Foto’s deur Tom Garner, Isaac Darko-Acheampong, Alexander K. Boateng, en Jonas Rebicki

Beginsels van Bediening, Oktober 2020

Bediening deur die Kinder- en Jeugprogram

Om andere uit te nooi om te groei en hulle op die weg te help is die kern van bediening.

Daar is volop geleenthede om te dien deur die Kinder- en Jeugprogram. Jy mag dalk kinders of jeug van jou eie by die huis hê. Jy mag dalk ʼn leier in die program wees of families met kinders en jeug dien. Of dalk ken jy kinders en jeug (dit behoort omtrent almal van ons te dek). Wat ook al jou situasie mag wees, daar is baie maniere om hierdie program of sy beginsels te gebruik om die lewens van ander te seën.

Om Onsself Saam te Ontwikkel

Die kern van Kinders en Jeug is ʼn fokus om elke dag te probeer om meer soos die Saligmaker te word, wat perfek gedien het. Baie van diegene wat deelgeneem het aan die program, het geleer dat hoe meer jy in verskillende areas van jou lewe vorder, hoe beter is jy toegerus om ander te help of te dien.

Maar met die Kinder- en Jeugprogram hoef jy nie te wag totdat jy iets geleer het voordat jy ander seën nie. Om te leer, bied self geleenthede om te dien.

Vir ʼn jong man met die naam Prophet wat in Ghana woon, was die stel van die doel in Kinders en Jeug om te leer hoe om klavier te speel, net die begin. “Dit is my doel om ook ander mense te help om te weet wat ek leer,” sê Prophet.

Selfs al is hy nog nie ʼn instrukteur nie, het sy doel alreeds gegroei tot iets baie groter as wat hy ooit kon dink. Daar is nou 50 studente wat musieklesse saam met Prophet by die kerk neem. En presies wie leer vir Prophet en daardie ander 50 studente? Alexander M. en Kelvin M., beide 13 jaar oud. “Ons wil gebare van goedhartigheid aan ander mense betoon,” sê Kelvin.

Die twee jongmans gee drie dae per week basiese klavierlesse gratis vir almal wat kom om te leer. Daar was ʼn bykomende voordeel tot die klavierlesse. Verskeie van die studente wat deur die klavierlesse aan die Kerk voorgestel is, het later die evangelie bestudeer en besluit om gedoop te word.

Soos ons moeite doen om onsself te verbeter, kan ons ander dien deur hulle te nooi om by ons aan te sluit.

ʼn Wenresep vir Bediening

As ʼn Pen-primêre Organisasie President, het Sabrina Simões Deus Augusto van Curitiba, Brasilië, gesien hoe die persoonlike ontwikkelingsaspekte van die program die kinders en jeug in haar pen seën. Maar sy het ook baie maniere gesien om dít wat sy geleer het oor persoonlike ontwikkeling in haar opdrag as ʼn bedieningsuster te gebruik.

“Wanneer ek ʼn talent ontwikkel,” sê Suster Augusto, “kan ek daardie talent gebruik om iemand wat ek dien, te seën.”

Suster Augusto het een van die susters wat aan haar toegewys is, geleer hoe om sjokolade truffels te maak. Daardie suster maak en verkoop nou truffels om haar familie se inkomste aan te vul. “Maande later is ek geseën toe ʼn ander suster my geleer het hoe om heuningbrood te maak wat ek kon verkoop,” het Suster Augusto gesê. “Die ontwikkeling en deel van ons talente kan ons lewens seën en ons verhoudinge as bedieningsusters verdiep.”

© 2020 deur Intellectual Reserve, Inc. All rights reserved. Printed in USA. Engelse goedkeuring: 6/19. Vertalingsgoedkeuring: 6/19. Vertaling van Ministering Principles, October 2020. Afrikaans. 16725 501

Hoe kan die Kinder- en Jeugprogram Jou Help om te Dien?

1. Nooi andere om deel te neem aan die Kinder- en Jeugprogram.

   Jy kan die families van jeug en kinders wat jy dien, nooi om deel te neem aan die Kinder- en Jeugprogram. Hulle mag geïnteresseerd wees om deel te neem aan die aktiwiteite, persoonlike ontwikkeling, of selfs die evangeliese studie-aspekte van die program. (Vir meer inligting oor bediening deur Come, Follow Me, sien “Bediening deur Come, Follow Me,” in die September 2020 Liahona.)

2. Steun hulle doelstellings.

   As ʼn bedieningsbroer of -suster vir families met jeug, is jy in ʼn natuurlike posisie om die doelstellings waaraan hulle mag werk in Kinders en Jeug, te ondersteun. Terwyl hulle doelstellings persoonlik is, kan jy aanbied om te help op ʼn verskeidenheid maniere as jy weet waarin hulle belangstel. Dit kan wees in die vorm van om die kunsvoorrade te vind waarna hulle soek, om te dien as ʼn beoordelaar vir koekies wat hulle bak, of om ʼn mentor te word in ʼn area waar jy kennis het. Weet jy hoe om ʼn motor se olie te ruil? Geskeurde klere reg te maak? Is jy ʼn kundige op die gebied van onderhoudvoering vir werk? Jy kan aanbied om jou kennis of vaardighede te deel as hulle belangstel.

3. Nooi ander om deel te wees van jou eie persoonlike ontwikkeling.

   Persoonlike ontwikkeling is nie gereserveer vir kinders en jeug nie. Jy kan self aan die program deelneem, maak nie saak hoe oud jy is nie. Soos jy tyd spandeer om die geestelike, sosiale, fisiese, en intellektuele areas van jou lewe te verbeter, sal jy beter voorbereid wees om andere te dien, maak nie saak wie jy ontmoet nie. En soos Prophet in Ghana, kan jy andere seën deur hulle te nooi om saam met jou deel te neem, of dit nou is om klavierlesse te organiseer, na ʼn oefenklas te gaan, of saam ʼn taal aan te leer.

4. Maak bediening ʼn doel.

   Oorweeg dit om elke dag tyd te wy aan bediening. Dit kan wees om ʼn teksboodskap te stuur of in te loer om te sien hoe dit gaan of om ʼn geselligheid te reël. Dit kan insluit om tyd te neem om diegene wat jy dien se verjaarsdae op jou kalender aan te teken of om hulle op sosiale media te volg om uit te vind waarin hulle belangstel of wat hulle onlangs mee besig was. Om net vyf minute te neem om oor iemand anders se behoeftes te dink kan lei tot geïnspireerde idees wat ʼn verskil kan maak.

Een vir Een

“ʼn Kenmerk van die Here se ware en lewende Kerk sal altyd ʼn georganiseerde, doelgerigte poging wees om die kinders van God en hulle families individueel te dien. Omdat dit sy Kerk is, sal ons as sy dienaars die een dien, net soos Hy gedoen het.”

President Russell M. Nelson, “Bediening deur die Mag en Gesag van God,” Liahona, Mei 2018, 69.