Digital Lamang
Kinahanglan ba Gayod Ako nga Mobayad og mga Halad sa Puasa?
Wala pa gayod ako nakabayad og mga halad sa puasa kaniadto. Mahinungdanon ba nga sulayan ang imbitasyon sa akong bishop?
Ang akong bishop ug ako adunay nindot nga panag-istoryahanay sa iyang opisina, apan sa pagkatinuod, wala gayod kaayo ako naminaw.
Tunga-tunga kini sa Disyembre, ug nagtagbo kami alang sa husay sa ikapulo [tithing settlement]. Kanunay akong adunay pagpamatuod sa ikapulo ug mibayad og ikapulo, mao nga wala kaayo ako naghunahuna sa mubo nga miting. Ug matinguhaon nako nga mobalik sa pagtuon alang sa akong kataposang mga pasulit [finals] sa kolehiyo, ilabi na tungod kay akong nahibaloan nga wala ako nakapasar sa akong kataposang pasulit sa math—alang sa ikaduhang higayon.
Mibati ako nga wala gayoy paglaom, ug naghunahuna ako sa laing mga butang.
Mabination akong gitan-aw sa akong bishop.
“Nakabantay ako nga wala ikaw mibayad og mga halad sa puasa niining tuiga,” miingon siya, nga nagpahiyom.
Kana ang hinungdan nga naminaw ako pag-usab.
Husto siya.
Naghunahuna ako mahitungod sa mga halad sa puasa sulod sa pipila ka bulan. Kini usa ka butang nga panagsa ra nga gihisgotan sa akong pamilya sa akong pagdako, ug wala kaayo kami naghisgot mahitungod niini sa simbahan, usab.
Nasayop ako sa pagtuo nga dili ako kinahanglan motampo og daghan, tungod kay sa usa ka bahin anaa na ako karon sa usa ka YSA nga ward, ug tungod kay sa usa ka bahin ako medyo nabutaan sa akong kaugalingong garbo ug wala gayod makabaton og pagpamatuod sa pagpuasa o sa mga halad sa puasa.
Nagtuo ako nga ang pagbayad sa akong ikapulo ug ang dili pagkaon kay igo na.
“Wala ako makabayad,” miingon ako. “Apan kon nagbayad ako sa akong ikapulo ug nagpuasa, mao kana ang labing mahinungdanon, husto ba?”
Mipahiyom ang akong bishop ug mipasabot kanako sa kaimportante sa pagbayad og halad sa puasa uban sa pagpuasa kada bulan, ug ang gidaghanon sa temporal nga mga panalangin nga mahatag niini alang niadtong nanginahanglan sa ward.
Apan labaw sa tanan, mihatag siya og gibug-aton sa mga panalangin nga anaa alang niadtong kinsa andam sa pagsakripisyo ug sa pagtuman sa balaod sa puasa.
Mitan-aw siya nako sa mata ug miingon, “Kana nga mga panalangin makatabang kanimo sa bisan unsang hagit nga imong giatubang karong higayona, bisan nianang sa imong edukasyon.”
Nahingangha ako. Wala gani nako siya gisultihan nga bag-o lang kong nahagbong sa akong klase sa math.
“Nan unsay imong ginasulti mao ang,” miingon ako, “kon mobayad ako sa akong mga halad sa puasa, makapasar ako sa math sa sunod nga semestre?”
Nangatawa kaming duha, apan nasurprisa ako og gamay nga mitando gayod siya.
Gisultian niya ako nga kon ako magtuon ug makaangkon og pagpamatuod sa kaimportante sa balaod sa puasa ug mobayad og halad sa puasa kada bulan, masurprisa ako sa mga panalangin nga ibubo sa Langitnong Amahan ngari kanako.
Nasayod nga kining math nga klase mao ang bugtong nga butang nga nagpugong kanako sa paglambo sa pag-eskwela ug nga ako naglisod sa math (ilabi na sa math nga naglakip sa mga numero ug mga letra) sa tibuok nakong kinabuhi, mihukom ako nga sulayan kini.
Pagkat-on sa mga Rason sa Pagpuasa
Sa pagsugod sa sunod nga semestre, misaad ako sa akong kaugalingon nga mas magtuon pa ako og math kay sa akong nabuhat sukad, ug nga magkat-on usab ako kutob sa akong mahimo mahitungod sa pagpuasa ug sa mga halad sa puasa.
Kanunay akong nagpuasa samtang nagdako ako, apan wala gayod nako nahimo kini nga makahuluganon. Kasagaran sa panahon sa Dominggo sa puasa, naghunahuna lamang ako kon unsa gayod ako kagutom nga ang prutas nga mga kendi nga nahulog sa mga bata sa salog atol sa panagtigom sa sakramento lami kaayong kan-on.
Sa dihang miabot na ang sinugdanan sa bag-ong bulan, naglisod ako sa pagbayad sa akong ikapulo ug halad sa puasa. Usa ako ka kabos nga estudyante sa kolehiyo, ug ako wala kaayoy daghan nga ikahalad!
Apan samtang milabay ang mga bulan, gibati nako ang akong maduhaduhaon nga kinaiya ug garbo nga hinay-hinay nga nawala. Samtang gitutokan nako ang ngano sa pagpuasa, gibati nako nga nausab sa daghang paagi ang akong kasingkasing ug hugot nga pagtuo sa matag Dominggo sa puasa:
-
Ang akong mga pag-ampo sa sinugdanan ug kataposan sa akong mga pagpuasa nahimong mas kinasingkasing ug makahuluganon.
-
Ang pagbayad og mga halad sa puasa nakatabang kanako nga magpuasa nga may katuyoan, ug imbes nga maghunahuna lamang sa akong gigutom nga tiyan, nagsugod ako sa pagkaila sa hinay nga tingog ug impluwensiya sa Espiritu.
-
Ang lunlon, apan halawom, nga espirituhanong kalig-on nga akong mabati sa kataposan sa kada puasa mopuno sa akong kalag ug mohupay sa akong kasingkasing.
-
Sa kataposan nakaamgo ako nga kon kita andam nga mosakripisyo alang sa uban, kita malunsay ngadto sa mas Kristohanon nga mga binuhat, tungod kay ang pagsakripisyo mao gayod ang unsay Iyang gibuhat alang kanato. Sa tibuok kinabuhi ni Kristo naghatag Siya ngadto sa uban.
-
Gibati nako ang gugmang putli nga nagpalambo sa akong kalag kada bulan samtang naghunahuna ako kon pila ka tawo ang atong maserbisyohan pinaagi sa atong kaandam sa paghatag. Ug mibati usab ako og pasalamat alang sa tanang panalangin sa akong kinabuhi nga usahay nakalimtan nako kaniadto.
-
Ang pagpuasa alang sa katuyoan sa pagpakigbahin og kahayag ug mga panalangin ngadto sa uban nahimong mas importante kay sa mga benepisyo nga akong madawat niini.
-
Gibati nako nga mas duol sa Langitnong Amahan ug sa Manluluwas.
-
Bisan pa sa nagpadayon nga mga hagit, nakasinati ako og daghang ginagmay nga mga kaluoy, ug ako mibati og dako kaayo nga kalipay sa akong kinabuhi.
Natandog ako sa mga pulong ni Elder Joseph B. Wirthlin (1917–2008) sa Korum sa Napulog Duha ka Apostoles sa dihang miingon siya:
“Ang pagpuasa sa tukma nga espiritu ug sa pamaagi sa Ginoo modasig kanato sa espirituhanong paagi, molig-on sa atong disiplina sa kaugalingon, mopuno sa atong mga panimalay sa kalinaw, mopagaan sa atong mga kasingkasing uban sa hingpit nga kalipay, molig-on kanato batok sa tintasyon, moandam kanato alang sa mga panahon sa kalisdanan, ug moabli sa mga bentana sa langit. …
“Samtang magsunod kita sa balaod sa puasa, wala lamang kita magpaduol sa Dios pinaagi sa pag-ampo, apan kita mopakaon sa gigutom ug moatiman sa kabos.”1
Daghan kaayo kana nga gisaad nga mga panalangin nga naghulat lamang kanato.
Sukad niini nga kasinatian, ang pagpuasa ug ang mga halad sa puasa nahimong importante nga bahin sa akong pagkadisipulo. Gibati nako nga mas duol sa akong Langitnong Amahan ug sa Manluluwas sa matag higayon nga mohatag ako. Ug usahay magpuasa ako bisan kon kini dili Dominggo sa puasa aron sa pagpangita og mga tubag ug kahupayan alang sa akong kaugalingon o alang sa uban.
Nakaamgo ako nga ang balaod sa puasa usa gayod ka gasa.
Ug enkaso naghunahuna kamo, oo, napasar gayod nako sa milagrosong paagi ang math nga klase niana nga semestre. Ug wala lang nako napasar kini—nakuha nako ang usa sa labing taas nga mga grado sa klase. Nagtuon ako, siyempre, apan sa makausa sa akong kinabuhi, kadto nga mga letra ug mga numero daw nasabtan na gayod nako sa kataposan.
Ang Langitnong Amahan usa gayod ka Dios sa mga milagro.
Samtang maningkamot kita sa pagsunod Kaniya ug sa Iyang Anak, si Jesukristo, uban sa mga sugo Nila, makapadayon kita nga adunay hugot nga pagtuo, paglaom, ug gugma nga putli, ug mopahinumdom Sila kanato nga nag-uban Sila kanato ug andam sa pagpanalangin kanato sa atong mga paningkamot.