“Akacsruhi Kahlwem luhn Mwet Lahngo ke Krismas,” Liahona, Tisacmpuh 2020

Petsaciyucklac sel Niltza Beatriz Santillan Castilo; petsac ke mwe sang ke Getty Images

Ip Yohk ke Karihngihn, Tisacmpuh 2020

Akacsruhi Kahlwem luhn Mwet Lahngo ke Krismas

Nuhnkuh elos suc kom oruh karihngihnyuck lom nuh se. Kom ac oruh fuhkah kom in kahsrweltahl in muh fototoyang nuh sin Kraist ke Krismas se inge?

Ke kuht esam Mwet Lahngo Kraist ke yac nuhkwewa, Krismas pa sie puhlan pacl kuht ahkfuhlwactye yohk mwe sang se emet muh utuckuh: “Tuh God el lunges facluh ohinge, tuh el use wen sefanna isuslac nahtuhl” (John 3:16). Ke kuht karihngihn ke lwen Krismas, kuht oyacpac kuh in sang mwe sang ma kuh in kahsruh mwet sahyac in fototoyang nuh sin Mwet Lahngo. Wolacna in nuhnkuh kacsr sifacna oacna ke senngucni mwe sang utuckuh sin Pahpah tuhmasr Inkuhsrao uh.

Nga Srwackna Engankihn Mwe Sang

Susan Hardy, California, USA

Ke nga tuh yac 11 ah, mwet luti luhk ke Sacnri Skul, Tamuhwel Deets, fahk nuh sin kuhlahs lasr ah lah fin kuht esamyac Ip Yohk ke Luhlahlfongi ac ahkuhtweyac nuh sel lah meac kalmweyac, elac fah molelah puk in ma suhmuhslah nahtuhsr sifacna.

Tamuhlwel ac Tahmtahel Deets elos siyacnyacn fuhsr se, tuhfahna muhtwacwacack. Nga tiacna arlac nuhnkuh muh Tamuhwel Deets el kuh in molwelah mwe sang se inge nuh sin oacna sie. Tuhsruhk nga sulwaclah muh fin el nuhnkuh muh Ip Yohk ke Luhlahlfongi yohk srihpac in esamyucki, ngac fah srihkeyuc nuh kac.

Tukun nga ahksahfyelah nuhfohn ma 13 ah, pacl uh somlah ac nga muhlkuhnlah olwelah se lal ah.

Na, ke Lwen in Krismas ah, nga eis sie wanesr sihmlac inek kac. Nga ikucslah ac liyacack lah puk in ma sumuhslah se nuhtihk sifacna, wi pwepuh se sihmlac in ahkkweyeyuc in riti pacl nuhkwewa. Pacl sacn yac 1972, ac nuh ke lwen se mihsenge inge srwackna oasr sihk ma suhmuhslah inge. Ma se ingen sacohk sihk.

Tiac ma ke molin mwe sang sac tuhsruhk ma ke kuhlwacng el ahkkahlwemye nuh sihk ac kihsackuhnlah el eisaclang in oraclah nuh sihk ma use nuh sihk kena yohk luhk in lutlut ke kahs luhn God. Nga srihke in ukwe srihkasrak lal Tamuhlwel Deets ke karihngihn in sang mwe sang oasr kalmweyac nuh sin mwet sahyac rauniyuclac, finsraki tuh nga kuh in ahkinsewowoye moul lalos oacna ke el ahkinsewowoye yuc.

Solsol se in Oruh Ip La

Richard M. Romney, Utah, USA

Ke elos suc ma plwacni tuhkweni in Krismas ke ward lasr ah siyuck sihk in som muhtwacta yurin sie mempucr muhnahslah ac solwacl in wi tuhkuh nuh ke prokrwacm ah, ngacn fahk na pwacye lah nga tuhfal. Nga tuh ohsun met sel Darren pacl se fanna, ke el tuh wi sie toeni met ke ward lasr ah. El tuh orekmakihn atsuhmaki in skuter se ke insifacl. Aunsucf fasrfasr loeloes se lal ah kapriyucki an ahtaht ke sie karak, ahluht na loes fasrfasr se lal, ac pahol nwacnwaclah ke srihsrihng.

Inge, kamiti mempucr se wiyuc, nga tulac ke motonoac lal Darren ah, nuhnkuh lah meac ngac elac fahk. El siyuck tuh kuht in utyak nuh loac, ac kuht fahk nuh sel lah efuh kuht som nuh yohrohl. El fahk, “O, nga luhngse oruh ma sacn!”

El oraclah arulacna wo, kahsruh in oruh mukwikwi se lasr ah oasr kalmac nuh sin mwet puhkantwen. Kihtin pacl tok, nga ac mwet in karihngihn se wiyuc ah siyuckyuck tuh kuht in muhtwacta yohrohl Darren tahkuhnlah. El kwacna engan ke liye kuht ah, ac kuht oraclah sramsram na wowo yohrohl. Nga sruikihn nuhnak in moklweyuck se in sulwacl nuh in wi tuhkweni ke mukwiwi luhn ward lasr ah kolyucklac nuh ke sie kuhpahsr sacohk.

Karihngihn nuh sin Mwet Sahyac ke Krismas.

Pa inge kuhtuh sin ma kom kuh in oruh nuh sin elos suc ma kom karihngihn fah etuh lah kom nuhnkwaclos, yohkiyacna ke kain pacl se inge ke yac.

Kuhtuh pacl uh pahng kuh sihm lwacta oruh in ahknuhnakye. Sramtweyacn sie sramsram ke ma fihsrwacsr, “Paing kom, kom fuhkah?” kuh in oraclah sie eklac.
Wi som nuh ke ahkfuhlwact lalos fin kuh. Krismas uh kuh in pacl wowo se emet in lotwelah ke luhlahlfongi ma oasr sesr kewa. Ke kom akacsruhi luhlahlfongi ac porongo mwet sahyac, kom ikucslah sruhnguhl nuh ke kahlwem yohk.
Pruhe kaclos ke inelos. Siyuck sin Pahpah tuhmasr Inkuhsrao in kahsrwekom nuhnkweack inkacnwek in usacloseni in fototoyang nuh sin Wen Nahtuhl.
Mwe sang srihsrihk wacna esamyucki yohk. Mwe sang uh tiac enenuh in ahkkahlwemyeyuck in luhngseyuck. Mwe sang luhn pacl, mwe sang luhn porongo, akacsruhi ke sie petsac kuh mwe acsmakihn—ma inge kewa kuh in mwe sang luhn insiyac.
Sang mwe sang luhn testimony. Siyuck selos in akacsruhi luhngse kacn Mwet Lahngo nuh sum, ac sang in akacsruhi luhngse lom nuh Sel nuh selos.
Suli mwet sahyac in som wi tuhkweni ke Krismas. Kuhtuh mwet uh luhngse in ahkfuhlwact tuh tiac etuh lah elos ac som nuh oyac. Solwaclos in tuhkuh wi kom ahkfuhlwact.
Nwacklah lohm selos ke mihs. Lelah elos in etuh lah oasr pweng sacohk ke krismas ma misineri uh ahkoo in akacsruhi, sie ma fah use finsrak ac luhngse nuh insiaclos.

Karihngihn nuh sin Nuhkwewa Ekihn Sie U.

Enenuh luhn u in mwet nuhkwewa usrnguck. Kuhtuh ma wo ke oraclah sie mukwiwi yohk. U in mwet sahyac sahp wokihn sie ma srihsrihk ac fihsrwacsr. Elos suc wi plwacnwelah ac oraclah mukwikwi uh pruhe nuhnkuh lah ac oruh fuhkah enenuh ingacn in sikyak.

Mempucr ke stek tolu fin acn Paris, kahsruh ahkkweye sie parti luhlahp ke Tohlwack Fwacluh ma oasr ahkfahsryeyacn sie sro ke talan ac sie sro ke mwe nahweyuck. Elos ahkolah kuhfa ma ac ituckyang nuh sin mwet sukohsohklah ac mwet moulkihn wacngihn lohm se.
Charlotte North Carolina Central Stake ahkfahsrye sie mukwiki ke “Krismas raunweack Facluh” nuh ke mura lalos, wi sie tuhkweni in ahkfuhlwactye Kraist ke mongo, atacn facsin ke Krismas ke acn nuhkwewa, on, mukwikwi in kuhlwacnsap, ac ke sie ohiyacn tuhlihk srihsrihk.
Mempucr ke Vero Beach Florida Stake wi sie mwe ahkacsmakihn luhn sie mura kac lah efuh kuht ahkfuhlwactye Krismas. Mwe sritacl utucklac nuh ke mura ke acn in kihtakat. Choir luhn tuhlihk srihsrih ke Primary oruh ma kunwaclos, ac alu puhkantwen oasr acn lalos in ahkfahsrye mwe fahkwack lalos.
Jacksonville Florida South Lake Stake ahkfahsrye sie oreklac luhn Mwet Lahngo luhn Facluh nuh sin mura uh.

© 2020 sin Intellectual Reserve, Inc. Kuh ac suwohs nuhkwewa fihliyucki. Sihmlac fin acn USA. Ahkkweyeyucklac ke kahs English: 6/19. Ahkkweyeyucklac ke Lweng: 6/19. Lweng ke Ministering Principles, December 2020. Kosraean. 16727 868