Mga Tingog sa mga Santos sa Ulahing mga Adlaw
Ang Liahona nga Gipakita sa Dios Kanako
Sa sinugdanan, ingon og mapanamastamason kanako ang pagsulti nga ang Simbahan ni Jesukristo gipahiuli na.
Hulagway sa kamot gikan sa Getty Images; luyo nga litrato gilitratohan ni Clebher Tex
Isip usa ka estudyante sa PhD [Doktor sa Pilosopiya] sa Australia, kasagaran akong mibiyahe gikan sa akong pinuy-anan ngadto sa duol nga mga restawran sa distrito nga sentro sa negosyo sa Melbourne. Atol sa usa sa akong mga pagngadto-ngari, akong nakita diha sa yuta ang usa ka kard nga may hulagway ni Jesukristo. Usa ka tingog sulod kanako mipugos nga puniton ko kini.
Gisunod ko kini ug mabinantayong gibasa og maayo ang kard. Dayon ako nangita og mas maayong dapit nga kabinlan sa gamay nga hulagway sa Manluluwas apan walay nakaplagan. Tungod niana, gidala ko ang kard sa panimalay ug gibutang kini sa akong butanganan sa mga basahon.
Tulo ka adlaw ang milabay, nakasugat ako og duha ka mga misyonaryo samtang nagpadulong og paniudto. Naghimo kami og sabut alang kanila sa pagtudlo kanako, ug sila mihatag kanako og kard nga sama ngadto sa usa nga akong nakaplagan. Sa dihang mipauli ako, akong gitandi ang duha ka mga kard. Silang duha gikan sa mga misyonaryo sa simbahan.
Sa dihang ang mga misyonaryo mibisita kanako, sila mipamatuod mahitungod sa Ang Simbahan ni Jesukristo sa mga Santos sa Ulahing mga Adlaw. Sa sinugdanan, wala ako moayon sa ilang pagpamatuod. Alang kanako, ingon og mapanamastamason nga moingon nga ang Simbahan ni Jesukristo gipahiuli na ug mao lamang ang tinuod nga simbahan dinhi sa yuta, apan duha ka mga butang ang mihupot sa akong interes.
Una, akong nabasa gikan sa mga kasulatan nga “ang kahadlok sa Ginoo mao ang sinugdanan sa kaalam” (Salmo 111:10). Ako nagkinahanglan og kaalam ug gusto nga mahadlok sa Ginoo aron ako makakuha og kaalam. Nangatarungan ako nga dili nako kahadlokan ang Ginoo nga wala mahibalo Kaniya. Busa, unsay gitudlo sa mga misyonaryo kanako importante tungod kay nagkinahanglan ako og kahibalo mahitungod sa Ginoo.
Ikaduha, nakahukom ako nga ang Ginoo migiya kanako sa pagkakaplag sa kard nga akong gipunit. Sa daghang mga katuigan nga ako mipabilin sa Melbourne, wala gayud ako makakita og sama nga kard diha sa yuta. Nakahukom ako nga ang mga kard wala ilabay sa danghag nga paagi.
Samtang gidawat nako ang mga leksyon sa misyonaryo, nahimo akong mas malipayon ug natandog sa kahibalo nga akong nadawat gikan sa bag-ong pagtulun-an. Wala madugay, ako gibunyagan. Karon ako nabugkos ngadto sa akong asawa ug mga anak alang sa karon ug sa tanang kahangturan, ug karon ako adunay sama nga pagpamatuod nga gipamatuod sa mga misyonaryo ngari kanako: Ang Simbahan ni Jesukristo gipahiuli pinaagi ni Propeta Joseph Smith. Ang Simbahan ni Jesukristo sa mga Santos sa Ulahing mga Adlaw mao lamang ang tinuod nga simbahan dinhi sa yuta ug gigiyahan pinaagi sa usa ka buhi nga propeta.