Upat ka mga Paagi sa Pagpalambo sa mga Konseho sa Pamilya
Unsaon ninyo sa pag-uban og trabaho isip usa ka pamilya aron masulbad ang mga problema ug makakaplag og mas dakong panag-uyon?
Paghulagway ni David Green
Daghan ang mga mahitabo sa mga pamilya. Mga bata masakit. Mga ayuhunon kinahanglan nga buhaton. Trabaho, mga kalihokan, ug simbahan tanan mokompetensya sa imong panahon. Mahimo kining makasanap!
Busa sa unsang paagi imong mas mapasuod ang imong pamilya taliwala niining tanan nga mga kalihokan?
Mapasalamaton, ang Langitnong Amahan naghatag kanato og usa ka sumbanan alang sa kinabuhi sa pamilya ug komunikasyon nga gitawag og mga konseho sa pamilya. Ania ang upat ka mga paagi sa paghimo niini nga mo-epekto alang sa imong pamilya.
1. Ang mga Konseho mga Panag-istoryahanay, Dili mga Pangasaba
Si Presidente M. Russell Ballard, Akting nga Presidente sa Korum sa Napulog Duha ka mga Apostoles, mitudlo: “Ang mga konseho sa pamilya sa kanunay gikinahanglan. Kini, sa tinuod, mahangturon. Nasakop kita sa usa ka konseho sa pamilya didto sa premortal nga kalibutan, sa dihang nagpuyo kita uban sa atong langitnong mga ginikanan isip ilang espiritu nga mga anak.”1
Ang atong mga konseho sa pamilya gimodelo sunod niining langitnong konseho. Ang mga inahan ug mga amahan magtinambagay ug kauban sa ilang mga anak. Ang mga single adult mahimong makigtambag uban sa sinaligan nga pamilya ug mga higala. Ang pagtambag usa ka hugpong sa mga baruganan nga makahatag og dugang nga gahum sa pagsulbad og problema nganha sa inyong panimalay. Tingali ikaw naghunahuna, “Unsaon ko sa pagbuhat niana sa akong mga anak? Dili sila sa tinuod interesado sa pagpaminaw kon unsay kinahanglan nakong isulti.”
Kon ang paagi nimo sa konseho sa pamilya sama sa usa ka pangasaba, dili nimo magamit ang hingpit nga kapuslanan niini. Apan ang usa ka malipayon nga kahimtang mahimong mamugna kon ang tanan mobati og sama nga sila kabahin sa solusyon.
2. Ang mga Konseho Nagmugna og Pag-apil
Ang pag-apil sa kanunay diha sa mga konseho motabang kanimo sa pagkakita kon unsa ang tinuod nga nagpanghitabo sa matag sakop sa pamilya. Ang tanan kinahanglan unta nga moapil sa pagtabang sa pagmugna og solusyon nga aktibo ug sa paghimo sa ilang kaugalingon nga mga katuyoan. Samtang ang mga pamilya magtinabangay sa paghimo og mga desisyon, ang mga indibidwal mouswag, ug ang pamilya mahimong mas magkahiusa sa kinatibuk-an.
Ang pipila ka mga konseho mahimong planohon, samtang ang uban mahimong mahitabo sa natural nga paagi. Pagdesisyon kon unsay labing epektibo alang sa imong pamilya.
3. Kamo Makasaulog ug Makatinabangay
Ang mga konseho sa pamilya dili lamang mahitungod sa pagsulbad og seryosong mga problema. Unsa kaha kon ang imong asawa bag-ohay nga nakadawat og pag-uswag sa trabaho? Mahimong magsaulog kamo sa iyang kalampusan sa inyong sunod nga konseho sa pamilya. Tingali ang imong pamilya nagpalambo og kinaiya sa pagpahayag og pasalamat. Papuli-puliha ang kada usa sa pagpahayag og usa ka butang nga sila mapasalamaton.
Himoa ang mga konseho sa pamilya nga usa ka butang nga ang tanan magpaabut. Kon ang matag sakop sa pamilya, ngadto sa labing gamay, mahibalo nga sila paminawon ug bililhon malipay sila nga moapail.
4. Minos nga Wi-fi Nagpasabut og Mas Labaw nga Ikaw ug Ako
Hunahunaa ang pagpahikling sa tanan nilang digital nga mga kagamitan sa panahon sa mga konseho. Kon kamo mag-istorya nga mag-atubangay uban sa mga bata nga walay bisan unsang mga makabalda, sila mobati nga bililhon. Ang pag-ampo uban ug alang sa usag usa modapit sa Espiritu nganha sa inyong panimalay. Walay usa nga kinahanglan nga mosulbad sa problema nga mag-inusara. Ikaw nagpakita og ehemplo sa pagtinguha sa tabang sa Dios kon ang mga butang magkalisud.
Kon ikaw nakahimo na og mga konseho sa pamilya, paghunahuna og mga paagi sa pagpalambo. Kon wala ka pa maghimo niini, karon mahimong hingpit nga adlaw sa pagsulay. Sugod og gamay, ug tan-awa samtang ang mga konseho sa pamilya naglambo ngadto sa usa ka malipayon nga okasyon diin ang mga sakop sa pamilya nagkat-on ug nagsuporta sa usag usa.