Elder S. Mark Palmer

Peresidenira’a nō te Hitu ’Ahuru

’Ua māuruuru ’a muri noa atu Elder S. Mark Palmer nō te ’oa’oa ’e te ti’aturira’a i ’itehia i roto i te tāvinira’a ’e te mau ’ōro’a nō te hiero. Te pi’ira’a ’ia tāvini i te mau hepetoma ato’a i te hiero nō Dallas Texas ’e tāna vahine ’o Jacqueline, i roto i te hō’ē o te mau taime ’ohipa roa o tō rāua orara’a, ’ua tauturu ia Elder Palmer ’ia fa’atītī’aifaro i tāna mau ’ohipa mātāmua. ’Ua ha’api’i te tāvinira’a i roto i te hiero iāna ’ia fa’atusia, ’ia fa’anaho ’e ’ia tauturu iāna ’ia ha’amana’o i tāna mau fafaura’a ’e ’ia riro ’ei tāne fa’aipoipo ’e ’ei metua tāne maita’i a’e. ’Ua fa’aha’amana’o te tāvinira’a i roto i te hiero iāna i te natura mure ’ore o te ’utuāfare ’e i te putuputura’a ’oa’oa nō ananahi ’e te mau ta’ata tei reva atu ’e tei herehia, ’oia ato’a hō’ē tuahine tei fa’aru’e mai i te hō’ēra’a o tōna matahiti.

’Ua tauturu ato’a te tāvinira’a i roto i te hiero ia Elder Palmer ’ia fa’aineine i te pae vārua nō te mau pi’ira’a autahu’ara’a i muri a’e, ’oia ato’a ’ei melo nō te peresidenira’a o te Hitu ’Ahuru. Elder Palmer, pāturuhia i te 3 nō ’Ēperēra 2021, e ha’amata ’oia i tāna mau hōpoi’a ’āpī i te 1 nō ’Ātete 2021.

’Ua fānauhia Stanley Mark Palmer i te 11 nō Fepuare 1956, i Te Puke, Bay of Plenty, (Niuterani), nā Kenneth ’e Jill Palmer. ’Ua tomo mai tōna ’utuāfare i roto i te ’Ēkālesia ’a vai tamari’iri’i noa ai ’oia.

I muri a’e i tōna tāvinira’a i te hō’ē misiōni rave tāmau i roto i te misiōni nō Niuterani Wellington, ’ua roa’a tāna parau tū’ite ’aravihi tuatoru i te fare ha’api’ira’a teitei nō Auckland i te matahiti 1979 ’e te parau tū’ite teitei i roto i te fa’aterera’a ’ohipa i te ha’api’ira’a teitei nō Brigham Young i te matahiti 1982. ’A ora ai ’oia i Provo, Utaha, ’ua mātau ’oia i te hō’ē tuahine tei ho’i mai nō tāna misiōni, ’o Jacqueline Wood. ’Ua fa’aipoipohia rāua i roto i te hiero nō Roto Miti i te matahiti 1981. E 6 tā rāua tamari’i ’e e 16 mo’otua.

E peresideni Elder Palmer nō SMP Ventures, e taiete ho’ora’a fenua tāna iho i fa’ati’a i Austin, Texas (Fenua Marite). ’Ua tāvini ’oia ’ei ’episekōpo, ’ei peresideni titi, ’ei peresideni nō te misiōni nō Washington Spokane (2009–12), ’ei peresideni taime poto nō te misiōni nō Australia Sydney ’Apato’a (2014), ’e ’ei Hitu ’Ahuru Ārea.

’Ua pāturuhia ’oia ’ei Hitu ’Ahuru Huimana Fa’atere Rahi i te 2 nō ’Ēperēra 2016, ’e i teie taime, tē tāvini nei ’oia ’ei peresideni nō te Ārea nō ’Āfirita ’Apato’a.