Tāpapa i te ’īra’a o te Mesia
Nā Elder Jeffrey R. Holland
Nō te Pupu nō te Tinoʼ Ahuru ma Piti ʼāpōsetolo
Nō roto mai i te hō’ē a’ora’a nō te hō’ē purera’a retiōni rau nā te feiā ʼāpī paʼari, « Te fāito ’o te ’īra’a o te Mesia » hōro’ahia i Stanford, California, Marite, i te 9 nō Fepuare 2020.
I teie pu’e tau nō Pāsa, ’a haere ia Iesu Mesia ra ’e ’a ’imi i tōna reo pāruru o te hau.
’Eiaha e mata’u, nā Michael Malm
Tē pūpū atu nei au i te tahi mau mana’o nō ni’a i te ’imira’a a te ta’ata iho ’o tā te ta’ata tāta’itahi e rave nō te ’imira’a i « te ’īra’a » o te fāito o te Mesia (hi’o Ephesia 4:13). Tē tiaturi nei au ē, e riro te reira ’ei faufa’a nō ’outou i teie taime ha’api’ipi’ira’a o tō ’outou orara’a ’e i roto i te mau huru orara’a ’o tā ’outou iho e ora nei.
Vetahi o ’outou tei reira i te vāhi tā ’outou i hina’aro e vai ai, ’aore rā ’ua ’ite ’outou i hea ’outou e haere ai i roto i tō ’outou orara’a. Vetahi o ’outou e au ra, ’ua fāri’i e rave rahi ha’amaita’ira’a ’e te mau mā’itira’a fa’ahiahia i mua ia ’outou. Vetahi o ’outou tē mana‘o nei ē, nō te hō’ē taime ’e nō te tahi atu tumu ’ē, e mea fāna’o ri’i noa ’e ma te iti te mau ’ē’a fa’ahiahia ’o tē tīa’i ’oi’oi mai ra ia rātou.
Terā rā noa atu te vāhi tā ’outou e haere ra ’e e aha te huru tō ’outou fa’a’oroma’ira’a i tō ’outou mau tāmatara’a nō te tāpae, tē ani nei au ia ’outou ’ia haere mai i te Fa’aora ra, ia Iesu Mesia, ’ei ta’ahira’a mātāmua roa nō te tāpae i tō ’outou iho hope’ara’a, nō te ’ite mai i tō ’outou ’oa’oa ’e te pūai o te ta’ata iho, ’e ’ia fa’atupu i tō ’outou hope’a ’e tō ’outou manuia hō’ē roa (hi’o 1 Nephi 10:18 ; 2 Nephi 26:33 ; Omoni 1:26 ; Te Parau Ha’api’ira’a ’e te mau Parau Fafau 18:11).
E nehenehe te tā’āto’ara’a e riro nō ’outou mai te mea te pāhonora’a i te uira’a « Tē haere nei ’oe i hea ? » (Mose 4:15) ’oia ho’i « i te vāhi tei reira ’oe, e te Fatu ? ».
E nehenehe te orara’a e riro ’ei mea fifi. E mea nā roto i te mau māuiui ’e te mau tātarahapara’a ’e te mau fifi, tātou e upo’oti’a ai. Tē vai nei tō tātou mau pe’ape’a ’e te ’oto, te mau huru ato’a. ’Ua fa’ahiti rā te Fatu ’e te mau peropheta i te mau parau fa’aitoitora’a nāva’i maita’i nō ni’a e nāhea i te fa’aruru i teie mau fifi nō te fa’a’ī i te buka ’ā’amu rarahi.
« ’O tō’u nei hau tā’u e hō atu nō ’outou »
’Ua riro te ha’amaita’ira’a a te Fa’aora i ni’a i tāna mau pipi, ’a haere ai ’oia i te māuiui ’e i te mamae i Getesemane ’e i Kalavaria, ’o te ’ā’amu putapū roa a’e o teie mau parau. I te reira pō, te pō o te mamae rahi ’o tei ’ore i tupu na i te ao nei ’aore rā ’o tē ’ore roa e tupu fa’ahou, ’ua parau te Fa’aora : « E hau ta’u e vaiiho ia ’outou nei, ’o tō’u nei hau tau e hō atu nō ’outou nei… ’Eiaha e taiā tō ’outou ’ā’au, ’eiaha ho’i e mata’u » (Ioane 14:27).
’Auē ïa hi’ora’a maere i te orara’a i roto i te mau hora teimaha mau ! Nāhea ’oia e nehenehe ai e parau mai i te reira, i mua i te mea ’o tāna i ’ite e fa’aruru atu ’oia ? E nehenehe ’oia e parau i te reira nō te mea nāna te ’Ēkālesia ’e te ’evanelia o te mau hope’a ’oa’oa ! Nō tātou, ’ua upo’oti’a a’ena i te rē. E hi’ora’a ātea tōna ; tē fa’a’ite nei ’oia i te hōho’a rarahi.
Tē mana’o nei au ia vetahi o tātou, ’atu-’atura’a, tē vai fa’ahou ra i roto ia tātou teie mana’o o te faufa’a ’āi’a teretetiano ’o tē parau nei ē, e mea hape ’ia tāmāhanahanahia ’aore rā ’ia tauturuhia, ’e ’ua tītauhia ia tātou ’ia ro’ohia i te ’ati nō te hō’ē mea i te mau taime ato’a. Tē fāri’i nei au ē « ’ia hauhia tō ’outou iā’u nei » (Ioane 16:33) i roto i te ’imira’a nō « te fāito teitei o te ’īra’a ’o te Mesia » (Ephesia 4:13) e nehenehe e riro ’ei fa’auera’a ’oia ho’i, i roto i te ’ā’au o te feiā mo’a o te mau mahana hope’a nei te ha’apa’o maita’i, fātata i te tā’āto’a e ha’apa’o ’ore ; ’e ’aita roa atu rā e mea teimaha a’e i te ’ā’au aroha o te Fatu.
E ha’ape’ape’a rahi au mai te mea i te hō’ē vāhi i roto i tō rātou orara’a, tē tapitapi ra ’aore rā tē ’oa’oa ’ore ra ’aore rā tē ha’apa’o ’ore ra te hō’ē o ta’u mau tamari’i, e riro vau i te rahi atu ā i te hepohepo ’ia ’ite au ē i te reira taime, ’aita teie tamari’i e ti’aturi iā’u nō te tauturu ’aore rā e mea faufa’a ’ore tōna huru nō’u ’aore rā e mea fifi mau nō’u.
I roto i taua ā mana’o ra, tē ti’aturi nei au ē ’aita te hō’ē o tātou e au ’ia ha’apēpēhia te ’ā’au o te Atua te Metua ’aore rā ’o tāna tamaiti, te Fa’aora o te ao nei, ’ia ’ite rāua ē ’aita te mau ta’ata e ti’aturi nei i roto i tā rāua ’atu’atura’a ’aore rā tō rāua rima ’aore rā e ti’aturi nei i tā rāua mau fa’auera’a. E tō’u mau hoa, nō teie noa tumu, e ti’a roa ia tātou ’ia ’oa’oa !
Tōna « maita’i ’ātīrē ïa ».
Te tahi fa’ahou parau a’o nō ni’a i te ’imira’a i te fāito teitei o te ’īra’a o te Mesia, ’ua tupu te reira i muri mai i te fa’atupura’a Iesu i te temeio nō te fa’a’amura’a i nā 5 000 ta’ata nā roto mai e pae faraoa ’e e piti i’a (hi’o Mataio 14:13–21). (Teie rā, ’eiaha e ha’ape’ape’a i te mea ē e ’aita e temeio tā te Mesia nō te tauturu ia ’outou. [Tōna] « maita’i ’ātīrē ïa » (2 Korinetia 12:9). E ha’api’ira’a pae vārua ’e te mure ’ore teie temeio. E rave rahi mau ha’amaita’ira’a tāna i rave i te mau panie e rave rahi tei ’ī ! ’A ti’aturi ’e ’a ’oa’oa i tāna pūpūra’a i « te pane ora »! [Ioane 6:35].)
I muri a’e i tō Iesu fa’a’amura’a i te naho’a ta’ata, ’ua fa’aho’i ’oia ia rātou ’e ’ua tu’u i tāna mau pipi i roto i te hō’ē pahī tāi’a nō te haere i te tahi atu pae o te moana nō Galilea. I reira « haere atu ra ’oia i ni’a i te hō’ē mou’a nō te pure » (Mataio 14:23).
’A ta’uma ai te mau pipi i roto i tō rātou pahī, ’ua pō’iri ho’i, ’e e pō vero. E mea pūai paha ïa te mau mata’i mai te ha’amatara’a mai ā. Nō te mau mata’i, mea pāpū ’aita a’enei paha teie mau ta’ata i tu’u na i te mau ’ie, ’ua fa’a’ohipa noa ra i te mau hoe—’e e ’ohipa rahi mau te reira.
’Ua ’ite tātou i te reira nō te mea i te taime o « te maha o te arara’a o te ru’i » (Mataio 14:25)—terā huru ārea taime, hora 3 ’e hora 6 i te po’ipo’i—’ua tere noa rātou i te tahi tau maile (hi’o Ioane 6:19). I te reira taime, ’ua mau tō rātou pahī i roto i te vero hitahita mau.
E mai tei mātauhia, ’ua vai ara noa Iesu i ni’a ia rātou. Nō tōna ’itera’a i tō rātou fifi, ’ua rave noa te Fa’aora i te rāve’a arata’i ’āfaro a’e i tō rātou pahī, ma te haerera’a nā ni’a i te mau ’are nō te tauturu ia rātou.
Fa’aotira’a nō te fa’aro’o, nā J. Alan Barrett
« ’Eiaha e mata’u »
I roto i tō rātou taime hepohepo rahi, ’ua hi’o te mau pipi ’e ’ua ’ite i roto i te pō’iri i teie ’ohipa fa’ahiahia i roto i te hō’ē ’ahu ’ana’ana e haere mai ra ia rātou ra nā ni’a i te ’are miti. ’Ua tuō rātou i te ri’ari’a i te ’itera’a atu, ’ua mana’o rātou ē e tūpāpa’u te reira i ni’a i te ’are miti. I muri iho, nā roto i te vero ’e te pōuri—e au ra e mea rarahi roa te miti ’e e mea na’ina’i roa tō rātou pahī—’ua tae mai ra te reo hō’ē ra ’e te pāpū o te hau nō ō mai i tō rātou Fatu : « O vau nei ïa ; ’eiaha e mata’u » (Mataio 14:27).
Tē fa’aha’amana’o mai nei teie ’ā’amu o te pāpa’ira’a mo’a ia tātou ē, te haerera’a i te Mesia ra, te ’imira’a i tōna ’īra’a ’aore rā i roto i tōna haerera’a mai ia tātou nō te hōpoi mai ia tātou teie ’īra’a, e nehenehe te ta’ahira’a mātāmua e fa’a’ī ia tātou i te hō’ē mea mai te huru ra e ri’ari’a mau. E ’ere rā te reira, i te tahi taime e tupu mai iho ā te reira. Hō’ē o te mau ’ohipa ’ārearea rahi o te ’evanelia ’oia ho’i, te tumu mau o te tauturu ’e o te pārurura’a tei pūpūhia mai ia tātou ’o te mea ïa tā tātou e nehenehe e hōro ’ē atu, i roto i tō tātou ’ite-’ore-ra’a i te ātea i te tahuti nei.
Noa atu e aha te tumu, ’ua ’ite au i te mau melo ’ore i te horo-’ē-ra’a i te bāpetizora’a. ’Ua ’ite au i te mau peresibutero i te horo-’ē-ra’a i te hō’ē pi’ira’a misiōni. ’Ua ’ite au i te mau ’āpiti tē vai ra te here rahi tei horo ’ē i te fa’aipoipora’a. ’Ua’ ite au i te mau melo i te horo-’ē-ra’a i te mau pi’ira’a teimaha. ’E ’ua ’ite au i te mau ta’ata i te horo-’ē-ra’a i tō rātou ti’ara’a melo nō te ’Ēkālesia.
Pinepine tātou i te horo ’ē i taua ā mau mea nei ’o tē fa’aora ia tātou ’e ’o tē hōro’a mai ia tātou i te hau. Pinepine tātou i te ’ite i te mau fafaura’a o te ’evanelia mai te hō’ē ’ohipa ri’ari’a ’e i muri iho e vaiihohia i te hiti.
’Ua parau o Elder James E. Talmage (1862–1933) ē, « e tae mai te mau ’itera’a i roto i te orara’a o te ta’ata pa’ari tāta’itahi o te tahuti nei mai te ’arora’a a te mau rātere tei fa’a’āueuehia e te vero ma te mau mata’i tāui ’e te mau ’are fēto’ito’i ; pinepine i te pō ’arora’a ’e te ’ati e mea pa’ari roa ïa, hou te fāra’a mai te fa’aorara’a ; ’e i muri iho, e mea pinepine roa te tauturu nō te fa’aorara’a i te mana’ohia ’ei ’ohipa ri’ari’a rahi mau. [’Ārea rā,] mai tei tae mai i [teie mau pipi] i rōpū i te mau pape ’ārepurepu, nō reira, e tae mai i te feiā ato’a e ’ohipa ma te fa’aro’o, te reo o te Fa’aora—‘’O vau nei ïa ; ’eiaha e mata’u’ ».1
Haere mai iāna ra
Te ’ohipa fa’ahiahia nō ni’a i teie anira’a nō te fāri’i i te Fa’aora, ’ia haere mai iāna ra ’e ’ia rave i te ’īra’a o tōna teitei, ’oia ho’i, e nehenehe te ta’ata ato’a e rave i te reira. E ’ere rā te aura’a ē te feiā ato’a tā ’outou i mātau e hina’aro e ha’apa’o i te mau fa’auera’a, ’aore rā, te feiā ato’a tā ’outou i fārerei e ha’apa’o i te mau fa’auera’a. Te aura’a rā o te reira, e nehenehe e ha’apa’o i te mau fa’auera’a ma te ’ore hō’ē a’e hōro’ara’a ’aore rā faufa’a ’āi’a ta’a ’ē nō te rave i te reira.
Tē tāparu hōhonu nei au nō te hō’ē fa’aro’o ’o te « ’ana’ana ’e te māramarama ’e te pāutuutu ’e te parauti’a », « ’ia hōpoihia te Mesia i roto i te mau initi ato’a o [tō tātou] hīro’a tumu »,2 ’e ’ia fāitohia te teiteira’a o te Mesia i roto i tō tātou orara’a (hi’o Ephesia 4:13).
E tāmata te orara’a ia ’outou. E tae mai te mau tāfifira’a. E tā’irihia e te mau ’oto. E pohe te mau ta’ata tei herehia. Nō reira, i te mau vāhi ato’a tā ’outou e haere ra, ’a haere nā mua roa ia Iesu Mesia ra. ’A ha’amana’o ē, e nehenehe tōna māuiui ’e tōna ti’afa’ahoura’a e fa’atupu i tō tātou rēra’a i ni’a i te fifi ’e te pohe. ’A rave i tā ’outou mau fafaura’a ’e ’ōna ’e ’a ha’apa’o i te reira i te roara’a o tō ’outou tere.
I roto i tō’u mau paruparu ato’a, ’o ta’u e ’ite mau nei, tē hina’aro nei au ’ia tae’ahia ia tātou « te fāito o te teitei o te ’īra’a o te Mesia ». Tē hina’aro nei au ’ia haere mai iāna ra. Tē hina’aro nei au iāna, mai te mea e nehenehe, e haere mai iā’u nei. ’E tē hina’aro mau nei au i taua ha’amaita’ira’a ra nō ’outou pā’āto’a.