“Kasalehda Marain en Sounkomouro nan Krismas,” Liahona, Tihsempe 2020

Kilel en ipwidi en Krais sang Niltza Beatriz Santillan Castillo; kilel en kisakis sang Getty Images

Padahk kan en Papah, Tihsempe 2020

Kasalehda Marain en Sounkomouro nan Krismas

Taman irail akan me kumwail kin papah. Ia mwomwen amwail kak sewese irail en kak karaniala Krais nan Krismas wet?

Mendahte atail kin tamataman Sounkomour Sises Krais pahr ehu pwon, Krismas wia ahnsou ehu me kitail kin kataman kisakis keieu laud me kohieng kitail iei: “Pwe iei wen Koht eh loaloale sampah, me e ketikihdohki sapwelime Ieros” (Sohn 3:16). Ni atail kin wia pwukoah doadoahk en papah nan Krismas, kitail pil kak kiheng mehteikan kisakis me pahn kak sewese irail en karaniala Sounkomouro. E kesempwal ni atail pahn kin medewe pein kitail karasahieng kisakis me kohsang Samatail Nanleng.

I Keskesemwpwalkihte Kisakiso

Susan Hardy, California, USA

Ni ansou me ih sounpar 11, ahi sounpadahk en Santi Skuhl, Brother Deets, patohwanehng kiht me ma se pahn wadlikiala Iren Pwoson akan oh kawehweiong ih kawehwehperail, e pahn patohwan pwainehng kiht pein nait pwuhk sarawi.

Brother oh Sister Deets wia pwopwoud pwulopwul ehu, me ahpwte tepda. I sehse ma Brother Deets pahn kak pwainda kisakis ong aramas. Ahpw i pilada me ma e medemedewe me Iren Pwoson Akan kesempwal en wadlikiala, i pahn alehda oh wia.

Mwurin ai kanekehla meh 13, e mwur wereilahr oh i manokehla inou me e wiahdahu.

Eri, ni rahn en Krismaso, i alehdi kakon ehu me edeio inting powe. I kihpeseng kakono ngehi diarada pwuhk sarawi kei me ongie, iangahki kisin kard kis me kakehlailihkinie ien kin kalapw wadek. Me me wiawi ni pahr 1972 , oh leledo rahnwet i kolokolete pwuhk sarawihko. Pwuhk sarawi pwukat inenen kesempwal ong ie.

Kaidehn pwehki pweinen kisakiso ahpw pwehki kadek me e kasalehiongie oh meirong me e inengiong en wiahiongie me kahrehda ahi kak ahneki ineng laud en onopiki mahsen en Koht. I kin alasang karasaras en Brother Deets me pid doadoahk en papah ong mehteikan sang ni ahi kin kihong irail kisakis me mie katepe oh kin kasik me ih pahn kak kapaiada arail mour me duwehte kapai me i alehsang ih.

Luhk en iang Wia Mekot

Richard M. Romney, Utah, USA

Ni ansou me irail akan me kin kaukaunop pilahn en Krismas en aht ward peki rehi ien pwarek emen me luet oh lukehiong en iang patehng kemwekido, udahn i kasalehda me i saloh. I tuhwongehr Darren pak ehu rahnteio, ansou me e iang ehu kemwekid en wardo. E mware ehu dipwisouhn soun dak skuhder pohn moangehu. Piten monge pwetepwet reirei lemispene, alis pwetepwet, oh peh kan lipwalipwkihla pelipel.

Met, ngehi oh iengei emen ohl keskesihnen ni eh wenihmwo, medemedewe dahme e pahn nda. E peki sen doulong, kiht eri indahng dahme se kohkihla reh. E nda, “Oh, udahn i men iang!”

E wia doadoahk kaselel rahno, ni ah sewese kemwekid en rahno en kesempwal oh katapan ong me tohto. Ansou kis mwuri, pekpek kohieng ngehi oh iengeio en kin kalapw pwarek Darren. E sansal me e kin pereniki kilang kiht, oh se kin koasoaikipene koasoai mwahu tohto. I kapingki luhk me kohieng ih en iang patehng kemwekid en wardo me elehda soangen whewehpene mwahu ehu ah mie.

Doadoahk en Papah ong Mehteikan nan Krismas

Iet soahng kan me kumwail kak wia me pahn kahrehiong irail akan me kumwail kin pwarek en ese me kumwail kin medemedewe irail, ahpw mehlel nan ahnsou en nan pahr wet.

Ekei pak ma pil koahlte de pil inting kak wia mehkot kopwuriamwei. Tepikihda kisin koasoi mengei me ketihtihki “Kaselel, iairomw?” kak wia wekidekla ehu rehrail.
Iang patehng arail kaperen ahnsou me konehng. Rahn en Krismas wia ehu ansou mwahu en esehla soahng kan me kitail kin kamehlele me duwepene. Ni ansou me kumwail ehukipene dahme kumwail kin kamehlele oh rong mehteikan, keumwail kin ritingada wenihmw ong kamarain laud.
Kapakap kin irail ki adarail kan. Peki rehn Sahm Nanleng en sewesehkin kumwail ahl akan me kumwail kak sewesehkin irail en karaniala Sapwelime Iehros.
Kisin kisakis mengei kan kin mengei en tamataman. Kisakis sohte anahne en kin laud pwehn mie kesempwalpe. Kisakis en ahnsou, kisakis en rongorong, ehukipenehn kilel de iren kataman—soahng pwukat koaros kak wia kisakis akan en mohngiong.
Kasalehda kisakis en kadehdeh. Peki irail en ehukihong kumwail arail limpoak ong Sounkomouro, oh peki ken pil ehukihong irail ahmw limpoak ong Ih.
Lukehiong mehteikan en iang towehda sarawi en Krismas. Ekei aramas kin men sarawi ahpw sehse iawasa irail pahn kohla ie. Lukehiong irail en iang kumwail sarawi.
Audehkihda imwarail kan meleilei. Kehsehkin irail me mie padahk kesempwal en Krismas me misineri kan kak ehukihong irail, me pahn wahdo koapwoaroapwoar oh limpoak nan arail mohngiong kan.

Doadoahk en Papah ong Koaros nan ansou en Kapokon en Kaudok kan

Anahn en ehu ehu kapokon en kaudok kan kin wekpeseng. Ekei kin pweida sang ni koasoanepen koasoanehdi kemwekid laud. Ah ekei kin kak pweida sang ni mehkot tikitik oh mengei. Irail akan me kin kaunopada kapokon kan kin kapakapki mwomwen arail kak apwalih anahn akan me mie.

Irail tohn Steik siluh en Paris, France, sawaspene oh utung kapokon en Light the World ehu me audaukihda kasale koahiek kan oh mehkot me kahpw. Irail kaunopadahr soahng kei me kohieng irail akan me idihdieng en mwesel sang sapwerail kan oh irail akan me sohte wasahn arail kousoan.
Steik en Charlotte Central wia, “Krismas wasa koaros nan Sampah” kemwekid ong kousapw, ni arail kamadipwki Krais sang ni arail doadoahngki mwenge, mehn kapwar de kasansal en tiahk kan en Krismas, koul, proatek kan, oh koasoiepen en seri men wasa me e ipwisang ie.
Toweh kan en Steik en Vero Beach Florida towehda kousapw ehu me wia kataman en dahme karehda kitail kin kawauwih Krismas. Mehn mwadong kan kin kohieng kousapw akan ni wiepen sawas. Seri en Primary kan wia arail koul, oh diren mowmwohdiso mie peihn arail kisin wasa en kasale iren kaweid kan.
Steik en Pali Kapi en Jacksonville Florida kasalehda Sounkomour en Sampah wiawihda ong weipokon.

© 2020 sang Intellectual Reserve, Inc. Kolokol pwuhng koaros. Intingda nan USA. Kamanaman ong ni lokaiahn Wai: 6/19. Kamanaman ong kawehwe: 6/19. Kawehwehpen Padahk kan en Papah, Tihsempe 2020. Pohnpeian. 16727 885