Valaau Tamā
Afai ou te vilia malosi, na manatu ai Yu, e mafai ona ou taunuu i le fale a o lei lolovaia ia magaala.
“Ia fiafia o le a taitaia outou i le ala” (Mataupu Faavae ma Feagaiga 78:18).
Sa laa ese Yu mai se aoga tumaoti i le alasavali pisi. Sa tumu lona ulu i mea tau matematika mai lana vasega o le aoga afiafi. Sa faanatinati ane tagata ma o latou faamalu. Sa vave le toulu ifo o mataua lapopoa o le timu ma sa lolovaia le magaala.
Sa laa ane foi i ona autafa le uo a Yu, o Lin. “E tatau ona valaau lou tama e sau e piki atu oe,” o le tala lea a Lin. “Fai mai Mr. Zhang o la ua tatafe ni vaega o le aai.”
“E mafai ona ou alu lava au i le fale.”
“Ae sei vaai atu i vai uma na!”. Sa fai atu ai Lin ma tusi atu i le vai ua tatafe mai i le alavai.
Mo sina taimi, sa i ai se lagona mālie ia Yu. Mata e sa’o Lin? Atonu ua tatau ona ia valaau i lona Tamā e momoli ia i le fale a o lei tatafe magaala. Ae sa fai le la feupuaiga ma lona Tamā anapo, ma o la lava sa ita Yu. Sa le’i manao o ia e fai i lona Tamā mo se fesoasoani.
Sa tatala e Yu lana uila ma faatofa loa ia Lin. Afai ou te vili malosi, na manatu ai o ia, e mafai ona ou taunuu i le fale a o lei lolovaia ia magaala.,
Sa ia vili malosi, ae e lei umi ae maluluina ona lima, sa susū pala ona ofu, ma sa vaivai o ia. Sa toe oo mai le manatu e valaau Tamā. Pe mai le Agaga Paia lea lagona? Sa fai atu ia faifeautalai ia na papatisoina o ia, e mafai ona avea le Agaga Paia ma ona taiala. Sa sioa a’e Yu i le lagi. Sa matua aupouli ma sa ia le iloa atu tumutumu o fale. Ae sa ia le fiafia pea lava i lona Tamā.
Sa le amanaiaina e Yu le lagona ma vili pea. Sa oo ina maualuga tele le vai ma sa tapunia e le au faioloa o latou faleoloa. Sa la’u e tagata a latou meatotino i falealuga e maualuluga atu. Sa iloa atu e Yu se tina o tulei atu lana fanau e toalua i le lolo i totonu o se tama’i vaa pa’u.
Ona ua i luga a’e o ona tapuvae le vai, ua le toe mafai ai e Yu ona vili lana uila. Sa oso ifo i lalo ma tulei. Atonu ua tuai tele ona valaau i lona tamā i le taimi nei, ma o loo timu pea lava. Sa pāpā faititili ma feemo uila i ona luga a’e. Sa lagona e Yu le fefe. Ma sa matua lelava o ia! Sa ia tilotilo atu i luma. Sa mamao lava le fale. Sa le tatau ona ia le amanaiaina le Agaga Paia ona o se feupuaiga faavalevalea.
Sa tu o ia Yu e fai sina tatalo puupuu. Sa le mafai ona ia lagona lona leo i le mamafa o timuga ma faititili, ae sa ia iloaina e mafai ona lagona mai o ia e le Tama Faalelagi.
“Le Tama Faalelagi,” na tatalo ai Yu. “Faamolemole fesoasoani mai ia te au ia ou taunuu saogalemu i le fale.” Ina ua uma, sa ia lagonaina ua lava le malosi e faaauau ai pea.
Na iu, ina mafai e Yu ona vaaia lona fale i luga o le mati’e. I le malulu, lelavā, ma na misi se seevae, sa faataupepe atu ai Yu i luga o le mati’e. Sa ia vaaia Tamā o faatalitali mai mo ia i fafo. Sa faatopetope ane Tamā e faafetaia’i ia te ia, ma āsaāsa atu i le vai a o ia tamo’e.
Ina ua pa’i atu Tamā ia te ia, sa ia opo atu ia Yu. “Sa ou matuai popole lava!” Na fai atu ai Tama. “Sa tatau ona e valaau mai ia te au!”
“Faapea lava a’u sa ta taufai ita le tasi i le isi,” na fai atu ai Yu.
“E le taitai lava ona ou ita tele e le mafai ai ona ou fesoasoani atu ia te oe,” na fai mai ai Tamā. Ona ia aveina lea o le uila a Yu ma tulei i le vaega uma na totoe o le ala i luga o le mati’e.
E ui i faititili sa laulogo i le va o fale uumi ma timuga mamafa sa pasasa i lalo, ae sa faatumuina lava le loto o Yu i se lagona mafanafana. Sa ia lagonaina le filemu ma le saogalemu ao ia mulimuli atu i lona Tamā i le fale.