“Ukulungiselela ngeNkqubo yaBantwana neyoLutsha”, Liyahona EyeDwarha 2020

Umfanekiso

Imigaqo yoKulungiselela

Iifoto nguTom Garner, u-Isaac Darko-Acheampong, u-Alexander K. Boateng, noJonas Rebicki

IMigaqo yoKulungiselela, EyeDwarha 2020

Ukulungiselela ngeNkqubo yaBantwana neyoLutsha

Ukumemela abanye ukuba bakhule kwaye ubancede apha endleleni kungumongo wokulungiselela.

Amathuba maninzi ekulungiseleleni ngenkqubo yaBantwana neyoLutsha. Mhlawumbi unabo abantwana okanye ulutsha kwikhaya lakho. Mhlawumbi uyinkokheli kulenkqubo okanye ulungiselela kwiintsapho ezinabantwana kunye nolutsha. Okanye mhlawumbi kwenzeka ukuba wazi abanye abantwana nolutsha (oko kusenokusiquka thina sonke). Nokuba injani imeko yakho, zininzi iindlela zokusebenzisa inkqubo okanye imigaqo yayo yokusikelela ubomi babanye.

Ukuziphuhlisa Kwethu Kunye

Entliziyweni yaBantwana noLutsha kukugxila ekuzameni usuku ngalunye ukufana ngakumbi njengoMsindisi, owayelungiselela ngokugqibeleleyo. Uninzi lwabo oluthe lwathabatha inxaxheba kwinkqubo lufunde ukuba xa uqhubela phambili ngakumbi kwiinkalo ezahlukeneyo zobomi bakho, uzube uxhotyiswe ngokungcono ukuncedeni okanye ekulungiseleleni abanye.

Kodwa ngenkqubo yaBantwana neyoLutsha, ukusikelela abanye akufuneki ukuba kulinde de ufunde okuthile. Isenzo sokufunda ngokwaso sibonelela ngamathuba okulungiselela.

Kumfana omncinane ogama linguProphet ohlala eGhana, ukuzibekela injongo kuBantwana noLutsha yokufunda ukudlala ipiyano yayisiqalo nje. “Yinjongo yam ukunceda abanye abantu ukuba bazazi izinto endizifundayo,” utsho u-Prophet.

Nangona engenguye umqeqeshi okwangoku, injongo yakhe sele ikhule yayinto enkulu kakhulu kunokuba wayecinga. Ngoku kukho abafundi abangama-50 awathatha iiklasi zepiyano kwindlu yokuhlangana kunye noProphet. Kwaye ngubani ofundisa uProphet kunye nabanye abafundi abangama-50? Ngu-Alexander M. kunye noKelvin M., bobabini baneminyaka eli-13. “Sifuna ukubonisa izenzo zobubele kwabanye abantu,” utsho uKelvin.

Iintsuku ezintathu evekini ulutsha olubini lufundisa izifundo ezisisiseko zepiyano simahla kubo bonke abaza kufunda. Kuye kwabakhona inzuzo eyongeziweyo kwizifundo zepiyano. Uninzi lwabafundi olwaziswa kwiBandla ngezifundo zepiyano lwaye lwafunda kamva ivangeli kwaye lwagqiba ekubeni lubhaptizwe.

Njengoko sisenza iinzame zokuziphucula, sinako ukulungiselela abanye ngokubamema ukuba bazimanye nathi.

Indlela Eyimpumelelo eKulungiseleleni

NjengoMongameli weSikolo saBantwana Abancinane bengqokelela yamasebe, uSabrina Simões Deus Augusto waseCuritiba, eBrazil, uyibonile indlela amacandelo ophuhliso lobuqu ale nkqubo asikelela ngayo abantwana nolutsha kwingqokelela yamasebe yakhe. Kodwa ukwabone iindlela ezininzi zokusebenzisa izinto azifundileyo malunga nophuhliso lomntu kwisabelo sakhe njengomlungiselelikazi.

UDade Augusto uthi: “Xa ndiphuhlisa italente, ndingayisebenzisa loo talente ukusikelela umntu endilungiselela kuye.”

UDade Augusto wafundisa omnye woodade owayebelwe yena ukuba enze iitruffle zetshokholethi . Loo dade ngoku wenza kwaye athengise ii-truffle ukuncedisa ekongezeleleni kwingeniso yosapho lwakhe. “Kwiinyanga zakamva, ndaye ndasikelelwa xa omnye udade endifundisa ukwenza isonka sobusi endandinokusithengisa,” utshilo uDade Augusto. “Ukuphuhlisa nokwabelana ngeetalente zethu kungasikelela ubomi babanye kwaye kwandise ubudlelwane bethu njengabalungiselelikazi.”

© 2020 ngu Intellectual Reserve, Inc. All rights reserved. Ishicilelwe e-USA. Isivumelo sesiNgesi: 6/19. Isivumelo senguqulelo: 6/19. Inguqulelo yeMinistering Principles, October 2020. Xhosa. 16725 774

Ingaba iNkqubo yaBantwana neyoLutsha Ingakunceda Njani Ukuba Ulungiselele?

Mema abanye ukuba bathathe inxaxheba kwinkqubo yaBantwana neyoLutsha.

Ungamema iintsapho zolutsha kunye nezabantwana olungiselela kuzo ukuba zithathe inxaxheba kwinkqubo yaBantwana neyoLutsha. Basenokuba nomdla ekuthatheni inxaxheba kwizinto ezenziwayo, kuphuhliso lomntu, okanye nkqu nasekufundeni amacandelo evangeli yenkqubo. (Ngolwazi oluthe vetshe malunga nokulungiselela nge-Uze, Undilandele, bona “Ukulungiselela nge-Uze, Undilandele,” kwiLiyahona.yoMsintsi 2020.)
Xhasa iimbono zabo.

Njengomlungiseleli okanye umlungiselelikazi kwiintsapho ezinolutsha, ukwisikhundla sendalo sokuxhasa iinjongo abanokuthi basebenza kuzo kwinkqubo yaBantwana neyoLutsha. Ngelixa iimbono zabo zingezobuqu, ukuba uyayazi into abanomdla kuyo, ubunganceda unikele ngeendlela ezahlukeneyo. Oku kungenzeka ngendlela yokufumana izinto zobugcisa abazifunayo, uncedise njengomgwebi ekwenzeni kwabo amaqebengwana, okanye ube ngumcebisi kwindawo apho unolwazi khona. Ingaba uyayazi indlela yokutshintsha i-oyile emotweni? Ukulungisa iimpahla ezikrazukileyo? Ingaba uyingcali kudliwano-ndlebe lwemisebenzi? Unganikezela ngokwabelana ngolwazi okanye izakhono onazo ukuba banomdla.
Mema abanye babe yinxalenye yokuziphuhlisa kwakho buqu.

Uphuhliso lomntu alugcinelwanga abantwana nolutsha. Unokuthatha inxaxheba kule nkqubo ngokwakho nokuba ungakanani na ebudaleni bakho. Njengoko uchitha ixesha uphucula iindawo zobomi bakho kwezomoya, nezentlalo, nezomzimba, kunye nezengqondo, uya kukulungela ngcono ukulungiselela ebantwini, nokuba ngubani na odibana naye. Kwaye njengoProphet waseGhana, ungabasikelela abanye ngokubamema ukuba bathathe inxaxheba kunye nawe, nokuba ngaba ulungiselela izifundo zepiyano, ukuya kwiklasi yokuzilolonga, okanye nifunda ulwimi kunye.
Yenza ukulungiselela kube yimbono.

Cinga ngokuchitha ixesha usuku ngalunye ulungiselela. Oku kunokuba kukuthumela umbhalo okanye ukundwendwela ukubona ukuba izinto zihamba njani okanye ukucwangcisa indibano. Kungabandakanya ukuthatha ixesha kwikhalenda yemihla yokuzalwa kwabo ulungiselela kubo okanye ubalandele kumaqonga weendaba zoluntu ukufumanisa ukuba yintoni abanomdla kuyo okanye abayenzayo mva nje. Ukuthatha nje imizuzu emihlanu ucinga malunga noko kufunwa ngomnye umntu kunokukhokelela kwizimvo eziphenjelelweyo ezinokwenza umohluko.