Ritratti minn Tom Garner, Isaac Darko-Acheampong, Alexander K. Boateng, u Jonas Rebicki

Prinċipji tal-Ministeru, Ottubru 2020

Nimministraw permezz tal-Programm Tfal u Żgħażagħ

Li nistiednu lil ħaddieħor biex jikber u li nibqgħu ngħinuh tul il-vjaġġ tiegħu hi l-essenza vera tal-ministeru.

Jeżistu bosta opportunitajiet kif aħna nistgħu nimministraw permezz tal-Programm Tfal u Żgħażagħ. Jista’ jkun li intom stess għandkom tfal jew żgħażagħ ġewwa darkom. Jista’ jkun li inti mexxej fil-programm jew wieħed li timministra lil familji bi tfal u żgħażagħ. Jew forsi inzertajt li taf lil xi tfal u żgħażagħ (xi ħaġa li tapplika kważi għalina lkoll). Hi x’inhi s-sitwazzjoni tiegħek, hemm diversi modi kif tista’ tuża l-programm jew il-prinċipji tiegħu biex tbierek lill-ħajja ta’ ħaddieħor.

Niżviluppaw Lilna Nfusna Flimkien

Fil-qalba tal-programm Tfal u Żgħażagħ hemm l-idea li kuljum nippruvaw insiru nixbhu aktar lis-Salvatur, li mministra b’mod perfett. Ħafna minn dawk li ħadu sehem fil-programm tgħallmu li, aktar ma inti tavvanza f’diversi oqsma ta’ ħajtek, aktar tkun preparat biex tgħin u timministra lil ħaddieħor.

Iżda bil-programm Tfal u Żgħażagħ, li tbierek lil ħaddieħor m’hemmx għalfejn toqgħod tistenna sakemm titgħallem xi ħaġa. L-att tat-tagħlim innifsu jipprovdi opportunitajiet biex timministra.

Għal wieħed żagħżugħ jismu Prophet li jgħix ġewwa l-Gana, li jfassal l-għan li hemm fit-Tfal u Żgħażagħ li jitgħallem idoqq il-pjanu kien biss il-bidu. “L-għan tiegħi hu li ngħin ukoll lil ħaddieħor isir jaf dak li qed nitgħallem jien,” qal Prophet.

Minkejja li hu għadu mhuwiex għalliem, l-għan tiegħu diġà żviluppa f’xi ħaġa ferm akbar milli qatt immaġina. Flimkien ma’ Prophet issa hemm 50 student ieħor jattendu l-lezzjonijiet tal-pjanu fid-dar tal-laqgħat. U min qed jgħallem lil Prophet u lil dawk il-50 student ieħor? Alexander M. u Kelvin M., li t-tnejn għandhom 13-il sena. “Nixtiequ nuru għemejjel twajba ma’ ħaddieħor,” qal Kevin.

Tliet darbiet fil-ġimgħa ż-żewġ żgħażagħ jgħallmu l-lezzjonijiet tal-pjanu b’xejn lil dawk li jmorru biex jitgħallmu. Kien hemm benefiċċju ieħor għal-lezzjonijiet tal-pjanu. Bosta mill-istudenti li ġew f’kuntatt mal-Knisja permezz tal-lezzjonijiet tal-pjanu aktar tard studjaw l-evanġelju u ddeċidew li jitgħammdu.

Hekk kif nagħmlu sforz li ntejbu lilna nfusna, aħna nistgħu nimministraw lil ħaddieħor billi nistednuhom biex jingħaqdu magħna.

Riċetta Rebbieħa għall-Ministeru

Bħala presidenza tal-Primarja tal-wited, Sabrina Simões Deus Augusto minn Curitiba, il-Brażil, rat b’għajnejha stess kif l-aspett tal-iżvilupp personali tal-programm bierek lit-tfal u ż-żgħażagħ fil-wited tagħha. Iżda hi rat ukoll ħafna modi kif setgħet tuża dak li tgħallmet dwar l-iżvilupp personali fil-ħidma tagħha bħala oħt li timministra.

“Meta jien niżviluppa xi talent,” qalet Sister Augusto, “jien nista’ nuża dak it-talent biex inbierek lil xi persuna li nkun qed nimministralha.”

Sister Augusto għallmet lil waħda mill-aħwa li kienet assenjata lilha kif tagħmel it-tartuf taċ-ċikkulata. Dik l-oħt issa tagħmel u tbigħ it-tartuf biex taqla’ xi ħaġa żejda għall-familja. “Xhur wara, jiena ġejt imbierka meta oħt oħra għallmitni nagħmel il-ħobż tal-għasel biex inkun nista’ nbigħu,” qalet Sister Augusto. “Li niżviluppaw u naqsmu t-talenti tagħna jista’ jbierek il-ħajja tagħna lkoll u jsaħħaħ ir-relazzjonijiet tagħna bħala aħwa li nimministraw.”

© 2020 minn Intellectual Reserve, Inc. All rights reserved. Printed in USA. Approvazzjoni bl-Ingliż: 6/19. Approvazzjoni tat-traduzzjoni: 6/19. Traduzzjoni ta’ Ministering Principles, October 2020. Language. 16725 159

Kif Jista’ Jgħinek Timministra l-Programm Tfal u Żgħażagħ?

1. Stieden oħrajn biex jipparteċipaw fil-programm Tfal u Żgħażagħ.

   Int tista’ tistieden lill-familji taż-żgħażagħ u t-tfal li lilhom timministra biex jipparteċipaw fil-programm Tfal u Żgħażagħ. Huma jafu jkunu interessati biex jipparteċipaw fl-attivitajiet, fl-iżvilupp personali, jew saħansitra fl-aspetti tal-istudju tal-evanġelju tal-programm. (Għal aktar informazzjoni dwar il-ministeru permezz ta’ Come, Follow Me, ara “Nimministraw permezz ta’ Come, Follow Me,” fil-Liahona ta’ Settembru 2020.)

2. Issapportja l-għanijiet tagħhom.

   Bħala persuna li timministra lil familji biż-żgħażagħ, inti tinsab f’pożizzjoni li tissapportja l-għanijiet li huma jafu qed jaħdmu dwarhom fit-Tfal u Żgħażagħ. Filwaqt li l-għanijiet tagħhom huma xi ħaġa personali, jekk inti tkun taf fiex huma interessati, tkun tista’ toffri l-għajnuna tiegħek b’diversi modi. Dan jaf ifisser li ssibilhom il-materjal tal-arti li qegħdin ifittxu, li dduq il-gallettini li jkunu għadhom kif sajru, jew li tiggwidahom f’xi qasam li taf sew dwaru. Inti taf tibdel iż-żejt ta’ karozza? Issewwi l-ħwejjeġ imqattgħin? Inti espert dwar kif tintervista persuna għal xi mpjieg? Inti tista’ toffri li taqsam magħhom xi għarfien jew ħila li għandek jekk huma jkunu interessati fihom.

3. Stieden lil oħrajn biex ikunu parti mill-iżvilupp personali tiegħek.

   L-iżvilupp personali mhuwiex riservat biss għat-tfal u ż-żgħażagħ. Inti tista’ tipparteċipa inti stess fil-programm, hi x’inhi l-età tiegħek. Hekk kif tgħaddi ħin ittejjeb l-oqsma spiritwali, soċjali, fiżiċi, u intelletwali ta’ ħajtek, inti tkun preparat aħjar biex timministra lill-individwi, tiltaqa’ ma’ min tiltaqa’. U bħal Prophet ġewwa l-Gana, inti tista’ tbierek lill-oħrajn billi tistedinhom biex jipparteċipaw miegħek, kemm jekk biex torganizzaw il-lezzjonijiet tal-pjanu, kemm jekk biex tattendu xi klassi għal xi eżerċizzju fiżiku, jew anki biex titgħallmu xi lingwa ġdida flimkien.

4. Agħmel il-ministeru wieħed mill-għanijiet tiegħek.

   Ikkunsidra li tqatta’ ftit ħin kuljum għall-ministeru. Dan jaf ifisser li tibgħat xi messaġġ jew tieqaf għand xi ħadd biex tara jekk hux kollox sew jew biex tiftiehmu ħalli tiltaqgħu flimkien. Dan jaf ifisser ukoll li tgħaddi ħin timmarka għeluq snin dawk li lilhom timministra jew issegwihom fuq il-midja soċjali biex tara x’inhuma l-interessi tagħhom jew kif inhuma bħalissa. Li sempliċiment tiddedika ħames minuti biex taħseb ftit dwar x’għandu bżonn ħaddieħor jaf iwassal għal ċerti ideat ispirati li jafu jagħmlu differenza.

Persuna wara Persuna

“Karatteristika ewlenija tal-Knisja vera u ħajja tal-Mulej dejjem se tkun l-isforz organizzat u dirett tagħna li nimministraw lill-ulied individwali ta’ Alla u lill-familji tagħhom. Peress li din hija l-Knisja Tiegħu, aħna bħala l-qaddejja Tiegħu se nimministraw persuna persuna, kif għamel Hu.”

Il-President Russell M. Nelson, “Nimministraw bil-Qawwa u l-Awtorità ta’ Alla,” Liahona, Mejju 2018, 69.