Welcome Niini nga Isyu

Pagsalig sa mga Saad sa Manluluwas

Kitang tanan adunay mga problema sa kinabuhi. Ang uban ginagmay ug temporaryo, samtang ang uban dagko ug malungtaron. Sa tibuok niining mga hagit, ang Kristohanon nga mga higala makatabang kanato nga mobati nga gihigugma ug gipalig-on.

Sa pahina 32, inyong mahimamat ang usa sa akong pinakapinangga nga mga higala, si Heather, kinsa mipalig-on nako uban sa gugma sulod na sa mga dekada nga panaghigalaay. Siya usa ka babaye nga may talagsaong pagtuo kinsa wala motugot sa mortal nga mga hagit—sama sa iyang inadlaw-adlaw nga pagpanglimbasug sa cerebral palsy—nga mobuntog sa iyang paglaum o mopawagtang sa iyang gana sa mga maayong buhat. Siya usa lang sa daghan sa atong mga kaigsoonan kinsa, bisan og nahiling nga adunay usa ka matang sa medikal nga kakulangan, makahimo sa pagtukod sa gingharian sa Dios sa gamhanang paagi.

Nakadungog ko ni Heather sa makadaghang higayon nga nagpamatuod kabahin sa iyang pagsalig diha sa mga saad sa Manluluwas. Kana nga mensahe ingon og makapatandog kaayo atol niining panahon sa Pasko sa Pagkabanhaw, nga nagdapit sa matag usa kanato nga mohunong kadali ug mamalandong kon unsa ang posibling mahitabo tungod ni Jesukristo. Ang Iyang gugma makahimo sa atong mga panlimbasug nga motabang sa atong pag-uswag. Tungod sa Iyang Pag-ula, walay kasakit, balatian, o limitasyon sa abilidad nga dili Niya masabtan. Siya nagtanyag og kompletong pagkaayo. Mao kana ang hingpit nga kalipay nga atong gisaulog sa Pasko sa Pagkabanhaw.

Uban sa gugma,

Marissa Widdison

Kaabag Tigdumalang Editor sa Gospel Living App