“Pagpaambit sang Kapawa sang Manluluwas sa Paskwa,” Liahona, Disyembre 2020

Litrato

ministering

Litrato sang pagkabun-ag iya ni Niltza Beatriz Santillan Castillo; litrato sang regalo gikan sa Getty Images

Mga Prinsipyo sa Ministering, Disyembre 2020

Pagpaambit sang Kapawa sang Manluluwas sa Paskwa

Pamensara ang imo mga ginaministeran. Paano mo sila buligan nga mangin mas malapit kay Cristo sini nga Paskwa?

Samtang aton ginapanumdum ang Manluluwas nga si Jesucristo sa bug-os nga tuig, ang Paskwa amo ang panahon nga kita nagasaulog sang pinakadako nga regalo nga ginhatag; “Kay ginhigugma gid sang Dios ang kalibutan sa bagay nga ginhatag niya ang iya bugtong nga Anak” (Juan 3:16). Samtang nagaminister kita sa Paskwa, makahatag man kita sang mga regalo nga makabulig sa iban nga mas mahilapit sa Manluluwas. Kanami pamensaron sang aton mga kaugalingon nga nagahatag sang pareho nga regalo sang iya sang Amay nga Langitnon.

Ginapakamahal Ko sa Gihapon ang Regalo

Susan Hardy, California, USA

Sang nagaedad ako 11 katuig, ang akon titser sa Sunday School, nga si Brother Deets, naghambal sa amon klase nga kon amon masaulo ang Mga Artikulo sang Pagtuo kag mapaathag sa iya kon ano sayuron sang mga ini, baklan niya kami sang amon kaugalingon nga balaan nga mga kasulatan.

Sanday Brother kag Sister Deets hubin pa nga mag-asawa, nga nagasugod pa lang [sa ila pagpangabuhi]. Indi ako sigurado kon si Brother Deets makasarang magbakal sang regalo para kay bisan sin-o. Pero nagpamat-od ako nga kon para sa iya ang Mga Artikulo sang Pagtuo importante nga masaulo, batunon ko ang hangkat.

Pagkatapos nga masaulo ko ang 13, nagligad ang panahon kag nalimtan ko ang iya promisa.

Dayon, sang Adlaw sang Paskwa, nakabaton ako sang pinutos nga may akon ngalan nga nasulat. Ginbuksan ko kag nakita ang set sang balaan nga mga kasulatan nga para gid sa akon, nga may nalakip nga kard nga nagapaisog sa akon sa pagbasa sini sing regular. Sang 1972 pa ato, kag hasta subong ara pa sa akon inang balaan nga mga kasulatan. Malahalon ang mga ini para sa akon.

Indi ang bili sang regalo kundi ang kaayo nga iya ginpakita sa akon kag ang sakripisyo nga handa niya himuon para sa akon ang nagdulot sa akon agud makaangkon sang dako nga handum nga magtuon sang pulong sang Dios. Gintinguhaan ko nga sundon ang halimbawa ni Brother Deets nga magminister paagi sa paghatag sang makahulugan nga mga regalo sa mga tawo sa akon palibot, nga nagalaum nga mabugayan ko ang kabuhi sang iban nga mga tawo pareho nga ginbugayan niya ang kabuhi ko.

Isa ka Pangagda nga Makigbahin

Richard M. Romney, Utah, USA

Sang ang mga nagaplano sang amon pagtipon-tipon sa Paskwa sa ward nagpangabay sa akon nga bisitahan ang isa ka indi-gawa-aktibo nga miyembro kag hagaron sia nga magpartisipar sa programa, ginaako ko nga ginkulbaan ako. Kis-a ko lang nakita si Darren, sang nag-intra sia sa isa ka kahiwatan sa ward sang una. Nagsuksok sia sang bandana nga pang-motor nga nabugkos sa iya sa ulo. Ang iya malaba kag bukay nga buhok napungos, may bukay ang malaba nga burangos, kag ang iya mga butkon puno sang pika.

Karon, kaupod ang isa ka miyembro sang komite, nagatindog ako sa may pwertahan ni Darren, nga nagapamensar kon ano ayhan ang iya ihambal. Gin-agda niya kami nga magsulod, kag ginsugiran sia namon kon ngaa nagkadto kami. Siling niya, “Ay, gusto ko ina!”

Kanami sang iya nahimo, sa pagbulig agud mangin makahulugan ang kahiwatan para sa madamo nga tawo. Wala madugayi, ginpangabay ako kag ang akon kaupod sa ministering nga bisitahan sing regular si Darren. Daw pirme sia ginasadyahan nga makita kami, kag nangin manami ang amon mga pagsinugilanonay. Nagpasalamat ako nga ang inspirasyon nga hagaron sia sa programa sang kahiwatan sang ward nagpadulong sa isa ka manami nga relasyon.

Pagminister sa Iban nga Tawo sa Paskwa

Ari ang pila ka butang nga pwede ninyo himuon agud maseguro nga ang inyo ginaministeran makahibalo nga ginapamensar ninyo sila, ilabi na sa sining tion sang tuig.

Kon kis-a ang tawag sa telepono ukon mensahe sa text nagahimo sing mga kaayuhan. Ang pagsugod sang sugilanon sa “Oy, kamusta ka?” sarang makahimo sing kinalain.
Mag-intra sa ila mga selebrasyon kon nagakaangay. Ang Paskwa mangin isa ka manami nga tion agud matun-an ang mga ginapatihan nga komon sa tunga naton. Kon nagapaambit kamo sang mga ginapatihan kag nagapamati sa iban, ginatugutan ninyo nga magsugod ang mas dako na paghangop.
Magpangamuyo para sa ila nga ginasambit ang ila ngalan. Pangabaya ang Amay nga Langitnon nga buligan kamo nga makapamensar sang mga paagi nga mas mahilapit sila sa Iya Anak.
Ang simple nga mga regalo sa masami amo ang madumduman sing maayo. Ang mga regalo indi kinahanglan nga magarbo agud pakamahalon. Ang paghatag sang tiyempo, ang pagpamati, ang pagpaambit sang litrato ukon sang handurawan—ini tanan mahimo nga mga regalo halin sa tagipusuon.
Maghatag sang regalo sang testimonya. Pangabaya sila nga magpaambit sang ila gugma sa Manluluwas upod sa imo, kag magtanyag nga ipaambit ang inyo gugma para sa Iya sa ila.
Hagara ang iban nga magtambong sa sakramento nga miting sa Paskwa. May mga tawo nga luyag magsimba apang wala makahibalo kon sa diin makadto. Hagara sila nga magsimba upod sa inyo.
Pun-a ang ila mga puluy-an sang paghidaet. Pahibal-a sila nga ang mga misyonero may espesyal nga mensahe sa Paskwa nga pwede nila mapaambit, mensahe nga magadala sang paglaum kag paghigugma sa ila mga tagipusuon.

Pagminister sa Tanan bilang Kongregasyon

Ang mga kinahanglanon sang tagsa ka kongregasyon pinasahi. Ang iban nagabenepisyo sa pag-organisa sang mas dako nga kahiwatan. Ang iban nga mga kongregasyon nagabenepisyo sa gamay kag simple lang. Ang mga nalakip sa pagplano kag pag-organisa sang mga aktibidades mapinangamuyuon nga nagabinagbinag kon paano sabton ang nagaluntad nga mga panginahanglan.

Ang mga miyembro sang tatlo ka stake sa Paris, France, nagbulig suporta sang Light the World nga tinipon-tipon sa gab-i nga nagalakip sang pasundayag sang mga talento kag fashion show. Naghanda sila sang mga bagay nga ginpanghatag sa mga tawo bakwit kag mga tawo nga wala sing maistaran.
Ang Charlotte North Carolina Central Stake naghiwat sang “Paskwa sa bilog nga Kalibutan” nga palagwaon para sa komunidad, nga may tipon-tipon sa pagsaulog kay Cristo paagi sa mga pagkaon, tradisyunal nga mga display sa Paskwa, musika, mga proyekto sa pagserbisyo, kag pagdramadrama sang mga kabataan sang pagkabun-ag ni Jesus.
Ang mga miyembro sang Vero Beach Florida Stake nag-upod sa pagpahanumdum sa komunidad kon ngaa nagasaulog kita sang Paskwa. Ang mga hampanganan ginpangdonar sa mga charity sang komunidad. Isa ka koro sang Primary ang nagkanta, kag madamo nga simbahan ang nagbutang sang mga kiosko nga naga-display sang impormasyon.
Ang Jacksonville Florida South Stake presentar sang produksyon nga Savior of the World para sa komunidad.

© 2020 iya sang Intellectual Reserve, Inc. All rights reserved. Gin-imprinta sa Pilipinas. Petsa sang pagtugot sa Ingles: 6/19. Petsa sang pagtugot sa paglubad: 6/19. Paglubad sang Ministering Principles, December 2020. Hiligaynon. 16727 861