Kilel kan sang Tom Garner, Isaac Darko-Acheampong, Alexander K. Boateng, oh Jonas Rebicki

Padahk kan en Papah, Oaktohpe 2020

Wie Papah sang nan en Serih kan oh Me Pwulepwul kan arail Pirokrahm

Lukeieng mehteikan en keirda oh sowese irail nan ahlo iei me wia poahson en papah.

Ansou mwahu en sawas mie nan en Serih kan oh Me Pwulepwul kan arail pirokrahm. Mwein mie pehin nohmw seri de me pwulepwul nan ihmwomwo. Mwein komwi emen sounkaweid nan pirokrahmo de komw kin wie papah peneinei kan me mie neirail seri oh me pwulepwul. De mwein komwi mwahngih ekei seri oh me pwulepwul (me pahn kak doke koaros). Mendahte soangen irair da me komw mi loale, wiepe tohto nan pirokrahm wet de padahk kan me kak kapaiada en mehteikan arail mour.

Kakairada Kitail Koaros

Ihme keieu kesempwal ong Serih kan oh Me Pwulepwul kan iei en kin nantihong en duwehla Sounkomouro me kin papah ni unsek rahn koaros. Tohto me iangehr pirokrahm wet eselahr me ni ahmw pahn kin kakairada wasa kei nan ahmw mour, komw pahn samaniala sewese de papah mehteikan.

Ahpw nan pirokrahm wet en Serih kan oh Me Pwulepwul kan, kapaiada mehteikan sohte anahnepen awi lao komw esehla mahs mehkot. Omwi pahn pein koakoahiek komwihda pil kin kihda ansou mwahu en papah mehteikan.

Mie mwahnakapw me adaneki Prophet me koukouson nan Ghana, tepkihda mahs koasonehdi pwehn esehla kesengki piano nan pirokrahm en Serih kan oh Me Pwulepwul kan. Prohpet nda, “Iei ei koasondi ien sewese mehteikan esehla dahme I wie kaskaskuhlki.”

Mendahte e saikinte wiahla sounpadahk men, ah koasondio keirdahr oh wiahla mehkot me e sohte medewe. Irahil tohn sukuhl meh limehk ansouwet me kin aliale kasukuhl en kesengki piano nan imwen sarawio iangahki pil Prohpet. Eri ihs me kaskasukuhlih Prophet oh ienge meh limehk o? Alexander M. oh Kelvin M., ira koaros sounpar 13. Kelvin nda,“Se men kasalehiong aramas teikan wiewiahn kadek.”

Rahn silu nan ehu wihk pwutak pwulepwul riemeno kin kihda kasukuhl en piano ong koaros me kin kohla ni so isepe. Pil mie ehu katep me pwarada sang ni kasukuhl kan en pianou. Tohto tohn sukuhlko kapeseiong Mwomwohdiso sang ni kasukuhl en piano ah mwuhr onopki rongamwahuo oh koasonehdi ren pepdaisla.

Ni atail kin kakairkitailda, kitail kak papah mehteikan oh luke irail en iang kitail.

Wiepen Papah Kaselel Ehu

Ni eh wia steik Praimeri presiden, Sabrina Simões Deus Augusto sang Curitiba, Brazil, kilangehr wiepen kakairada aramas nan pirokrahmo eh kapaiada serih kan oh me pwulepwul kan nan en liho steiko. Ahpw liho pil kilangehr ahl tohto me e kak doadoahngki sang dahme liho eselahr me pid keirdahn aramas sang nan en liho pwukoah en papah.

“Ni ahi koledi ehu talent,“ Sister Augusto nda, “I kak doadoahngki talento pwehn kapaiada mehmen me I kin papah.”

Sister Augusto padahkihong emen lih me e kin papah mwoamwen wiahda chocolate truffles. Liho met kin wiahda oh netiki truffles kan pwehn dapwin pai en ah peneinei. “Sounpwong kei mwuri, I pil alehdi kapai sang emen lih me padahkihong ie wiepen wiahda pilawa me honey me I kak netiki,” Sister Augusto nda. “Koadoahkiada oh ehukihda atail talent kan kak kapaiada en emenemen kitail atail mour oh kadaiala atail ehupene ni en lih akan kin wie papah.”

© 2020 sang Intellectual Reserve, Inc. Kolokol pwuhng koaros. Intingda nan USA. Kamanaman ong ni lokaiahn wai: 6/19. Kamanaman ong kawehwe: 6/19. Kawehwehpen Padahk en Papah, Oaktohpe 2020.Pohnpeian.16725 885

Ia Mwoamwen en Serih kan oh Me Pwulewpwul kan arail Pirokrahm Kak Sewese Komwi Papah?

1. Luke mehteikan en iang towehda pirokrahm en Serih kan oh Me Pwulepwul kan.

   Komw kak luke peneinei kan en me pwulepwul oh serih kan me komw kin papah en iang towehda pirokrahm en Serih kan oh Me Pwulepwul kan. Ele irahil pahn men iang towehda mwekid kan en kakairada aramas, de kasukuhl en rohngamwahu nan pirokrahmo. (Irehn kapehse kapatapat me pid papah kak alahldi sang Kohdo, Idawehn Ie, tehk “Doadoahk en Papah nanKohdo, Idawehn Ie,” nan Septempe 2020 Liahona.)

2. Sewese arail koasondi kan.

   Ni ahmw wia sounpapah ohl de lih ong peneinei kan me mie neirail me pwulepwul, komwi tungoaleniki ansou mwahu en sewese koasondi me irail koadkoadohki ong neirail Serih kan oh Me Pwulepwul kan. Tetehn koasondi pwuko wia pein arail, ma komw wehwehki dahme irail pwungki, komw kak kihda sawas ni soangen mwoahmw kei. Met kak wiawi ni ahmw rapakihdohng irail wasa irail kak diar dipwisou, wia sounkopwung nan arail kin kukiada cookies, de wia sounkaweid nan wasa me komw samani ie. Komw wehwehki mwoamwen welian oil en nan sidohsa? Deipina likou me tei? Komw kin samanih kapeidaki aramas me men ale doadoahk? Komw kak sewesehkin irail dahme komw samanih ma irail anahne.

3. Luke mehteikan en wia kisehn omwi keirda.

   Kekeirda sohte kin wiawi ongete serih kan oh me pwulepwul kan. Komw kak iang towehda pirokrahmo sohte lipilipil komw sounpar depe. Ni ahmw kakairada pali ngenomw, paliweremw oh wasa teikan en ahmw mour, komw pahn wiahla semen men me kak papah aramas akan sohte lipilipil ihs me komw tuhong. Oh me duwehte Prophet nan Ghana, komw kak kapaiada mehteikan ni omwi luke irail en iang komwi kauwada kasukuhl en piano, kohla eksersais, de kaskasukuhlki ehu lokaia.

4. Doadoahngki Papah en wia ehu omwi koasondi.

   Medewe komwi en kin wie papah ansou kis nan ehu ehu rahn. Met kak wiawi ni ahmw kadar ehu kair ni nting de uhdi oh tehk dahme wiewiawi de koasonehdi ehu ansoun tuhpene. Met pil kak iangahki kilelehdi nan kalendar rahn en ipwidi kan en irail me komw kin papah de tetehk dahme irail kin mwahuki de wiewia nan facebook. Doadoahngki minit limau te pwehn medewe en emen tohrohr ah anahn kan kak katikada madmadau kan me kin katapan.

Wad emen

“Ehu kilel en Mwomwohdiso mehlel en Kauno pahn kin kalapw wiawi ni soanamwahu, pwehn papah emen emen serih kan en Koht oh arail peneinei kan. Pwehki met iei Sapwellime Mwomwondiso, kitail ni atail wia Sapwellime sounpapah kei pahn kin papah mehteio duwehte me E ketin wiahier.”

Presiden Russell M. Nelson, “Papah sang ni Manaman oh Mweimwei en Koht,” Liahona, Mei 2018, 69.