Digital Lamang
Ang Pagdala sa Ebanghelyo ngadto sa Bulgaria
Makakat-on kita og daghan mahitungod sa gahom sa misyonaryo nga buhat gikan niini nga mga panghitabo sa kasaysayan sa Simbahan.
Niadtong Hulyo 30, 1899, si Mischa Markow, usa ka misyonaryo nga taga Serbia kinsa nagsangyaw sa tibuok Europe, mibunyag ni Argir Dimitrov, ang unang kinabig nga taga Bulgaria, duol sa Constanta, Romania.1
Sa Romania, si Markow ug si Dimitrov misangyaw sa upat ka mga pinulongan ug nakabunyag og pipila ka kinabig sa wala pa gipalayas sa lokal nga mga awtoridad.2 Niadtong Hunyo 1900, sila si Markow ug Michael Dimitrov, usa ka Bulgarian nga kinabig nga nabunyagan sa Bucharest, nagsangyaw didto sa Ruse ug sa Sofia sa Bulgaria.3 Human sa pipila ka semana didto sa Sofia, gidakop si Markow, gisukit-sukit, ug gipalayas sa wala pa ang pagbunyag sa bisan usa nga mga kinabig.4
Ang gipahiuli nga ebanghelyo wala na gisangyaw pag-usab sa Bulgaria sulod sa 90 ka tuig. Sa dihang natapos ang panahon sa Komunista, si Elder Russell M. Nelson sa Korum sa Napulog duha ka Apostoles mibiyahe ngadto sa Sofia inubanan sa ubang mga lider sa Simbahan. Niadtong Pebrero 1990, atol sa miting uban sa mga opisyal sa gobyerno, nangutana si Elder Nelson kon unsay mahimo sa Simbahan alang sa Bulgaria ug gihangyo sa pagpadala og mga magtutudlo sa Iningles.
Nianang tinglarag, unom ka mga misyonaryo, nga ang kadaghanan may pormal nga kasinatian sa pagtudlo, misugod sa pagtudlo og mga klase sa Iningles didto sa Sofia, Pravets ug Smolyan. Sa Sofia, si Elder Morris ug Sister Annetta Mower nakakaplag og pipila ka mga miyembro sa Simbahan—nabunyagan sa laing dapit didto sa Europe—nga nagpuyo na sa maong dapit. Niadtong Oktubre 14, 1990, nagsugod ang mga Mowers pagpahigayon og sinemana nga mga serbisyo sa Simbahan diha sa ilang apartment. Sulod sa usa ka bulan, kapin sa 50 ka tawo ang naghuot sa sulod sa gamayng apartment sa mga Mower alang sa sinemana nga mga miting.5 Sa dihang miabot ang unang mga misyonaryo sa pagsangyaw niadtong Nobyembre, unom ka mga tawo ang naghulat sa bunyag.6 Samtang ang kaikag diha sa Simbahan nagtubo, ang panginahanglan alang sa usa ka ulohang buhatan sa misyon sa Bulgaria naklaro na sa wala madugay.
Usa ka buntag niadtong Abril 1991, si Kiril ug si Nevenka Kiriakov didto sa ilang panimalay sa Virginia dihang mibagting ang telepono. Nakaila dayon si Nevenka sa pamilyar nga tingog: “Mahimo ba nakong makaistorya si Brother Kiriakov?” ang kanhi nga-si Elder Thomas S. Monson nangutana.7
“Mahimo kaayo,” mitubag siya. Sa wala pa niya mahatag ang telepono ngadto ni Kiril, hinoon, si Elder Monson mipadayon, “Unsa man ang imong bation kon ang imong bana matawag isip presidente sa misyon didto sa Bulgaria?”8
Si Kiril ug si Nevenka milayas sa Bulgaria niadtong 1963 uban sa ilang mga anak, nga sila si Julia ug Peter, ug mipasakop sa Simbahan didto sa France sa wala pa namuyo sa Estados unidos. Bisan og ang Komunistang mga awtoridad mihulga og kamatayon ni Kiril ug sa pagbilanggo sa iyang pamilya sa tibuok kinabuhi kon sila mobalik, si Kiril gisaaran diha sa usa ka panalangin nga siya mosangyaw sa ebanghelyo diha sa Bulgaria. Uban sa bag-ong gipahimutang nga gobyerno, sila mibati nga luwas sa pagbalik. Bisan pa sa dakong problema sa panglawas ni Kiril, siya ug si Nevenka maisugon nga midawat sa usa ka tawag sa pagserbisyo.9 “Mahinamon ko nga makita ang tanan nakong kaparyentihan ug mga higala,” miingon si Nevenka, “ug mopaambit kanila sa gipahiuli nga ebanghelyo ni Jesukristo.”10
Samtang si Kiril ug si Nevenka nangandam sa pagbalik ngadto sa ilang yutang natawhan, ang unang mga misyonaryo kinsa magserbisyo ubos sa ilang pagpangulo nangabot sa missionary training center didto sa Provo, Utah, USA. Ang magtutudlo sa pinulongan nga mitimbaya kanila sa ilang unang adlaw mao si Julia Kiriakov Caswell, ang anak nga babaye nilang Kiril ug Nevenka.11
Niadtong Hulyo 1991, opisyal nga giablihan ang Bulgaria Sofia Mission. Pinaagi sa hugot nga pagtuo, paglahutay, ug mga paningkamot sa lokal nga miyembro ug sa mga misyonaryo, ang Simbahan sa wala madugay nakadawat og opisyal nga pag-ila.12 Sa katapusan sa 1991, sobra sa 150 ka Bulgarian nga mga Santos nabunyagan.13
Mga dekada sa wala pa ang oportunidad sa pagsangyaw sa ebanghelyo didto sa Bulgaria nga mahimong usa ka reyalidad, ang Ginoo nagsugod sa paghimo og mga pagpangandam. Bisan pa sa kadugay nga pagkawala sa Simbahan diha sa nasod ug sa sayo nga mga kalisod, ang hugot nga pagtuo ug kakugi niadtong giandam sa Ginoo miabli sa kahigayonan alang sa uban nga makadawat sa gipahiuli nga ebanghelyo.
Kinsa ang giandam sa Ginoo alang kaninyo nga mapaambit ninyo ang ebanghelyo? Sa unsang paagi nga Siya miandam og paagi alang kaninyo? Hibaloi nga ang mga milagro naghulat kaninyo samtang kamo magtinguha og mga oportunidad sa pagsangyaw sa ebanghelyo, “sumala niana nga bahin sa Espiritu ug gah[o]m nga ihatag nganha kaninyo, gani ingon sa akong kabubut-on” (Doktrina ug mga Pakigsaad 71:1).