Elder Michael A. Dunn

Hitu ’Ahuru Hui Mana Fa’atere Rahi

’Ua ta’a na metua o Elder Michael A. Dunn i tōna tamari’i-ri’i-ra’a, tera rā ’a aupuru ai tōna metua vahine iāna, ’ua nīni’i ’oia i te fa’aro’o ’e te mau faufa’a pūai i roto iāna. I muri a’e i tōna haerera’a i te fare ha’api’ira’a Episcopal i Roto Miti, Utaha( Marite, ’ua haere atu ’oia i te fare ha’api’ira’a tuarua, i reira tōna fārereira’a i te mau melo nō te ’Ēkālesia a Iesu Mesia i te Feiā Mo’a i te mau Mahana Hope’a nei.

’A fāri’i poupou ai tōna mau hoa ’āpī ’e tō rātou mau metua iāna ma te rima mahora, ’ua hina’aro ’o Michael ’ia ha’api’i mai nō ni’a i te ’Ēkālesia. I te pae hope’a ’ua fa’aoti ’oia e fārerei i te mau misiōnare. Tā rātou mau ha’api’ira’a nō ni’a i te Atuara’a ’e te ’Ōrama Mātāmua ’a Iosepha Semita, « ’ua tau i roto iā’u ma te mana mau », tē nā reira ra ’oia.

Nā roto i te pure ’ua ’ite ’oia ē e parau mau te ’evanelia ’e ’ua bāpetizohia i te matahiti pa’ari ’o tāna ha’api’ira’a tuarua. Mai taua taime ra, ’ua « fa’a’amuhia ’o Elder Dunn e te tahi mau ti’a fa’atere fa’ahiahia ».

’Ua fāri’i ato’a ’oia i te fa’afāna’ora’a a te Metua i te Ao ra ’e te Fa’aora i roto i tōna orara’a tā’āto’a. « E ta’ata fa’aro’o vau », ’ua parau Elder Dunn. « ’Ua ha’amaita’ihia vau nō te rirora’a ’ei ’ite nō Iesu Mesia ’e ’ia poro i tōna ora, tōna maita’i, tōna maita’i, tāna ’evanelia tei fa’aho’i-fa’ahou-hia mai i teie mahana ».

’Ua fānauhia ’o Michael Austin Dunn i te 5 nō Māti matahiti 1958 nā Patricia ’e o James R. Dunn i Tucson, Arizona, Marite. ’Ua pa’ari ’oia i Roto Miti. I muri a’e i tōna tāvinira’a i te hō’ē misiōni rave tāmau i roto i te misiōni nō Hawaii Honolulu, ’ua fa’aipoipo ’oia ia Linda Virginia Poulson i te matahiti 1980 i roto i te hiero nō Roto Miti. E toru tamari’i tā rāua.

’Ua fāri’i ’o Elder Dunn i te parau tū’ite nō te ’āparaura’a i te matahiti 1981 ’e te hō’ē parau tū’ite master nō te ’āparaura’a i te matahiti 2008, i te fare ha’api’ira’a tuatoru nō Utaha. ’O ’oia te fa’atere rahi ’o te KUED (PBS Utah), peresideni ’o te Dunn Communications Inc., ’e ’aita i maoro a’e nei, ’ei upo’o fa’atere rahi nō BYUtv ’e BYU Radio.

Elder Dunn, ’o tei tāvini na ’ei Hitu Area i te taime nō tōna pi’ira’a, ’ua tāvini ’oia ’ei ’ēpisekōpo, ’ei tauturu i roto i te ’ēpisekōpora’a, ’ei peresideni titi, ’ei peresideni Feiā ’Āpī Tamaroa ’o te pāroita, ’ei melo ’āpo’ora’a teitei, ’e ’ei peresideni nō te misiōni i Afirita Apato’a mai te matahiti 2014 ’e tae atu i te matahiti 2017.