Parau poro’i tā’āva’e nō te Liahona, Fepuare 2021

’Ua parau mai te Atua ia tātou ’ia bāpetizohia

’Ua hōro’a mai Iesu Mesia i te hō’ē hi’ora’a nō te bāpetizora’a nā te hō’ē ta’ata tei mau i te mana o te Atua.

Noa atu ē, ’aita i rahi tā tātou mau fa’a’itera’a nō ni’a i te orara’a o Iesu Mesia iho, ’ua ’ite tātou ē ’ua bāpetizohia ’oia i te ārea o te 30ra’a o tōna matahiti (hi’o Luka 3:23). Teie te tahi mau ha’api’ira’a tā tātou e ’apo nei nō ni’a i te bāpetizora’a nō roto mai i tōna hi’ora’a.

Nō te mau ta’ata ato’a

Mai te mea ’ua nāva’i tō tātou matahiti ’e te pa’ari nō te ’ite i te ta’a-’ē-ra’a i roto i te maita’i ’e te ’ino, tē hina’aro nei tō tātou Metua i te ao ra ’ia bāpetizohia tātou (hi’o Te Parau Ha’api’ira’a ’e te mau Parau Fafau 18:42). E ta’ata hara ’ore Iesu, terā rā, ’ua mā’iti ’oia e bāpetizo iāna nō te pe’e i te mau fa’auera’a a te Atua (hi’o Mataio 3:13–17 ; 2 Nephi 31:7). ’Oia ato’a te feiā tei pohe a’ena tē nehenehe e fāri’i i te bāpetizora’a. E pūpū tātou i te reira ia rātou maoti te bāpetizora’a ia tātou nō rātou i roto i te mau hiero. (Hi’o Te Parau Ha’api’ira’a ’e te mau Parau Fafau 128:15–18).

Rāvehia nā roto i te mana

’Aita Iesu i bāpetizohia nā te hō’ē ta’ata ’ē. ’Ua haere ta’a ’ē ’oia i tōna tu’āne ia Ioane, tei fāri’i i te mana autahu’ara’a nō ’ō mai i te Atua ra. I muri a’e i tō Iesu pohera’a ’e te ha’apohera’ahia tāna mau pipi, ’ua mo’e te mana o te autahu’ara’a i ni’a i te fenua nei. ’E i te matahiti 1829, ’ua fā mai Ioane Bāpetizo ia Iosepha Semita ’e ’ua hōro’a iāna i te mana nō te bāpetizo nā roto i te i’oa o te Atua. Maoti teie fa’aho’i-fa’ahou-ra’a, e nehenehe tātou e bāpetizohia i taua huru mana ra, i teie mahana.

E parau fafau piti pae

E parau fafau piti pae e vai nei i roto i te bāpetizora’a, ’aore rā e fafaura’a i rotopū ia tātou ’e te Atua. Tē parau fafau nei tātou :

1. ’Ia rave i ni’a ia tātou iho te i’oa o Iesu Mesia.

2. ’Ia ha’amana’o noa ā iāna.

3. ’Ia ha’apao i tāna mau fa’auera’a.

’Ei fa’aho’ira’a, e parau fafau mai te Atua ē e vai tāmau noa mai tōna Vārua ia tātou ra. Tē fa’aha’amana’o mai nei te mau parau o te mau pure o te ’ōro’a mo’a ia tātou i teie fafaura’a i te mau hepetoma ato’a. (Hi’o Te Parau Ha’api’ira’a ’e te mau Parau Fafau 20:77–79.)

’Ua riro te fāri’ira’a i te Vārua Maita’i ’ei tūha’a faufa’a roa nō te bāpetizora’a

I muri a’e i tō Iesu bāpetizora’ahia, ’ua fā mai te Vārua Maita’i mai te huru o te hō’ē ’ū’upa (hi’o 2 Nephi 31:8). I teie mahana, ’ia oti te ta’ata i te bāpetizohia, e ha’amauhia rātou. Te aura’a o te reira, e fāri’i ïa rātou i te hō’ē ha’amaita’ira’a ta’a ’ē i reira e anihia ai ia rātou ’ia fāri’i i te hōro’a nō te tāmāra’a pae vārua o te Vārua Maita’i (hi’o 2 Nephi 31:17). E nehenehe te Vārua Maita’i e fa’aara ia tātou nō ni’a i te ’ati, e tāmāhanahana ia tātou, e arata’i ia tātou ’ia rave i te mau fa’aotira’a maita’i, ’e e tauturu ia tātou ’ia ’ite i te here o te Atua (hi’o Te Parau Ha’api’ira’a ’e te mau Parau Fafau 39:6).

E nehenehe tātou e tātarahapa tāmau noa

’Ua ’ite te Atua ē, e rave tātou i te mau hape. Noa atu tā tātou mau tauto’ora’a maita’i roa a’e, e rave iho ā tātou i te hara ’e e’ita tātou e ha’apa’o i tā tātou mau fafaura’a o te bāpetizora’a. Nō reira, ’ua hōro’a mai ’oia ia tātou tāta’itahi i te taime nō te tātarahapa. (Hi’o Te Parau Ha’api’ira’a ’e te mau Parau Fafau 18:13.) I te mau mahana ato’a, e ti’a ia tātou ’ia rave maita’i a’e nō te tātarahapa ’e nō te fa’a’āfaro i te mau hape ato’a. E nehenehe tā tātou e pure ’e e ani i te fa’a’orera’a hara a te Atua. I muri iho, ’ia rave ana’e tātou i te ’ōro’a mo’a mā te ’ā’au ha’eha’a, e nehenehe tātou e fāri’i i te Vārua Maita’i (hi’o 3 Nephi 18:11).

E aha tā te mau pāpa’ira’a mo’a e parau nei nō ni’a i te bāpetizora’a ?

E mea ti’a i te mau metua ’ia tauturu i tā rātou mau tamari’i ’ia fa’aineine nō te bāpetizora’a (hi’o Te Parau Ha’api’ira’a ’e te mau Parau Fafau 68:25).

Te tamari’i tei raro mai i te va’u matahiti, ’aita e tītauhia te bāpetizora’a (hi’o Moroni 8).

’Ia bāpetizo-ana’e-hia tātou, e fafau tātou « ’ia ’oto, ’a ’oto ai te feiā ’oto ra… ’ia ha’amāhanahana ia rātou i tei au ’ia ha’amāhanahanahia ra, ’e ’ia ti‘a ’ei ’ite o te Atua i te mau mahana ato’a, ’e i te mau mea ato’a, ’e i roto i te mau vāhi ato’a tā ’outou e pārahi ra » (Mosia 18:9).

© 2021 nā Intellectual Reserve, Inc. Fatura’a pāruruhia. Nene’ihia i te Fenua Marite. Parau fa’ati’a nō te reo Peretāne : 6/19. Parau fa’ati’a nō te ’īritira’a : 6/19. ’Īritira’a nō Monthly Liahona Message, Fepuare 2021. Tahitian. 17464 895