“ການປະຕິບັດສາດສະໜາກິດຜ່ານທາງປຶ້ມ ຈົ່ງຕາມເຮົາມາ,” Liahona, ເດືອນກັນຍາ 2020
ຫລັກທຳຂອງການປະຕິບັດສາດສະໜາກິດ, ເດືອນກັນຍາ 2020
ການປະຕິບັດສາດສະໜາກິດຜ່ານທາງປຶ້ມ ຈົ່ງຕາມເຮົາມາ
ປຶ້ມ ຈົ່ງຕາມເຮົາມາ ຊ່ວຍທ່ານສ້າງຄວາມແຕກຕ່າງໃນຊີວິດຂອງຄົນອື່ນແນວໃດ?
ບໍ່ວ່າທ່ານຢູ່ກັບຄອບຄົວຂອງທ່ານຫລືບໍ່ກໍຕາມ, ໃນຫ້ອງຮຽນຂອງໂຮງຮຽນວັນອາທິດ ໃນຖານະຄູສອນ ຫລື ນັກຮຽນ, ຫລື ຢູ່ທີ່ໂຮງຮຽນ, ບ່ອນທຳງານ, ຫລື ໃນບາງບ່ອນອື່ນອີກ, ການສຶກສາພຣະຄຳພີຜ່ານທາງປຶ້ມ ຈົ່ງຕາມເຮົາມາ ຈະໃຫ້ໂອກາດຢ່າງຫລວງຫລາຍ ເພື່ອປະຕິບັດສາດສະໜາກິດຕໍ່ຄົນອື່ນ. ເຖິງຢ່າງໃດ, ການສິດສອນ, “ແມ່ນເກີນກວ່າການນຳພາການສົນທະນາໃນວັນອາທິດເທົ່ານັ້ນ; ມັນຮ່ວມດ້ວຍການປະຕິບັດສາດສະໜາກິດດ້ວຍຄວາມຮັກ ແລະ ການເປັນພອນໃຫ້ແກ່ຄົນອື່ນດ້ວຍພຣະກິດຕິຄຸນ.”1
ການຕິດຕໍ່ກັບນັກຮຽນ
ເມື່ອນາງ ໂອຟີເລຍ ເທຼໂຮ ເດ ຄາເດນາສ໌ ໄດ້ຖືກເອີ້ນໃຫ້ສິດສອນຜູ້ໃຫຍ່ໜຸ່ມ ຢູ່ໃນຫວອດເມືອງແມັກຊິໂກຂອງນາງ, ນາງຮູ້ສຶກວ່າ ການມີຄວາມສຳພັນທີ່ໃກ້ຊິດກັບນັກຮຽນໃນໂຮງຮຽນວັນອາທິດຂອງນາງ ຈະເພີ່ມຄວາມສາມາດຂອງນາງ ໃນການສິດສອນ ແລະ ເພີ່ມຄວາມເຂັ້ມແຂງໃຫ້ແກ່ເຂົາເຈົ້າ.
“ຖ້າຫາກຂ້ອຍບໍ່ມີຄວາມສຳພັນທີ່ໃກ້ຊິດກັບນັກຮຽນຂອງຂ້ອຍ ແລະ ຖ້າຫາກເຂົາເຈົ້າບໍ່ຮູ້ສຶກເຖິງຄວາມຮັກຂອງຂ້ອຍ, ແລ້ວເຂົາເຈົ້າອາດບໍ່ເຊື່ອຂ້ອຍ ຕອນຂ້ອຍສິດສອນຫ້ອງຮຽນ ຫລື ຕອນຂ້ອຍສະແດງປະຈັກພະຍານຂອງຂ້ອຍ,” ນາງເວົ້າ. “ເຂົາເຈົ້າອາດຮູ້ສຶກວ່າ ຂ້ອຍ ພຽງແຕ່ ເປັນຄູສອນໂຮງຮຽນວັນອາທິດເທົ່ານັ້ນ.”
ແຕ່ຊິດສະເຕີຄາເດນາສ໌ຈະພັດທະນາຄວາມສຳພັນເຊັ່ນນັ້ນໄດ້ແນວໃດ ຖ້າຫາກນາງສິດສອນພຽງແຕ່ເດືອນລະສອງເທື່ອເທົ່ານັ້ນ? ນາງພົບເຫັນຄຳຕອບຜ່ານທາງເທັກໂນໂລຈີ. ໂດຍການໃຊ້ແອພ WhatsApp ຢູ່ໃນມືຖື, ບໍ່ດົນ ນາງ ແລະ ນັກຮຽນຂອງນາງກໍໄດ້ຕິດຕໍ່ຫາກັນໃນແຕ່ລະວັນຜ່ານທາງການສົ່ງຂໍ້ຄວາມ ແລະ ການປະສຽງໄວ້ໃນມືຖື. ບັດນີ້, ທຸກມື້ກ່ອນບົດຮຽນໃນວັນອາທິດຕໍ່ໄປ, ນັກຮຽນຄົນໜຶ່ງຈະອາສາສະໝັກສົ່ງຂໍ້ພຣະຄຳພີໄປໃຫ້ເພື່ອນນັກຮຽນດ້ວຍກັນ ກ່ຽວກັບບົດຮຽນໃນອາທິດຕໍ່ໄປ ພ້ອມດ້ວຍຄວາມຄິດຄວາມເຫັນສ່ວນຕົວທີ່ກ່ຽວຂ້ອງ. ຫລັງຈາກໄດ້ອ່ານຂໍ້ພຣະຄຳພີ ແລະ ຄວາມຄິດຄວາມເຫັນແລ້ວ, ເພື່ອນນັກຮຽນກໍໄດ້ຕອບກັບໄປດ້ວຍຄວາມຄິດຄວາມເຫັນຂອງຕົນເອງ.
“ເມື່ອເຂົາເຈົ້າອ່ານຂໍ້ພຣະຄຳພີແລ້ວ, ເຂົາເຈົ້າໄດ້ສົ່ງຮູບຮອຍຍິ້ມກັບໄປ ເພື່ອໃຫ້ຂ້ອຍຮູ້ວ່າ ເຂົາເຈົ້າໄດ້ອ່ານ ຫລື ໄດ້ສຶກສາຂໍ້ພຣະຄຳພີ ແລະ ວ່າເຂົາເຈົ້າໄດ້ຄິດກ່ຽວກັບມັນ,” ຊິດສະເຕີຄາເດນາສ໌ເວົ້າ. ເມື່ອເຖິງເວລາສຳລັບບົດຮຽນໃນວັນອາທິດຕໍ່ໄປ, ພວກນັກຮຽນກໍກະກຽມຮຽບຮ້ອຍແລ້ວ.
ການຕິດຕໍ່ໃນແຕ່ລະວັນເມື່ອບໍ່ດົນມານີ້ ໄດ້ເປັນພອນໃຫ້ແກ່ຜູ້ໃຫຍ່ໜຸ່ມຄົນໜຶ່ງ ຜູ້ທີ່ພໍ່ແມ່ບໍ່ເຂັ້ມແຂງໃນສາດສະໜາຈັກ.
“ຂ້ອຍມັກຫລາຍເມື່ອຂ້ອຍເຫັນລາວມາໂບດ ເພາະຂ້ອຍຮູ້ວ່າ ກ່ອນຈະໄປເຖິງຈຸດນັ້ນ, ລາວຕ້ອງໄດ້ຜ່ານການທ້າທາຍຫລາຍຢ່າງ,” ຊິດສະເຕີຄາເດນາສ໌ເວົ້າ. “ຂ້ອຍແນ່ໃຈວ່າ ຂໍ້ພຣະຄຳພີ ແລະ ຄວາມຄິດຄວາມເຫັນ ທີ່ເພື່ອນນັກຮຽນສົ່ງໄປຫາລາວ ແລະ ຂໍ້ພຣະຄຳພີ ແລະ ຄວາມຄິດຄວາມເຫັນທີ່ລາວໄດ້ສົ່ງໃຫ້ເພື່ອນນັກຮຽນ ຕອນເຖິງຜຽນລາວ ໄດ້ເພີ່ມຄວາມເຂັ້ມແຂງໃຫ້ແກ່ລາວຫລາຍທີ່ສຸດ.”
ຊິດສະເຕີຄາເດນາສ໌ເວົ້າວ່າ ການປະຕິບັດສາດສະໜາກິດຜ່ານທາງພຣະຄຳພີ ບໍ່ໄດ້ຢຸດຢູ່ກັບບົດຮຽນໃນວັນອາທິດຂອງນາງ ແລະ ການສົ່ງຕໍ່ຂໍ້ພຣະຄຳພີຫາກັນໃນແຕ່ລະວັນ.
“ການກະກຽມຂອງຂ້ອຍແມ່ນຮ່ວມດ້ວຍການອະທິຖານເພື່ອນັກຮຽນຂອງຂ້ອຍ,” ນາງເວົ້າ. “ຂ້ອຍຄິດກ່ຽວກັບເຂົາເຈົ້າບໍ່ພຽງແຕ່ໃນວັນອາທິດເທົ່ານັ້ນ ແຕ່ທຸກວັນລະຫວ່າງອາທິດຄືກັນ. ເຂົາເຈົ້າແຕ່ລະຄົນມີຄວາມຕ້ອງການໃດໜຶ່ງໂດຍສະເພາະ ແລະ ແຕກຕ່າງກັນ. ແຕ່ລະຄົນເປັນລູກຂອງພຣະເຈົ້າ. ຂ້ອຍຄິດກ່ຽວກັບເຂົາເຈົ້າຂະນະທີ່ຂ້ອຍກະກຽມບົດຮຽນຂອງຂ້ອຍ.”
ແລະ ເມື່ອນາງສິດສອນ, ນາງຮັບຟັງ—ທັງນັກຮຽນ ແລະ ພຣະວິນຍານບໍລິສຸດ.
“ຄູສອນຄືພຣະວິນຍານ,” ຊຶ່ງນາງໄດ້ຍິນເລື້ອຍໆ ຈາກສຽງຂອງນັກຮຽນຂອງນາງ. “ຂ້ອຍຕ້ອງຕັ້ງໃຈຟັງ ເພາະວ່າສິ່ງທີ່ເຂົາເຈົ້າເວົ້າແມ່ນເຫັນໄດ້ວ່າ ພຣະວິນຍານໄດ້ມອບໃຫ້ເຂົາເຈົ້າ.”
ຫ້ອງຮຽນຂອງພວກເຮົາເປັນ “ຄືກັນກັບການສັງສັນໃນຕອນແລງ”
ນາງຄາລາ ກູເຕຍເລສ໌ ອໍເຕກາ ຄໍໂດບາ ຮູ້ສຶກໄດ້ຮັບພອນທີ່ໄດ້ເປັນສະມາຊິກໃນຫ້ອງຮຽນຂອງໂຮງຮຽນວັນອາທິດຂອງຊິດສະເຕີຄາເດນາສ໌ ເພາະວ່າມັນເປັນສະພາບແວດລ້ອມທີ່ໃຫ້ການລໍ່ລ້ຽງ ແລະ ການປະຕິບັດສາດສະໜາກິດ. ນາງຄາລາໃຫ້ເຫດຜົນຂອງສະພາບແວດລ້ອມນັ້ນວ່າເປັນເພາະປັດໃຈຫລາຍຢ່າງ, ລວມທັງ:
-
ການກະກຽມ: ການແບ່ງປັນຂໍ້ພຣະຄຳພີ ແລະ ຄວາມຄິດຄວາມເຫັນ ຊ່ວຍນັກຮຽນໃຫ້ກະກຽມສຳລັບຫ້ອງຮຽນເທື່ອຕໍ່ໄປ. “ຂໍ້ພຣະຄຳພີໄດ້ລໍ່ລ້ຽງ ແລະ ເພີ່ມຄວາມຮູ້ໃຫ້ພວກເຮົາທຸກວັນ,” ນາງອະທິບາຍ.
-
ການມີພາກສ່ວນ: “ພວກເຮົາທຸກຄົນເວົ້າລົມກັນ. ສິ່ງນີ້ຊ່ວຍຂ້ອຍໃຫ້ຮູ້ຈັກເພື່ອນນັກຮຽນຢ່າງເລິກຊຶ້ງ, ໃນຖານະໝູ່ເພື່ອນ ແລະ ອ້າຍເອື້ອຍນ້ອງກັນ.”
-
ຄວາມຮັກ: “ຊິດສະເຕີຄາເດນາສ໌ໄດ້ຈູງມືນຳພາພວກເຮົາໄປ. ຫ້ອງຮຽນຂອງພວກເຮົາຮູ້ສຶກຄືກັນກັບເປັນການສັງສັນໃນຕອນແລງ, ພ້ອມດ້ວຍອ້າຍເອື້ອຍນ້ອງຫລາຍຄົນ. ມັນພິເສດຫລາຍ.”
-
ພຣະວິນຍານບໍລິສຸດ: “ພວກເຮົາມີຄວາມຮູ້ສຶກທາງວິນຍານທີ່ສະໜຸກສະໜານ ແລະ ຖືກຕ້ອງປອງດອງກັນ ຢູ່ໃນຫ້ອງຮຽນຂອງພວກເຮົາ ເພາະວ່າພວກເຮົາສອດຄ່ອງກັບພຣະວິນຍານ.”
-
ປະຈັກພະຍານ: “ຈົ່ງຕາມເຮົາມາ ໄດ້ຊ່ວຍຂ້ອຍກຽມພ້ອມທີ່ຈະແບ່ງປັນປະຈັກພະຍານຂອງຂ້ອຍ. ຂ້ອຍມີຄວາມຮູ້ກ່ຽວກັບພຣະຄຳພີມໍມອນ ແລະ ພຣະຄຣິສຕະທຳຄຳພີຢ່າງເລິກຊຶ້ງ. ສິ່ງນັ້ນໄດ້ຊ່ວຍຂ້ອຍໃຫ້ແບ່ງປັນສິ່ງທີ່ຂ້ອຍກຳລັງຮຽນຮູ້ກັບເພື່ອນນັກຮຽນ ແລະ ຜູ້ຄົນຢູ່ທີ່ບ່ອນທຳງານ.”
ການປະຕິບັດສາດສະໜາກິດຕໍ່ຄວາມຕ້ອງການທາງວິນຍານ
ເມື່ອກະເຣກ ແລະ ນິກກີ້ ຄຣິສຕຽນເຊັນ, ຈາກລັດເຄັນທັກກີ້, ສະຫະລັດ, ໄດ້ອ່ານກ່ຽວກັບພັນທະສັນຍາຂອງອັບຣາຮາມຢູ່ໃນພຣະຄຳພີ ພ້ອມກັບລູກຊາຍສາມຄົນຂອງເຂົາເຈົ້າ, ເຂົາເຈົ້າໄດ້ພົບເຫັນວ່າ ເຂົາເຈົ້າບໍ່ຮູ້ຈັກຈະອະທິບາຍແນວໃດຕໍ່ລູກ. ເຂົາເຈົ້າໄດ້ຕັດສິນໃຈວ່າ ໃຫ້ແຕ່ລະຄົນສຶກສາພັນທະສັນຍາຂອງອັບຣາຮາມເປັນສ່ວນຕົວ ແລະ ແລ້ວໃຫ້ແບ່ງປັນສິ່ງທີ່ເຂົາເຈົ້າພົບເຫັນ.
“ພວກເຮົາໄດ້ຍິນຄວາມຄິດຄວາມເຫັນທີ່ໜ້າສົນໃຈ,” ກະເຣກເວົ້າ. “ລູກຊາຍຜູ້ອາຍຸແປດປີໄດ້ຮຽນຮູ້ວ່າ ອັບຣາຮາມເຄີຍມີຊື່ວ່າ ອັບຣາມ. ຊື່ເພິ່ນໄດ້ຖືກປ່ຽນເປັນອັບຣາຮາມ ເພາະວ່າເພິ່ນໄດ້ເຮັດຄຳໝັ້ນສັນຍາກັບພຣະຜູ້ເປັນເຈົ້າ ທີ່ຈະຫັນໜີຈາກບາບ ແລະ ດຳລົງຊີວິດຢ່າງຊອບທຳ. ຂ້ອຍປະຫລາດໃຈແທ້ໆທີ່ລາວຮູ້ຈັກແນວນັ້ນ.”
ທຸກຄົນກໍໄດ້ຮຽນຮູ້ບາງຢ່າງໃໝ່ໆ ແລະ ໄດ້ມີການສົນທະນາທີ່ດີກ່ຽວກັບຄວາມໝາຍຂອງພັນທະສັນຍາຂອງອັບຣາຮາມ ແລະ ມັນມີຄວາມໝາຍແນວໃດຕໍ່ໄພ່ພົນຍຸກສຸດທ້າຍໃນທຸກວັນນີ້.
“ແຕ່ກ່ອນພວກເຮົາພຽງແຕ່ປ່ຽນຜຽນກັນອ່ານຂໍ້ພຣະຄຳພີເທົ່ານັ້ນ ສຳລັບການສຶກສາພຣະຄຳພີເປັນຄອບຄົວ,” ນາງນິກກີ້ເວົ້າ. ປຶ້ມ “ຈົ່ງຕາມເຮົາມາ ເນັ້ນໃສ່ການສິດສອນໂດຍພຣະວິນຍານ. ບັດນີ້ເມື່ອພວກເຮົາສຶກສານຳກັນ, ຂ້ອຍຮູ້ສຶກຖືກກະຕຸ້ນຈາກພຣະວິນຍານໃຫ້ມີສ່ວນຮ່ວມໃນການສົນທະນາໃນທິດທາງທີ່ແຕກຕ່າງ ອີງຕາມຄວາມຕ້ອງການຂອງຄອບຄົວຂອງພວກເຮົາ.”
ການໃຊ້ປຶ້ມ ຈົ່ງຕາມເຮົາມາ ບໍ່ພຽງແຕ່ໄດ້ຊ່ວຍຄອບຄົວຂອງເຂົາເຈົ້າໃຫ້ມີພາກສ່ວນ ແລະ ສົນໃຈໃນການສຶກສາພຣະກິດຕິຄຸນເປັນຄອບຄົວເທົ່ານັ້ນ, ແຕ່ຍັງໄດ້ຊ່ວຍກະເຣກ ແລະ ນາງນິກກີ້ປະຕິບັດສາດສະໜາກິດຕໍ່ຄວາມຕ້ອງການທາງວິນຍານຂອງລູກໆຂອງເຂົາເຈົ້ານຳອີກ.
ປຶ້ມ “ຈົ່ງຕາມເຮົາມາ ຊ່ວຍຂ້ອຍສິດສອນລູກໆຂອງຂ້ອຍ,” ນາງນິກກີ້ເວົ້າ. “ມັນກໍຍັງຊ່ວຍຂ້ອຍໃຫ້ສາມາດປະເຊີນກັບການທ້າທາຍທີ່ແຕກຕ່າງກັນ ຊຶ່ງຂ້ອຍເຄີຍມີກັບລູກໆຂອງຂ້ອຍເປັນບາງຄັ້ງນຳອີກ. ຂ້ອຍຮູ້ສຶກເຂົ້າໃກ້ພຣະວິນຍານຫລາຍກວ່າເກົ່າ, ຂ້ອຍຮັບຟັງຢ່າງຕັ້ງໃຈຫລາຍກວ່າເກົ່າ, ແລະ ຂ້ອຍໄດ້ຮັບການກະຕຸ້ນເຖິງວິທີທີ່ຂ້ອຍສາມາດຊ່ວຍລູກແຕ່ລະຄົນ.”
ກະເຣກກໍມັກການສົນທະນາດົນໆເລື່ອງພຣະກິດຕິຄຸນ ທີ່ປຶ້ມ ຈົ່ງຕາມເຮົາມາ ຊ່ວຍຂະຫຍາຍຢູ່ໃນຄອບຄົວ. “ພວກລູກຊາຍຂອງພວກເຮົາ ແຕ່ລະຄົນກໍມີຄວາມຮູ້ໃນລະດັບທີ່ແຕກຕ່າງກັນເລື່ອງພຣະກິດຕິຄຸນ,” ລາວເວົ້າ. “ຈົ່ງຕາມເຮົາມາ ໄດ້ໃຫ້ວິທີສຳລັບພວກເຮົາທີ່ຈະຊ່ວຍເຂົາເຈົ້າແຕ່ລະຄົນໃຫ້ຮຽນຮູ້ ອີງຕາມຄວາມຕ້ອງການຂອງເຂົາເຈົ້າ. ການເຫັນເຂົາເຈົ້າເຕີບໂຕດ້ວຍຄວາມຮັກທີ່ມີຕໍ່ພຣະກິດຕິຄຸນ ແລະ ການເບິ່ງເຂົາເຈົ້າຊອກຫາວິທີທີ່ຈະນຳໃຊ້ຄວາມຮູ້ເລື່ອງພຣະກິດຕິຄຸນໃນຊີວິດຂອງເຂົາເຈົ້າ ໄດ້ເປັນພອນທີ່ປະເສີດຫລາຍ.”
© 2020 by Intellectual Reserve, Inc. All rights reserved. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/19. ການແປໄດ້ຮັບອະນຸຍາດ: 6/19. ແປຈາກ Ministering Principles, September 2020. Laotian. 16724 331