“Ndibuana uŋwana Andinyaŋa kini Ukabade-isua,” Liahona, Ɔfiɔŋ December ke isua 2020

Ndise eke ebiet emana emi otode Niltza Beatriz Santillan Castillo; ndise enɔ emi otode Getty images

Ukpebnkpo Unwam, Ofiong December ke isua 2020

Ndibuana uŋwana Andinyaŋa kini Ukabade-isua

Kere-banga mbon emi mbufo enwamde. Afo ekeme ndiŋwam mmɔ didie man mmɔ esik ekpere Christ ke Ukabade-isua emi?

Kini nnyin itide Andinyaŋa Jesus Christ ke ofuri isua, Ukabade-isua edi ini emi nnyin idarade enɔ emi okponde akan, emi enɔde: “Koro Abasi akamama ererimbot, tutu enye osio ikpɔŋ eyen emi enye okobonde ɔnɔ” (John 3:16). Nte nnyin inɔde uŋwam kini Ukabade-isua, nnyin ŋko imekeme ndinɔ mme enɔ emi ekemede ndiŋwam mbon efen esik ekpere Andinyaŋa. Edi inem ŋkpɔ ndikere mbaŋa idem nnyin nte iwutde enɔ oro otode Ete nnyin ke Heaven.

Ami nsuk mma-ma enɔ oro

Susan Hardy, California, USA

Kini ami ŋkedide isua duopekiet, andikpep mi ke Ufɔk-ŋwed Ederi, Eyenete eren Deets, ama etiŋ ɔnɔ nnyin ete edieke nnyin idimumde Uwet-ŋkpɔ Mbuɔtidem ikama ke ibuot, iyuŋ inam aŋwaŋa imɔ se mmɔ eworode, imo iyedep Nwed Abasi inɔ nnyin.

Eyenete eren ye eyenete aŋwan Deets ekedi ŋwan ye ebe emi edide mkparawa, mmɔ eketɔtɔŋɔ uwem. Ami ŋketimke mfiɔk me eyenete eren Deets ekeme ndidep enɔ nnɔ owo ekededi. Edi ami mma mbiere nte edieke enye ekerede ete ke Articles of Faith emi edi akpan-ŋkpɔ owo ndimum ke ibuot, ami nyanam oro.

Ke mmaŋkekure ofuri duopeta oro, ini ama ebe, ami mma nnyuŋ mfre mbaŋa eŋwɔŋɔ esie.

Ndien ke usen Ukabade-isua, ami mmambɔ eku emi enyiŋ mi ewerede ke esit. Ami mma ŋkubɔre enye nnyuŋ ŋkut Nwed Abasi emi enɔde mi, ye kard emi esinde mi udɔŋ ndikot enye kini kini. Oro ekedi ke 1972, ndien tutu esim usen mfin emi, aminsuk nyenyene mme ŋwed Abasi oro. Mmɔ edi ŋkpɔ-uto enɔ mi.

Ikedighe ekɔm urua enɔ oro, edi ekedi eti ido emi enye ekewutde mi ye nnwaidem emi enye ekemekde ndiwa nnɔ mi akanam mi nyene ntɔtuŋɔ udɔŋ ndiduŋɔde Ikɔ Abasi. Ami mma ndomo nditiene uwutŋkpɔ uŋwam eke eyenete eren Deets, oto ke ndinɔ mbon oro edude ke nkanade mi nti mme enɔ, sia nyenede idorienyin nte ke mmekeme ndidiɔŋ uwem mbon efen nte enye ekediɔŋde okim.

Ikoot nditiene nam nkpɔ

Richard M. Romney, Utah, USA

Kini mbon oro enamde ndutim ebaŋa edinam Ukabade-isua ekedɔhɔde mi ete ŋkese member nnyin kiet emi misinke idem nnyuŋ nnɔ enye ikot atiene abuana ke edinam oro, mmenyime nte ke ama etimede mi esit. Ami ŋkosobo ye Darren ini kiet kpɔt mbemiso, ke ini enye eketienede oduk edinam ward ema ekenanam. Enye ama ɔbɔp mbɔbɔ ibuot masiŋ ke ekoiso esie. Ema ebɔp anyan afia idet esie nte isim enang mbakara, enye ama enyene afia ntaŋebek emi ɔyɔhɔde, ema enyuŋ eda mme tattoo efuk enye ubɔk.

Ami ŋkasaŋa ye owo committee kiet, ŋkada ke iso enyin usuŋ Darren, mma ŋkere se enye ekpetiŋ. Enye ama ɔdɔhɔ nnyin iduk esit, ndien nnyin ima itiŋ inɔ enye ntak emi nnyin idude do. Enye ama ɔdɔhɔ ete, “Oh, ami mkpama ndinam oro!”

Enye ama anam akwa utom, ke ndiŋwam ndinam edinam oro enyene ufɔn ɔnɔ ata ediwak. Ke ibio ini ama ekebe, ema edɔhɔ anditiene mi nnɔ uŋwam, ye ami isika ikese Darren ke ini ke ini. Esit esisuk enenem enye ndikut nnyin, nnyin imanyuŋ inyene mme inem nneme kiet. Esit enem mi, edidemede ekikere ndikot enye edibuana ke ndutim edinam ward ama ada inem ebuana edi.

Ndiŋwam mbon efen ke Ukabade-isua.

Emi edi ndusuk mme ŋkpɔ emi afo ekemede ndinam man okut ete ke mbon oro afo aŋwamde eyefiɔk ete ke afo ke ekere abaŋa mmɔ, akpan-akpan ke ini emi ke isua.

Ndusuk ini ndikot ke ŋkpɔ utiŋ ikɔ, me ndiwewet text, ekeme ndinam utibe. Nditoŋo nneme ye ekpri ŋkpɔ nte “Hi, etie didie?” ekeme ndinam ukpuhɔde.
Tiene mmɔ buana ke edidara mmɔ ke ini ɔfɔnde. Ukabade-isua ekeme ndidi akwa ini ndikpebe mbaŋa mbuɔtidem emi nnyin inyenede kiet. Kini afo edemede mbuɔtidem onyuŋ akpaŋde utɔŋ ɔnɔ mbon efen, afo ɔnɔnɔ ifet ndinyene ifiɔk okponde akan.
Ebɔŋ akam enɔ mmɔ ke enyiŋ. Beŋe Ete ke heaven ndinwam fi ekere abaŋa usuŋ akpedade anam mmɔ mkpere Eyen Esie.
Esiti mkpri mme enɔ ekan. Enɔ inyeneke ndidi akamba man ekeme ndima. Enɔ ini, enɔ mkpaŋutɔŋ, ndibuana ndise me eti ekikere—kpukpru emi ekeme ndidi mme enɔ eke esit.
No mme enɔ eke ikɔ-ntiense. Dɔhɔ mmɔ ete ebuana ima emi mmɔ enyenede enɔ andinyaŋa enɔ fi, nyuŋ nyime ndibuana ima emi enyenede ɔnɔ Enye ye mmɔ.
Kot mbon efen edibuana ke mbono Ukabade-isua. Ndusuk owo esiyom ndituak ibuot, edi ifiɔkke ebiet emi ekpekade. Kot mmɔ editiene fi etuak ibuot.
Da emem yɔhɔ ufɔk fo. Nam mmɔ efiɔk ke mbon oro edude ke utom ukworo Ikɔ, enyene asaŋasaŋa etop Ukabade-isua emi mmɔ ekemede ndikwɔrɔ, emi ekemede ndida idorienyin ye ima nsin ke esit mmɔ.

Ndinɔ uŋwam nte eboho otu owo kiet

Kpukpru unana eke eboho otu owo edi sanga sanga. Ndusuk ekut ufɔn eto ke ndinam akamba edinam. Eboho otu owo efen ekeme ndikut ufɔn eto ekpri ŋkpɔ emi edide mmemmem. Mbon oro esinde ke ndinam ndutim nnyuŋ nda usuŋ ke ndinam edinam, esinyene ekikere oto ke ndibɔŋ akam mbaŋa nte ekpeyɔde mme unana oro odude.

Mbon oro edude ke otu stake ita oro ke Paris, France, ema eŋwam edian ubɔk ke edinam mbubreyo eke Nɔ Ererimbot Uŋwana, emi ɔkɔrɔde ye ediwut enɔ ndinam ŋkpɔ emi mme owo enyenede, ye ediwut mme nsine. Mmɔ ema ebeŋe mme ŋkpɔ emi ekenɔde mbon emi efehede ediyom ifure, ye mbon oro enanade ebiet iduŋ.
Charlotte North Carolina Central Stake ema enam edinam “Ukabade-isua ke nkanade Ererimbot,” edinam emi enamde enɔ mbon obio, emi enamde ye otu owo ke ndidara Christ oto ke udia, ndiwut Ukabade-isua ke ido eset eke ofuri ererimbot, ikwɔ, ndinam mme utom, ye ebiet emana eke nditɔwɔŋ.
Mbon emi edude ke otu Vero Beach Florida stake ema ediana kiet ke nditi mbio obio mbaŋa ntak emi nnyin idarade Ukabade-isua. Ema enɔ mme ufɔk emi ekamade nditɔ akpa mme ŋkpɔ mbre nditɔwɔŋ. Nka ikwɔ nditɔwɔŋ ema ekwɔ ikwɔ, ediwak mme ufɔk Abasi ema enyene mkpri ufɔk ke ndiwut etop.
Stake eke Jacksonville Florida South ema enɔ mbio obio oro ndise Andinyaŋa Ererimbot .

© 2020 otode Intellectual Reserve, Inc. All rights reserved. Ekeming ke USA. Enyime edikabare ke Ikɔ Mbakara: 6/19. Enyime ndikabare: 6/19. Edikabare eke Ukpebnkpɔ Unwam, Ɔfiɔŋ December ke isua 2020. Efik. 16727 553