Parau poro’i tā’āva’e nō te Liahona, Tiunu 2021

E aha te Atuara’a ?

Te Metua i te Ao ra, ’o Iesu Mesia, ’e te Vārua Maita’i, e toru ïa ta’ata ta’a ē ’i roto i te hō’ē fā.

Tuha’a nō te First Vision [Ōrama Matamua], nā Jon McNaughton

I te hō’ē taime ’ua ani mai te hō’ē pāpa’i ve’a i te peropheta Iosepha Semita e aha tā te mau melo o te ’Ēkālesia a Iesu Mesia i te Feiā Mo’a i te mau Mahana Hope’a nei e ti’aturi. ’Ei pāhonora’a, ’ua pāpa’i te peropheta 13 fa’ahitira’a nō tō tātou ti’aturira’a, ’e ’o tā tātou e pi’i nei te mau Hīro’a Fa’aro’o. Tē fa’ahiti nei te tuha’a mātāmua, « Tē ti’aturi nei mātou i te Atua, te Metua Mure ’ore, ’e i tāna Tamaiti ia Iesu Mesia, ’e i te Vārua Maitai ho’i » (Te mau Hīro’a Fa’aro’o 1:1). ’Ua riro teie nau ta’ata e toru i te mea tā tātou e parau nei te Atuara’a.

Te Atua te Metua Mure ’ore

E tino ’i’o ’e te ivi ti’afa’ahou tō te Atua. ’O te Metua ïa nō tō tātou vārua. ’Ua here maita’i roa ’oia i tāna mau tamari’i tāta’itahi. E mea maita’i roa te Atua, ’ua mau i te mau mana ato’a, ’e ’ua ’ite i te mau mea ato’a. E ta’ata parauti’a ’oia ’e te aroha ’e te maita’i. I ora na tātou ’ei mau vārua ’e te Atua hou ’a fānauhia mai ai tātou. ’Ua tono mai ’oia ia tātou i te fenua nei ’ia ha’api’i ’e ’ia tupu i te rahi. Te hina’aro rahi tumu o te Atua, ’ia ho’i ïa tāna mau tamari’i tāta’itahi ’e ’ia ora fa’ahou iāna ra ’ia pohe ana’e tātou. ’Ua ha’api’i mai te Atua ia tātou ē, ’ia pe’e tātou ia Iesu Mesia e ti’a ai, nō te ho’i i mua i te aro o te Atua.

Christ Preaching in the Spirit World [Tē poro ra ’o Iesu Mesia i te ’evanelia i roto i te Ao Vārua], nā Robert T. Barrett

Iesu Mesia

E tino ’i’o ’e te ivi ti’a-fa’ahou ato’a tō Iesu Mesia. ’O ’oia te Tamaiti Fānau Tahi a te Atua. Hou tātou ’a fānauhia mai ai, ’ua fa’aoti te Atua ē, ’ia riro ’oia ’ei Fa’aora nō tātou. Te aura’a ra, ’ua haere mai Iesu i te fenua nei ’ia riro ’oia ’ei hi’ora’a nō tātou, ’e nō te ha’api’i i tāna ’evanelia, ’ei tāra’ehara nō tā tātou mau hara, ’e nō te fa’aora ia tātou i te pohe. Maoti ’o Iesu Mesia e fa’a’orehia tā tātou mau hara ’ia tātarahapa ana’e tātou. ’Ua māuiui ato’a ’o Iesu Mesia e rave rahi mau ’ino ’ia māramarama ’oia ia tātou nō te tauturu mai ia tātou. ’Ua pohe ’o Iesu Mesia ’e ’ua ora fa’ahou mai ’oia, e tapa’o te reira e ora fa’ahou mai te mau ta’ata ato’a.

Hōho’a nā Guetty Images

Te Vārua Maita’i

Te Vārua Maita’i, ’o te melo o te Atuara’a ’aita tōna e tino tāhuti. E vārua ’oia. E ti’a i te Vārua Maita’i ’ia tūreia ti’a atu i tō tātou vārua. Tē fa’aite pāpū nei ’oia ia tātou ē, tē ora nei te Atua ’e ’o Iesu Mesia tō tātou Fa’aora. Tē ’ohipa nei te Vārua Maita’i ’ei ve’a nā te Atua nō te hōro’a mai ia tātou i te mau māna’o nō te aroha, te arata’iraa ’e te tāmahanahanara’a. ’Ia bāpetizohia ’e ’ia ha’amauhia tātou, e fāri’i tātou i te hōro’a o te Vārua Maita’i. I muri a’e i tō tātou bāpetizora’a, e nehenehe te Vārua Maita’i e fa’aea tumu i pīha’i iho ia tātou mai te mea ē, e ha’apa’o tātou i te mau fa’auera’a a te Atua.

First Vision [’Ōrama Mātāmua], nā Walter Rane

Te ’Ōrama Mātāmua a Iosepha Semita

I te roara’a o te tau, ’ua ta’a ’ore te mau ta’ata i te Atuara’a. ’Ua pāto’i te mau ta’ata nō ni’a i te huru o te Atua, o Iesu Mesia, ’e o te Vārua Maita’i. Nō reira i riro ai te ’Ōrama Mātāmua a Iosepha Semita ’ei tumu faufa’a rahi roa. ’Ua ’ite ’oia ē, e tino tō te Metua i te Ao ra ’e ’o Iesu Mesia ’e e piti tino ta’a ’ē tō rāua.

Listening [Tē fa’aro’o nei], nā Michael Jarvis Nelson

’Ua ta’a ’ē terā rā, ’ua hō’ē

Tē ha’api’i mai nei te mau pāpa’ira’a mo’a ’e te mau peropheta nō teie ’anotau ia tātou ē, e mea ta’a ē te Atua Metua ia Iesu Mesia ’e te Vārua Maita’i, hō’ē noa rā fā : tō tātou tāhuti ’ore ’e te ora mure ’ore (hi’o Mose 1:39). Mai te mau melo hō’ē ā pupu tō ratou, tē rave ’āmui nei rātou i te ’ohipa nō te tauturu ia tātou i te mau mahana ato’a. E nehenehe tātou i te ha’afātata ia rātou ’ia tātarahapa ana’e tātou i tā tātou mau hara ’e ’ia mā’iti i te ’ē’a ’āfaro.

Mau pāpa’ira’a mo’a nō ni’a i te Atuara’a

• ’Ua riro te Metua i te Ao ra ’e ’o Iesu Mesia ’ei tumu hō’ē i roto i te ’ohipa (hi’o Ioane 10:30).

• ’Ua parauparau te Metua i te Ao ra i tāna Tamaiti (hi’o Mataio 3:16–17).

• ’Ua parauparau Iesu Mesia i tōna Metua (hi’o Ioane 11:41).

• ’Ua pure Iesu Mesia ’ia riro tātou ’ei hō’ē i te tahi mahana (hi’o Ioane 17:11).

• ’Ua ’ite Iosepha Semita i te Metua ’e i te Tamaiti (hi’o Iosepha Semita—’Ā’amu 1:17).

• E fa’a’ite pāpū te Vārua Maita’i ē, ’o Iesu Mesia tō tātou Fa’aora (hi’o Ioane 15:26).

© 2021 nā Intellectual Reserve, Inc. Fatura’a pāruruhia. Nene’ihia i te Fenua Marite. Parau fa’ati’a nō te reo Peretāne : 6/19. Parau fa’ati’a nō te ’īritira’a : 6/19. ’Īritiraa nō Monthly Liahona Message, June 2021. Tahitian. 17470 895