Mga Regalo sa Pasko o Ikapulo?
Mituo ko nga ang ebanghelyo tinuod, apan makahimo kaha ko sa pagbayad sa ikapulo?
Paghulagway ni Allen Garns
Nangita ko og usa ka simbahan hangtud nga gipaila-ila ko sa sister nga mga misyonaryo ngadto sa Ang Simbahan ni Jesukirsto sa mga Santos sa Ulahing mga Adlaw. Nabunyagan ug nakumpirma ko paglabay sa usa ug tunga sa bulan. Usa sa mga butang nga ang mga misyonaryo mitudlo nako mao ang baruganan sa ikapulo.
“Madawat nimo ang mga panalangin kon mobayad ka sa ikapulo,” misulti sila kanako.
Nag-inusara ko nga ginikanan. Hapit dili igo ang akong kwarta ipalit og pagkaon ug sa akong mga balayranan. Kasagaran dakong butang ang pagbayad og ikapulo o pagpalit og pagkaon, pagbayad sa akong mga balayranan, o pagbayad sa sakyanan.
Sulod sa katuigan, miagi ko og panahon nga naningkamot sa pagbayad og ikapulo. Sa katapusan, ako miingon, “Kon nagtuo ka nga tinuod ang ebanghelyo, nan kinahanglan aduna kay buhaton niana. Sa higayon nga makabuhat na ka sa butang, ang Dios mopanalangin kanimo.”
Nakautang ko og $500 sa ikapulo, apan nagkinahanglan usab ko og $503 para ibayad sa pipila ka balayranan. Dili nako makita kon unsaon nga masulbad kini, apan miingon ko, “sulayan lang gyud nako.” Mibayad ko sa akong ikapulo. Walay usa nga nahibalo nga nagkulang ko og $503, apan adunay wala magpaila nga tawo ang mipadala nako og lima ka tag $100 diha sa koreyo.
Mao kadto ang sinugdanan sa akong pag-usab. Miusab kini nako sa espirituhanong paagi. Nakaamgo ko nga ang Dios nahigugma kanako, ug nga Siya nagpakabana kanako, ug nga Siya gusto nga magmalampuson ko. Sukad niadtong puntoha, mibayad na ko sa akong ikapulo. Apan dili kadto kanunayng sayon.
Usa ka Pasko sa daghang kautigan na ang milabay, ang akong kinamagulangang anak nga babaye nakahinumdom nga nakadungog nako nga nagsulti nga dili ko makahimo sa pagbayad og ikapulo ug mamalit og mga gasa sa Pasko alang kaniya ug sa iyang mga igsoon.
“Nasayud mi nga wala mi makuha bisan unsang butang, apan sige lang,” ang akong anak misulti nako sa wala madugay. “Mihukom kami nga gusto namo nga mobayad ka sa imong ikapulo.”
Sama sa naandan, ang Ginoo mihatag, ug sila aduna gayuy mga gasa sa Pasko.
Alang sa usa ka nag-inusara nga inahan nga makasuporta sa iyang mga anak ug mobayad sa ikapulo usa ka dakong butang. Sukad nga mihukom ko sa pagbayad sa ikapulo, napanalanginan ko. Dili ako adunahan, apan ang Ginoo makahimo og paagi alang kanako.
Napanalanginan ko sa laing paagi usab. Ang maayong mga ehemplo sa mga miyembro sa Simbahan ug pamilya nakatabang sa akong mga anak ug nako nga magpabilin nga aktibo sa Simbahan. Ako silang gisultihan nga ang tanang kabahin sa panalangin nga gisaad sa Ginoo—nga ang mga tamboanan sa langit maabli alang kanamo.