Susan H. Porter

Tauturu hō’ē i roto i te peresidenira’a rahi o te Paraimere

I muri a’e i te pohera’a tāna tāne fa’aipoipo, ’o Elder Bruce D. Porter, e Hitu ’Ahuru Huimana Fa’atere Rahi, i mua i te ma’i māhāhā i te ’āva’e Tītema 2016, ’ua fa’aea ’ōtahi noa te tuahine Susan Porter i tō rātou fare i Bountiful, Utaha (Fenua Marite).

Fātata e piti matahiti hou tōna fa’aru’era’a mai, ’ua rātere ’oia ’e ’ua tāvini i pīha’i iho iāna ’a tāvini ai ’oia ’ei peresideni nō te Ārea nō Europa Hitia’a o te rā.

’Ei vahine ’ivi ’āpī, ’ua pure ’oia ’ia arata’ihia. I te hō’ē mahana ’ua ’ite ’oia i te hō’ē hōho’a pēni nō te Fa’aora e paraparau ra i te vahine nō Samaria i te ’āpo’o pape a Iakoba (hi’o Ioane 4:6–26). ’Ua fāri’i ’oia i te muhumuhu a te Vārua ’ia « pārahi i te ’āvae o te Fa’aora ’e ’ia ha’api’i mai, ’e nāna e ha’api’i ia ’oe ».

’Ua tūtava te tuahine Porter i te ha’afātata atu i te Fa’aora, ’e ’ua tāmāhanahana te Vārua Maita’i iāna ’e ’ua arata’i iāna i mua.

« ’Ua ’ite au ’ua amohia vau » ’ua parau ’oia. « ’Ua roa’a iā’u te pūai ’e te hau i ni’a a’e i tō’u iho. »

’A fa’aruru ai te mau tamari’i o te Paraimere ’ati a’e te ao nei i te ’ati, ’ua hina’aro te tuahine Porter ’ia ’ite rātou ē, tē here nei te Atua ia rātou.

« ’Ahiri Iesu i pīha’i iho ia rātou i teienei, e rave tāta’i hō’ē ’oia ia rātou ’e e ha’amaita’i ia rātou ’e e pure ho’i nō rātou, mai tāna i rave nō te mau tamari’i ’āti Nephi e mea maoro i teienei [hi’o 3 Nephi 17:21]. Tē ti’aturi nei au ē, e pure te tamari’i tāta’itahi nō te ani i tāna tauturu ’e ’ia ani ’ia ’ite i tōna rima here i roto i tō rātou iho orara’a ».

’Ua fānauhia Susan Holland Porter i te 31 nō Tiurai 1955, i Ponca City, Oklahoma (Fenua Marite), nā Hans ’e Charlene Holland. ’Ua roa’a te parau tū’ite ’aravihi tuatoru i te pae hēmia [chimie] nō te fare ha’api’ira’a teitei nō Brigham Young. ’Ua ’ohipa ’oia ’ei tauturu i roto i te vāhi mā’imira’a ’e ’ei ’orometua ha’api’i nō te nūmera.

’Ua fa’aipoipo ’oia ia Elder Porter i te matahiti 1977 i roto i te hiero nō Washington D.C. E maha tamari’i tā rāua.

’Ua tāvini te tuahine Porter i roto i te ’āpo’ora’a fa’atere rahi a te Sōtaiete Tauturu mai te matahiti 2017 ra. Tōna mau pi’ira’a tahito ’oia ho’i, ’ei tauturu i roto i te peresidenira’a Sōtaiete Tauturu titi, ’ei peresideni Sōtaiete Tauturu pāroita, ’e ’ei peresideni Feiā ’Āpī Tamāhine pāroita, ’ei ’orometua ha’api’ira’a ’evanelia ’e ’ei arata’i nō te pehe Paraimere.