E mea au nā’u ’ia hi’o i te hiero
Tei roto i te hiero tātou e fāri’i ai i te ha’apāpūra’a nō te mau tū’atira’a ’utuāfare here e tāmau noa i muri iho i te pohe, ’e ’o tē vai ē a muri noa atu.
E au mau taea’e, e au mau tuahine, ’oa’oa iti rahi tō’u ’ia ti’a atu i rotopū ia ’outou i teie tuha’a purera’a mātāmua o te ’āmuira’a rahi. ’Ua ’āfa’i mai te mau ta’ata a’o, te pehe ’e te pure i te Vārua—nā reira ato’a te mana’o nō te māramarama ’e te ti’aturi.
’Ua fa’aho’i te reira mana’o i tō’u ferurira’a i te mahana mātāmua vau ’a haere ai i roto i te hiero nō Roto Miti. E taure’are’a vau i te reira taime. Mātou noa tō’u nā metua tei haere i terā mahana. I roto i te hiero, ’ua fa’aea ri’i rāua ’ia fāri’ihia mai e te hō’ē rave ’ohipa o te hiero. ’Ua haere atu vau nā mua ia rāua, ’o vau ana’e i terā taime.
E vahine ruhiruhiā tei fāri’i mai iā’u ’e tōna ’ahu roa ’uo’uo nehenehe nō te hiero. ’Ua hi’o mai ’oia iā’u ma te mata ’ata’ata, ’e ’ua parau marū mai : « Maeva i te hiero nei e te taea’e Eyring ». ’Ua mana’o roa vau i terā taime e melahi ’oia, nō te mea ’ua ’ite ’oia i tō’u i’oa. ’Aita vau i ha’apa’o ē e tāreta na’ina’i tei ni’a i tō’u perēue ma tō’u i’oa i ni’a iho.
’Ua fa’anu’u atu ā vau ’e ’ua fa’aea atu ra. ’Ua hi’o tō’u mata i ni’a i te aroaro ’uo’uo teitei tei ha’amāramarama roa i te piha e au roa ē ’ua vētea te ra’i. I terā taime, ’ua puta mai teie mau parau pāpū i tō’u ferurira’a : « ’Ua tae a’ena mai au i teie vāhi māramarama nā mua atu ». I reira rā, teie mau parau i puta mai i roto i tō’u ferurira’a, e ’ere nā tō’u iho reo : « ’Aita, ’aita a’enei ’oe i haere mai i’ō nei. Tē ha’amana’o ra ’oe i te hō’ē taime hou tō ’oe fānaura’a. Tei te hō’ē vāhi mo’a ’oe mai teie ».
I rāpae i tō tātou mau hiero, tē tu’u nei tātou i teie mau parau « Ha’amo’ahia i te Fatu ». ’Ua ’ite iho ā vau ē, e parau mau teie mau parau. ’Ua riro te hiero ’ei vāhi mo’a i reira te heheura’a e tae ’ōhie mai ai ia tātou mai te mea ’ua mahora tō tātou ’ā’au ’e ’ua ti’amā tātou nō te reira.
I muri mai, i terā iho mahana, ’ua putapū fa’ahou vau i terā Vārua. I roto i te ’ōro’a o te hiero e mau parau tei fa’atae mai i te mana’o māhanahana i tō’u ’ā’au, ’ei ha’apāpūra’a ē, te mea e vauvauhia ra, e parau mau ïa. Te mea tā’u i putapū nō’u iho ïa nō ni’a i tō’u ananahi, ’e ’ua riro mai ïa ’ei parau pāpū e 40 matahiti i muri mai nā roto i te hō’ē pi’ira’a nō te tāvini nō ’ō mai i te Fatu.
Hō’ē ā mana’o tā’u i putapū i te fa’aipoipora’ahia vau i roto i te hiero nō Logan (Utah). Nā te peresideni Spencer W. Kimball i rave i te tā’atira’a. I roto i tāna mau parau, ’ua hōro’a mai ’oia i teie parau a’o : « Hal ’e Kathy, ’a ora i te orara’a ē, ’ia tae mai te pi’ira’a, e haere ’ōhie atu ’ōrua i rāpae ».
I te paraura’a ’oia i teie mau parau, ’ua ’ite pāpū roa vau i roto i tō’u ferurira’a, te hōho’a pāpū, nō te hō’ē ’āivi ’āhoro ma te hō’ē purūmu e haere i ni’a. E ’āti’a ’uo’uo i te pae ’aui o te purūmu, ē mo’e roa atu i roto i te hō’ē ’āpapara’a tumu rā’au i ni’a i te ’āivi. E fare ’uo’uo tē ’ite-ri’i-hia nā roto i te mau tumu rā’au.
Hō’ē matahiti i muri mai, ’ua ’ite au i terā ’āivi ’a fa’ahoro ai tō’u metua ho’ovai tāne ia mātou nā ni’a i terā purūmu. ’O te mea iho tā’u i ’ite i te hōro’ara’a mai te peresideni Kimball i terā parau a’o i roto i te hiero.
I te taera’a mātou i ni’a i te ’āivi, ’ua tāpe’a tō’u metua ho’ovai tāne i pīha’i iho i terā fare ’uo’uo. ’Ua parau mai ’oia ia māua ē, tē ho’o ra rāua tāna vahine i te reira fenua ’e ’ua hina’aro ’oia ia māua tāna tamāhine ’ia noho i roto i te fare manihini i reira. E noho rāua i roto i te fare rahi, e mea piri roa. Nō reira, 10 matahiti te maoro māua i te orara’a i roto i terā fare metua iti, fātata pauroa te mahana māua ta’u vahine e parau ē : « ’Ia māuruuru maita’i tāua i teie vāhi, nō te mea e’ita tāua e fa’aea maoro mai ».
’Ua tae mai ra te hō’ē pi’ira’a nā te fa’atere rahi o te fa’anahora’a ha’api’ira’a a te ’Ēkālesia, ’o Neal A. Maxwell. Tupu pāpū a’era te fa’aarara’a a te peresideni Kimball « ’ia haere ’ōhie atu ’ōrua i rāpae ». ’Ua tae mai te pi’ira’a e fa’aru’e i teie orara’a ’utuāfare huru au ’e te maita’i nō te tāvini i ni’a i te hō’ē ti’ara’a i te hō’ē vāhi ’aita roa vau i mātau. ’Ua ineine tō māua ’utuāfare ’ia fa’aru’e i teie tau ’e teie vāhi ha’amaita’i nō te mea i ’ite na te hō’ē peropheta, i roto i te hō’ē hiero, e vāhi ho’i nō te heheura’a, i te hō’ē ’ohipa nō ananahi, ’e ’ua fa’aineine ïa māua nō te reira.
’Ua ’ite au e mau vāhi mo’a te mau hiero a te Fatu. Tā’u nei fā i teie mahana ’a paraparau ai au nō ni’a i te mau hiero, ’o te fa’arahira’a ïa i tō ’outou hina’aro ’e tō’u iho nei ’ia vai ti’amā ’e ’ia vai ineine nō te fāna’o rahi atu ā i te mau ’ohipa i te hiero, ’o tē tae mai ia tātou nei.
Iā’u nei, te fa’aitoitora’a rahi roa a’e nō te vai ti’amā nō te ’ohipa i te hiero, ’o te parau ïa a te Fatu nō ni’a i tāna mau fare mo’a :
« ’E mai te mea e fa’ati’a mai tā’u mau ta’ata i te hō’ē fare iā’u nei i roto i te i’oa o te Fatu, ’e e ore roa ho’i e fa’ati’a i te hō’ē mea vi’ivi’i ’ia tomo i roto i te reira, ’ia ’ore ho’i te reira ’ia ha’avi’ivi’ihia ra, e fa’aea tō’u hanahana i ni’a i te reira ;
« ’Oia ïa, ’e e vai ho’i tō’u aro i reira, nō te mea e tomo mai au i roto i te reira, ’e ’o rātou ato’a ’o tei mā te ’ā’au ’o tē tomo i roto i te reira e ’ite ïa i te Atua.
« Terā rā mai te mea e ha’avi’ivi’ihia te reira e ’ore roa vau e tomo i te reira, ’e e ’ore roa tō’u hanahana e vai i reira : nō te mea e ’ore roa vau e tomo i roto i te mau hiero mo’a ’ore ».1
’Ua ha’apāpū maita’i mai te peresideni Russell M. Nelson ē, e ti’a ia tātou ’ia « ’ite » i te Fa’aora i roto i te hiero, i te mea ē, ’aita fa’ahou tātou e ’ore e mātau iāna. ’Ua nā ’ō te peresideni Nelson : « E māramarama tātou iāna. E ta’a tātou i tāna ’ohipa ’e tōna hanahana. ’E e ha’amata tātou i te putapū i te maita’i tā’ōti’a ’ore o tōna orara’a fāito ’ore ».2
’Āhani ’outou ’e ’o vau nei e haere i te hiero ma te mā nava’i ’ore, e’ita ïa e ti’a ia tātou ’ia ’ite, nā roto i te mana o te Vārua Maita’i, te ha’api’ira’a pae vārua nō ni’a i te Fa’aora ’o tā tātou e nehenehe e fāri’i i roto i te hiero.
’Ia ti’amā tātou nō te fāri’i i taua ha’api’ira’a ra, ’ei reira te tīa’ira’a, te ’oa’oa ’e te mana’o ’ana’anatae e nehenehe ai e tupu i te roara’a o te orara’a, nā roto i te ’ohipa hiero. E roa’a noa te reira tīa’ira’a, te ’oa’oa ’e te mana’o ’ana’anatae nā roto i te fāri’ira’a i te mau ’ōro’a e ravehia nei i roto i te mau hiero mo’a. Tei roto i te hiero tātou e fāri’i ai i te ha’apāpūra’a nō te mau tū’atira’a ’utuāfare here e tāmau noa i muri iho i te pohe, ’e ’o tē vai ē a muri noa atu.
E rave rahi matahiti i ma’iri a’enei, ’a tāvini ai au ’ei ’episekōpo, ’ua pāto’i te hō’ē taure’are’a tamāroa nehenehe i tā’u anira’a e vai ti’amā noa nō te ora a muri noa atu i pīha’i iho i te Atua ’ei ’utuāfare. Ma te mārō, ’ua paraparau mai ’oia nō tāna mau ’āreareara’a ’e tōna mau hoa. ’Ua fa’aro’o noa vau iāna. I muri iho, fa’ati’a mai nei ’oia i te hō’ē taime i roto i tāna mau ’āreareara’a, i roto i te māniania tararā, ’ua puta tā’ue mai te mana’o ’ōtahi. ’Ua ui atu vau e aha tei tupu. ’Ua nā ’ō mai ’oia ē, ’ua ha’amana’o ’oia i te hō’ē taime i tōna tamari’ira’a, tei ni’a ’oia i te turi ’āvae o tōna metua vahine, e tauahi ra tōna rima iāna. I taua taime ra ’a fa’ati’a mai ai ’oia i tāna ’ā’amu, ’ua ta’i ’oia. ’Ua parau a’era vau iāna i teie parau mau tā’u i ’ite : « Te rāve’a noa e putapū ai ’oe i terā tauahira’a ’utuāfare a muri noa atu, ’o te vai-ti’amā-ra’a ïa ’oe iho ’e te tauturura’a i te ta’ata ’ia fāri’i i te mau ’ōro’a tā’atira’a o te hiero ».
’Aita tātou i ’ite i te parau ri’i hu’ahu’a nō te mau tū’atira’a ’utuāfare i te ao vārua ’aore rā e aha tē tupu i muri iho i te ti’afa’ahoura’a. ’Ua ’ite rā tātou ē, ’ua haere mai te peropheta Eliaha nō te fa’afāriu i te ’ā’au o te mau metua i te mau tamari’i ’e tō te mau tamari’i i te mau metua.3 ’E ’ua ’ite tātou ē, tei ni’a tō tātou ’oa’oa mure ’ore i te fa’aitoitora’a nō te pūpū i taua ’oa’oa vai maoro ra i te mau ta’ata ato’a tā tātou e nehenehe.
Hō’ē ā hina’aro manuiara’a tō’u i te anira’a i te mau melo o te ’utuāfare e ora ra ’ia hina’aro ’ia vai ti’amā noa nō te fāri’i ’e nō te fa’atura i te mau ’ōro’a tā’atira’a o te hiero. E tuha’a te reira nō te ha’aputuputura’a o ’Īserā’ela i te mau mahana hope’a nei, i nā pae e piti o te pāruru.
Te taime rahi roa a’e nō tātou ’o te taime ïa e mea ’āpī te mau melo o te ’utuāfare. E fānauhia rātou ma te māramarama o te Mesia ’ei hōro’a. E fa’aara te reira ia rātou i te maita’i ’e te ’ino. Nō reira, e nehenehe ato’a te ’itera’a i te hō’ē hiero ’aore rā te hōho’a nō te hiero e fa’a’atu’atu i roto i te tamari’i te hina’aro ’ia ti’amā ’e ’ia fāna’o nō te haere i reira ’ia tae i te hō’ē mahana.
E tae mai ïa te reira i tō rātou ’āpīra’a, ’ia fāri’i rātou i te hō’ē parau fa’ati’a nō te hiero nō te rave i te mau bāpetizora’a feiā mono i roto i te hiero. I roto i terā ’ohipa e ti’a ai i tō rātou mana’o ’ia tupu ē, e fa’atoro tāmau noa te mau ’ōro’a o te hiero i ni’a i te Fa’aora ’e tāna tāra’ehara. ’Ia putapū rātou ē, tē pūpū ra rātou i te hō’ē ta’ata i te ao vārua i te fāna’ora’a i te tāmāra’a hara, e rahi atu tō rātou mana’o e tauturu i te Fa’aora i roto i tāna ’ohipa mo’a e ha’amaita’i i te hō’ē tamari’i a tō tātou Metua i te ra’i ra.
’Ua ’ite au i te mana o te reira ’ohipa i te tauira’a i te orara’a o te hō’ē taure’are’a. E rave rahi matahiti i ma’iri, ’ua haere māua tā’u tamāhine i te hiero, i te ahiahi. ’O ’ōna te mono hope’a i te vāhi bāpetizora’a. ’Ua anihia i tā’u tamāhine ’ia fa’aea maoro ri’i nō te rave fa’aoti i te mau ’ōro’a o te feiā ato’a tei fa’aineinehia te i’oa. ’Ua pāhono ’oia : « ’ē ».
’Ua hi’o vau i tā’u tamāhine iti i te haera’a i roto i te ’āpo’o bāpetizora’a. Ha’amata a’era te mau bāpetizora’a. ’Ua he’e noa te pape i ni’a i te mata o tā’u tamāhine iti i te mau taime ato’a e hutihia mai ai ’oia i rāpae i te pape. ’Ua anihia ’oia fa’ahou ’e fa’ahou ā : « E nehenehe ānei e haere fa’ahou ā ? » I te taime tāta’itahi, e pāhono ’oia « ’ē ».
Tē ha’ape’ape’a ra vau ’ei metua tāne, tē ha’amata ra vau i te feruri ē, maita’i ē e’ita rātou e ani fa’ahou ā. Tē ha’amana’o nei rā vau i tōna ’āueue ’ore ’ia anihia ’oia ’ia rave atu ā, ’e tōna reo iti pāpū i te pāhonora’a « ’Ē ». ’Ua fa’aea ’oia e tae roa i te i’oa hope’a i ni’a i te tāpura i terā mahana ’ia fāri’i i te ha’amaita’ira’a nō te bāpetizora’a nā roto i te i’oa o Iesu Mesia.
I te haerera’a māua i rāpae i te hiero i terā pō, ’ua māere au i te mea tā’u i ’ite iho nei. ’Ua fa’ateiteihia ’e ’ua tauihia te hō’ē tamari’i i mua i tō’u mata nā roto i te tāvinira’a i te Fatu i roto i tōna fare. Tē ha’amana’o noa nei ā vau i te mana’o nō te māramarama ’e te hau ’a haere ai māua i rāpae i te hiero.
’Ua ma’iri te mau matahiti. Tē parau noa nei ā ’oia « ’ē » i te uira’a a te Fatu, ’ua hina’aro ānei ’oia e rave rahi atu ā nōna i te taime fifi. ’O te mea ïa tā te tāvinira’a hiero e nehenehe e rave nō te taui ’e nō te fa’ateitei ia tātou. Terā te tumu tō’u ti’aturi ia ’outou ’e tō ’outou ’utuāfare here ē, ’ia tupu noa te hina’aro ’e te fa’aotira’a nō ’outou ’ia vai ti’amā noa nō te haere i roto i te fare o te Fatu, te pinepine e nehenehe.
Tē hina’aro nei ’oia e maeva ia ’outou i reira. Tē pure nei au ’ia tāmata ’outou i te patu i te hina’aro i roto i te ’ā’au o te mau tamari’i a te Metua i te ao ra ’ia haere i reira, i reira rātou e putapū ai i te mana’o fātata iāna, ’e ’ia ani ato’a ’outou i tō ’outou mau tupuna ’ia fa’aineine nō te pārahi a muri noa atu iāna ra ’e ia ’outou.
E ti’a i teie mau parau ’ia fa’ahitihia e tātou :
E mea au nā’u ’ia hi’o i te hiero.
E haere au i reira ’ia tae i te hō’ē mahana
Nō te putapū i te Vārua mo’a,
Nō te fa’aro’o ’e nō te pure.
Inaha ’o te hiero te fare o te Atua,
E vāhi nō te here ’e te nehenehe.
E fa’aineine au iā’u i tō’u ’āpīra’a ;
’O tā’u nei ïa hōpoi’a mo’a.4
Tē hōro’a nei au ma te tura i tō’u ’itera’a pāpū ē, e tamari’i tātou nā te hō’ē Metua here i te ao ra. ’Ua mā’iti ’oia i tāna Tamaiti here, ia Iesu Mesia, nō te riro ’ei Fa’aora ’e ’ei Tāra’ehara nō tātou. Tē rāve’a noa e ho’i ai tātou e ora ia rāua ra ’e i tō tātou ’utuāfare, e mea nā roto ïa i te mau ’ōro’a o te hiero mo’a. Tē parau pāpū nei au ē, tē mau nei ’e te fa’a’ohipa nei te peresideni Russell M. Nelson i te mau tāviri ato’a o te autahu’ara’a, ’o te ha’amatara i te ora mure ’ore nō te mau tamari’i ato’a a te Atua. Tē fa’a’ite pāpū nei au i te reira i te i’oa mo’a ’o Iesu Mesia, ’āmene.