Tugoti ang Dios nga Magpangibabaw
Handa bala kamo nga tugotan ang Dios nga magpangibabaw sa inyo kabuhi? Handa bala kamo nga tugotan ang Dios nga mangin pinakaimportante nga impluwensya sa inyo kabuhi?
Mga pinalangga kong kauturan, nagapasalamat gid ako sa matahum nga mga mensahe sa sining komperensya kag sa akon pribelihiyo nga maghambal sa inyo karon.
Sa masobra 36 anyos nga ako nangin Apostoles, ang doktrina sang pagtipon sang Israel nag-agaw sang akon atensyon.1 Ang tanan parte sini nagpukaw sang akon interes, lakip na ang mga pag-alagad kag mga ngalan2 nanday Abraham, Isaac, kag Jacob; ang ila mga kabuhi kag ang ila mga asawa; ang kasugtanan nga ginhimo sang Dios sa ila kag ginpadayon sa ila kaliwatan;3 ang paglinapta sang dose ka tribo; kag ang madamo nga mga propesiya parte sa pagtipon sa aton panahon.
Gintun-an ko ang pagtipon, nagpangamuyo parte diri, nagpaayaw sa tagsa ka balaan nga kasulatan nga naangot sini, kag nagpangabay sa Ginuo nga pasanyugon ang akon pag-intiendi.
Gani hunahunaa ang akon kalipay sang gindala ako sini lang sa isa ka bag-o nga paghangop. Sa bulig sang duha ka Hebreo nga mga iskolar, akon natun-an nga ang isa ka kahulugan sa Hebreo sang tinaga nga Israel amo ang “tugoti ang Dios nga magpangibabaw.”4 Gani ang ngalan mismo nga Israel nagatumod sa isa ka tawo nga handa nga tugotan ang Dios nga magpangibabaw sa iya kabuhi. Ina nga ideya nagainspirar gid sang akon kalag!
Ang tinaga nga handa importante gid sa sini nga paathag parte sa Israel.5 Tanan kita may kahilwayan sa pagpili. Pwede kita magpili nga mangin kabahin sang Israel, ukon indi. Pwede kita magpili nga tugotan ang Dios nga magpangibabaw sa aton mga kabuhi, ukon indi. Pwede kita magpili nga tugotan ang Dios nga mangin pinakamabaskog nga impluwensya sa aton mga kabuhi, ukon indi.
Sa makadali, dumdumon naton ang pinakaimportante nga tion sa kabuhi ni Jacob, ang apo ni Abraham. Sa lugar nga gintawag ni Jacob nga Peniel (nga kon sayuron “ang nawong sang Dios”),6 si Jacob nagpakig-away sa isa ka seryoso nga hangkat. Ang iya kahilwayan sa pagpili natilawan. Sa sini nga pagpakig-away, ginpamatud-an ni Jacob kon ano ang pinakaimportante sa iya. Ginpakita niya nga handa sia nga ang Dios ang magpangibabaw sa iya kabuhi. Bilang sabat, gin-islan sang Dios ang ngalan ni Jacob sa Israel,7 nga ang buot silingon “tugoti ang Dios nga magpangibabaw.” Ang Dios nagpromisa dayon kay Israel nga ang tanan nga mga pagpakamaayo nga ginhatag kay Abraham mangin iya man.8
Ang masubo, ginguba sang panimalay ni Israel ang ila mga kasugtanan sa Dios. Ginpangbato nila ang mga propeta kag wala nagpasugot nga ang Dios magpangibabaw sa ila mga kabuhi. Sang ulihi, ginlapta sila sang Dios sa apat ka pamusod sang duta.9 Sa kaluoy, Iya ginpromisa sang ulihi nga pagatiponon sila, suno sa ginsiling ni Isaias: “Sa isa ka diutay nga tion ginbayaan ko ikaw [Israel], apang nga may dako nga kaluoy tiponon ko ikaw.”10
Nga ginapanumdom ang kahulugan sang Israel sa Hebreo, maintiendihan naton nga ang pagtipon sang Israel may dugang nga kahulugan. Ang Ginuo nagatipon sinang mga nagatugot nga ang Dios ang magpangibabaw sa ila mga kabuhi. Ang Ginuo nagatipon sinang magapili nga tugotan ang Dios nga mangin pinakaimportante nga impluwensya sa ila mga kabuhi.
Sa madamo nga mga siglo, ang mga propeta naghambal na nga daan parte sa sining pagtipon,11 kag nagakatabo na ini sa karon! Bilang isa ka indi mapaiway nga hitabo antes sang Ika-duha nga Pagkari sang Ginuo, amo ini ang pinaka importante nga buluhaton sa kalibutan!
Ining pagtipon antes sang milenya personal nga kasaysayan sang pagpasangkad sang pagtuo kag espirituhanon nga kaisog para sa minilyon ka mga tawo. Kag bilang mga miyembro sang Ang Simbahan ni Jesucristo sang mga Santos sa Ulihing mga Adlaw, ukon “nakighisugot nga Israel sa ulihing mga adlaw,”12 gintakayan kita nga magbulig sa Ginuo sa sining importante nga buluhaton.13
Kon aton hambalan ang pagtipon sang Israel para sa mga patay ukon mga buhi, nagatumod kita, siyempre, sa mga buluhaton nga pangmisyonaryo, templo, kag family history. Nagatumod man kita sa pagpasad sang pagtuo kag testimonya sa mga tagipusuon sinang aton mga kaupod sa balay, sa trabaho, ukon aton mga ginaalagaran. Sa bisan ano nga tiyempo nga nagahimo kita sang bisan ano nga butang nga nagabulig sa bisan kay sin-o—patay man ukon buhi—sa paghimo kag pagtipig sang ila mga kasugtanan sa Dios, nagabulig kita sa pagtipon sang Israel.
Indi pa gid madugay kaayo, ang asawa sang isa namon ka apo, ginabudlayan sa espirituhaon. Tawgon ko sia nga “Jill.” Wala sapayan sang pagpuasa, pangamuyo, kag mga bendisyon sang priesthood, ang amay ni Jill nagatagumatayon. Ginkulbaan sia kaayo nga madula pareho ang iya amay kag ang iya testimonya.
Isa ka gab-i, ginsugiran ako sang akon asawa, nga si Sister Wendy Nelson, sang sitwasyon ni Jill. Sang madason nga aga, ginpabatyag si Wendy nga ipaambit kay Jill nga ang akon sabat sa iya espirituhanon nga pagpakig-away isa lang ka tinaga. Ang tinaga amo ang hapaw.
Sang ulihi gin-ako ni Jill kay Wendy nga sang primero naglalain sia sa akon sabat. Nagsiling sia, “Nagalaum ako nga si Lolo mapromisa sa akon sang milagro para sa akon tatay. Nagsige ako palibog kon ngaa ang tinaga nga hapaw amo ang tinaga nga iya nahambal.”
Pagkatapos nga mapatay ang amay ni Jill, ang tinaga nga hapaw padayon nga nagabalikbalik sa iya hunahuna. Ginbuksan niya ang iya tagipusuon agud mahangpan sing mas madalom nga ang hapaw nagakahulugan nga “indi makakita sa malayo.” Dayon ang iya pamensaron nagsugod sa pagbaylo. Dayon si Jill nagsiling, “Ang hapaw nagpapundo, nagpapamenssar, kag nagpaayo sa akon. Inang tinaga sa karon nagapuno sa akon sang katawhay. Nagapadumdom ini sa akon nga pasangkaron ang akon panan-aw kag magtinguha para sa wala katapusan. Nagapadumdom ini sa akon nga may ara sang diosnon nga plano kag ang akon amay buhi sa gihapon kag nagapalangga kag nagabantay sa akon. Ang hapaw nagdala sa akon sa Dios.”
Ginapabugal ko gid ang asawa sang akon apo. Sa sining masubo kaayo nga tion sa iya kabuhi, ang pinalangga nga si Jill nakatuon sa pagbaton sang pagbuot sang Dios para sa iya amay, nga may wala katapusan nga panan-aw para sa iya kaugalingon nga kabuhi. Sa pagpili nga tugotan ang Dios nga magpangibabaw, nakasalapo sia sang katawhay.
Kon tugotan naton, may madamo nga mga pamaagi nga ang Hebraiko nga kahulugan sang Israel makabulig sa aton. Panumduma kon paano magabag-o ang aton mga pangamuyo para aton mga misyonero—kag para sa aton kaugalingon nga mga pagpangabudlay sa pagtipon sang Israel—nga ginapanumdom ining konsepto. Masami kita nagapangamuyo nga kita kag ang mga misyonero tuytoyan sa sinang mga handa nga magbaton sang mga kamatuoran sang ginpanumbalik nga ebanghelyo ni Jesucristo. Ginapamensar ko, kay sin-o ayhan kita tuytoyan kon magpangabay kita nga makit-an inang mga handa nga tugotan ang Dios ang magpangibabaw sa ila mga kabuhi?
Mahimo nga tuytoyan kita mga tawo nga wala gid sang una nagapati sa Dios ukon kay Jesucristo apang luyag na karon nga makatuon parte sa Ila kag sa Ila plano sang kalipayan. Ang iban mahimo nga “natawo sa kasugtanan”14 apang nagtalang palayo sa dalan sang kasugtanan. Mahimo nga handa na sila karon nga maghinulsol, magbalik, kag tugotan ang Dios ang magpangibababaw. Pwede naton sila buligan paagi sa pag-abiabi sa ila nga bukas ang mga butkon kag mga tagipusuon. Kag ang pila sinang mga dalhan sa aton mahimo nga nagabatyag nga may kulang sa ila mga kabuhi. Sila man nagakahidlaw sang kabug-osan kag kalipay nga maangkon sinang mga nagatugot nga ang Dios magpangibabaw sa ila mga kabuhi.
Ang malab-utan sang ebanghelyo para tipunon ang naglinapta nga Israel masangkad kaayo. May lugar para sa kada tawo nga lubos nga magbaton sang ebanghelyo ni Jesucristo. Ang kada hinaylo mangin isa sa mga anak sang Dios sa kasugtanan,15 bisan paagi sa pagkatawo ukon sa pagbuylog. Ang kada isa mangin lubos nga manunubli sang tanan nga ginpromisa sang Dios sa matutom nga mga anak sang Israel!16
Ang kada isa sa aton may diosnon nga potensyal tungod ang kada isa anak sang Dios. Ang kada isa alalangay sa Iya panulukan. Ang mga epekto sining kamatuoran madalom. Mga kauturan, palihog pamatii sing maayo ining akon inughambal. Ang Dios wala nagapalangga sang isa ka lahi labaw sangsa isa. Maathag ang Iya doktrina parte diri. Ginaagda Niya ang tanan nga magpalapit sa Iya, “itom kag puti, ulipon kag hilway, lalaki man kag babayi.”17
Ginapasalig ko kamo nga ang inyo estado sa atubang sang Dios wala ginadiktahan sang kolor sang inyo panit. Ang mahamut-an ukon indi mahamut-an sang Dios nagadepende sa inyo debosyon sa Dios kag sa Iya mga kasugoan kag indi sa kolor sang inyo panit.
Ginakasubo ko nga ang aton Itom nga mga kauturan sa bilog nga kalibutan nagaagwanta sang mga kasakit sang rasismo kag diskriminasyon. Sini nga adlaw ginapanawagan ko sa aton mga miyembro sa bisan diin nga pangunahan ang pagsikway sang mga pamatasan kag mga buhat sang diskriminasyon. Nagapangabay ako sa inyo nga pasanyugon ang respeto sa tanan nga mga anak sang Dios.
Ang palamangkutanon para sa aton tanan, wala sapayan sang lahi, palareho lang. Handa ka bala nga tugotan ang Dios nga magpangibabaw sa imo kabuhi? Handa ka bala nga tugotan ang Dios nga mangin pinakaimportante nga impluwensya sa imo kabuhi? Tugotan mo bala ang Iya mga pulong, ang Iya mga kasugoan, kag ang Iya mga kasugtanan nga mag-impluwensya sang imo ginahimo sa kada adlaw? Tugotan mo bala ang Iya tingug nga magpanguna sangsa bisan ano nga iban pa? Ikaw bala handa nga unahon ang bisan ano nga kinahanglan Niya ipahimo sa imo sangsa iban mo pa nga mga ambisyon? Ikaw bala handa nga ipaidalom ang imo pagbuot sa Iya?18
Binagbinaga kon paano inang kahanda magpakamaayo sa inyo. Kon wala pa kamo nakasal kag nagapangita sang kaupod sa wala katapusan ang inyo handum nga mangin “kabahin sang Israel” magabulig sa inyo sa pagdesisyon kon sin-o ang i-deyt sa karon kag kon paano.
Kon kasado kamo sa tiayon nga nagguba sang iya mga kasugtanan, ang inyo kahanda nga tugotan ang Dios nga magpangibabaw sa inyo kabuhi magatugot sang inyo mga kasugtanan sa Dios nga magpabilin nga malig-on. Ayuhon sang Manluluwas ang inyo nagasakit nga balatyagon. Magabukas ang mga kalangitan kon ginatinguhaan ninyo nga mahibaloan kon paano magpadayon. Indi ninyo kinahanglan nga magtalangtalang ukon magpalibog .
Kon may sinsero kamo nga mga pamangkot parte sa ebanghelyo ukon sa Simbahan, sa inyo pagpili nga tugotan ang Dios nga magpangibabaw, tuytoyan kamo nga makita kag mahangpan ang bug-os, wala katapusan nga mga kamaturoran nga magagiya sa inyo kabuhi kag magabulig sa inyo nga magpabilin nga malig-on sa dalan sang kasugtanan.
Kon nagaatubang kamo sang mga tentasyon—bisan pa nga ang tentasyon nagaabot sa tion nga kapoy kamo kaayo ukon nagabatyag nga nagaisahanon ukon wala mahangpi—panumduma ang kaisog nga inyo maangkon kon nagapili kamo nga tugotan ang Dios nga magpangibabaw sa inyo kabuhi kag kon nagapangabay kamo sa Iya nga pabakuron kamo Niya.
Kon ang inyo pinakadako nga handum amo nga tugotan ang Dios nga magpangibabaw, agud mangin kabahin sang Israel, madamo kaayo nga mga desisyon nga mas nagahapos himuon. Madamo sang mga problema nga indi na mangin problema! Makahibalo kamo kon paano mo dalhon ang inyo kaugalingon. Makahibalo kamo kon ano ang tan-awon kag basahon, sa diin gamiton ang inyo oras, kag kon sin-o ang updon. Makahibalo kamo kon ano ang luyag ninyo tapuson. Makahibalo kamo kon ano nga klase sang tawo ang gusto ninyo nga mangin.
Karon, mahal kong mga kauturan, kinahanglanon ang pagtuo kag kaisog agud tugotan nga ang Dios ang magpangibabaw. Nagakinahanglan ini sang sige-sige, maid-id nga espirituhanon nga pagpanikasog sa paghinulsol kag pagbiya sa kinaugali nga tawo paagi sa Pagbayad-Sala ni Jesucristo.19 Nagakinahanglan ini sang dalayon, adlaw-adlaw nga pagpaninguha sa pagpatubo sang personal nga mga kahilig sa pagtuon sang ebanghelyo, sa pagkilala pa gid sa Amay nga Langitnon kag kay Jesucristo, kag pagpangita kag pag-akto sa personal nga rebelasyon.
Sa tion sining makatalagam nga mga panahon nga ginpropesiya ni Apostoles Pablo,20 si Satanas wala na gani nagatinguha nga taguon pa ang iya mga pagpang-atake sa plano sang Dios. Nangin popular ang kalainan sa bisan diin. Gani, ang solo gid lang nga paagi agud makaluwas sing espirituhanon amo ang mangin determinado nga tugotan ang Dios nga magpangibabaw sa inyo mga kabuhi, tun-an ang magpamati sa Iya tingug, kag gamiton ang aton kusog agud magbulig sa pagtipon sang Israel.
Karon, ano ayhan ang balatyagon sang Ginuo sa mga tawo nga magatugot nga ang Dios magpangibabaw? Ginsiling ini ni Nefi: “[Ang Ginuo] nagahigugma sa ila nga nagabaton sa Iya nga mangin ila Dios. Yari karon, palangga niya ang aton mga katigulangan, kag nakighisugot sia sa ila, ilabi na gid, bisan kanday Abraham, Isaac, kag Jacob; kag [gina]dumdom niya ang mga kasugtanan nga iya [gin]himo.”21
Kag ano ang handa sang Ginuo nga himuon para sa Israel? Ang Ginuo nagsumpa nga Sia magapakig-“away sang [aton] mga away, kag sang mga away sang [aton] mga anak, kag sang [mga away] sang mga anak sang aton mga anak …tubtob sa ika-tatlo kag ika-apat nga henerasyon”!22
Samtang inyo ginatun-an ang inyo balaan nga mga kasulatan sa masunod nga anum ka bulan, ginapaisog ko kamo nga maghimo sang listahan sang tanan nga ginpromisa sang Ginuo nga Iya pagahimuon para sa nakapakighisugot nga Israel. Sa banta ko makibot gid kamo! Binagbinaga ining mga promisa. Hambali ang mga ini upod sa inyo pamilya kag mga kaabyanan. Dayon ipangabuhi kag bantayi ining mga promisa nga matuman sa inyo kaugalingon nga kabuhi.
Mahal kong mga kauturan, sa inyo pagpili nga tugotan ang Dios nga magpangibabaw sa inyo mga kabuhi, maeksperiyensyahan ninyo sa inyo kaugalingon nga ang aton Dios “Dios sang mga milagro.”23 Bilang katawhan, Iya kita mga nagapakighisugot nga kaanakan, kag pagatawgon kita sa Iya ngalan. Sa sini ako nagapamatuod sa sagrado nga ngalan ni Jesucristo, amen.