Camille N. Johnson

Peresideni rahi o te Paraimere

’Ua rave Camille N. Johnson i tōna orara’a ato’a nō te tuatāpapa i te mau ta’o, i te hāmanira’a ’e i te fa’a’ohipara’a i te reira nō te tauturura’a i te mau ta’ata ’ia fa’ati’ati’a i tō rātou mau fifi i te roara’a hau atu i te 30 matahiti ’ei pāruru. ’E ’ua ’ite tāmau ’oia i te hau rahi i roto i te mau parau o te mau pāpa’ira’a mo’a. E fa’ati’a ’oia i te mau ta’ata o te pāpa’ira’a mo’a i rotopū i tōna mau hoa au-roa-hia.

Inaha, i tōna haerera’a i te Fenua Marite apato’a ’e tāna tāne nō te arata’i i te misiōni nō Arequipa Peru mai te matahiti 2016 e tae atu i te matahiti 2019, ’ua hina’aro rahi tōna i te mau ta’o. ’Aore roa atu ’oia i ha’api’i i te reo pāniora, ’ua pure ’oia ’ia ti’a iāna ’ia ’āparau ’e tāna mau misiōnare ’e i te mau ta’ata ’ia ’ite rātou i tōna here nō rātou ’e tōna ’itera’a pāpū nō te Buka a Moromona.

« ’Ua ti’aturi au i te Fatu ’e ’ua turu’i au i ni’a i te Vārua nō te fa’a’ite i tōu here ’e tōu ’itera’a pāpū ’ia mo’ehia iā’u te mau ta’o. E mea huru au ’e te ’anaanatae te ha’api’ira’a tā’u i ’apo mai ‘’eiaha e turu’i i ni’a i [tōu] iho ’ite’ [Maseli 3:5] e hōro’a rā i te tā’āto’ara’a nā tōu Fa’aora ».

I ni’a i te ’ē’a, ’ua ha’api’i fa’ahou mai ā ’oia i te hō’ē parau mau ’ōhie o te ’Evanelia : « ’Oia ho’i te herera’a i te Fa’aora, ’ia here mai tā te Fa’aora ’e ’ia vaiiho te here ’e te tāra’ehara ’o Iesu Mesia ’ia ’ohipa i roto i tō tātou ’orara’a ».

’Ua ha’amaita’ihia te tuahine Johnson i te here nō nā 552 misiōnare o te misiōni ’e tē ’ite ra i teienei i tōna māfatu i te ’ā’anora’a nō te here atu i te hō’ē milioni mau tamari’i ’o tāna e ha’apa’o.

« Tē ’āminamina nei au i teie rāve’a nō te ’apo mai mai roto mai i te mau tamari’i ’o rātou te fa’a’ite nō te here vi’ivi’i-ore ’o Iesu Mesia ».

’Ua fānauhia Camille Neddo Johnson i te 12 nō Tetepa 1963, nā Hal ’e Dorothy Neddo i Pocatello, Idaho, Fenua Marite. ’Ua fa’aipoipo ’oia ia Douglas R. Johnson i te matahiti 1987 i roto i te hiero nō Roto Miti. E toru tamari’i tā rāua. ’Ua fāri’i ’oia i te parau tu’ite nō reo Peretāne i te fare ha’api’ira’a tuatoru nō Utaha i te matahiti 1985, ’e i te fare ha’api’ira’a tuatoru nō Utaha S. J. Quinney College te parau tu’ite nō te ture i te matahiti 1989.

’Ua tāvini na te tuahine Johnson ’ei peresideni nō te Feiā ’Āpī Tamāhine pāroita, i roto i te peresidenira’a o te Sōtaiete Tauturu ’e te Paraimere o te pāroita, ’e ’ei ’orometua nō te Ha’api’ira’a tumu o te ’Evanelia.