“Panangibinglay iti Silaw ti Mangisalakan iti Paskua,” Liahona, Disiembre 2020

Ladawan ti pannakayanak ni Niltza Beatriz Santillan Castillo; ladawan ti sagut manipud iti Getty Images

Dagiti Pagbatayan iti Ministering, Disiembre 2020

Panangibinglay iti Silaw ti Mangisalakan iti Paskua

Ibilangyo dagiti tao a pagministeranyo. Kasano a matulongam ida nga ad-adda pay nga umasideg ken ni Cristo itoy a Paskua?

Idinto a laglagipentayo ti Mangisalakan a ni Jesucristo iti makatawen, iti Paskua ket panawen a rambakantayo ti kaindaklanan a sagut a naited: “Ta kasta unay ti panagayat ti Dios iti lubong, nga intedna ti Anakna a bugbugtong (Juan 3:16). Bayat ti panagserbitayo iti Paskua, makaitedtayo met kadagiti sagut a mangtulong kadagiti dadduma nga ad-adda pay nga umasideg iti Mangisalakan. Nakaskasdaaw a panunoten a datayo ket kas sarming ti sagut nga inted ti Nailangitan nga Ama.

Ipatpategko Pay Laeng ti Sagut

Susan Hardy, California, USA

Idi agtawenak iti 11, imbaga ti mannursuromi iti Sunday School, ni Brother Deets, iti klasemi a no mayulomi ti Pagannurotan ti Pammati ket ilawlawagmi kenkuana no ania ti kayatda a sawen, igatangannakami iti bukodmi a set dagiti nasantuan a kasuratan.

Apagdenna nga agassawa da Brother ken Sister Deets, a mangrugrugi pay laeng. Diak sigurado no kabaelan ni Brother Deets ti gumatang iti maysa a regalo para iti asino man. Ngem inkeddengko a no napanunotna a nasken a yulo ti Pagannurotan ti Pammati, awatek ti karit.

Kalpasan ti panangileppasko iti amin a 13, naglabas ti panawen ket nalipatakon ti maipapan iti karina.

Kalpasanna, iti Aldaw ti Paskua, nakaawatak iti maysa a pakete nga adda ti naganko iti rabawna. Linukatak daytoy ket nakitak iti maysa a set dagiti nasantuan a kasuratan para kaniak, nga addaan iti maysa a kard a mangal-allukoy kaniak a mangbasa kadagitoy a masansan. Tawen ti 1972 idi, ket agingga iti daytoy nga aldaw adda pay laeng kaniak dagita a nasantuan a kasuratan. Napateg dagitoy kaniak.

Saan a ti gatad daytoy regalo no di ti kinaimbag nga impakitana kaniak ken ti sakripisio a siaayat nga inaramidna para kaniak a nangibati kaniak a maaddaan iti nalaus a tarigagay nga agadal iti balikas ti Dios. Padpadasek a suroten ti pagwadan ni Brother Deets ti ministering babaen ti panangted kadagiti napapateg a sagut kadagiti adda iti lawlawko, a mangnamnama a mabendisionak ti biag dagiti dadduma a kas iti panangbendisionna iti biagko.

Awis a Mangakem iti Maysa a Papel

Richard M. Romney, Utah, USA

Idi kiniddaw dagiti agplanplano iti panagtitipon iti Paskua iti ward a bisitaek ti maysa a miembro a saan unay nga aktibo ket awisek daytoy a makiraman iti programa, akuek a nagnerbiosak. Naam-ammok ni Darren iti naminsan laeng, idi nakiraman daytoy iti maysa nga aktibidad iti ward. Nagsuot daytoy iti motorcycle headband a naibarabad iti mugingna. Naka-ponytail ti atiddog a puraw a buokna, purawen ti atiddog a barbasna, ken napno iti tato dagiti takiagna.

Ita, kakuyogko ti maysa a miembro ti komite, nakatakderak iti ridaw ni Darren, agpampanunot no ania ti mabalin nga ibagana. Indawatna a sumrekkami, ket imbagami kenkuana no apay nga addakami sadiay. Kinunana, O, magustuak nga aramiden dayta!”

Nakaaramid iti napintas a banag, iti panangtulong nga agbalin ti aktibidad a napateg para iti kaaduan. Idi agangay, nakiddaw kadakami iti kompanionko iti ministering a masansan a sarungkaranmmi ni Darren. Kasla kanayon a naragsak a makakita kadakami, ket naddaankami iti sumagmamano a makaay-ayo a panagsasarita. Agyamanak a ti inspirasion a mangawis kenkuana a makiraman iti programa ti maysa nga aktibidad ti ward ket nagbanag iti napaut a panaglilinnangen.

Panagminister kadagiti Dadduma iti Paskua

Dagitoy ti sumagmamano a banag a maaramidmo tapno masigurado a maammuanto dagiti pagministeranyo a pampanunotenyo ida, nangnangruna iti daytoy a panawen ti tawen.

No dadduma ket makaaramid kadagiti kinadatdatlag ti maysa nga awag iti telepono wenno maysa a mensahe babaen ti text. Iti panangrugi iti maysa a panagsasarita nga addaan iti simple a “Hi, kumustaka?” ket makaaramid iti maysa a pagdumaan.
Makiraman kadagiti parambakda no maitutop. Mabalin ti Paskua a naindaklan a gundaway tapno masursuro ti maipapan kadagiti pammati a pagpapadaantayo. No mangibinglayka kadagiti pammatitayo ken dumngeg kadagiti dadduma, lukatam ti ridaw para iti dakdakkel pay a pannakaawat.
Ikararagam ida babaen ti naganda. Kiddawem iti Nailangitan nga Ama a tulongannaka a mangpanunot kadagiti wagas a mangyasideg kadakuada iti Anakna.
Masansan a kasayaatan a malagip dagiti simple a sagut. Saan a masapul a nawadwad dagiti sagut tapno maayat. Ti sagut ti panawen, ti sagut ti panagdengngeg, panangibinglay iti ladawan wenno maysa a lagip—mabalin dagitoy amin a sagut ti puso.
Mangted iti sagut ti pammaneknek. Kiddawem kadakuada nga ibinglayda kenka iti ayatda ti Mangisalakan, ken idiayam nga ibinglaymo kadakuada ti ayatmo para Kenkuana.
Awisem dagiti dadduma pay a dumar-ay iti serbisio ti Paskua. Sumagmamano a tao ket kayatda iti agdaydayaw ngem saanda nga ammo no sadino ti papananda. Awisem ida a makipagdaydayaw a kaduadaka.
Punnuem dagiti pagtaenganda iti kappia. Ipakaammom kadakuada a dagiti misionario ket addaan iti naisangsangayan a mensahe ti Paskua a mabalinda nga ibinglay, maysa a mangisangbay iti namnama ken ayat kadagiti pusoda.

Panagministering iti Amin a kas Maysa a Kongregasion

Naidumduma dagiti kasapulan ti tunggal kongregasion. Mairanud ti sumagmamano manipud iti panangurnos iti dakdakkel nga aktibidad. Mairanud dagiti sabali pay a kongregasion manipud iti maysa a banag a babassit ken gagangay. Nainkararagan nga ibilang dagiti makiraman iti panagplano ken panagurnos kadagiti aktibidad no kasano a maipaay dagiti kasapulan a tumaud.

Timmulong a sumuporta dagiti miembro manipud iti tallo nga stake iti Paris, Pransia, iti Light the World soirée a nakairamanan iti maysa a talent show ken maysa a fashion show. Nangisaganada kadagiti aytem a naited kadagiti refugee ken tattao a makapadpadas iti kinaawan ti pagtaenganda.
Nangangay ti Charlotte North Carolina Central Stake iti pasken a “Paskua iti aglawlaw ti Lubong” para iti komunidad, nga addaan ti panagtitipon a pangrambak ken ni Cristo babaen kadagiti makmakan, panagipakita iti sangalubongan a kannawidan iti Paskua, musika, proyekto ti serbisio, ken ti pannakayanak dagiti ubbing.
Nakiraman dagiti miembro ti Vero Beach Florida Stake iti palagip iti komunidad no apay a rambakantayo ti Paskua. Naidonar dagiti abalbalay kadagiti charity iti komunidad. Maysa a koro dagiti ubbing iti Primary ti nagpabuya, ken addaan ti adu a simbaan iti puesto a pangipakitaanda iti impormasion.
Impabuya ti Jacksonville Florida South Stake ti maysa a produksion a Mangisalakan iti Lubong para iti komunidad.

© 2020 ti Intellectual Reserve, Inc. Nailatang amin a karbengan. Naimaldit iti EUA. Pannakaanamongna iti Ingles: 6/19. Pannakaanamongna a maipatarus: 6/19. Panakaipatarus ti Ministering Principles, December 2020. Ilocano. 16727 684