« Te fa’a’itera’a i te māramarama o te Fa’aora i te tau Noela », Liahona, Tītema 2020

Hōho’a nō te fanaura’a nā Niltza Beatriz Santillan Castillo ; hōho’a nō te hōro’a, nā Getty Images

Te mau parau tumu nō te aupurura’a, Tītema 2020

Te fa’a’itera’a i te māramarama o te Fa’aora i te tau Noela

’A feruri i te mau ta’ata ’o tā ’oe e aupuru nei. Nāhea e ti’a ia ’oe ’ia tauturu ia rātou ’ia ha’afātata atu ā i te Mesia i teie tau Noela ?

Noa atu ā e ha’amana’o tātou i te Fa’aora ’o Iesu Mesia i te matahiti tā’āto’a, ’o te tau Noela te taime e fa’ahanahana ai tātou i te tao’a hōro’a hau atu i te rahi i hōro’ahia mai ra : « I aroha mai te Atua i tō te ao, ’e ’ua tae roa i te hōro’a mai i tāna Tamaiti fānau tahi » (Ioane 3:16). ’A aupuru ai tātou i te ta’ata i roto i te tau Noela, e ti’a ato’a ia tātou ’ia pūpū atu i te tahi mau hōro’a ’o tē tauturu ’ia ha’afātata atu ā i te Fa’aora. E mea fa’ahiahia ’ia feruri ia tātou iho mai te fa’ahōho’ara’a i te tao’a hōro’a i hōro’ahia mai e te Metua i te Ao ra.

Tē poihere noa nei au i teie tao’a hōro’a

Susan Hardy, California, Fenua Marite

I te 11ra’a o tō’u matahiti, ua parau mai te taea’e ra ’o Deets, tō’u ’orometua Ha’api’ira’a Sābati, i roto i ta mātou piha ha’api’ira’a ē, ’ia tamau ’ā’au mātou i te mau Hīro’a Fa’aro’o ma te fa’ata’a atu iāna i te aura’a, e ho’o mai ’oia nā mātou tāta’itahi i te mau papa’ira’a mo’a.

E nau ta’ata fa’aipoipo ’āpī te taea’e ’e te tuahine ra Deets, ’a tahi ra rāua i ha’amata ai. ’Aita roa vau i papu ē, e ti’a anei i te taea’e ra ’o Deets ’ia ho’o mai i te tahi noa atu tao’a hōro’a. ’Ua fa’aoti ra vau ē, mai te mea ē, ’ua mana’o ’oia ē, e mea faufa’a i te tāmau ’ā’au i te mau Hīro’a Fa’aro’o, e fāri’i ïa vau i teie fa’auera’a.

I te hopera’a iā’u i nā hīro’a fa’aro’o 13, ’ua mo’e roa ïa iā’u tāna fafaura’a.

’E i te mahana Noela ra, ’ua fāri’i au i te tahi pū’ohu ’ua pāpa’ihia tō’u i’oa i ni’a iho. I to’u ’īritira’a i taua pū’ohu ra, ’ua ’ite au i te tahi tau pu’e pāpa’ira’a mo’a nā’u ’e te hoē tāreta fa’aitoitora’a iā’u i te tai’o tāmau noa i te reira. I tupu na te reira i te matahiti 1972, ē tae roa mai i teie nei mahana, tē vai noa nei ā taua mau pāpa’ira’a mo’a ra. E mea faufa’a roa nō’u.

E ’ere nō te ho’o o taua tao’a hōro’a ra, nō tōna rā maita’i iā’u nei ’e nō te tusia ’o tāna ato’a ho’i i rave, ’ua hōro’a mai te reira i te hina’aro hōhonu e ha’api’i ’e e ’apo mai i te parau a te Atua. ’Ua fa’aitoito vau i te pe’e atu i te hi’ora’a a te taea’e ra ’o Deets nō te aupurura’a mā te hōro’a i te mau tao’a faufa’a rahi nō te feia e hā’ati nei iā’u, ma te ti’aturi ē, e nehenehe ato’a vau e ha’amaita’i i te orara’a a vetahi ’ē mai tāna ato’a ho’i i ha’amaita’i iā’u.

Hō’ē tītaura’a ’ia ha’uti i te tahi tuha’a

Richard M. Romney, Utah, Fenua Marite

I te anira’a mai te pupu fa’anaho ’ohipa ri’i nō te Noela a te pāroita ’ia hāhaere i te hō’ē melo māuiui mā te tītau atu iāna ’ia ’amui mai i teie ’ohipa, ’aita e ha’avare, ’ua huru pe’ape’a roa vau. Hō’ē noa taime to māua Darren fārereira’a i muta’a ra, i te taime ’a ’amui a’e ’oia i roto i te tahi fa’a’oa’oara’a paroita. E tā’amu upo’o feiā fa’ahoro moto i ni’a i tōna rae. ’Ua tā’amuhia tōna rouru ’uo’uo mai tō te ’āero fanau’a pua’ahorofenua te huru, ’ua rahi roa tōna huruhuru ta’a ’uo’uo, ’e ’ua tātauhia tōna nā rima to’opiti.

I teienei rā, ’ua ’ape’e mai te hō’ē melo o te tōmite iā’u, ’e tē ti’a ra vau i mua i te ’ūputa fare ’o Darren, ma te uiui ē e aha te mea tāna e parau mai. ’Ua parau mai ’oia ia māua ’ia tomo mai i roto i tōna fare, ’e ’ua parau māua e aha mau te tumu nō tō maua tere iāna ra. ’Ua parau mai ra ’oia ē : « ’Auē ho’i ē, mea au roa nā’u ’ia rave i te reira ! »

’Ua rave ’oia i te tahi ’ohipa fa’ahiahia roa, ’e ’ua faufa’ahia te ’ohipa nō te feiā e rave rahi. Tau taime poto noa i muri mai, ’ua anihia ia māua tō’u hoa aupuru ’ia hāhaere tāmau ia Darren. E au ra ē, ’e ’oa’oa noa ’oia ’ia ’ite mai ’oia ia māua, ’e ’ua tupu te tahi mau ’aparaura’a maita’i roa. Tē ’oa’oa nei au ē maoti te fa’aurura’a nō te tītaura’a manihini iāna ’ia ’amui mai i roto i te fa’anahora’a ’ohipa a te paroita i tupu ai teie tā’amura’a iti.

Te aupurura’a ia vetahi ’ē i roto i te tau Noela

Teie te tahi mau fa’anahora’a e nehenehe ia ’outou ’ia rave nō te ha’apāpū i te feiā ’o tā ’outou e aupuru nei ē, tē māna’ona’o nei ’outou ia rātou, i roto iho ā rā i teie taime ta’a ’ē o te matahiti.

Te tahi taime, e niuniu ’outou ’āore rā, e pāpa’i atu i te tahi poro’i ’a hāpono atu ai nā roto i te niuniu parauparau. Ha’amata i te ’āparaura’a nā roto i teie parau ’ōhie : « E to’u hoa, e aha to ’oe huru ? », penei a’e e tupu mai te tahi mea ta’a ’ē.
’A ’amui atu i roto i tā rātou mau fa’a’oa’oara’a ’ia tano ana’e te reira. Te tau Noela, e nehenehe e riro ’ei taime fa’ahiahia roa nō te ’ite mai e aha tō te ta’ata ti’aturira’a mai tō tātou nei. ’Ia fa’a’ite ana’e ’outou i tō ’outou ti’aturira’a ’e ’ia fa’aro’o ’outou ia vetahi ’ē, tē ’īriti ra ïa ’outou i te ’ūputa nō te hāro’aro’a hau atu i te rahi.
’A pure nō rātou mā te fa’ahiti i tō rātou i’oa. ’A ani i te Metua i te Ao ra ’ia tauturu mai ’oia ia ’outou nō te feruri i te mau rāve’a e au nō te ha’afātata ia rātou i tāna Tamaiti.
Pinepine te mau tao’a ’ōhie tē ha’amana’o-maita’i-hia. ’Aita e tītauhia te tao’a hōro’a ’ia rahi roa ’ia auhia atu. Te hōro’a nō te taime, te hōro’a nō te fa’aro’ora’a, te hōro’ara’a i te hō’ē hōho’a ’aore rā te tahi ha’amana’ora’a—e nehenehe ’ia parauhia e mau hōro’a teie nō roto mai i te ’ā’au.
’A hōro’a i te tao’a nō te ’itera’a pāpū. ’A ani ia rātou ’ia fa’a’ite mai ia ’outou i tō rātou here nō te Fa’aora, ’e ’a fa’a’ite ato’a atu ’outou i tō ’outou here nōna.
’A tītau manihini i te ta’ata ’ia haere mai i roto i te hō’ē ’amuira’a Noela. Tē hina’aro nei te tahi mau ta’ata e haere i te purera’a, ’aore rā rātou i ’ite ē, i hea mau rātou e haere ai. ’A tītau mai ia rātou ’ia haere ’amui ’e ’outou i te purera’a.
’A fa’a’ī i te hau i roto i tō rātou fare. ’A fa’a’ite ia rātou ē, tē vai ra te tahi mau poro’i Noela ta’a ’ē tā te mau misiōnare e hōro’a mai, e poro’i teie tei fa’atupu i te ti’aturira’a ’e te here i roto i tō rātou ’ā’au.

Te aupurura’a i te tā’āto’ara’a ’ei ’amuira’a

Mea ta’a ’ē te mau hina’aro o te mau ’amuira’a tāta’itahi. Tē vai ra tei fāri’i te maita’i nā roto i te fa’anahora’a i te tahi fa’a’oa’oara’a ’āmui. E fāna’o te tahi atu mau ’amuira’a nā roto i te iti ’e te ’ōhie. Te feiā e ’ōpua ’e e fa’anaho nei i te mau fa’a’oa’oara’a, e hi’o rātou nāhea ’ia noa’a ’ia rātou i te fāna’ora’a i te mau hina’aro e vai nei.

’Ua tauturu te mau melo o nā titi to’otoru nō Paris, i Farāni, i te hō’ē ’aru’i Tūramara’a i te Ao ’e te fa’anahora’a i te tahi mau fa’a’itera’a tālēni ’e te tahi fa’a’ite’itera’a ’ahu ’āpī. ’Ua fa’aineine rātou i te mau tao’a tei hōro’ahia nā te mau tītīhoria ’e te feia mihi tāpo’i.
’Ua fa’atupu te titi nō Charlotte North Carolina Central i te hō’ē ’ōro’a nā te huira’atira i ni’a i te tumu parau « Noela tei hā’ati i te Ao nei » ’e te hō’ē ’amuitahira’a sōtiare tei ha’amana’o i te Mesia nā roto i te mā’a, te fa’a’ite’itera’a i te mau peu Noela o te ao nei, te hīmene, te mau rāve’a tāvinira’a, ’e te phātene nō te mau tamari’i.
’Ua ’amui mai te mau melo nō te titi nō Vero Beach Florida i roto i te hō’ē ’amuitahira’a nō te ha’amana’ora’a e aha tātou e fa’ahanahana ai i te ’ōro’a Noela. ’Ua hōro’ahia te mau ha’uti i roto i te mau pū tauturura’a o te ’oire. ’Ua hīmene te pupu tamari’i Paraimere, ’e e rave rahi mau ’ēkālesia tei fa’ata’a i te mau vāhi fa’a’ite’itera’a ha’amāramaramara’a.
’Ua rave te titi nō Jacksonville Florida South i te hō’ē ha’uti ta’ata ora, te Fa’aora o te ao nei, nō te huira’atira.

© 2020 nā Intellectual Reserve, Inc. Fatura’a pāruruhia. Nene’ihia i te Fenua Marite. Parau fa’ati’a nō te reo peretāne : 6/19. Parau fa’ati’a nō te ’īritira’a : 6/19. ’Īritira’a nō Ministering Principles, December 2020. Tahitian. 16727 895