Digital Lamang
Ang Epekto nga Nahimo sa Kinatibuk-ang Komperensya sa Akong Pagkakabig
Ang tagsulat nagpuyo sa Iowa, USA.
Ang mga mensahe nga gipakigbahin sa panahon sa kinatibuk-ang komperensya makatabang kanato nga mahimong mas makabig ngadto sa kamatuoran ug mosilsil og espirituhaong gahom sa atong mga kasingkasing.
Kwarenta ka tuig nang milabay, ako mihatag sa akong kasingkasing ngadto ni Jesukristo ug misugod sa pagtambong og usa ka ebanghelikanhon [evangelical] nga simbahan. Duna koy talagsaon kaayo nga pastor ug nakakaplag og daghang mga higala kinsa mitabang kanako nga molambo sa espirituhanong paagi. Apan human sa daghang mga tuig nga pagtambong, ako nahasol sa pipila ka bag-ong mga pamaagi sa simbahan. Naningkamot ko og maayo nga magpabilin, apan ako dili lang gyod makatuman sa mga kausaban.
Sa dihang ako misugod sa pagpangita og usa ka bag-o nga simbahan, ang akong igsoong lalaki ug iyang asawa, kinsa mga miyembro sa Ang Simbahan ni Jesukristo sa mga Santos sa Ulahing mga Adlaw, midapit kanako sa ilang simbahan. Apan dili madawat sa akong kasingkasing ug hunahuna si Joseph Smith isip usa ka propeta. Matinahorong giingnan nako sila, “Salamat, apan ayaw lang.”
Nagsugod ko sa pag-adto sa laing ebanghelikanhon nga simbahan, apan mao ra gihapon ang nahitabo didto. Sa wala madugay, akong gibati nga ang akong espirituhanon nga panginahanglan wala gihapon nakakaplag og katagbawan didto. Sa makausa pa, ang akong igsoong lalaki ug ang iyang asawa midapit kanako sa ilang simbahan, ug usab ako matinahorong mibalibad.
Ang Punto sa Kausaban
Mihukom ko nga dili ko makasalig sa bisan unsa nga simbahan. Nagplano na lang ko nga puy-an ang akong pagtuo nga mag-inusara. Apan kon walay simbahan o ang oportunidad sa pagpakigbahin sa akong hugot nga pagtuo sa uban, gibati nako ang akong kaugalingon nga nag-anam og kalayo gikan sa akong pasalig ngadto ni Jesukristo. Nagsugod ko sa pagduha-duha sa unsay akong gituohan sulod sa 30 ka tuig! Mao kadto ang higayon sa maayong kausaban ngari kanako.
Gitan-aw nako ang bugtong kapilian nga morag mao na lang ang nahabilin ug sa kataposan gisultihan ang akong igsoong lalaki ug ang iyang asawa nga gusto ko nga mosimba uban kanila.
Nagduha-duha ko sa sinugdanan, apan dili gayod ko makalimot sa unang Dominggo nga mitambong ko uban kanila. Ang akong kasingkasing napuno sa kalipay sa tibuok miting sa sakramento, samtang among gihisgotan ang Bag-ong Tugon sa Sunday School, ug usab dihang nanganta mi og nindot nga musika sa Relief Society. Ug ganahan kaayo ko sa paagi nga ang mga tawo nag-istoryahanay sa ingon nga gugma ug kamabination.
Mibati ko nga komportabli uban kanila.
Pagpangita og mga Tubag
Nagpadayon ko sa pagsimba, apan human sa pag-ampo ug pagpangita nga milungtad og hapit duha ka tuig, ako sa gihapon adunay daghang mga pangutana alang sa Ginoo ug dili pa andam nga magpabunyag. Dayon, niadtong Oktubre 2012, mihukom ko nga motan-aw sa kinatibuk-ang komperensya aron mangita sa akong mga tubag.
Ang mga sesyon sa Sabado nakatandog kaayo sa akong kasingkasing, ug ako nakahukom nga motan-aw sa sesyon sa Dominggo sa buntag didto sa gambalay sa simbahan. Bisan tuod og halos walay tawo didto, gibati nako ang lahi nga kalinaw kabahin sa akong desisyon sa pag-adto sa chapel. Gibati nako ang akong kasingkasing nga nag-anam og kahumok. Ako gigutom na kaayo sa kamatuoran.
Si Presidente Henry B. Eyring, Ikaduhang Magtatambag sa Unang Kapangulohan, mipakigbahin og maanindot nga mensahe nga dili gayod nako makalimtan. Namulong siya kabahin sa pag-ampo ni Joseph Smith didto sa Bilanggoan sa Liberty, sa dihang siya mituaw: “O Dios, hain ba ikaw? Ug hain ang imong gambalay nga nagsalipod sa imong tagoanan?” (Doktrina ug mga Pakigsaad 121:1). Si Presidente Eyring mitandi sa pagbati ni Joseph ngadto sa akong gibati:
“Daghan kanato, sa mga higayon sa personal nga kasakit, mobati nga layo ang Dios kanato. … Wala gayud magtago ang Dios, apan hinoon kita usahay, matabunan sa gambalay sa mga motibo nga makapalayo kanato gikan sa Dios ug mohimo Kaniya nga layo ug dili maabut. …
“Ang atong pagbati nga nahibulag gikan sa Dios mag-anam og kawala kon kita mahimong mas mahisama sa bata diha sa Iyang atubangan. … Kini makatabang sa atong pag-ila sa kamatuoran: Duol ug nahibalo ang Dios kanato ug dili gayud magtago gikan sa Iyang matinud-anong mga anak.”1
Samtang si Presidente Eyring mipakigbahin niini nga mensahe mahitungod sa pagdawat sa gugma sa Dios ug sa Iyang kabubut-on, ako nakadungog og usa ka mensahe gikan sa Espiritu diha sa akong hunahuna. Duha kadto ka yanong mga pulong: “Magpabunyag ka.”
Sa dihang si Elder David A. Bednar sa Korum sa Napulog Duha Ka mga Apostoles namulong mahitungod sa pagkakabig niana gihapong adlawa,2 akong gibati nga ang akong mga kabalaka mahitungod sa pagpabunyag nawala. Nakaamgo ko nga wala nako biyai ang akong pinakaimportante nga mga gituohan gikan sa akong ebanghelikanhong mga adlaw pinaagi sa pag-apil og usa ka bag-o nga pagtuo. Ako nagtukod diha sa hugot nga pagtuo ug mga kamatuoran nga daan na nakong gituohan. Ako mas labing nakabig ngadto sa Ginoo. Ug ang Iyang mga propeta mitabang kanako niini nga kasinatian.
Sa buntag human sa komperensya, akong gitawag ang akong igsoong lalaki ug nangutana kaniya kon siya mobunyag ba kanako. Usa kadto ka malipayon nga higayon nga nakapatulo sa among mga luha.
Ang Kinatibuk-ang Komperensya Adunay mga Tubag alang Kanato
Samtang ako namalandong sa akong panaw sa kinabuhi, ako mapasalamaton sa kahigayonan nga gihatag kanako pinaagi ni Jesukristo. Ug mapasalamaton ako sa kinatibuk-ang komperensya. Atol sa kinatibuk-ang komperensya, akong gibati nga ang Dios naminaw kanako. Siya mitubag sa akong mga pangutana, mitubag sa akong mga kahadlok, ug mihigugma kanako pinaagi sa mga pulong sa Iyang mga propeta.
Ako nasayod nga ang matag kinatibuk-ang komperensya adunay usa ka mensahe gikan mismo sa Ginoo nga personal nga gipahiangay kaninyo ug sa unsay inyong gisinati. Samtang kita maminaw sa mga propeta uban sa kaandam sa pagdawat sa mensahe sa Dios alang kanato, kita makadungog Kaniya. Makadawat kita og mga tubag sa atong mga pag-ampo ug mga tubag sa atong mga pangutana. Atong masayran nga ang Ginoo namulong, ug kita mahimong mas labaw nga makabig ngadto Kaniya.