Kuhudumu kupitia Njoo, Unifuate

Ni kwa jinsi gani Njoo, Unifuate inaweza kukusaidia kuleta utofauti katika maisha ya wengine?

Iwe na familia yako, kwenye darasa la Shule ya Jumapili kama mwalimu au mwanafunzi, au shuleni, kazini, au pahali pengine, usomaji wa maandiko kupitia Njoo, Unifuate hutoa fursa za kutosha za kuwahudumia wengine. Kufundisha, hata hivyo, “ni zaidi ya kuongoza majadiliano siku ya Jumapili; kunahusisha kuhudumu kwa upendo na kuwabariki wengine kwa injili.”¹

Kuunganika na Wanafunzi

Wakati Ofelia Trejo de Cárdenas alipoitwa kufundisha vijana wakubwa kwenye kata yake katika Jiji la Mexico, alihisi kwamba kuwa na uhusiano wa karibu na kila mwanafunzi wake wa Shule ya Jumapili kungeongeza uwezo wake wa kuwafundisha na kuwaimarisha.

“Iwapo sitakuwa na uhusiano wa karibu na wanafunzi wangu na kama hawatahisi upendo wangu, huenda wasiniamini ninapofundisha darasa au kutoa ushuhuda wangu,” anasema. “Huenda wakahisi kwamba mimi ni mwalimu tu wa Shule ya Jumapili.”

Lakini Dada Cárdenas angewezaje kukuza uhusiano kama huo ikiwa alifundisha mara moja kila baada ya wiki mbili? Alipata jawabu kupitia teknolojia. Kwa kutumia programu ya WhatsApp, yeye na wanafunzi wake punde waliungana kila siku kupitia ujumbe wa arafa na sauti. Sasa, kila siku kabla ya somo linalofuata la Shule ya Jumapili, mtu wa kujitolea darasani hutuma kifungu cha andiko kwa washiriki wengine wa darasa kutoka kwenye somo hilo linalofuata na wazo binafsi linalohusiana. Baada ya kusoma andiko na wazo, washiriki wa darasa hujibu kwa mawazo yao.

“Wanaposoma andiko, wanatuma uso wenye furaha kwa hivyo najua wamesoma au kujifunza andiko hilo na kwamba wamewaza kulihusu,” anasema Dada Cárdenas. Inapofika wakati wa somo la Jumapili inayofuata, wanafunzi wanakuwa tayari kushiriki.

Hivi karibuni muunganiko huu wa kila siku ulimbariki kijana mmoja mkubwa ambaye wazazi wake hawashiriki kikamilifu Kanisani.

“Mimi hufurahia ninapomuona akija kanisani kwa sababu najua kwamba ili kufika hapo, ilimbidi kupitia changamoto kadhaa,” anasema Dada Cárdenas. “Nina uhakika kwamba maandiko na mawazo yaliyotumwa na washiriki wenzake wa darasa na maandiko na mawazo aliyoyatuma ilipokuwa zamu yake yamemuimarisha sana.”

Dada Cárdenas anasema kuhudumu kupitia maandiko hakuishii kwenye somo lake la Jumapili na muunganiko wa kimaandiko wa kila siku wa darasa lake.

“Matayarisho yangu huhusisha kuwaombea wanafunzi wangu,” anasema. “Mimi huwaza kuwahusu si Jumapili pekee bali kila siku ya wiki. Kila mmoja wao ana mahitaji maalum na tofauti. Kila mmoja ni mtoto wa Mungu. Mimi huwaza kuwahusu ninapotayarisha masomo yangu.”

Na anapofundisha, husikiliza—wanafunzi wake na Roho Mtakatifu.

“Mwalimu ni Roho,” ambaye yeye humsikia kila mara katika sauti za wanafunzi wake. “Ni lazima niwe msikivu kwani wayasemayo ni ufunuo wanaopewa na Roho.”

Darasa letu Ni “Kama Jioni ya Nyumbani”

Carla Gutiérrez Ortega Córdoba anahishi kubarikiwa kuwa mshiriki wa darasa la Shule ya Jumapili la Dada Cárdenas kwa sababu ya mazingira yake ya malezi na kuhudumu. Carla anahusisha mazingira hayo na sababu kadhaa, zikiwemo:

Matayarisho: Kushiriki maandiko na mawazo huwasaidia wanafunzi kujitayarisha kwa ajili ya darasa linalofuata. “Maandiko ya kila siku hutupatia lishe na kupanua uelewa wetu,” anaeleza.
Ushiriki: “Sisi sote huzungumza. Hii huniruhusu kuwajua wenzangu darasani kwa kina zaidi, kama marafiki na kama kaka na dada.”
Upendo: “Dada Cárdenas anakushika kwa mkono. Darasa letu huwa kama jioni ya nyumbani, likiwa na akina kaka na akina dada kadhaa. Ni la kipekee sana.”
Roho Mtakatifu: “Tuna roho wa kupendeza na mwenye kuleta umoja darasani kwetu kwa sababu tuko pamoja na Roho.”
Ushuhuda: “Njoo, Unifuate imenisaidia kuwa tayari kushiriki ushuhuda wangu. Nina uelewa wa kina wa kitabu cha Mormoni na Biblia. Hilo huniruhusu kushiriki ninayoyasoma na wanadarasa wenzangu shuleni na watu kazini.”

Kuhudumia Mahitaji ya Kiroho

Wakati Greg na Nicky Christensen, kutoka Kentucky, Marekani, waliposoma kuhusu agano la Ibrahimu katika maandiko pamoja na wana wao watatu, walipata ugumu kuwaelezea. Waliamua kama familia kwamba kila mmoja wao angejifunza kuhusu agano la Ibrahimu kila mtu kibinafsi na kisha kushiriki kile walichopata.

“Tulipata maoni kadhaa ya kusisimua,” Greg anasema. “Mwana wetu mwenye umri wa miaka minane alijifunza kwamba Jina la Ibrahimu lilikuwa Abramu hapo awali. Jina lake lilibadilika kuwa Ibrahimu kwa sababu alifanya ahadi kwa Bwana kugeuka kutoka dhambini na kuishi maisha ya uadilifu. Nilishangaa sana kwamba aliweza kulipata hilo.”

Wote walijifunza kitu kipya na tukawa na majadiliano mazuri kuhusu agano la Ibrahimu ni nini na kile linachomaanisha kwa Watakatifu wa Siku za Mwisho leo.

“Tulikuwa tumezoea kuzunguka kwenye chumba na kufanya zamu kusoma vifungu vya maandiko kwa masomo yetu ya maandiko ya kifamilia,” Nicky anasema. “Njoo, Unifuate imelenga zaidi kwenye kufundisha kwa Roho. Sasa tunapojifunza pamoja, mimi huhisi miguso midogo kutoka kwa Roho kupeleka majadiliano yetu katika mwelekeo tofauti kulingana na mahitaji ya familia yetu.”

Kutumia Njoo, Unifuate si tu kumesaidia familia yao kuwa wenye kujihusisha na wenye kuvutiwa katika kujifunza injili kifamilia, bali pia kumewasaidia Greg na Nicky kuhudumia mahitaji ya kiroho ya watoto wao.

“Njoo, Unifuate hunisaidia kufundisha watoto wangu,” Nicky anasema. “Pia hunisaidia kushughulikia changamoto tofauti tofauti ninazokuwa nazo wakati mwingine pamoja na watoto wangu. Najihisi mwenye kuenenda sawa zaidi na Roho, ninasikiliza kwa ukaribu zaidi, na nimepokea mwongozo wa kiungu kuhusu jinsi ninavyoweza kumsaidia kila mtoto.”

Greg hufurahia majadiliano marefu ya injili ambayo Njoo, Unifuate husaidia kuzalisha katika familia. “Wana wetu wote wako tofauti katika mahali gani wapo kwenye uelewa wao wa injili,” anasema. “Njoo, Unifuate imetoa njia kwetu kusaidia kila mmoja wao kujifunza kulingana na mahitaji yao. Kuwaona wakikua katika kupenda kwao injili na kuwatazama wakifikiria jinsi wanavyoweza kutekeleza uelewa wao wa injili katika maisha yao kumekuwa baraka ya kupendeza.”

© 2020 na Intellectual Reserve, Inc. Haki zote zimehifadhiwa. Imepigwa chapa Marekani. Idhini ya Kiingereza: 6/19. Idhini ya kutafsiri: 6/19. Tafsiri ya Ministering Principles, September 2020. Swahili. 16724 743