Digital Lamang: Mga Young Adult
Unsaon Nako sa Pagpasaylo Kon Kini Lisod Kaayo?
Ang pagpasaylo sa usa ka tawo malisod usahay. Apan ang Ginoo mohimo sa lisod nga mga butang nga posible.
Kanunay kitang gitudloan sa ebanghelyo nga ang pagpasaylo importante alang sa kalinaw, kalipay, pagkaayo, ug paghinulsol. Akong nasayran kon unsa ka tinuod kadto nga mga pagtulun-an, bisan og sa pagkatinuod ang pagpasaylo lisod kaayo alang kanako ug usa ka butang nga wala moabot sa natural nga paagi.
Sa tibuok nakong kinabuhi, human nga nasakitan o nahiubos, akong nakaplagan ang akong kaugalingon nga naghunahuna, “Oo, siyempre gipasaylo na nako kana nga tawo,” pero wala damha nga ang mga pagbati sa kasuko, kasubo, o kasakit nga mibalik sa unang pahinumdom kon sa unsang paagi sila mipasakit kanako.
Tingali makasabot kamo.
Mao nga sa unsang paagi kita makakat-on nga “mopasaylo sa tanan nga mga tawo” (Doktrina ug mga Pakigsaad 64:10), sama sa gisulti sa Manluluwas nga gikinahanglan sa atoa? Sa tinuod lang, wala gayod ako masayod sa hingpit. Kini usa ka butang nga ang Ginoo nagtabang gihapon kanako sa pagsabot, apan ako nakakat-on og pipila ka mga butang diha sa proseso.
Si Kristo Nag-antos sa Tanan nga Matang sa Kasakit
Una, nakaamgo ako nga ang gahom ni Jesukristo ug ang mga panalangin sa Iyang Pag-ula mao ang hilabihan ka importante, hilabihan ka gamhanan, ug hilabihan ka malukpanon. Ang iyang gahom tinuoray gayod nga walay kinutoban.
Nasayod kita nga pinaagi sa Pag-ula, Siya nag-antos alang sa atong mga sala nga kita mahimong maghinulsol. Nasayod usab kita nga Siya midala diha Kaniya sa atong mga sakit ug mga kasakit, “nga ang iyang kasingkasing mahimo nga mapuno uban sa kal[u]oy, sumala sa unod, nga siya mahimo nga masay[o]d sumala sa unod unsaon pagtabang ang iyang mga katawhan sumala sa ilang mga kahuyang” (tan-awa sa Alma 7:11–14). Kana nagpasabot nga si Kristo makabati sa akong gibati ug makasabot sa tanang kasakit nga akong nasinati, gikan sa usa ka bali nga bukton ngadto sa usa ka masulub-on nga kasingkasing.
Ug bisan tuod nasayod Siya sa akong mga sala ug mga kahuyang, andam gihapon Siya nga mopasaylo kanako kon ako masayop. Andam Siya nga mosakripisyo sa Iyang Kaugalingon alang kanako.
Migahin ko og taas kaayo nga panahon, apan nakahukom ako nga kon motuo ako nga ang Iyang Pag-ula personal nga magamit ngari kanako, kon ako motuo nga ako mapasaylo, nan kinahanglan usab ako nga motuo nga ang tanan nga mga tawo kinsa nakapasakit kanako ug ang mga tawo nga akong gihigugma mapasaylo usab. Tungod kay ang Iyang sakripisyo alang sa tanan.
Ang Pagpasaylo Usa ka Proseso
Si Elder Richard G. Scott (1928–2015) sa Korum sa Napulog Duha Ka Apostoles mitudlo mahitungod sa pagkaayo nga gidala sa pagpasaylo: “Kon kamo makapasaylo sa sala, kamo makadawat og kahupayan sa sakit ug kaguol.” Ug siya misiguro kanato nga kon kita makapasaylo, kita “makatagamtam … og mas dakong kalinaw” sa atong kinabuhi.1
Apan mahimong lisod ang pagpasaylo. Adunay mga higayon sa akong kinabuhi sa dihang ang hunahuna sa pagpasaylo sa usa ka tawo ingon og imposible gani nga ikonsiderar. Niini nga mga sitwasyon, nakakuha ko og kahupayan sa mga pulong ni Elder Scott: “Ingon ka imposible kini alang kaninyo karon, sa kadugayan ang pag-alim nga inyong madawat nga gikan sa Manluluwas motugot kaninyo sa tinuoray nga pagpasaylo sa [nakasala kaninyo]. … Kon ang hunahuna sa pagpasaylo mihatag kaninyo og dugang pang kasakit, isalikway kini hangt[o]d makabaton kamo og [dugang nga] kasinatian uban sa makaalim nga gah[o]m sa Manluluwas sa inyong kaugalingong kinabuhi.”2
Nahimo nako kana. Gitugotan nako ang akong kaugalingon nga mamalandong, motutok sa akong relasyon sa Ginoo, ug sa kataposan mosalig sa gugma ug pagkaayo nga akong nadawat aron atubangon pag-usab ang pagpasaylo nga ako dili andam nga mosabot kaniadto. Nasayod ako gikan sa personal nga kasinatian nga ang Ginoo nakasabot sa atong mga kasingkasing ug mga hunahuna ug nag-uban kanato samtang kita mogahin og panahon nga atong gikinahanglan aron mamaayo.
Ang Pagpasaylo Makatabang Kanato nga Mamaayo
Ang akong pagpamatuod sa makaayo nga gahom sa pagpasaylo padayon nga naglambo. Nakakat-on ako nga motuo sa gipasalig ni Elder Scott nga “ang pagpasaylo makaayo sa makalilisang, [makapasubo] nga mga samad”3 pinaagi sa pagtugot sa Ginoo sa pagpuno kanato sa gugma ug pagtabang kanato nga kalimtan ang kasilag, bisan unsa pay atong nabuhat o unsay nahitabo kanato.
Nagtuo ako nga ang Langitnong Amahan nakasabot nga usahay nagkinahanglan kini og panahon nga kita mahimong andam sa pagbuhat sa lisod nga mga butang. Ug ako nagtuo nga kon kita andam na, Siya andam nga motabang kanato sa pagbuhat og butang nga sama ka lisod sa pagpasaylo.