“ການແບ່ງປັນແສງສະຫວ່າງຂອງພຣະຜູ້ຊ່ວຍໃຫ້ລອດໃນວັນຄຣິດສະມາດ,” Liahona, ເດືອນທັນວາ 2020
ຮູບການປະສູດໂດຍ ນິດຊາ ບີອາທຣີສ ຊານຕິຢານ ກາສຕີໂຢ; ຮູບຂອງຂວັນຈາກ Getty Images
ຫລັກທຳຂອງການປະຕິບັດສາດສະໜາກິດ, ເດືອນທັນວາ 2020
ການແບ່ງປັນແສງສະຫວ່າງຂອງພຣະຜູ້ຊ່ວຍໃຫ້ລອດໃນວັນຄຣິດສະມາດ
ໃຫ້ພິຈາລະນາກ່ຽວກັບຜູ້ທີ່ທ່ານປະຕິບັດສາດສະໜາກິດຕໍ່. ທ່ານສາມາດຊ່ວຍເຂົາເຈົ້າໃຫ້ເຂົ້າໃກ້ພຣະຄຣິດຫລາຍຍິ່ງຂຶ້ນໄດ້ແນວໃດໃນວັນຄຣິດສະມາດນີ້?
ໃນຂະນະທີ່ພວກເຮົາລະນຶກເຖິງພຣະຜູ້ຊ່ວຍໃຫ້ລອດ ພຣະເຢຊູຄຣິດ ຕະຫລອດທັງປີ, ຄຣິດສະມາດແມ່ນເທດສະການທີ່ພວກເຮົາສະຫລອງຂອງຂວັນທີ່ຍິ່ງໃຫຍ່ທີ່ສຸດທີ່ຖືກປະທານໃຫ້: “ເພາະພຣະເຈົ້າຮັກໂລກຫລາຍແທ້ ຈົນໄດ້ປະທານພຣະບຸດອົງດຽວຂອງພຣະອົງ” (ໂຢຮັນ 3:16). ດັ່ງທີ່ພວກເຮົາປະຕິບັດສາດສະໜາກິດໃນວັນຄຣິດສະມາດ, ພວກເຮົາກໍສາມາດໃຫ້ຂອງຂວັນຕ່າງໆທີ່ສາມາດຊ່ວຍໃຫ້ຄົນອື່ນເຂົ້າໃກ້ພຣະຜູ້ຊ່ວຍໃຫ້ລອດຫລາຍຂຶ້ນໄດ້. ເປັນສິ່ງທີ່ວິເສດຫລາຍທີ່ຄິດວ່າຕົວເຮົາສະທ້ອນເຖິງຂອງຂວັນທີ່ພຣະບິດາເທິງສະຫວັນຊົງປະທານໃຫ້.
ຂ້າພະເຈົ້າຍັງຄົງທະນຸຖະໜອມຂອງຂວັນນັ້ນ
ຊູຊານ ຮາດີ, ແຄລິໂຟເນຍ, ສະຫະລັດອາເມຣິກາ
ຕອນທີ່ຂ້າພະເຈົ້າອາຍຸ 11 ປີ, ຄູສອນໂຮງຮຽນວັນອາທິດ, ບຣາເດີ ດີສ, ໄດ້ບອກຫ້ອງຂອງພວກເຮົາວ່າ ຖ້າພວກເຮົາຈື່ຫລັກແຫ່ງຄວາມເຊື່ອ ແລະ ອະທິບາຍໃຫ້ລາວຟັງວ່າ ນັ້ນໝາຍຄວາມວ່າຫຍັງ, ລາວຈະຊື້ພຣະຄໍາພີໃຫ້ພວກເຮົາແຕ່ລະຄົນໜຶ່ງຊຸດ.
ບຣາເດີ ແລະ ຊິດສະເຕີ ດີສ ເປັນຄູ່ສາມີພັນລະຍາທີ່ຫາກໍແຕ່ງງານໃໝ່. ຂ້າພະເຈົ້າບໍ່ແນ່ໃຈວ່າ ບຣາເດີ ດີສ ຈະສາມາດຊື້ຂອງຂວັນໃຫ້ໃຜໄດ້ບໍ່. ແຕ່ຂ້າພະເຈົ້າຕັດສິນໃຈວ່າ ຖ້າລາວຄິດວ່າຫລັກແຫ່ງຄວາມເຊື່ອສໍາຄັນພໍໃຫ້ຈື່, ຂ້າພະເຈົ້າຈະຮັບເອົາການທ້າທາຍນີ້.
ຫລັງຈາກທີ່ຂ້າພະເຈົ້າສໍາເລັດທັງ 13 ຂໍ້ແລ້ວ, ເວລາຜ່ານໄປ ແລະ ຂ້າພະເຈົ້າໄດ້ລືມກ່ຽວກັບຄໍາສັນຍາຂອງລາວ.
ແລ້ວໃນວັນຄຣິດສະມາດ, ຂ້າພະເຈົ້າໄດ້ຮັບພັດສະດຸທີ່ມີຊື່ຂອງຂ້າພະເຈົ້າ. ຂ້າພະເຈົ້າເປີດກ່ອງ ແລ້ວພົບພຣະຄໍາພີໜຶ່ງຊຸດສໍາລັບຂ້າພະເຈົ້າໂດຍສະເພາະ, ພ້ອມດ້ວຍຈົດໝາຍນ້ອຍທີ່ຊູໃຈໃຫ້ຂ້າພະເຈົ້າອ່ານມັນເປັນປະຈໍາ. ນັ້ນແມ່ນປີ 1972, ແລະ ຈົນເຖິງມື້ນີ້ ຂ້າພະເຈົ້າຍັງມີພຣະຄໍາພີເຫລົ່ານັ້ນຢູ່. ພວກມັນມີຄ່າສໍາລັບຂ້າພະເຈົ້າຫລາຍ.
ບໍ່ແມ່ນລາຄາຂອງຂອງຂວັນ ແຕ່ແມ່ນຄວາມໃຈດີທີ່ລາວໄດ້ສະແດງຕໍ່ຂ້າພະເຈົ້າ ແລະ ການເສຍສະລະທີ່ລາວເຕັມໃຈເຮັດເພື່ອຂ້າພະເຈົ້າ ຊຶ່ງເຮັດໃຫ້ຂ້າພະເຈົ້າມີຄວາມປາດຖະໜາຢ່າງເລິກເຊິ່ງທີ່ຈະສຶກສາພຣະຄໍາຂອງພຣະເຈົ້າ. ຂ້າພະເຈົ້າພະຍາຍາມທີ່ຈະເຮັດຕາມແບບຢ່າງຂອງບຣາເດີ ດີສ ໂດຍການໃຫ້ຂອງຂວັນທີ່ມີຄວາມໝາຍຕໍ່ຜູ້ຄົນທີ່ຢູ່ອ້ອມຕົວຂ້າພະເຈົ້າ, ໂດຍຫວັງວ່າຂ້າພະເຈົ້າຈະສາມາດເປັນພອນໃຫ້ແກ່ຊີວິດຂອງຄົນອື່ນ ດັ່ງທີ່ລາວໄດ້ເປັນພອນໃຫ້ແກ່ຊີວິດຂອງຂ້າພະເຈົ້າ.
ການເຊື້ອເຊີນໃຫ້ຮັບບົດເປັນສ່ວນໜຶ່ງ
ຣິເຈີດ ເອັມ ຣອມນີ, ຢູທາ, ສະຫະລັດອາເມຣິກາ
ເມື່ອຜູ້ທີ່ວາງແຜນຈັດງານຄຣິດສະມາດຢູ່ຫວອດຂອງພວກເຮົາ ຂໍໃຫ້ຂ້າພະເຈົ້າໄປຢ້ຽມຢາມສະມາຊິກຄົນໜຶ່ງທີ່ບໍ່ເຂັ້ມແຂງໃນໂບດ ແລະ ເຊື້ອເຊີນລາວໃຫ້ມາເຂົ້າຮ່ວມໃນໂຄງການ, ຂ້າພະເຈົ້າຕ້ອງຂໍຍອມຮັບວ່າ ຂ້າພະເຈົ້າຮູ້ສຶກໜັກໃຈ. ຂ້າພະເຈົ້າເຄີຍພົບກັບແດເຣັນພຽງແຕ່ເທື່ອດຽວເທົ່ານັ້ນ, ຕອນທີ່ລາວເຂົ້າຮ່ວມໃນກິດຈະກໍາຂອງຫວອດກ່ອນໜ້ານີ້. ລາວໃສ່ຜ້າພັນຫົວລົດຈັກພາດໜ້າຜາກຂອງລາວ. ຜົມຍາວໆສີຂາວຂອງລາວຖືກມັດເປັນຊົງຫາງມ້າ, ລາວມີໜວດທີ່ເປັນສີຂາວລ້ວນ, ແລະ ແຂນຂອງລາວກໍເຕັມໄປດ້ວຍຮອຍສັກ.
ບັດນີ້, ພ້ອມດ້ວຍສະມາຊິກຄະນະກໍາມະການ, ຂ້າພະເຈົ້າກໍາລັງຢືນຢູ່ໜ້າປະຕູເຮືອນຂອງແດເຣັນ, ດ້ວຍຄວາມສົງໄສວ່າລາວຈະເວົ້າຫຍັງ. ລາວບອກໃຫ້ພວກເຮົາເຂົ້າໄປທາງໃນ, ແລະ ພວກເຮົາບອກລາວວ່າ ພວກເຮົາມານີ້ເຮັດຫຍັງ. ລາວເວົ້າວ່າ, “ໂອ, ຂ້ອຍຢາກເຮັດ!”
ລາວເຮັດວຽກໄດ້ດີຫລາຍ, ໃນການຊ່ວຍເຮັດໃຫ້ກິດຈະກໍານີ້ມີຄວາມໝາຍສໍາລັບຫລາຍໆຄົນ. ຫລັງຈາກນັ້ນບໍ່ດົນ, ຄູ່ປະຕິບັດສາດສະໜາກິດຂອງຂ້າພະເຈົ້າ ແລະ ຂ້າພະເຈົ້າ ໄດ້ຖືກຂໍໃຫ້ໄປຢ້ຽມຢາມແດເຣັນເປັນປະຈໍາ. ລາວເບິ່ງຄືວ່າດີໃຈຫລາຍທີ່ໄດ້ພົບພວກເຮົາ, ແລະ ພວກເຮົາກໍໄດ້ມີການສົນທະນາທີ່ໜ້າຊື່ນບານໃຈຫລາຍ. ຂ້າພະເຈົ້າຮູ້ສຶກຂອບຄຸນສຳລັບແຮງບັນດານໃຈໃນການເຊື້ອເຊີນລາວໃຫ້ເຂົ້າຮ່ວມໃນໂຄງການຂອງກິດຈະກໍາຫວອດ ຊຶ່ງນໍາໄປສູ່ຄວາມສໍາພັນທີ່ໜ້າຫວງແຫນ.
ການປະຕິບັດສາດສະໜາກິດຕໍ່ຄົນອື່ນໃນວັນຄຣິດສະມາດ
ຕໍ່ໄປນີ້ແມ່ນບາງສິ່ງທີ່ທ່ານສາມາດເຮັດໄດ້ ເພື່ອໃຫ້ແນ່ໃຈວ່າຜູ້ທີ່ທ່ານກໍາລັງປະຕິບັດສາດສະໜາກິດຕໍ່ ຈະຮູ້ວ່າທ່ານກໍາລັງຄິດເຖິງເຂົາເຈົ້າ, ໂດຍສະເພາະໃນເວລານີ້ຂອງປີ.
-
ບາງເທື່ອການໂທຫາ ຫລື ການສົ່ງຂໍ້ຄວາມກໍສ້າງອັດສະຈັນໄດ້. ການເລີ່ມການສົນທະນາດ້ວຍຄໍາທີ່ລຽບງ່າຍເຊັ່ນ “ສະບາຍດີ, ເປັນແນວໃດສະບາຍດີບໍ່?”ກໍສາມາດສ້າງຄວາມແຕກຕ່າງໄດ້.
-
ເຂົ້າຮ່ວມໃນການສະຫລອງຂອງເຂົາເຈົ້າເມື່ອເໝາະສົມ. ຄຣິດສະມາດສາມາດເປັນເວລາທີ່ດີຫລາຍທີ່ຈະຮຽນຮູ້ກ່ຽວກັບຄວາມເຊື່ອຖືທີ່ພວກເຮົາມີຄືກັນ. ເມື່ອທ່ານແບ່ງປັນຄວາມເຊື່ອຖື ແລະ ຟັງຄົນອື່ນ, ທ່ານກໍເປີດປະຕູສູ່ຄວາມເຂົ້າໃຈທີ່ຍິ່ງໃຫຍ່.
-
ອະທິຖານເພື່ອເຂົາເຈົ້າໂດຍການອອກຊື່. ທູນຂໍໃຫ້ພຣະບິດາເທິງສະຫວັນຊ່ວຍໃຫ້ທ່ານຄິດເຖິງວິທີນໍາພາເຂົາເຈົ້າໃຫ້ເຂົ້າໃກ້ພຣະບຸດຂອງພຣະອົງຫລາຍຍິ່ງຂຶ້ນ.
-
ຂອງຂວັນທີ່ລຽບງ່າຍມັກຈະເປັນທີ່ຈົດຈໍາຫລາຍທີ່ສຸດ. ຂອງຂວັນບໍ່ຈໍາເປັນຕ້ອງຊັບຊ້ອນເພື່ອໃຫ້ເປັນທີ່ຮັກ. ຂອງຂວັນແຫ່ງເວລາ, ຂອງຂວັນແຫ່ງການຟັງ, ການແບ່ງປັນຮູບພາບ ຫລື ຄວາມຊົງຈໍາ—ສິ່ງທັງໝົດເຫລົ່ານີ້ສາມາດເປັນຂອງຂວັນແຫ່ງຈິດໃຈໄດ້.
-
ໃຫ້ຂອງຂວັນແຫ່ງປະຈັກພະຍານ. ຂໍໃຫ້ເຂົາເຈົ້າແບ່ງປັນຄວາມຮັກທີ່ເຂົາເຈົ້າມີຕໍ່ພຣະຜູ້ຊ່ວຍໃຫ້ລອດກັບທ່ານ, ແລະ ໃຫ້ສະເໜີແບ່ງປັນຄວາມຮັກທີ່ທ່ານມີຕໍ່ພຣະອົງກັບເຂົາເຈົ້າ.
-
ເຊື້ອເຊີນຜູ້ອື່ນໃຫ້ເຂົ້າຮ່ວມງານຄຣິດສະມາດ. ບາງຄົນຢາກນະມັດສະການ ແຕ່ບໍ່ຮູ້ວ່າຈະໄປໃສ. ເຊື້ອເຊີນເຂົາເຈົ້າໃຫ້ເຂົ້າມານະມັດສະການກັບທ່ານ.
-
ເຕີມເຕັມບ້ານຂອງເຂົາເຈົ້າດ້ວຍສັນຕິສຸກ. ໃຫ້ເຂົາເຈົ້າຮູ້ວ່າ ຜູ້ສອນສາດສະໜາມີຂ່າວສານຄຣິດສະມາດທີ່ພິເສດທີ່ເຂົາເຈົ້າສາມາດແບ່ງປັນໄດ້, ຊຶ່ງເປັນຂ່າວສານທີ່ຈະນໍາຄວາມຫວັງ ແລະ ຄວາມຮັກມາສູ່ຈິດໃຈຂອງເຂົາເຈົ້າ.
ການປະຕິບັດສາດສະໜາກິດຕໍ່ທຸກຄົນເປັນກຸ່ມໃຫຍ່.
ຄວາມຕ້ອງການຂອງແຕ່ລະກຸ່ມແມ່ນບໍ່ຄືກັນ. ບາງກຸ່ມໄດ້ປະໂຫຍດຈາກການຈັດກິດຈະກໍາທີ່ໃຫຍ່ໂຕ. ບາງກຸ່ມອາດໄດ້ປະໂຫຍດຈາກສິ່ງເລັກນ້ອຍ ແລະ ລຽບງ່າຍ. ຜູ້ທີ່ກ່ຽວຂ້ອງກັບການວາງແຜນ ແລະ ການຈັດກິດຈະກໍາ ພິຈາລະນາດ້ວຍການອະທິຖານວ່າຈະເຮັດຢ່າງໃດເພື່ອຕອບສະໜອງຄວາມຕ້ອງການທີ່ມີຢູ່.
-
ສະມາຊິກຈາກສາມສະເຕກໃນປາຣີສ, ປະເທດຝຣັ່ງ, ໄດ້ຊ່ວຍສະໜັບສະໜຸນໂຄງການເຮັດໃຫ້ໂລກສະຫວ່າງ ຊຶ່ງລວມທັງການສະແດງຄວາມສາມາດ ແລະ ເດີນແຟຊັ້ນໂຊ. ເຂົາເຈົ້າໄດ້ກະກຽມສິ່ງຂອງທີ່ໄດ້ມອບໃຫ້ແກ່ຊາວອົບພະຍົບ ແລະ ຜູ້ຄົນທັງຫລາຍທີ່ກໍາລັງປະສົບກັບຄວາມພະເນຈອນ.
-
ສະເຕກຊາລ໊ອດ ນ໊ອດຄາໂຣໄລນາ ເຊັນທຣັລ ໄດ້ຈັດງານ “ຄຣິດສະມາດໃນທັງທົ່ວໂລກ” ສໍາລັບຊຸມຊົນ, ດ້ວຍການສັງສັນທີ່ສະເຫລີມສະຫລອງພຣະຄຣິດຜ່ານທາງອາຫານ, ການສະແດງຄຣິດສະມາດພື້ນເມືອງນານາຊາດ, ດົນຕີ, ໂຄງການຮັບໃຊ້, ແລະ ການສະແດງການປະສູດຂອງກຸ່ມເດັກນ້ອຍ.
-
ສະມາຊິກທັງຫລາຍຈາກສະເຕກເວໂຣບີຈ໌ ຟລໍຣິດາ ໄດ້ເຂົ້າຮ່ວມໃນການຢໍ້າເຕືອນຊຸມຊົນວ່າ ເປັນຫຍັງເຮົາຈຶ່ງສະຫລອງວັນຄຣິດສະມາດ. ຂອງຫລິ້ນໄດ້ຖືກບໍລິຈາກໃຫ້ແກ່ອົງກອນການກຸສົນຕ່າງໆໃນຊຸມຊົນ. ກຸ່ມຮ້ອງເພງປະສານສຽງຈາກເດັກນ້ອຍປະຖົມໄວໄດ້ຂຶ້ນສະແດງ, ແລະ ຫລາຍໆໂບດໄດ້ຕັ້ງໂຕະວາງເຄື່ອງສະແດງຂໍ້ມູນ.
-
ສະເຕກແຈັກສັນວີວ ຟລໍຣິດາໃຕ້ ໄດ້ນໍາສະເໜີການສະແດງ ພຣະຜູ້ຊ່ວຍໃຫ້ລອດຂອງໂລກ ສຳລັບຊຸມຊົນ.
© 2020 by Intellectual Reserve, Inc. All rights reserved. ຈັດພິມໃນສະຫະລັດອາເມຣິກາ. ສະບັບເປັນພາສາອັງກິດໄດ້ຮັບອະນຸຍາດ: 6/19. ການແປໄດ້ຮັບອະນຸຍາດ: 6/19. ແປຈາກ Ministering Principles, December 2020. Laotian. 16727 331