Fa’atupu i te ’itera’a nō te mana o te Autahu’ara’a

’Ua anihia i te mau vahine e tauturu nei i te arata’i i te ’Ēkālesia nāhea te mana o te autahu’ara’a i te tupura’a i ni’a i tō rātou orara’a. Teie te tahi mau mana’o tā rātou i fa’a’ite mai.

Fa’ahōho’ara’a nā Matisse Hales

« E mau hōpoi’a ta’a ’ē tā te mau tāne ’e tā te mau vahine e mea faufa’a ato’a rā i te fare ’e i roto i te ’Ēkālesia. E nehenehe te mana o te autahu’ara’a e tauturu i te ta’ata tāta’itahi ’ia fa’aoti i taua mau hōpoi’a ra nō te maita’i o te tā’āto’ara’a.

« Nō te mea tei ni’a te mana autahu’ara’a o te Atua i te fenua nei i teie mahana, e roa’a te mau ha’amaita’ira’a rarahi i te mau melo ti’amā ato’a o te ’Ēkālesia, i te feiā pa’ari ānei ’aore rā te feiā ’āpī, te tāne ’aore rā te vahine, tei ’ōtahi ’aore rā tei fa’aipoipohia ».

—Peresideni Joy D. Jones, peresideni rahi nō te Paraimere

« E fa’a’ā’ano te tāvinira’a i tō tātou vārua, e fa’a’ā’ano i tō tātou hi’ora’a ātea ’e e fa’ati’a ia tātou ’ia huti rahi mai i te mana o te Atua. ’Ua ’ite te Fatu i te reira, ’o Sātane ato’a rā. I roto i tāna tāmatara’a pūai tāmau i te fa’aātea ia tātou i te mana o te Atua, e fa’a’ōnevaneva te ’enemi ia tātou ’aore rā e fa’atupu i roto ia tātou te mana’o ē, te mea tā tātou i pūpū e ’ere i te mea tano …

« …’Eiaha roa e ha’afifi te ferurira’a nō te hō’ē ha’ara’a maita’i.

« Te tu’ura’a mai ma te hina’aro mau i te tāvinira’a ia vetahi ’ē i roto i tō tātou orara’a, e ’ite mai tātou i te mau parau ’aro a te Atua. E ’ite mai tātou te hau, e ’itehia mai te pūai, ’e e fāri’i i te hō’ē mana pūai atu, ’a tāvini ai tātou i te Fa’aora, ia Iesu Mesia ».

—Peresideni Bonnie H. Cordon, peresideni rahi o te Feiā ’Āpī Tamahine

« Pinepine roa, e fa’aau te mau vahine ia rātou iho ’e te tahi atu mau ta’ata. ’Aita rā te hō’ē o tātou e au maita’i i roto i taua fa’aaura’a ra. Tē vai rā tō te vahine tāta’itahi hō’ē ana’e ’āno’ira’a o te mau ’aravihi ’e te mau tāleni, ’e te reira tā’āto’a e mau hōro’a nō ō mai i te Atua ra. ’E ere nō te mea ’outou ’e ’o vau nei e ’ere i te hō’ē ā huru—’aore rā, e rave rahi mau vahine e ’ere i te hō’ē ā huru—e’ita e fa’ariro ia tātou e mea ’iti ’aore rā e mea rahi a’e. E ti’a ia tātou ’ia ’ite mai i tō tātou mau hōro’ara’a ’e ’ia fa’ananea i te reira, ’ia ha’amana’o nā vai i hōro’a mai te reira ia tātou, ’e i muri iho e fa’a’ohipa i te reira nō tāna mau fā. ’A fa’a’ite ai tātou i tā tātou mau hōro’a nō te ha’amaita’i ia vetahi ’ē, tē fa’atupu ra tātou i te ’itera’a o te mana o te autahu’ara’a i roto i tō tātou orara’a ».

—Peresideni Jean B. Bingham, peresideni rahi o te Sotaiete Tauturu

« ’A ’imi pinepine i te mau rāve’a nō te fa’arahi i tō ’outou hāro’aro’ara’a nō te ‘ha’api’ira’a tumu o te autahu’ara’a’. E ti’a ia tātou tāta’itahi e ’imi i teie hāro’aro’ara’a nō tātou iho.

« E hōro’a mai te tuatāpapara’a i te mau pāpa’ira’a mo’a ’e te mau parau a te mau peropheta nō te ’anotau hope’a nei i te hō’ē niu faufa’a roa ’ia rahi atu ā teie hāro’aro’ara’a. Nā reira ato’a nō te ha’apa’ora’a i te mau fa’auera’a a te Atua ’e te orara’a mau i te mau fafaura’a tā tātou i rave nā roto i te mau ’ōro’a o te autahu’ara’a. E hōro’ahia mai te hāro’aro’ara’a ia tātou ‘rēni nā ni’a i te rēni, te a’o nā ni’a i te a’o’ [2 Nephi 28:30]. Nā roto i te heheura’a a te ta’ata iho, e ‘ma’iri mai’ te reira i ni’a i tō ’outou vārua ‘mai te hupe nō te ra’i mai ra’ [Te Parau Ha’api’ira’a ’e te mau Parau Fafau 121:45]. »

—Tuahine Lisa L. Harkness, tauturu hō’ē i roto i te peresidenira’a rahi nō te Paraimere

« Tei roto tātou tāta’itahi i te hō’ē tere… E tere tātou nā roto i te mau tāmatara’a o te tā’amura’a, te mau tāmatara’a i te pae moni, ’e i te pae o te ea o te ferurira’a ’e o te pae tino. E tere tātou nā roto i te mau tītaura’a ’eta’eta ’e tā tātou tāpura nō te mau ’ohipa e rave. Tē tere nei paha te tahi o tātou nā roto i te ’oto ’aore rā te vai-’ōtahi-ra’a ’aore rā te fiu. E mea ta’a ’ē tō tātou mau tāmatara’a, tē vai ra rā tō tātou pā’āto’a.

« Te ha’apa’ora’a i tā tātou mau fafaura’a, e ’ere ïa i te tātarara’a i teie mau tāmatara’a, te aura’a rā ’oia ho’i ’ua fafau mai te Fatu e parahi mai ’oia i pīha’i iho ia tātou ».

—Tuahine Michelle D. Craig, tauturu hō’ē i roto i te Peresidenira’a rahi o te Feiā ’Āpī Tamāhine

« Tē feruri nei au i te mana o te autahu’ara’a mai te hō’ē taura ’uo’uo ’ōtahi, e mea apuapu ’e te mānina nō ō mai i te Atua ra, ’o tē hāmani i te mau ha’avaro i roto ’e i rāpae, i ni’a ’e i raro, e au ra tē vai ra tōna iho arata’ira’a i roto i tō tātou orara’a. Terā rā, i te roara’a o te tau, ’ua heheuhia mai te hō’ē hōho’a fifi mau. E tāpo’i taua hōho’a ra i te fata o te Atua, te vāhi mo’a roa a’e i reira tātou e ha’amau ai i te fenua nei ’e e ha’amau ai i te ra’i ra…

« I te mau taime ato’a e ’ite au i te tāpo’i fata i roto i te hiero mo’a, e mana’o vau ē, ’o te hō’ē ïa o te mau tāpa’o pūai roa a’e o te hiero nō te fa’ahōho’a i te huru o te Atua ’ia hōro’a mai i tōna mana i tāna mau tamari’i ha’apa’o maita’i, ’ia nehenehe ’ia ha’aputuputuhia ’e ’ia tāhō’ēhia i roto i te hō’ē fā fifi ’e te mo’a ».

—Tuahine Sharon Eubank, tauturu hō’ē i roto i te Peresidenira’a rahi o te Sōtaiete Tauturu

« Nā roto i tō’u iho mau ’itera’a nō te orara’a, ’ua ’ite au ē, te ha’apa’ora’a i te mau fa’auera’a a te Fatu, te roa’ara’a te fa’aro’o ’e te ti’aturi-hope-ra’a iāna, e mau rāve’a ïa e nehenehe tātou e fāri’i i tōna mana autahu’ara’a… »

« …’A vai ha’apa’o maita’i noa ai tātou, e nehenehe tātou e fāri’i i te reira mau mana ’e mau ha’amaita’ira’a o te autahu’ara’a i roto i te mau tuha’a ato’a o tō tātou orara’a. E nehenehe te reira e hōro’a mai ia tātou te pārurura’a, te tāmāhanahanara’a, te pūai, te hau, ’e te mau fafaura’a e tae’ahia i roto i te mau mure-’ore-ra’a. Nā roto i te reira mana autahu’ara’a, e tauturu ato’a mai te Vārua Maita’i iā’u ’ia ha’amana’o i te mau ’itera’a tei tupu i roto i tō’u orara’a ’o te tāmau noa nei i te patu i tō’u ’itera’a pāpū ’e te fa’aro’o i te Atua ».

—Tuahine Cristina B. Franco, tauturu piti i roto i te Peresidenira’a rahi nō te Paraimere

« E rave rahi matahiti tei ma’iri, ’a fāri’i ai au i tō’u ha’amaita’ira’a patereāreha, tē ha’amana’o maita’i ra rā vau i te ’itera’a…

« ’Ua ha’amaita’i te reira ’itera’a e rave rahi mau fa’aotira’a ’o tā’u i rave i roto i tō’u orara’a. ’Ua ’ite au ē, nō te fa’atupu i teie mau ha’amaita’ira’a i hina’arohia, e ti’a iā’u e rave i tā’u tuha’a.

« I teienei, tē ’ite nei au e mea hau atu i te mea tā tō tātou Metua e hina’aro ’ia fāri’i au, hau atu ā i te mea tei fa’ahitihia i roto i tō’u ha’amaita’ira’a patereareha ».

—Tuahine Becky Craven, tauturu piti i roto i te Peresidenira’a rahi o te Feiā ’Āpī Tamāhine

« ’Ua ’āmui atu vau i Te ’Ēkālesia a Iesu Mesia i te Feiā Mo‘a i te mau Mahana Hope’a Nei i te 26ra’a o tō’u matahiti. Noa atu e mana’o hau tō’u i roto i tō’u ’ā’au, ’a pe’e ai au i te hina’aro ’ia ha’amaita’ihia e te Atua ma te ravera’a i te hō’ē fafaura’a ’e ’ōna, ’ua ’ite au ē tō’u hāro’aro’ara’a nō teie fafaura’a e mea tano ïa mai te hō’e huero iti i taua taime ra.

« I te roara’a o te mau matahiti i ma’iri, ’a fa’aitoito ai au i te ha’apa’o i taua fafaura’a ra o te bāpetizora’a ’e te tahi atu mau fafaura’a ’o ta’u i rave ’e te Metua i te Ao ra, ’ua ’ite au ē ’ua ha’amaita’i ’oia iā’u ma te hō’ē hāro’aro’ara’a hōhonu nō ni’a iāna, tō’u Fa’aora ’e nō ni’a i tō’u ti’ara’a ’ei tamāhine nō te fafaura’a nā nā Metua i te ra’i ra. »

—Tuahine Reyna I. Aburto, tauturu piti i roto i te Peresidenira’a rahi nō te Sōtaiete Tauturu