Ang Langitnong Amahan Gusto nga Mahibalik Kita

Ni Elder Ulisses Soares

Sa Korum sa Napulog Duha ka mga Apostoles

Tingali kamo mas duol na subay sa dalan pabalik sa inyong Langitnong Amahan kaysa inyong pagtuo.

Ang akong mga ginikanan, sila si Aparecido ug Mercedes Soares, kanunayng nangandoy sa pagserbisyo og usa ka misyon. Gusto nilang mobalos sa Ginoo alang sa daghang panalangin nga miabot sa ilang pamilya sukad nga sila miapil sa Simbahan. Miabot ang ilang oportunidad niadtong 1989 sa dihang gidawat nila ang tawag sa pagserbisyo didto sa Templo sa São Paulo Brazil.

Lamang sa pipila ka bulan sa ilang misyon, ang akong amahan giataki sa kasingkasing ug namatay. Atol sa iyang lubong, akong gigakos ang akong inahan samtang nagbarog kami diha tungod sa lungon sa akong amahan.

“Ma, unsa man ang imong buhaton karon?” Nangutana ko.

“Ang imong amahan ug ako nangandoy niini nga misyon,” mitubag siya. “Nagserbisyo ko karon, ug mopadayon sa pagserbisyo—para kaniya ug kanako.”

Usa ka mabination nga presidente sa templo mi-assign og laing biyuda nga moserbisyo isip kompanyon sa akong inahan, ug ang akong inahan mipadayon sa iyang misyon sa sobra sa 20 ka bulan. Ang iyang misyonaryo nga pagserbisyo mipanalangin kaniya, ug ang iyang hugot nga pagtuo ug ehemplo mipanalangin sa akong pamilya ug kanako.

Atol sa iyang misyon, duha sa akong igsoong mga lalaki namatay usab, ug ako ug ang akong asawa namatyan og duha ka anak. Ang una natawo nga kulang sa adlaw ug wala makalahutay, ug nawad-an kami sa ikaduha tungod kay nakuha atol sa pagmabdos. Atol nianang panahon sa pagsulay sa among pamilya, ang akong inahan anaa sa templo matag adlaw sa pagmatuod sa iyang hugot nga pagtuo—ug nagpalig-on sa amoa—diha sa plano sa kaluwasan.

Ang iyang hugot nga pagtuo sa usa ka mahimayaong panag-uban og usab sa akong amahan ug ang saad sa kinabuhing dayon diha sa presensya sa atong Langitnong Amahan mipaluyo kaniya sulod sa 29 ka tuig isip usa ka biyuda hangtod sa kataposan sa iyang mga adlaw, sa edad nga 94.

Ang Plano sa Kalipay

Pagkabulahan nato isip mga Santos sa Ulahing mga Adlaw sa pagkasayod nga ang ebanghelyo gipahiuli. Ang plano sa kaluwasan sa tinuoray mao “[ang] mahinungdanon nga laraw sa kalipay” (Alma 42:8). Sa matinuoron ug matinud-anon, nagsaad kini og usa ka walay kataposan nga ganti diha sa presensya sa Dios.

Sama sa gipadayag diha sa Doktrina ug mga Pakigsaad, hapit tanan nga mga anak sa Langitnong Amahan makasulod og usa ka gingharian sa himaya. Pinaagi sa Pag-ula sa Manluluwas, kadtong kinsa moabot “sa pagkabanhaw sa makiangayon” (Doktrina ug mga Pakigsaad 76:17) mahimo nga hingpit ug makapanunod sa celestial nga himaya.

Kadaghanan sa mga miyembro sa Ang Simbahan ni Jesukristo sa mga Santos sa Ulahing mga Adlaw midawat niini nga doktrina. Subo lang, ang uban tingali dili motuo nga kini magamit ngadto kanila sa personal nga paagi. Sila makahimo og sayop. Ang ilang espirituhanon nga pag-uswag, hinay, bisan og makanunayon. Naghunahuna sila kon igo na ba kaha ang ilang kamaayo alang sa celestial nga gingharian.

Kon kamo maanaa niana nga grupo, hinumdumi ang mga pulong sa Ginoo ngadto sa laing grupo sa mga tumutuo: “Ihangad ang inyong mga ulo ug pagmadasigon, kay ako nasayud sa pakigsaad diin kamo mihimo ngari kanako” (Mosiah 24:13).

Ang Dios nahigugma kanato ug gusto nga kitang tanan mahibalik sa Iyang presensya. Tingali kamo mas duol na subay sa dalan pabalik sa inyong Langitnong Amahan kaysa inyong pagtuo.

“Makiangayon ug Matarung.”

Sa Doktrina ug mga Pakigsaad seksyon 76, ang Ginoo mipadayag kon sa unsang paagi ang Iyang mga anak makapanunod sa celestial nga gingharian. Kon ikaw usa ka miyembro sa Simbahan ug nakabaton og usa ka pagpamatuod, ikaw nakasugod na sa imong dalan, sama sa gihulagway sa Doktrina ug mga Pakigsaad:

Kita kinahanglan gayod nga makadawat “sa pagpamatuod ni Jesus” ug motuo “sa iyang ngalan” (bersikulo 51).
Kita kinahanglan nga magpabunyag pinaagi sa pagpaunlod (tan-awa sa bersikulo 51).
Kita kinahanglan gayod nga “makadawat sa Balaan nga Espiritu pinaagi sa pagpandong sa mga kamot” sa usa ka tawo nga adunay awtoridad sa pagkapari (bersikulo 52).

Ang ubang mga lakang, hinoon, molungtad pa sa tibuok kinabuhi nga paningkamot, ug ang pipila ka mga miyembro mobati nga mawad-an og kadasig kon sila makahimo og sayop. Kitang tanan naningkamot niini nga mga panginahanglan. Salamat sa Pag-ula ni Jesukristo, kitang tanan makakab-ot niini:

Paghupot sa mga sugo ug “mahugasan ug malimpyohan gikan sa tanan [natong] mga sala” (bersikulo 52).
“Nakabuntog pinaagi sa hugot nga pagtuo” (bersikulo 53).
“Gibugkos pinaagi sa Balaan nga Espiritu sa saad” (sa bersikulo 53), nga mao ang Espiritu Santo, nga nagsaksi “ngadto sa Amahan nga ang [atong] mga ordinansa sa pagluwas gipahigayon sa matarung nga paagi ug nga ang mga pakigsaad nga nauban kanila giampingan.”¹ Ang Amahan misaad niining pagbugkos sa “tanan niadto kinsa mga makiangayon ug matarung” (bersikulo 53).

Ang “makiangayon ug matarung,” namahayag si Presidente Ezra Taft Benson (1899–1994), mao ang “usa ka angay nga pahayag alang niadtong maisugon sa pagpamatuod ni Jesus. Sila adunay kaisug sa pagpanalipod sa kamatuoran ug sa pagkamatarung. Kini ang mga miyembro sa Simbahan kinsa nagpalambo sa ilang mga calling diha sa Simbahan (tan-awa sa D&P 84:33), nagbayad sa ilang ikapulo ug mga halad, magkinabuhi nga limpyo sa moral nga paagi, mipaluyo sa ilang mga lider sa Simbahan pinaagi sa pulong ug sa buhat, naghupot sa Igpapahulay isip balaan nga adlaw, ug nagsunod sa tanang mga sugo sa Dios.”²

Ang pag-angkon sa labing taas nga ang-ang sa celestial nga gingharian, nga sa kasagarang gipasabot nga kahimayaan [exaltation], adunay usa ka kataposan nga mga panginahanglan. Kita kinahanglan gayod nga mosulod ngadto “[sa] bag-o ug walay katapusan nga pakigsaad sa kaminyoon” (Doktrina ug mga Pakigsaad 131:2), nga gipahigayon diha sa templo pinaagi sa tukmang awtoridad sa pagkapari. Sumala sa maloloy-on nga plano sa atong Amahan, kita nakahibalo nga ang celestial nga mga panalangin maanaa na sa sunod nga kinabuhi ngadto niadtong kinsa walay oportunidad alang sa ordinansa sa pagsilyo diha sa templo niini nga kinabuhi apan matinud-anon hangtod sa kataposan.

Atong makat-onan diha sa Basahon ni Mormon nga ang tanang mga anak sa Dios kinsa motuman sa Iyang mga sugo ug matinud-anon, bisan unsa pa ang kahimtang sa kinabuhi, mapanalanginan ug “pagadawaton ngadto sa langit, nga pinaagi niana sila mahimo nga mopuyo uban sa Dios diha sa usa ka kahimtang nga walay katapusan ang kalipay” (Mosiah 2:41). Adunay paglaum kanunay alang kanato diha sa maloloy-on ug mahigugmaon nga plano sa kaluwasan sa atong Langitnong Amahan.

Ang Panalangin sa Paghinulsol

Ang atong pinalangga nga propeta, si Presidente Russell M. Nelson, mitudlo: “Ang Ginoo wala magdahum og kahingpitan gikan kanato niining puntuha sa atong mahangturong pag-uswag. Apan Siya nagdahum gayud nga kita mag-anam-anam og kaputli. Ang matag adlaw nga paghinulsol mao ang agianan ngadto sa kaputli, ug ang kaputli magdala og gahum.”³

Miingon usab si Presidente Nelson nga “sa pagbuhat ug mahimong mas maayo matag adlaw” modala kanato og “makapalig-on nga gahum.”⁴ Samtang atong gamiton ang makapalig-on nga gahum batok sa mga kinaiyanhon nga lalaki o babaye (tan-awa sa Mosiah 3:19), kita mouswag og dugang diha sa dalan pabalik sa atong Amahan.

Tungod kay walay mahugaw nga butang ang makapuyo sa presensya sa Dios (tan-awa sa Moises 6:57), atong trabahoon kada adlaw ang tinuod nga espiritwal nga kausaban—sa atong mga hunahuna, sa atong mga tinguha ug sa atong kinaiya. Sa mga pulong ni Apostol Pablo, atong tinguhaon ang mahimong bag-o nga nilalang diha ni Kristo, sa hinay-hinay nga pagpuli sa karaan nga kaugalingon ngadto sa bag-ong kaugalingon (tan-awa sa 2 Mga Taga-Corinto 5:17). Kini nga kausaban moabot isip pagtulun-an human sa laing pagtulun-an samtang kita maningkamot nga mahimong mas maayo sa matag adlaw.

Ang pagsunod sa Manluluwas pinaagi sa pagpaningkamot nga mahimong sama Kaniya mao ang usa ka proseso sa paghikalimot sa kaugalingon, diin Iyang gihulagway isip pagdala sa atong krus (tan-awa sa Mateo 16:24–26). Kita mopas-an sa atong krus kon kita:

Mokontrolar sa atong mga tinguha, mga gana, ug sa mainit nga mga pagbati.
Mapailubon nga “[mo]dawat sa tanan nga mga butang diin ang Ginoo makakita nga angay ipahamtang [nganhi]” kanato (Mosiah 3:19).
Molimud sa atong mga kaugalingon sa tanan nga dili diosnon (tan-awa sa Moroni 10:32).
Motugyan sa atong kabubut-on ngadto sa kabubut-on sa Amahan, sama sa gibuhat sa Manluluwas.

Ug unsay atong buhaton kon kita makahimo og kasaypanan? Modangop kita sa atong Amahan ug mohangyo Kaniya nga “[modihog] sa inula nga dugo ni Kristo nga [kita] mahimo nga makadawat sa kapasayloan sa [atong] mga sala” (Mosiah 4:2). Maningkamot kita pag-usab aron mabuntog ang kahuyang ug mobiya sa sala. Mag-ampo kita alang sa grasya, ang “makaabag nga gahum ug espirituhanon nga pagkaayo” ni Jesukristo.⁵ Kita mokuha sa atong krus ug mopadayon sa atong panaw, bisan unsa ka taas ug kalisod, ngadto sa gisaad nga yuta sa Ilang presensya.

Mosalig sa Iyang mga Saad

Ang atong pagka-imortal ug kinabuhing dayon mao ang buhat ug himaya sa Dios (tan-awa sa Moises 1:39). Ang atong buhat sa pagkab-ot niana nga himaya naglakip sa pagkamaisugon sa atong pagpamatuod samtang anaa pa sa yuta.

Sa panan-awon, nakita ni Propeta Joseph Smith nga ang matinud-anon “makabuntog sa tanan nga mga butang” (Doktrina ug mga Pakigsaad 76:60). Sa kaulahian, siya namahayag, “Tanan nga mga trono ug mga kamandoan, gagmay nga mga gingharian ug mga gahum, mapadayag ug ihatag diha sa tanan kinsa milahutay nga maisugon alang sa ebanghelyo ni Jesukristo” (Doktrina ug mga Pakigsaad 121:29).

Samtang mosalig kita niining mga saad, dili nato paundangon ang atong kaugalingon, ang atong mga minahal, o ang ubang mga anak sa Dios. Maningkamot kita nga himoon ang pinakamaayo ug tabangan ang uban nga mobuhat sa ingon. Sa atong kaugalingon lamang, walay usa kanato nga igo na ang kamaayo aron maluwas diha sa celestial nga gingharian, apan “pinaagi sa mga maayo nga buhat, kalooy, ug grasya sa Balaang Mesiyas” (2 Nephi 2:8), kana nga panalangin nagpabilin nga makab-ot ra.

Samtang kita magpadayon nga magmatinud-anon, ako mopamatuod nga kita makapanunod sa “walay katapusan nga kalipay” diha sa presensya sa Amahan ug sa Anak. “O hinumdumi, hinumdumi nga kini nga mga butang tinuod; kay ang Ginoong Dios namulong niini” (Mosiah 2:41).