Feiā ʼāpī paʼari
Te rirora’a ’ei mau ti’a’au maita’i a’e nō te fenua ’o tā te Atua i hāmani nō tātou
Nā Elder Marcus B. Nash
Nō te Hitu ’Ahuru
Nō roto mai i te a’ora’a tei hōro’ahia i te 18ra’a o te putuputura’a o te Pū Stegner i te Fare ha’api’ira’a teitei nō Utaha i Roto Miti i te 12 nō ’Ēperēra 2013.
Maita’i a’e tātou i te aupuru i teie ao ’e te mau mea ato’a e vai ra, maita’i a’e te reira i te pāturu, i te fa’auru, i te ha’apūai, i te fa’a’ana’anatae ’e i te fa’a’oa’oa i tō tātou ’ā’au ’e tō tātou vārua.
Tā’u pi’ira’a ’o tē vaira’a ïa i roto i te nātura, te haerera’a ānei nā te mau mou’a, te fa’ahe’era’a nā ni’a te hiona, te hoera’a te va’a initia nā ni’a te moana, te ta’ahira’a te pere’o’o ta’ata’ahi ’aore rā ’oia ato’a te safari. ’Ei tamari’i, mea au nā’u e fa’aea i roto i te uru rā’au ’e ’ia fāri’i i te māniania ’ore, te fa’ahiahia ’o tā te mau tumu rā’au rau’ere rarahi e fa’a’ite nei nō te Ta’ata Poiete ’A riro mai ai au ’ei ta’ata pa’ari, ’ua ha’api’i mai au nō roto i te tuatāpapara’a ’e te fa’aro’o ē mai te mea e hāro’aro’a tātou ’o vai tātou, te ’ōpuara’a ’e te tumu o te fenua i hāmanihia ai—’e ’ia tāpe’a i teie mau mea i roto i te ferurira’a—e fa’ariro tātou i teie fenua, ’e te mau mea ato’a i roto, ma te rāve’a teitei ’e te hanahana.
Te ’ōpuara’a a te Atua i roto i te hāmanira’a i te fenua
’Ua tāmata te Fatu, nā roto i tāna mau peropheta i tahito ra ’e i teie ’anotau, e tauturu ia tātou ’ia māramarama ’e ’ia māuruuru nō te hōro’a nō te orara’a i ni’a i teie fenua. I roto i te Faufa’a Tahito, ’ua fa’ariro Davida i te mau hāmanira’a nehenehe a te Atua ’e ’ua uiui ma te reo pūai nō te aha—i rotopū i te mau mea fa’ahiahia—’ua ha’ape’ape’a te Atua nō te ta’ata (hi’o Salamo 8:4). ’Ua fa’aoti Davida ē e mea ta’a ’ē te huru ta’ata, « i raro iti a’e ’oia i te mau mēlahi ».(Salamo 8:5).
’Ua ’ite ’ōrama ato’a Mose i te mau ao ’aita e nehenehe e tai’o1 ’e ’ua parau, « i teienei, nō reira vau i ’ite ai ē, e mea faufa’a ’ore te ta’ata nei, mai tei ’ore i mana’ohia e au ra ».(Mose 1:10).
I roto i te ha’eha’a ’o Mose i mua i te mau poietera’a fa’ahiahia a te Atua, ’ua manuia ’ore ’oia i te hāro’aro’a i te hō’ē parau mau rahi. Nō reira, ’ua fa’a’ite atu te Atua iāna i tāna mau poietera’a hope ’ore ’e ’ua parau māramarama ē, ’oia—te Atua—’ua hāmani i teie mau poietera’a « nō te fa’atupu i te tāhuti ’ore ’e te ora mure ’ore o te ta’ata nei » (Mose 1:39). Teie fenua—’oia ho’i te mau poietera’a ato’a—’ua hāmanihia nō te tauturu ia tātou ’ia roa’a te tāhuti ’ore ’e te ora mure ’ore.
E paraparau fa’ahou na nō te ’ōpuara’a o te fenua, ’ua parau te Fatu, « e hāmani tātou i te hō’ē ao ’ei pārahira’a nō rātou (’o tātou ïa). ’E e tāmata tātou ia rātou i reira, ’ia ’ite tātou ē, e ha’apa’o ānei rātou i te mau mea ato’a tā te Fatu tō rātou Atua e fa’aue ia rātou ra ».(Aberahama 3:24–25 ; hi’o ato’a te ’īrava 26). Te orara’a i ni’a i teie fenua, ’āpitihia ’e te hōro’a o te ti’amāra’a morare, e hōro’a mai ia tātou i te rāve’a nō te mā’iti i te ’imi ’e i te fāri’i i te hō’ē mahana i te mau mea ato’a ’o tā te Atua e pūpū.2
I te oti-hope-ra’a te poietera’a o te fenua, ’ua ’oa’oa te Atua nō te mea ’ua ’ite ’oia ē e tāvini te reira i tāna ’ōpuara’a nō tātou, tāna mau tamari’i.3 E ’ere te mau tamaiti ’e te mau tamāhine a te Atua ’e te mau ’utuāfare tā rātou i fa’atupu ’ei mau tao’a faufa’a ’ore i ni’a i teie fenua ; ’o rātou rā te niu mau o tāna ’ōpuara’a.4
’Ia riro tātou ’ei mau ti’a’au maita’i e ti’a ai.
’Ua riro te ’orara’a i ni’a i teie fenua ’ei hō’ē ha’amaita’ira’a ’e ’ei hō’ē hōpoi’a. ’Ua parau te Fatu, « nō te mea, inaha, te mau pua’a o te ’āua ’e te mau manu o te reva, ’e te reira mea ’o te tupu mai nō roto mai i te repo ra, ’ua ha’apa’ohia ïa nō te ta’ata nei ’ei mā’a nāna ’e ’ei ’ā’ahu ’e ’ia nava’i ho’i tōna ».(Te Parau Ha’api’ira’a ’e te mau Parau Fafau 49:19). ’Ātirē, nō te mea te fenua ’e te mau mea ato’a e vai ra i ni’a iho e mau « ’ohipa te reira nā tō’u nei rima » (Te Parau Ha’api’ira’a ’e te mau Parau Fafau 29:25), nāna teie mau mea ato’a.5 ’Ei feiā pārahi poto mai, ’ua riro tātou ’ei mau ti’a’au—e ’ere ’ei mau fatu fenua. Te rirora’a mai te reira, e hōpoi’a nā tātou i mua i te Atua—te fatu fenua—i te mea tā tātou e rave i tāna poietera’a : « Nō te mea e mea ti’a ïa iā’u, ’o te Fatu, ’ia tītau i te ta’ata ato’a ’ia ha’apa’o, mai te hō’ē ti’a’au ra i ni’a i te mau ha’amaita’ira’a tāhuti nei, tā’u i fa’ati’a ’e i fa’aineine ho’i nō tō’u mau mea e ora nei ».(Te Parau Ha’api’ira’a ’e te mau Parau Fafau 104:13).
Te huru ’o tā tātou aupurura’a i te fenua, te huru ’o tā tātou fa’a’ohipara’a ’e te ’ōperera’a o tōna mau maita’i, ’e te huru o tā tātou fa’arirora’a i te mau mea ato’a tei hōro’ahia mai, e tuha’a ïa nō tā tātou hi’opo’ara’a i te tāhuti nei. E ti’a ia tātou e fa’a’ohipa ma te māuruuru i te mea tā te Fatu i hōro’a mai, fa’aea i te ha’amāu’a i te ora ’e te mau ’auhunera’a, ’e e fa’a’ohipa i te mau maita’i o te fenua nō te aupuru i te feiā veve.6 Tē ha’ape’ape’a hōhonu nei te Fatu i te mau ora ato’a ’e i tāna iho ā ra mau tamari’i, ’e e fa’ariro ia tātou ’ei ti’a’au nō te mea ’o tā tātou e mā’iti i te rave (’aore rā e’ita e rave) i te mau ’auhune o tāna poietera’a.
’Ua fafau mai te Fatu ia tātou ē, mai te mea e pe’e tātou iāna ’e e fa’a’ohipa maita’i i te ’auhunera’a o te fenua ma te māuruuru ’e te fa’atura, « te ’īra’a o te fenua nei (nō tātou), te mau pua’a o te ’āua ’e te mau manu ho’i nō te reva… ’E nā te reira i ha’amāuruuru i te Atua i te mea ē ’ua hōro’a atu ’oia i teie nei mau mea ato’a i te ta’ata nei ; nō te mea nō reira ho’i teie nei i hāmanihia ai ’ia ravehia, nā roto i te mana’o au, ’eiaha mai te fa’arahi roa ’ino, ’eiaha ato’a mai te tītaura’a ti’a ’ore ».(Te Parau Ha’api’ira’a ’e te mau Parau Fafau 59:16, 20).
E ti’a ia tātou e fa’a’ohipa i teie mau ’auhunera’a ma te ’āfaro mau ’e te māuruuru, ma te hina’aro e tauturu ia vetahi ’ē—te mau u’i i teienei, i ma’iri, ’e i muri iho—’ia fāri’i i te mau ha’amaita’ira’a ’ō tā tō tātou Metua i te ao ra e hina’aro nō tāna mau tamari’i.
Hi’o i ni’a a’e ia tātou iho
Mea ’oto, i teie mahana tē ora nei tātou i roto i te hō’ē ao i reira te mau ta’ata e nehenehe ai e mā’iti e pāto’i i te Atua ’e ’ia fa’ariro i tāna poietera’a ma te au ’ore. ’Ia tupu ana’e te reira, e māuiui te Atua ’e te poietera’a.
Tē pāpa’i nei Enoha ē, ’ua ’oto te Atua nō te mau mā’itira’a ’ino ’e te ha’apa’o-rahi-ra’a iāna iho o tāna mau tamari’i.7 ’Ua tohu Moroni ē, i te mau mahana hope’a e tupu te « auahi, te vero ’e te mau au auahi… [’e] te mau mea vi’ivi’i rarahi i ni’a i te fenua » ’e i teie mau huru ’ohipa ’āmuihia mai e « te mau huru ’ino ato’a ; ’ei reira e rave rahi te parau mai ē, ’a rave i teie, ’a rave ho’i i terā, ’aore ïa e pe’ape’a ».(Moromona 8:29, 31). ’Ia ha’avi’ivi’i ana’e te ta’ata i teie ao i te pae vārua ’aore rā i te pae tino, e’ita noa te Atua te māuiui ’o te nātura ato’a rā !8.
Te mea faufa’a roa, tē vai ra te mau ha’amaita’ira’a ’e te mana nā roto mai i te ’Ēkālesia a te Fatu tei fa’aho’i-fa’ahou-hia mai ’e te ’evanelia, e aravihi tō rāua i te ha’aparare ’e i te taui i te huru ta’ata i ni’a a’e iāna iho, i te fa’auru i te here o te Atua ’e tāna mau poietera’a, ’e e tauturu ia tātou ’ia feruri i te maita’i o vetahi ’ē ’e ’ia feruri i te mau hina’aro o te mau u’i nō ananahi.
E ha’afātata te nātura ia tātou i te Atua
’Ua hau atu te fenua ’e te mau mea ora ato’a i te tao’a e pau nei ’e/’aore rā e ha’aputuhia ; e ti’a ato’a vetahi mau tuha’a ’e mau tuha’a o te reira ’ia vai-maite-noa ! Te nātura e vai vi’ivi’i ’ore noa ’e « ’ua hāmanihia ïa nō te maita’i ’e te ravera’a a te ta’ata nei, nō te ha’amāuruuru i te mata ’e nō te fa’atupu i te ’oa’oa i roto i te ’ā’au… ’e nō te fa’aitoito i te vārua ».(Te Parau Ha’api’ira’a ’e te mau Parau Fafau 59:18–19).
E ha’afātata te nātura i roto i tōna vi’ivi’i ’ore ia tātou i te Atua, e tāmā i te vārua ’e i te ’ā’au i te māniania ’e i te mau fa’a’ōnevanevara’a o te mātēria, e fa’ateitei ia tātou i te hō’ē vāhi teitei a’e, ’e e tauturu ia tātou ’ia mātau maita’i a’e i tō tātou Atua : « Tē ’ohu nei te fenua i ni’a i tōna nā pererau, ’e tē hōro’a mai nei te mahana i tōna māramarama i te ao, ’e tē hōro’a mai nei te ’āva’e i tōna māramarama i te pō, ’e te hōro’a ato’a mai nei te mau feti’a i tō rātou ra māramarama… Te ta’ata [ato’a] ’o tei hi’o i te hō’ē e ’āore rā i tei iti a’e i teie mau mea, ’ua ’ite ïa i te Atua i te terera’a i roto i tōna māramarama ’e tōna mana ».(Te Parau Ha’api’ira’a ’e te mau Parau Fafau 88:45, 47).
E mea au noa rā nā’u e haere nā ni’a i te mau mou’a nā rotopū i te mau ’ōfa’ifa’i nehenehe ’e te mau tara mou’a. Noa atu te muhu ’ore, tē parau nei rātou i te mana ’e te hanahana o te Atua—’e i tōna pa’ari fāito ’ore nō te nehenehe. Mai tā Alama i fa’a’ite pāpū, « ’Ua fa’a’ite māite te mau mea ato’a ē, tē vai ra te Atua ; ’oia iho ā ïa, te fenua, ’e te mau mea i te ao nei… i te fa’a’ite mau ē, tē vai ra Tei Hāmani i te mau mea ato’a ra » (Alama 30:44).
E mea au roa nā’u e hi’o i te mau feti’a i te pō, e tāmata i te pū’ohu i tō’u vārua i roto i te mure ’ore o te tau ’e te reva o tō’u hi’ora’a. Tē fa’ahiahia noa nei au i te ’ite ’o te tae mai i roto i taua mau taime ra, noa atu te ’ā’ano o te ao, ’ua ’ite te Fatu o te ao nui i tō’u paruparu. ’E ’ua ’ite maita’i ’oia ia tātou tāta’itahi. Tē fa’a’ite pāpū nei te poietera’a i tei Poiete ē, mai te mea e fa’aherehere tātou i teie mau vāhi ta’a ’ē ’e te vi’ivi’i ’ore, e fa’a’ite pāpū rātou ma te fa’ahiahia ’e te hōhonu nō tō tātou Atua ’e e fa’auru ia tātou nā mua.
Maita’i a’e tātou i te aupuru i teie ao ’e te mau mea ato’a i ni’a iho, maita’i a’e te reira i te pāturu, i te fa’auru, i te ha’apūai, i te fa’a’ana’anatae ’e i te fa’a’oa’oa i tō tātou ’ā’au ’e te vārua—’e e fa’aineine ia tātou nō te ora i pīha’i iho i tō tātou Metua i te ao ra ’e tō tātou mau ’utuāfare i roto i te hō’ē ao tiretiera, ’o teie iho ā te fenua teie tā tātou e ti’a nei i teie mahana, i roto rā i tōna ti’ara’a hanahana.9
E mata na tātou i te aupuru i teie fenua—tō tātou fare i teienei ’e te pūai nō ananahi.