Dali, Sunod Kanako
Unsa ang Moabut gikan sa Kahitas-an Sagrado
Ni Elder Jorge M. Alvarado
Sa Seventy
Ang mga sugo sa Ginoo kinahanglang dili tagdon sa walay pag-amping nga paagi.
Mga paghulagway ni Dilleen Marsh
Sa dihang ako 15 anyos ang panuigon, nakahukom ako nga ibutang nako sa pagsulay ang balaod sa ikapulo. Nagtrabaho ako isip usa ka tigsulod og mga pinalit sa grocery sa Ponce, Puerto Rico. Matag duha ka oras may 15 minutos akong pahulay. Atol sa break akong iphon kon pila ang akong nadawat nga kwartang pasalamat [tip]; dayon akong ilain ang ikapulo nga kwarta. Human ako misugod sa paghimo niini sa han-ay nga paagi, akong nabantayan nga ang kantidad sa akong kwartang pasalamat mitubo! Wala ako masayud nga kini usa ka resulta sa balaang pagtabang, apan nasayud ako nga nagsunod ako og usa ka sugo ug nga kon kita mosunod og mga sugo, sa dali o sa madugay madawat nato ang mga panalangin.
Sa tinuod, ang mga panalangin dili kanunay moabut sa paagi nga kita maghunahuna nga kini moabut. Human ako magbayad sa ikapulo sa makadiyot, nasayud ako nga unsay akong gibuhat sagrado. Kini dili lamang ang paghatag og kwarta ngadto sa Simbahan. Ako nagtagad sa unsay gisulti sa Ginoo uban sa pagtahud, ug nakasiguro ako nga ang akong ikapulo gibayaran sa kanunay ug sa walay paglangan. Naghinam-hinam ako sa pagbuhat og unsay akong mahimo sa pagtabang og tukod sa gingharian sa Dios.
Akong Nabiyaan ang Akong Ikapulo
Unya usa ka Dominggo sa buntag, mas nadugay ako kay sa naandan nga pagmata. Ang akong mga ginikanan gusto nga moabut og sayo sa simbahan, busa sa dihang sa katapusan mibangon ako, nagdali-dali ako. Wala ako makaamgo hangtud kami didto na sa meetinghouse nga akong nabiyaan ang akong kwarta sa ikapulo. “Ako na lang bayran sa sunod semana,” naghunahuna ako. Apan dili maayo ang akong gibati. Gusto ko nga ang Langitnong Amahan mahibalo nga ako masulundon.
Human sa mga miting, kami miabut sa panimalay nga nakita nga ang among panimalay gilungkab. Mga alahas, usa ka video camera—hapit tanang butang nga adunay bili gikawat. Midali ako ngadto sa akong kwarto ug gisiksik pag-ayo ang hunos diin akong nabiyaan ang akong ikapulo. Nawala usab kini. Karon akong gibati ang pagkadili maayo. Gibati nako nga kon ako nahinumdom pa unta sa pagdala sa akong ikapulo ngadto sa simbahan, wala unta kini mawala karon.
Dayon naaghat ako sa pagsulti og usa ka butang ngadto sa akong amahan: “Ayaw kaguol. Ang tanan mahimong OK ra. Ang tawo kinsa mitulis kanato midala sa kwarta sa Ginoo, busa iyang gidala ang usa ka butang nga sagrado.” Wala ako maghunahuna nga ang Ginoo motugot nga dili kana mahibaloan.
Apan ang Ginoo gusto kanako nga makakat-on nga mas mabinantayon sa unsay Iyang gipanag-iya. Sa wala madugay ang kawatan nadakpan, ug ang tanan nahimong gipang-uli—gawas sa akong kwarta sa ikapulo. Sa paghimo sa mga butang nga matarung, ako mikuha og samang kantidad gikan sa akong mga tiniguman ug gidala ngadto sa bishop sa pagkasunod gyud nga Dominggo. Sukad niadto, ako kanunay na gyud naningkamot sa pagbayad sa akong ikapulo sa paagi nga walay paglangan. Ako nasayud nga ang ikapulo balaod gikan sa Dios, ug kana nagpasabut nga kinahanglan ako seryoso nga magbuhat niini.
Ayaw Tagda ang Sagrado nga mga Butang nga Walay Pag-amping
Sa Doktrina ug mga Pakigsaad seksyon 63, ang Ginoo nagtudlo og usa ka sagrado nga baruganan: pagkamasulundon. “Ako, ang Ginoo, nagpahayag sa akong tingog, ug kini pagasundon” (bersikulo 5). Unsa ang Iyang gisulti “nga sagrado, ug kinahanglan gayud ipamulong uban sa pag-amping” (bersikulo 64).
Sa panahon nga kini nga pagpadayag nadawat, si Joseph Smith gisaway sa pipila kinsa mibatok kaniya. Ang usa kanila mao si Ezra Booth. Si Booth usa ka ministro sa laing tinuohan apan mihukom nga magpabunyag human iyang nakita si Joseph nga miayo sa bukton sa usa ka babaye pinaagi sa gahum sa pagkapari.
Hinoon, si Booth sa wala madugay nawad-an og hugot nga pagtuo diha niana nga iyang nasaksihan. Nahimo siyang hinawayon sa Propeta. Wala siya makasabut nga ang mga timailhan o mga milagro lamang dili makahatag og malungtarong hugot nga pagtuo. Sa dihang misugod siya sa pagtagad sa sagradong mga butang nga walay pag-amping, siya nahisalaag ug nahimong usa sa mga “dautan ug masinupakon” (bersikulo 2).
Kini nakapaikag kanako nga kon ang Ginoo mamulong mahitungod sa atong pagkamasulundon, siya mamulong usab mahitungod sa Iyang mga pagpili. Ang Iyang pagpili dili pasagad ug kaugalingong gusto; kini pinasikad sa doktrina ug mga baruganan. Sa seksyon 82 sa Doktrina ug mga Pakigsaad, Siya nagpahayag, “Ako, ang Ginoo, mapugos sa pagtuman kon kamo mobuhat sa unsa nga Ako misulti” (bersikulo 10).
Ngari kanako unsay gipasabut niini mao nga Siya nagsaad nga kon kita magmasulundon, kanunay Siyang motuman sa Iyang mga saad. Mopanalipod Siya kanato. Mogiya Siya kanato. Ug samtang dili kita kinahanglan mangita og mga timailhan sa pagpatuo sa uban sa kamatuoran o sa paghimatuod sa atong hugot nga pagtuo, ang mga timailhan ug mga milagro mahimo ug mahitabo isip resulta sa hugot nga pagtuo diha ni Jesukristo, uban sa kabubut-on sa Dios (tan-awa sa Doktrina ug mga Pakigsaad 63:9–10). Ang atong pagkamasulundon sa tinuoray adunay kalabutan diha sa abilidad sa Ginoo sa pagpanalangin kanato. Kini tulukibon ngari kanako.
Ang Iyang Mga Paghukom Makiangayon
Ang lain nga baruganan sa pagkamasulundon mao nga ang kalaglagan ug paghukom nga ihatag alang sa mga dautan, bisan og lisud nga paminawon o hunahunaon, mahimong makiangayon. Walay pagkamasulundon nga gitudlo ug gipaabut, kini dili mahimo nga mao. Apan tungod kay ang mahangturong mga balaod adunay mahangturong mga sangputanan, bisan ang tigdawat sa mga sangputanan mahibalo nga ang mga paghukom sa Ginoo mga makiangayon (tan-awa sa Mosiah 16:1). “Ang tanan nga mga tawo masayud nga Ako ang Dios” (Doktrina ug mga Pakigsaad 63:6).
Ang mga ganti ug mga silot sa Ginoo ang paghatag. Kon Siya nagpasidaan niadtong kinsa mosukol, Siya naghimo niini tungod sa gugma alang kanila, sa pag-awhag kanila sa pagbalik ngadto sa matarung nga paagi samtang sila makahimo pa, “kay kon walay hugot nga pagtuo walay tawo nga makapahimuot sa Dios” (bersikulo 11).
“Siya nga molahutay diha sa hugot nga pagtuo ug magbuhat sa akong kabubut-on, ang mao makabuntog” (bersikulo 20), ug “nganha kaniya nga naghupot sa akong mga sugo Ako mohatag sa mga misteryo sa akong gingharian, ug ang mao maanaa diha kaniya ang usa ka atabay sa buhi nga tubig, nga magtubod ngadto sa walay katapusan nga kinabuhi” (bersikulo 23).
“Pinaagi sa Pulong ug pinaagi sa Pagpanaw”
Sa pagkatinuod, ang Ginoo miingon nga dili lamang kita sa atong mga kaugalingon mismo magmasulundon, apan kita kinahanglan nga moawhag sa uban sa pagbuhat sa sama. Siya miingon, “Ug nga ang matag tawo [lalaki] [ug babaye] kinahanglan mobaton og pagkamatarung diha sa iyang mga kamot … ug mopataas og usa ka tingog sa pahimangno ngadto sa mga lumulupyo sa yuta; ug magpahayag pinaagi sa pulong ug pinaagi sa pagpanaw nga ang kagul-anan moabut diha sa mga dautan” (bersikulo 37).
“Pinaagi sa pulong ug pinaagi sa pagpanaw.” Gusto ko niini nga hugpong sa mga pulong. Kadtong kinsa masulundon molayas sa kalibutan ug magpundok sa Zion. Kana nagpasabut kaniadto sa pagpundok ngadto sa punoang buhatan sa Simbahan; karon, kini nagpasabut sa pagpundok sa mga dapit sa pagkamatarung, lakip sa templo. Sa dihang si Presidente Russell M. Nelson miingon, “Matag usa kanato nanginahanglan sa padayon nga espirituhanong paglig-on ug pagtudlo nga mahimo lamang diha sa balay sa Ginoo.”1
Samtang kita magpundok ngadto sa Zion, kana kinahanglan mao ang mensahe ngadto sa uban. Sa laing pagkasulti, ang tawo kinahanglang makamatikod nga kita dili moapil og piho nga mga butang. Kita mopahawa gikan sa piho nga mga dapit; kita modangop ngadto sa mga templo, sa mga chapel, ug ngadto sa atong mga panimalay. Kini kinahanglan nga klaro ngadto sa uban kon unsay atong gigamit ug dili gamiton, unsay atong tan-awon o dili tan-awon, unsay atong basahon o dili basahon, ug unsay atong isulti o dili isulti. Ang atong pagpanaw gikan sa kalibutan kinahanglang namatikdan, ug kini mismo ang mahimong usa ka mensahe ngadto sa mga masinupakon.
Usab, ang Ginoo naglaum kanato sa paggamit sa atong mga tingog. Samtang kita mopalayo sa mga dautan sa kalibutan, kita usab kinahanglan gayud nga mopahayag sa mga himaya sa ebanghelyo. Sa normal ug natural nga mga paagi, ang mga tawo maukiton mahitungod kon nganong dili kita moapil sa pipila ka kalibutanong mga butang, ug kita kinahanglang adunay kaisug sa pagtubag niini, dili gumikan sa pagpaubos o kalooy apan gumikan sa gugma ug usa ka tinuod nga tinguha sa pagluwas kanila.
Samtang si Elder Dieter F. Uchtdorf sa Korum sa Napulog Duha ka mga Apostoles miingon: “Wala ko mohangyo nga mobarug mo sa dalan dala ang megaphone ug mosinggit sa mga bersikulo sa Basahon ni Mormon. Ang akong gihangyo mao nga kanunay mong mangita og mga kahigayonan sa paghisgut bahin sa inyong pagtuo sa natural ug normal nga pakig-istorya sa mga tawo—sa personal ingon man sa online. Mohangyo ko nga kamo ‘mobarug nga mga saksi’ [Mosiah 18:9] sa gahum sa ebanghelyo sa tanang panahon—ug kon kinahanglan, gamit og mga pulong.”2
Buhata Unsa Ang Matarung
Sa dihang misugod ako sa pagbayad sa ikapulo sa daghang katuigang milabay, wala ako makaamgo sa hingpit nga kahulugan sa unsay akong gibuhat. Apan ako nahibalo nga kini matarung ug nga ako kinahanglan nga mosunod sa mga sugo sa Dios sa tinuoray, tungod kay unsa ang moabut gikan sa kahitas-an sagrado. Kini nakapaikag kanako nga ang seksyon 63 usab naghisgut mahitungod sa pinansyal nga mga desisyon ug sa mga donasyon ngadto sa Simbahan ug gihatag kini nga saad gikan sa Ginoo: “Siya nga matinud-anon ug molahutay makabuntog sa kalibutan.
“Siya nga nagpadala og mga bahandi ngadto sa yuta sa Zion makadawat og kabilin niini nga kalibutan, ug ang iyang mga binuhatan mosunod kaniya, ug usab usa ka ganti diha sa kalibutan nga moabut” (bersikulo 47–48).