“Erekyɛ Agyenkwa No ne Kan Borɔnya ber,” Liahona, Mumu 2020
Jesus N’awoe ho mfonyin a Niltza Beatriz Santillan Castillo twae; mfonyin akyɛdze a ofi Getty Images hɔ
Erosom ho Fapem, Mumu 2020
Erekyɛ Agyenkwa No ne Kan Borɔnya ber
Dwen hɔn a esom hɔn no ho. Ibesi dɛn botum aboa hɔn ma wɔabɛn Christ ara yie Borɔnya yi.
Yɛkaa Agyenkwa Jesus Christ afe mu no nyina dze, naaso Borɔnya nye ber a yɛhyɛ akyɛdze kɛsenara a wɔdze ama hɛn pɛn no no ho fa: “Na mbrɛ Nyankopɔn dɔɔ wiadze nye yi, dɛ ɔdze ne Ba a ɔwoo no kor mae” (John 3:16). Ber a yɛsom Borɔnya ber no, hɛn so yebotum ama akyɛdze horow a ɔboa twe binom bɛn Agyenkwa no. Ɔyɛ nwanwa dɛ yɛdwen dɛ hɛn akyɛdze ayɛ dza Ɔsor Egya dze mae no ne saso.
Akyɛdze no Da ho Som Me Bo
Susan Hardy, California, USA
Midzii mfe 11 no, me Kwesida Skuul kyerɛkyerɛnyi, Onuabanyin Deets, kãa kyerɛɛ hɛn adzesũafo no dɛ, sɛ yebotum yesũa Gyedzi ho Nsɛmpɔw no egu hɛn tsir mu na yɛakyerɛkyerɛ n’asekyerɛ mu akyerɛ no a, ɔbɔtɔ kyerɛwsɛm ahorow no nyinara bi ama hɛn mu kor biara.
Nna Onuabanyin na Akyerɛbaa Deets yɛ awarfo kumaba a, afei na wɔrehyɛ abrabɔ ase. Nna menngye nndzi dɛ Onuabanyin Deets botum atɔ akyɛdze ama obiara. Naaso meyɛɛ m’adwen dɛ sɛ ɔnoara susu dɛ Gyedzi ho Nsɛmpɔw no ho hia dodow dɛ wosũa gu tsir mu a, mubosũa.
Mowiee 13 no nyinara no, ma mber pii guu mu no, mowerɛ fiir n’anohoba no.
Afei, Borɔnya Da no, me nsa kaa adakaba kakraba bi a wɔakyerɛw me dzin wɔ do. Mubuei do na muhun kyerɛwsɛm ahorow no nyina a ɔyɛ me dze, a krataa bi so kã ho a wɔdze rehyɛ me nkuran dɛ menkenkan daa daa. Nna ɔyɛ afe 1972 mu, na besi ndɛ, meda ho wɔ dɛm kyerɛwsɛm no. Wɔsom bo ma me.
Ɔnnyɛ akyɛdze no bo a wɔdze tɔe na mbom ayamuyie a ɔdaa no edzi kyerɛɛ me na afɔrbɔ a nna ɔpɛ dɛ ɔbɔ ma me no na ɔmaa menyaa ɔpɛ soronko bi dɛ mubosũa Nyankopɔn n’asɛm. Mobɔ mbɔdzen dɛ mebedzi Onuabanyin Deets no ɔsom fasusu do ber a medze akyɛdze a mfaso wɔ ho bɛma hɔn a wɔbɛn me, a mowɔ enyidado dɛ mubotum ehyira binom hɔn abrabɔ dɛ mbrɛ oehyira medze no.
Nsato Dɛ Ewɔ mu Kyɛfa
Richard M. Romney, Utah, USA
Ber a hɔn a wɔrodwendwen hɛn Borɔnya agordzi no ho see me dɛ menkɛsera onua akɔtrɔbɔdwenyi bi ma ɔmfa noho mbɛhyɛ dwumadzi mu no, nokwar nna me yamu hyehye me. Nna meedzi kan ehyia Darren dakor pɛr, ber a odzii kan dze no ho hyɛɛ ward dwumadzi bi mu. Nna ɔdze motorsyker abotsir bi akyekyer ne tsir pɔw do. Nna ɔakyekyer ne tsinhwi fufuw tsentsen dɛ pɔnkɔ dua, ɔwɔ abɔdwesɛ fufuw, na ɔayeyɛ ahyɛnsew wɔ ne nsa ho nyinara.
Afei, abaguafo no kor kã mo ho no, nna migyina Darren n’abow ekyir, a morodwendwen dza ɔbɛkã ho. Ɔfrɛɛ hɛn kɔɔr mu, na yɛkãa siantsir a yɛwɔ hɔ kyerɛɛ no. Ɔkãa dɛ, “O, mebɛyɛ dodow!”
Ɔbɔɔ noho mbɔdzen papaapa, ɔboae maa dwumadzi no yɛɛ mfaso maa nkorɔfo pii. Mber kakra ekyir no, wɔkãa kyerɛɛ emi na me nyɛnko a menye no rosom no dɛ yɛntaa nkɛsera Darren. Nna daa ohu hɛn a n’enyiwa gye, yɛnye no dzii nkɔmbɔ ahomka mu ara. M’enyisɔ nkenyan no dɛ yɛnto nsa mfrɛ no ma ɔmfa no ho mbɛhyɛ ward dwumadzi mu no a ɔmaa yebenyaa nkitahodzi mapã.
Yɛrosom Binom Borɔnya ber
Ndzɛmba binom a ibotum ayɛ dze ahwɛ no pefee dɛ hɔn a erosom no bohu dɛ dɛm mber tsitsir ara wɔ afe yi mu no erodwendwen hɔn ho nye yinom.
-
Ɔtɔfabi a foon ɔfrɛ anaa text nkrato yɛ anwanwdze pii. Idze “Hi, woho tse dɛn?” ara rehyɛ nkɔmbɔdzi ase botum aboa pii.
-
Ber a ɔsɛ no, enye hɔn nhyɛ hɔn fa. Borɔnya botum ayɛ mber pa ara yie a yɛdze bosũa gyedzi horow a hɛn nyinara yɛwɔ ho nsɛm. Sɛ enye binom kyɛ gyedzi horow na itsie hɔn a, ɔboa ma ntseasee kɛsenara ba.
-
Bɔ hɔn dzin fabɔ mpaa ma hɔn. Serɛ Ɔsor Egya ma ɔmboa wo ma dwen akwanhorow a ibotum dze hɔn abɛn Ne Ba no.
-
Wɔtaa kaa akyɛdze nketsenketse yie. Onnhia dɛ akyɛdze bɛyɛ kakraka ana enyiwa agye ho. Erenya hɔn ho adagyer, akyɛdze a wɔdze tsei, idze mfonyin bi bɛkyerɛ anaa ebɛkaa asɛm bi—iyinom nyinara botum ayɛ akoma mu akyɛdze.
-
Ma dasegye akyɛdze. Ma wɔnye wo nkyɛ hɔn dɔ a wɔwɔ ma Agyenkwa no, na ɔwo so nye hɔn nkyɛ wo dɔ ma No no.
-
To nsa frɛ binom ma wɔmbra Borɔnya som. Nyimpa binom pɛ dɛ wɔsom naaso wonnyim beebi a wɔnkɔ. To nsa frɛ hɔn ma wɔnye wo mbɔsom.
-
Fa asomdwee hyɛ hɔn efiefi mã. Ma wonhu dɛ nsɛmpakafo wɔ Borɔnya nsɛm soronko bi a wobotum akyɛ, a ɔyɛ dza ɔdze enyidado na ɔdɔ bɛba hɔn akoma mu.
Wɔrosom hɔn Nyinara dɛ Mboanofo
Mboanofo biara ehiadze ahorow no yɛ soronko. Binom nya mfaso fi wɔreyɛ dwumadzi akɛse mu. Mboanofo nkaafo so botum enya mfaso efi biribi kakraba na ɔnnyɛ kyinkyinɛnn mu. Hɔn a wɔkã dwumadzi ahorow ne nhyehyɛɛ ho no, mpaabɔ mu ara wɔhwɛ mbrɛ nsa bɛkã ehiadze horow a ɔwɔ hɔ no.
-
Asɔrmba a wofi stake ahorow ebiasa wɔ Paris, France, boae ma wɔyɛɛ Light the World ewimbir enyikãdze bi a nna talent na afadze horow ho ɔyɛkyerɛ bi kã ho. Wɔyɛɛ ndzɛmba pii a wɔdze maa tukɔrfo na nkorɔfo a wonnyi beebi da.
-
Charlotte North Carolina Central Stake no yɛɛ “Christmas around the World” dwuma bi maa sɔnmufo no, a wɔnam edziban, amansan Borɔnya ntɔyɛɛ ɔyɛkyerɛ, ndwom, ɔsom ndwumadzi, na Jesus N’awoo a mbofra dzii do hyɛɛ Christ ho fa.
-
Vero Beach Florida Stake asɔrmba no kɛkaa sɔnmufo ho wɔ siantsir a wodzi Borɔnya dwumadzi ho. Wɔdze agodzi ndzɛmba kyekyɛɛ sɔn mu adɔyɛkuw ahorow. Primary mbofra hɔn adwontokuw toow ndwom, na asɔrasɔr pii nyaa mbea a wɔdaa hɔnho nsɛm edzi.
-
Jacksonville Florida South Stake no so yii Wiadze Agyenkwa no sene bi kyerɛɛ sɔnmufo no.
© 2020 by Intellectual Reserve, Inc. All rights reserved. Wotsintsimii wɔ USA. Ngyiresi Borɔfo kasa ngye ntomu: 6/19. Nkyerɛasee ngye ntomu: 6/19. Ministering Principles, December 2020 ne nkyerɛasee.Fante. 16727 502