Ekkewe Nongonongen Iamwir

Sasing seni Tom Garner, Isaac Darko-Acheampong, Alexander K. Boateng, me Jonas Rebicki

Ekkewe Nongonongen Iamwir, October 2020

Iamwir seni ewe Prokramin Semirit me Serafo

Etiwa ekkoch repwe marita me akkanisir ina ewe auchean iamwir.

Tufich mi chommong fan iten iamwir seni ewe prokramin Semirit me Serafo. Menip epwe pwisin wor noum semirit ika serafo non imwom. Menip en emon sou emwen non ewe prokram ika en mi iamwir ngeni famini mi wor nour semirit me serafo. Are menip en mi fen sinei ekkoch semirit me serafo (epwe fen ounusa kich meinisin). Met chok nonnomum, mi wor chommong anen ach sipwe aea ewe prokram ika nongonongun kewe ne efeiochu manauen ekkoch.

Amarifengeni Kich

Met akon auchea ngeni ekkewe Semirit me Serafo ina ew mettoch repwe achocho ngeni iteiten ran repwe winiti usun ewe Chon Amanau, ewe a unusoch ne iamwir. Chommong me nein ekkewe ra fen fiti ei prokram ra fen kaeo pwe ren om mamarita non ekkoch kikininin manauom, epwe amwonnafichuk ne anisi ika iamwir ngeni ekkoch.

Nge ren ewe Prokramin Semirit me Serafo, om efeiochu ekkoch esap witiwitino tori om kopwe kaeo och mettoch. Ewe fofforun kaeo pwisin a awora tufich ne iamwir.

Ren emon anuon itan Prophet a nonnom non Ghana, an forata ewe kokkot non ewe prokramin Semirit me Serafo an epwe kaeo etikin ewe piano ina chok nepoputan. “Ina ai kokkot pwe upwe pwan anisi ekkoch aramas repwe sinei met ua kaeo,” Prophet a apasa.

Inamo ika ese mwo emon chon kait, an kokkot a fen watteno nap seni an aneanei. Iei a wor 50 chon kaeo fiti fengen me Prophet ne fiti klasin kaeo piano non ewe imwen mwich. Iwe ion chok ewe a aiti Prophet me ekkewe ekkoch 50 chon kaeo? Alexander M. and Kelvin M., ir me ruemon ier 13. “Aua mochen pwari fofforun kirekiroch ngeni ekkoch aramas,” Kelvin a apasa.

Unungat ran non ew wiik ekkewe ruemon serafo ra kait nesenin piano mi mecheres ese kamo ngeni meinisin ekkewe ra feito repwe kaeo. A fen pwan wor kapachetan tufich ngeni ekkewe nesenin piano. Ekkoch me nein ekkewe chon kaeo ra sinei usun ewe Mwichefen seni ekkewe nesenin piano mwirin ra kaeo ewe kapas allim me finata pwe repwe papatais.

Nupwen sia achocho ne aochu met sia sinei, sia tongeni iamwir ngeni ekkoch ren ach etiwer repwe fiti kich.

Ew Kokkot mi Murino ngeni Iamwir.

Ren wisan we Presetenin Kinter non an we steik, Sabrina Simões Deus Augusto seni Curitiba, Brazil, a fen kuna ifa usun ewe kotun pwisin mamarita ren ewe prokram a efeiochu ekkewe semirit me serafo non an we steik. Nge a pwan kuna chommong anen an epwe aea met a kaeo usun kotun pwisin mamarita non wisan we ren pekin fefin chon iamwir.

“Nupwen a wor ai sinenap,” Sister Augusto a apasa, “Ua tongeni aea ena sinenap ne efeiochu emon ua iamwir ngeni.”

Sister Augusto a aiti emon ekkewe sister i mi ewis ngeni an epwe eiti forun foun chokonet. Ena sister iei a for me amomo ekkewe foun chokonet an epwe awora mwonien tonong ngeni an famini. “Ekkoch maram mwirin, ua feioch nupwen pwan emon sister a aitiei usun forun pinewa mi for seni punech pwe upwe tongeni amomo,” Sister Augusto a apasa. “Ach amari me aea ach sinei a tongeni efeiochu manauen ekkoch me anapano nefinach ren fefin chon iamwir.”

© 2020 seni Intellectual Reserve, Inc. Meinisin pung mi kawor. A för non Merika. Kapungunon non fosun Merika: 6/19. Kapungunon chiakun: 6/19. Chiakun Ministering Principles, October 2019.Chuukese.16725 901

Ifa usun ewe Prokramin Semirit me Serafo a Tongeni Anisuk ne Iamwir?

1. Etiwa ekkoch repwe fiti ewe prokramin Semirit me Serafo.

   En mi tongeni etiwa faminien serafo me semirit ka iamwir ngenir ar repwe fiti ewe prokramin Semirit me Serafo. Menip repwe mochen fiti ekkewe urumot, kotun pwisin mamarita, are fen prokramin mwokutun kaeon ewe kapas allim. (Ren pwan ekkoch porous usun iamwir seni Feito, Tapweto Mwiri, nengeni “Ministering through Come, Follow Me,” non ewe September 2020 Liahona.)

2. Anisi ar kokkot.

   Ren wisemi mwan me fefin chon iamwir ngeni famini mi wor nour serafo, oua fen nenioch ami oupwe anisi ekkewe kokkot repwe angang ngeni non ewe prokram Semirit me Serafo. Nupwen ekkewe kokkot repwe pwisin ar, ika en mi sinei met ra mwasangasang non, en mi tongeni finata kopwe aninis non sokopaten napanap. Menip epwe non ewe napanap ren om kopwe kutta ekkewe pisekin chunga ra kukkuta, wisen chon emissi ekkewe kukis ra fori, ika winiti emon chon emwen ikewe a wor om sinenap non. En mi sinei ifa usun om kopwe siwini ewe oin non efoch taraku? Epinnasa uf mi kamw? En emon mi sinenap ne interfiu ren ekkoch angang? En mi tongeni finata om kopwe aea om sinei ika angangoch ika ir mi mochen.

3. Tingorei ekkoch repwe eu kinikinin pwisin amamaritan manauom.

   Kotun pwisin mamarita ese keimuno chok fan iten semirit me serafo. En mi tongeni pwisin fiti ewe prokram ese nifinifin ierum. Nupwen ka awora fansoun om kopwe emurinonoi ekkoch kinikinin pekin manauom ren non pekin ngun, pekin aramas, pekin inis, me tipachem, kopwe kuna pwe kopwe mwonefich ne iamwir ngeni ekkoch, ese nifinifin ion ka churi. Me usun chok Prophet non Ghana, en mi tongeni efeiochu ekkoch ren om etiwer repwe fituk, ika kopwe ota nesenin piano, no ngeni klasin taiso, ika kaeo fengen kapasen ekis.

4. Fori iamwir pwe ew kokkot kopwe fori.

   Ekieki om kopwe awora fansoun iteiten ran fan iten iamwir. Mi tongeni ren om kopwe tinano ew text ika kouno chok ren imwer om kopwe kuna ifa usun mettoch ika ota oupwe chufengen. Meni epwe pachenong fansoun kopwe ota ewe pwinin maram ren uputiwen ekkewe ka iamwir ngenir ika fiti wor social media om kopwe kuna met ra mwasangasang non ika met ra foffori non ekkewe ran. Om chok awora nimu minich ne ekieki usun met mi auchea ngeni emon a tongeni emweni ngeni ekiek seni ewe ngun ekkewe mi tongeni aochueno mettoch.

Emon me Emon

“Ew esisinen an ewe Samon ennetin Mwichefen mi manau epwe chok soun tettenoch, mwokutukutun emwen ne iamwir ngeni emon me emon noun Kot semirit me ar famini. Pokiten ina an Mwichefen, kich Noun chon angang sipwe iamwir ngeni ewe emon, usun chok I a fori.”

Preseten Russell M. Nelson, “Ministering with the Power and Authority of God,” Liaona, May 2018, 69.