“Pataje Limyè Sovè a nan Nwèl,” Lyawona, Desanm 2020

Foto yon nativite fèt pa Niltza Beatriz Santillan Castillo; foto kado a soti nan Getty Images.

Prensip Sèvis Pastoral, Desanm 2020

Pataje Limyè Sovè a nan Nwèl

Reflechi sou moun w ap rann sèvis pastoral yo. Kijan w ka ede yo vin pi pwòch Jezikri pou Nwèl sa a?

Lè nou sonje Sovè a, Jezikri tou ane a, Nwèl se epòk nou fete pi gwo kado ki te janm genyen an: “Paske Bondye sitèlman renmen lèzòm li bay sèl Pitit li a pou yo” (Jan 3:16). Lè nou rann sèvis pastoral nan Nwèl la, nou menm tou nou kapab bay kado ki ede lòt moun vin pi pwòch Sovè a. Ala bèl bagay lè nou ka panse wè tèt pa nou reflete kado Pè Selès la bay la.

Mwen Toujou Renmen Kado a

Susan Hardy, California, Etazini Damerik

Lè m te gen 11 zan, enstriktè Lekòldidimanch mwen, Frè Deets, te di klas nou an si nou te memorize Atik Lafwa yo epi eksplike l kisa yo te vle di, li t ap achte yon liv ekriti pou nou.

Frè ak Sè Deets sete yon jèn koup, ki te fèk marye. Mwen pa t sèten Frè Deets te gen mwayen pou l te achte kado pou pèsonn. Men mwen te deside ke si l te panse Atik Lafwa yo te enpòtan ase pou m te memorize yo, mwen t ap pran defi a.

Lè m te fini tout 13 atik yo, tan te pase epi m te vin bliye pwomès li a.

Epi, nan jou Nwèl la, mwen te resevwa yon pake ki te gen non m sou li. Mwen te ouvri li epi m te jwen yon liv ekriti pou mwen sèl, avèk yon kat ki te ankouraje m pou m te li yo regilyèman. Sa sete nan ane 1972, epi jodi a mwen toujou gen liv ekriti sa yo. Yo presye pou mwen.

Se pa t pri kado a men sete jantiyès yo te demontre m nan ak sakrifis yo te prè pou yo te fè pou mwen an ki te ban m yon gwo dezi pou m te etidye pawol Bondye a. Mwen eseye suiv egzanp Frè Deets lè m ap rann sèvis pastoral nan bay moun ki bò kote m kado ki gen sans, avèk espwa ke m kapab beni lavi lòt moun menm jan l te beni lavi pa m nan.

Yon Envitasyon Pou n Fè Pati Pa Nou

Richard M. Romney, Utah, Etazini Damerik

Lè moun ki t ap planifye aktivite Nwèl pawas nou yo te mande m pou m te vizite yon manm ki te inaktif epi pou m te envite l vin patisipe nan pwogram nan, fòk mwen admèt ke m te pè. Mwen te sèlman wè Darren yon fwa avan sa, lè li te patisipe nan yon aktivite pawas la avan sa a. Li te gen yon bando motosiklèt rabi antoure tèt li. Cheve l te blan, long epi li te mare nan yon chou, li te gen yon bab tou blan, epi bra l te kouvri ak tatwaj.

Kounyea, akonpaye pa yon manm komite a, mwen te kanpe devan pot kay Darren, ap mande m kisa l te ka di nou. Li te mande nou pou nou rantre, epi nou te di l poukisa nou te la. Li te di, “O wi, mwen ta renmen fè sa!”

Li te fè yon bon travay, li te ede fè aktivite a siyifikatif pou anpil moun. Yon ti tan nan apre, yo te mande mwenmenm ak konpayon sèvis pastoral mwen an pou nou te vizite Darren regilyèman. Li te toujou kontan wè nou, epi nou te rive fè bèl konversasyon ansanm. Mwen rekonesan dèske enspirasyon pou nou te envite l pou l te vin patisipe nan yon aktivite nan pawas la te rive fè nou jwen yon koneksyon nou renmen.

Fè Sèvis Pastoral pou Lòt moun nan Nwèl.

Men kèk bagay ou kapab fè pou asire w ke moun ou rann sèvis pastoral yo ka konnen ke w panse avèk yo, espesyalman nan tan sa a nan ane a.

Gen de fwa menm yon kout fil oswa yon mesaje tèks ka fè mèvèy. Kòmanse yon konvèsasyon byen senp nan di “Bonjou, kijan w ye?” ka fè yon gran diferans.
Fete avèk yo lè sa apwopriye. Nwèl se yon bon epòk pou n aprann sou kwayans nou genyen an komen. Lè nou pataje kwayans nou epi nou koute lòt moun, nou ouvri pòt pou plis konpreyansyon.
Priye pou yo nan non yo. Mande Pè Selès la pou L ede w panse sou lòt fason ou kapab ede yo pwoche pi pre pitit Li a.
Kado senp yo se yo moun souvan sonje pi plis. Kado yo pa oblije konplike pou yon moun renmen yo. Kado tan, kado tande, pataje yon foto oswa yon souvni—kado sa yo se kado ki soti nan kè.
Ofri kado temwayaj ou. Mande yo pou yo pataje lanmou yo genyen pou Sovè a avèk ou, epi ofri pou w pataje lanmou ou genyen pou Li avèk yo.
Envite lòt moun asiste yon sèvis Nwèl. Gen de moun ki ta renmen adore men yo pa konn ki kote pou yo ale. Envite yo pou yo vin adore avèk ou.
Ranpli kay yo ak lapè. Fè yo konnen misyonè yo gen yon mesaj Nwèl espesyal yo kapab pataje, youn ki kapab pote espwa ak lanmou nan kè yo.

Rann Sèvis Pastoral pou tout moun nan kongregasyon an.

Nesesite chak kongregasyon yo pa menm. Genyen ki benifisye nan òganize yon gwo aktivite. Gen lòt kongregasyon ki gen dwa benefisye nan yon bagay ki tou piti tou senp. Moun ki enplike nan planifye ak òganize aktivite yo dwe konsidere nan lapriyè kijan pou yo reponn bezwen ki egziste yo.

Manm nan twa pieu nan Paris, an France, te ede fè yon sware Klere Mond Lan ki te enkli yon cho talan ak yon defiledmòd. Yo te prepare bagay pou yo te bay refijye ak moun ki t ap vin nan lari.
Pieu Santral Charlotte North Carolina nan Etazini Damerik la te fè yon aktivite “Nwèl nan Tout Mond lan pou kominote a, avèk yon sware pou yo te selebre Kris la atravè manje, prezantasyon tradisyon Nwèl entènasyonal, mizik, pwojè sèvis, ak yon nativite pou timoun.
Manm Pieu Vero Beach nan Florida yo te ini pou yo te fè kominote a raple yo poukisa nou fete Nwèl. Yo te bay òganizasyon benevòl yo nan kominote a jwèt kòm don. Yon koral timoun Primè te chante, epi anpil legliz te gen tab kote yo te chita bay enfòmasyon.
Pieu Jacksonville nan Sid Floride la te prezante yon pwodiksyon sou Sovè Mond lan pou kominote a.

© 2020 pa Intellectual Reserve, Inc. Tout dwa rezève. Enprime nan Etazini Damerik. Apwobasyon Anglè: 6/19. Apwobasyon tradiksyon: 6/19. Tradiksyon Ministering Principles, December 2020. Haitian Creole. 16727 036