Mai, pe’e mai

Pi’ihia e te Fatu

Te Parau Ha’api’ira’a ʼe te mau Parau Fafau 77–80

Mai ia Jared Carter ’e Stephen Burnett (hi’o Te Parau Ha’api’ira’a ’e te mau Parau Fafau 79 ’e 80), e hina’aro ato’a te mau misiōnare ’āpī nō teie nei ’anotau i te hō’ē ’itera’a pāpū ē ’ua pi’ihia rātou e te Fatu.

E rave rahi tāuatini misiōnare tei tauihia tā rātou mau pi’ira’a misiōni, te tumu, ’o te coronavirus ïa. ’Ei hi’ora’a, ’o Curtis ’e ’o Ramona Miller tei tonohia i te hō’ē misiōni ta’a ’ē, nō te tirotiro te tumu. ’Ua fa’a’ite pāpū mai rāua : « E ’itera’a pāpū pūai tō māua, ’aita e faufa’a te vāhi māua e tāvini ai, ’o tō māua rā hina’aro ’ia tāvini. Mai te mea ē e vaiiho tātou i te rima o te Fa’aora ’ia arata’i i tō tātou orara’a, e fa’aineine manuia ’oia ia tātou nō teie ’ohipa » .

Jared Carter (1801–49)

• Bāpetizohia e Hyrum Smith i te matahiti 1831 i Colesville, i New York.

• ’Ua poro i Ohio, i Pennsylvania, i New York, ’e i Vermont i te matahiti 1831 ’e 1832.

• Ua haere atu i Hiram, i Ohio, nō te ani ia Iosepha Semita e aha te hina’aro o te Fatu nōna.

• ’Ua fāri’i Iosepha Semita i te heheura’a e fa’aue iāna ’ia poro fa’ahou i te Fenua Marite hiti’a o te rā (hi’o te Parau Ha’api’ira’a ’e te mau Parau Fafau 79).

Stephen Burnett (1813–85)

• Bāpetizohia e John Murdock i te matahiti 1830 i Warrensville, i Ohio.

• ’Ua fa’atōro’ahia ’ei tahu’a rahi i te 17ra’a o tōna matahiti.

• ’Ua fa’ata’ahia nō te haere e poro nā muri ia Eden Smith (hi’o Te Parau Ha’api’ira’a ’e te mau Parau Fafau 80:2), terā rā, ’ua ma’ihia ’o Eden.

• ’Ua ha’amata atu ra ïa i tāna misiōni nā muri i te metua tane o Eden, ’o John Smith.

Curtis ’e Ramona Miller

• I te hi’ora’a rāua i ni’a i te tahua natirara a te ’Ēkālesia nō te misiōnare pa’ari, ’ua mā’iti ’o Miller mā e va’u vāhi—te rahira’a tei Porinetia ïa ’e i Europa.

• I muri a’e e pae hepetoma, ’ua tae mai tā rāua pi’ira’a nō te Rēpupirita manahune nō Congo.

• E tītauhia ia rāua ’ia ha’api’i i te reo farāni.

• I muri a’e e toru ’āva’e ’e te ’āfa i Afirita, ’ua tauihia te fa’auera’a ’ohipa a Miller mā, nō te tāvini i Georgia, i te fenua Marite, nō te COVID-19.