2020
Pwarata ewe Saramen ewe Chon Amanau non Fansoun Kirisimas
December 2020

“Pwarata ewe Saramen ewe Chon Amanau non Fansoun Kirisimas,” Liaona, December 2020

iamwiri

Sasingen an Jises uputiw seni Nitza Beatriz Santillan Castillo; sasingen eu niffang seni Getty Images.

Nongonongun Iamwir, December 2020

Pwarata ewe Saramen ewe Chon Amanau non Fansoun Kirisimas

Ekkieki usun ekkewe ka iamwir ngenir. Ifa usun ka tongeni anisi aramas ne arap ngeni Kraist non ei fansoun Kirisimas?

Sia chechemeni ewe Chon Amanau Jises Kraist non unusen ewe ier, nge Kirisimas ina ewe fansoun nupwen sia pwapwaiti ewe niffang mi nap: “Pun Kot a fakkun tongei chon fonufan, ina minne a fangeno Noun we anamon” (John 3:16). Nupwen sia iamwir non fansoun Kirisimas, sia pwan tongeni fangeno mettoch mi tongeni anisi ekkoch ar repwe arap ngeni ewe Chon Amanau. Mi murrino ach sipwe ekieki pwe sia apiru ewe niffang minne Semach won Nang a ngenikich.

Ngang Mi Chiwen Tongei ewe Niffang

Susan Hardy, California, USA

Nupwen ua 11 ier, nei we sensen Sukunen Raninfel, Brother Deets, a erenikem pwe ika aupwe kaeo ekkewe Nongonongun Achifoua me awewe ngeni met wewen, epwe kamo nuem kewe puk fel.

Brother me Sister Deets ir ew pean pupunu ir chok onuon me fopun, me ra keran pupunu. Use sinei ika Brother Deets mi tongeni kamo niffang ngeni meinisin. Nge ua finata pwe ika a ekieki pwe ekkewe Nongongen Acheifoua mi auchea am aupwe kaeo, upwe fori.

Mwirin ua awesi meinisin ekkewe 13, ewe fansoun a nuno me ua nemenono an ewe pwon.

Iwe, non ewe Ranin Kirisimas, ua angei eu pour mi mak itei won. Ua suki me ua kuna ewe pukfel fan itei, fitifengen me echo taropwe a pesei ngeniei ai upwe sou anneani. Ena a fis non 1972, me tori ikenai mi chok nom rei kana pukefen. Mi auchea ngeniei.

Esap pokiten niwinin ewe niffang nge pokiten ewe kirokiroch a pwar ngeniei me an fangafangoch fan itei ena a esenipato ai mochen kaeo ewe kapasen Kot. Ua achocho ai upwe appiru an Brother Deets nenien appiru ren an iamwir ren an fangeno niffang mi murrino ngeni ekkewe aramas unuki, ua apinukunuk pwe upwe tongeni efeiochu manauen aramas usun a fen efeiochu manauei.

Ew Pesepes ne Aninis

Richard M. Romney, Utah, USA

Nupwen chon am wart ra fori ar kokkoten pari ren Kirisimas ra eiseniei ai upwe feino churi emon ese sou fiti fan me tingor ngeni an epwe fiti ewe prokram, ennet ua ner. Ua churi Darren fan ew chok me mwan, nupwen a fiti pwan eu mokutokuten ewe wart. A foti ngeni chamwan och fofon chawen chon wawa skuter. Mokuran ewe mi tam me pwech a rifengeni, mi wor enisan mi pwech, me poun kewe mi kuno ren tatu.

Iei, ua uta mesen imwen Darren ewe fitifengen me emon chon ewe mwich, ua anchangei met epwe era. A tingorei kem aupwe tonong, me aua ereni i pwata aua feito. Iwe a apasa, “Oo, upwe pwapwa ne fori ena!”

A fokkun angangoch, a anisi aramas ar repwe pwapwaiti ewe pari. Ekkis fansoun mwirn, emon a tingorei kem, ngang me chienei ne iamwir, am aupwene wisen chuchuri Darren. A kan pwapwa iteiten an kuna kem, me am poraus fengen mi murino. Ua kinisou ren ewe pwarata am aupwe tingor ngeni i an epwe fiti ewe prokram non ewe wart mi esenipato am chiechifengen.

Iamwir ngeni Ekkoch non Fansoun Kirisimas

Iei ekkoch mettoch ka tongeni fori om kopwe anisi ekkewe ka iamwir ngenir ar repwe sinei pwe ka ekiekir, pwan mwo non ei fansoun non ei ier.

  1. Fan ekkoch ach kokkori are mak emon mi tongeni esenipato mettoch mi amwarar. Ami poraus fengen ren om apasa “Ran allim, ifa usum?” mi tongeni siwini manauer.

  2. Fiti ar kewe fansoun pwapwa ika mi och. Fansoun Kirisimas mi eu fansoun mi och ach sipwe keao usun met sia nuku non mi nonno chok. Nupwen ka pwarata met ka nuku me pwan ausening ngeni ekkoch, ka suki ewe asam ngeni napenon weweoch.

  3. Iotek fan iter ren iter. Tingor ngeni Semach won Nang an epwe anisuk om kopwe sinei ifa usun kopwe emwenir ngeni Noun we.

  4. Napengeni sia chechemeni niffang mi kukkun. Ese namwot pwe ach kewe niffang repwe watte pwe aramas repwe sani. Ewe niffangen ach fansoun, ewe niffangen ach ausening, ach pwari och sasing are met sia chechemeni—ikkei niffangen netipach.

  5. Ngeni aramas ewe niffangen kapasen pwarata. Tingorer ar repwe aporausa ar tong fan iten ewe Chon Amanau ngonuk, me aporausa om tong fan iten I ngeniir.

  6. Tingorei ekkoch ar repwe fiti fanin Kirisimas. Ekkoch aramas ra mochen fan nge rese sinei ia repwe feino ia. Tungorer ar repwe fituk ne fan.

  7. Awora kinamwei non imwer. Ereniir pwe mi wor an ekkewe misineri nessen usun Kirisimas ra tongeni aporausa ngeniir, eu nessen epwe awora apinukunuk me tong non netiper.

Iamwir ngeni Aramas Meinisin ren Ach Pranch ika Wart

Met mi namwot ngeni eu me eu Pranch ika Wart mi sokofesen. Ren ekkoch mi och ar repwe fori eu watten mwich. Ren pwan ekkoch Pranch ika Wart mi och ika repwe fori mettoch mi kukun me mecheres. Ekkewe ra wisen fori kokot ren mwich repwe iotek ar repwe sinei ifa usun repwe fori met mi namwot fan iten ar Pranch ika Wart.

  • Chon ewe Mwichefen non unungat steik non Paris, France, ra aninis ren eu pari ren Asaramen Fonufan a pachenong ew okufun angangoch non teten uf. Ra ammonata mettoch fan iten wasona me aramas ese wor imwer.

  • Ewe Charlotte North Carolina Central Steik ra fori eu mwichen “Kirisimas seni unusen Fonufan” fan iten nenier, mi wor ar pari ne apwapwai Kriast ren mongo, mettochun Kirisimas seni ekis meinisin, kon, angang fengen, me eu sipai ren ekkewe semirit usun ewe uputiwen Jises Kriast.

  • Chon ewe Mwichefen non ewe Vero Beach Florida Steik ra fiti chon nenier ar repwe chechemeni pwata sia fori apwapwan Kirisimas. Ra fangeno pisekin urumot ngeni ekkewe mi osupwang. Eu mwichen Kinter ra kon, me mi wor chepen fan iten chommong mwichefen ren porauser.

  • Ewe Jacksonville Florida South Steik a fori eu sipai usun Ewe Chon Amanauen Fonufan fan iten ekkewe aramasen ewe neni.

© 2020 seni Intellectual Reserve, Inc. Meinisin pung mi kawor. A för non Merika. Kapungunon non fosun Merika: 6/19. Kapungunon chiakun: 6/19. Chiakun Ministering Principles, December 2020.Chuukese.16727 901