Ministering kadagiti Naespirituan a Kasapulan
Idi nabasa da Greg ken Nicky Christensen, manipud iti Kentucky, USA, maipapan iti katulagan ni Abraham kadagiti nasantuan a kasuratan kadagiti tallo nga annakna a lallaki, natakuatanda a narigat nga ilawlawag daytoy kadakuada. Inkeddengda kas pamilia nga adalen ti tunggal maysa kadakuada ti katulagan ni Abraham iti bukodda ket kalpasanna ibinglayda no ania ti nasarakanda.
“Naalami ti sumagmamano a makaay-ayo a komento,” kuna ni Greg. “Nasursuro ti anakmi nga agtawen iti walo a sigud nga Abram ti nagan ni Abraham. Nasukatan ti naganna iti Abraham gapu ta nangaramid iti kari iti Apo a mangsupring iti basol tapno agbiag iti nalinteg. Pudno a nasdaawak a kabaelanna ti mangparnuay iti dayta.”
Nasursuroda amin ti baro a maysa a banag ken adda napintas a panaglilinnawagda maipapan iti kaipapanan ti katulagan ni Abraham ken no ania ti kayat a sawen daytoy para kadagiti Santo iti Ud-udina nga Aldaw iti agdama.
“Sigud a mapankami no kua idi iti lawlaw ti siled ket agsisinnublatkami iti panagbasa kadagiti bersikulo iti nasantuan a kasuratan para iti sangapamiliaan a panagadalmi iti nasantuan a kasuratan,” kuna ni Nicky. TiUmaykayo, Sumurot Kaniak ket agpokus iti ad-adu pay a panangisuro babaen ti Espiritu. Ita no aggigiddankami nga agadal, mariknak a dagiti parikna manipud iti Espiritu a mangiturong kadagiti paglilinnawaganmi iti sabali a direksion ket maibatay kadagiti kasapulan ti pamiliami.
Ti panangusar iti Umaykayo, Sumurot Kaniak saan laeng a nangtulong iti pamiliada nga ad-adda a nakiraman ken naay-ayo iti sangapamiliaan a panagadal iti nasantuan a kasuratan, ngem nakatulong kada Greg ken Nicky nga agminister kadagiti naespirituan a kasapulan dagiti annakda.
“Tulongannak ti Umaykayo, Sumurot Kaniak a mangisuro kadagiti annakko,” kuna ni Nicky. “Daytoy pay ti mangtulong kaniak a mangsango iti nadumaduma a karit a mapaspasarak no dadduma kadagiti annakko. Ad-adda a mariknak ti pannakaitunos iti Espiritu, dumngegak a naas-asideg, ken nakaawatak kadagiti parikna iti no kasano a makatulongak iti tunggal ubing.”
Kaay-ayo ni Greg dagiti atitiddog a panaglilinnawag iti ebanghelio a pangtulongan ti Umaykayo, Sumurot Kaniak a mapadur-as iti pamilia. “Agduduma amin dagiti annakko a lallaki iti no kasano ti kadakkel ti pannakaammodan iti ebanghelio,” kunana.Ti “Umaykayo, Sumurot Kaniak nangted iti wagas tapno tulongantayo ti tunggal maysa kadakuada nga agsursuro a maibatay kadagiti kasapulanda. Ti panangkita kadakuada a dumur-asda iti ayatda iti ebanghelio ken panangsiput kadakuada a mangpattapatta no kasano a mayaplikarda ti pannakaammo iti ebanghelio iti biagda nagbalin a nakaskasdaaw a bendision.”
© 2020 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/19. Pannakaanamongna a maipatarus: 6/19. Panakaipatarus ti Ministering Principles, September 2020. Ilokano. 16724 864