Among Pagsimba sa Dubai
Ang tagsulat nagpuyo sa Utah, USA.
Ako wala gayud ni kausa mibati og ka dili komportable isip usa ka miyembro sa Ang Simbahan ni Jesukristo sa mga Santos sa Ulahing mga Adlaw didto sa usa ka Muslim nga nasud.
Mga hulagway sa luyo [background] gikan sa Getty Images
Ang akong pamilya miabut sa Dubai, United Arab Emirates, sa tinglarag sa 2013, ug kami naghinam-hinam sa pagsimba. Ang among mga kasinatian sa among pagsimba sa lain-laing mga dapit kanunay nga dili ka katingad-ang komportable. Kami gusto nga makahimo sa pagsulod sa mga pultahan sa unang higayon nga nakasabut na kon unsay mahitabo ug diha-diha dayon mahimong kabahin sa usa ka grupo sa mga tawo nga wala pa namo sukad mahimamat.
Ang among gipaabut natuman samtang kami nahimong kabahin niining mahigugmaong grupo sa mga Santos sa Ulahing mga Adlaw nga gikan sa daghang mga nasud, ug ang among hugot nga pagtuo ug pasalig mitubo sa among panahon didto sa Dubai. Dili gyud ako makalimot sa akong panahon sa Dubai ug ang maayong mga tawo nga akong nahimamat gumikan sa pagtambong sa simbahan ug sa pagsimba diha sa paagi nga ako sa kanunay bulahan nga nakabuhat. Nanghinaut ako nga ang mga lider sa UAE makasabut kon unsa nga gasa ang ilang nahatag ngari kanamo sa pagtugot kanamo sa pagsimba.
Ang among sentro sa stake sa Abu Dhabi.
Mga litrato sa pamilyang Chomjak sa maayong kabubut-on sa tagsulat
Unsa ang wala damha mao ang unsa ka dako ang akong hugot nga pagtuo mitubo isip sangputanan sa pagpuyo ug sa pagpakig-uban sa mga tawo kinsa dili mga miyembro sa akong relihiyon. Wala pa gayud ako sukad makapuyo bisan asa nga ang ka-importante sa Dios diha sa mga kinabuhi sa mga tawo hilabihan kaayo ka malukpanon.
Pagtugyan sa Pagsalig diha sa Dios
Akong gibati ang kalipay ug kalingaw nga makahimo sa pagsulti mahitungod sa impluwensya sa Dios ug sa relihiyon sa akong kinabuhi nga adunay tawo nga mibale-wala sa unsay akong gisulti o nahimong nasakitan. Gibati ko kini nga paagi tungod kay hapit tanan nga akong nahimamat sa Dubai namulong sama kanako, naghimo og diha-diha nga koneksyon samtang kami nagsultihanay.
Naglingkod duol sa swimming pool tupad sa laing inahan nga naghulat sa among mga anak nga mahuman sa pagbansay sa paglangoy, nakigbahin ako kon giunsa nako sa pagpanlimbasug sa pipila ka mga pagsulay ug sa pagbati nga nawad-an og kadasig. Kining Muslim nga inahan mipadayon sa paghatag og mabinationg mga pulong sa pag-awhag ug sa iyang panghimatuod nga ang Dios nagbantay kanato ug motabang kanato sa atong mga panlimbasog. Dili iyang Dios. Dili akong Dios. Atong Dios.
Ang akong anak nga babaye ug ako naglakaw ngadto sa siyudad usa ka adlaw niana ug gitanyagan og pagsakay sa usa ka Emirati nga babaye kinsa mipakigbahin kanamo sa iyang kasinatian mahitungod sa iyang anak nga lalaki kinsa adunay medikal nga mga kalisud nga nagkinahanglan kanila sa pagbiyahe ngadto sa Estados Unidos alang sa pagpatambal. Sa dagan sa iyang pag-istorya, ang iyang hugot nga pagtuo ug pagsalig sa kabubut-on ug sa mabinantayong pag-amuma sa Dios nalakip. Ako siyang gisultihan nga ako mag-ampo alang kaniya ug sa iyang pamilya, nga iyang gidawat uban sa pagsabut ug gugma.
Nasabtan ug Nadawat
Ang pakigkita sa kaubang mga pamilya nga sa panimalay nag-eskwela [home school] sa kanunay ingon ka luwas ug pagtinabangay nga kahimtang. Kami sa kadaghanan sa matag relihiyon girepresentar diha niana nga grupo. Kon kami maghisgot mahitungod sa Dios, pag-ampo ug pagsimba, ang matag tawo mibati nga nasabtan ug gidawat sa tanan. Bisan taliwala sa mga Kristiyano, adunay daghang nagkalain-laing mga relihiyon. Kon ako makigkita sa ubang nag-eskwela sa panimalay nga mga Kristiyano, kini nindot nga hingpit nga gidawat, sa walay pagsapayan sa akong piho nga sistema sa relihiyon ug pagtuo. Kami adunay sagad nga mga pamatasan ug sagad nga mga kalihokan tungod sa among debosyon ngadto sa Dios.
Kon ako makigsulti sa usa ka Hindu nga mama kansang mga anak gitudloan sa akong anak nga babaye, akong nadungog unsa ka importante ang iyang hugot nga pagtuo ug tinuohan ngadto kaniya samtang siya nagsulti kanako mahitungod kon giunsa niya paggahin ang iyang adlaw sa pagpamalandong ug pagsimba.
Uban sa akong bana, si Aaron, ug sa among mga anak, kami mibisita sa Jumeirah Beach, diha sa baybayon sa Persian Gulf.
Sagad nga mga Hiyas
Ug sa katapusan, ako kinahanglan gayud nga mosulti kon giunsa ko paghatag og bili ang pagpuyo sa laing dapit nga nagsagop sa sama gayud nga mga hiyas nga gitudlo sa akong bana ug kanako sa among mga anak. Kami nagtudlo sa among mga anak sa pag-atiman sa ilang panglawas pinaagi sa dili pag-inom og alkohol o paggamit og mga druga. Kami nagtudlo sa among mga anak sa pamatasan ug ka ligdong sa ilang sinina ug panagway. Usa sa among paborito nga mga butang nga among nasinati sa unang pipila ka mga adlaw sa pag-abut sa Dubai mao ang timaan diha sa pultahan sa mall nga nagpahayag sa sininaan ug pamatasan nga gipaabut. Ang akong pamilya ug ako diha-diha dayon mikomentaryo nga kini ingon og usa ka kinutlo gikan gayud sa Alang sa Kalig-on sa mga Kabatan-onan nga mga sumbanan nga booklet. Kami gusto niini!
Ako wala gayud sukad mibati og ka dili komportable ingon nga usa ka nagtuo ni Kristo, nahadlok sa Dios nga babaye didto sa Dubai. Sa sukwahi, akong gibati nga naawhag ug nalig-on sa akong mga gituohan pinaagi niadtong akong gikahimamat. Ako wala makasinati og ingon niini sa kinatibuk-an sa bisan asa nga dapit nga akong napuy-an.
Sa dihang ang akong pamilya nakadungog sa Dubai United Arab Emirates nga Templo nga gianunsyo sa kinatibuk-ang komperensya sa Abril 2020, kami nagtinutukay lamang sa tumang kahingangha. Kami napuno sa kalipay nga ang usa ka templo moabut sa Middle East! Ang akong kasingkasing malipayon alang sa daghang mga miyembro sa Simbahan kinsa nagpuyo niana nga rehiyon. Mapasalamaton kaayo ako sa mga lider sa UAE sa pagtugot niining balaan nga balay sa pagbarug taliwala sa ilang balaan nga mga balay—ilang matahum nga mga mosque nga mipuno sa talan-awon. Kini sa tinud-anay usa ka mahinungdanon ug dili makalimtan nga higayon.