Mai, pe’e mai

Te Parau Ha’api’ira’a ʼe te mau Parau Fafau 77–80

« E arata’i atu nā vau ia ’outou »

Nā Milton Camargo

Tauturu mātāmua i roto i te peresidenira’a rahi o te Ha’api’ira’a Sābati

Noa atu ē e riro tātou ’ei mau tamari’i i te pae vārua, e arata’i mai te Fatu ia tātou mai te mea ē e ti’aturi tātou iāna.

’Ua parau te misiōnare ’ua muhumuhu te Vārua ē e nehenehe tā’u e tauturu iāna ’ia ’ite mai i te hō’ē pāhonora’a.

Fa’ahōho’ara’a nā David Malan

I roto i Te Parau Ha’api’ira’a ’e te mau Parau Fafau 78:17–18, tē nā ’ō ra te Fa’aora ē :

« ’Oia mau, ’oia mau, tē parau atu nei au ia ’outou ē, e mau tamari’i ri’i ’outou, ’e ’aita ’outou i ’ite a’e nei i te mau ha’amaita’ira’a rahi tā te Metua e tāpe’a ra i roto i tōna rima ’e i fa’aineinehia nō ’outou ;

« ’E ’aita e ti’a ia ’outou ’ia fa’a’oroma’i i te mau mea ato’a i teie nei ; noa atu i te reira, ’a ’oa’oa maita’i nā, nō te mea e arata’i atu na vau ia ’outou. Nō ’outou te bāsileia ’e te mau ha’amaita’ra’a nō te reira nō ’outou ïa, ’e nō ’outou na te mau faufa’a mure ’ore na ».

’A feruri ai tātou tāta’itahi i tō tātou mau ’itera’a rau i roto i te orara’a, e ha’amana’o pāpū tātou i te mau taime ’a arata’i ai te Fatu ia tātou.

Te fa’aro’o o te hō’ē misiōnare

Tē ha’amana’o nei au i te hō’ē taime ’a arata’i ai te Fatu i te mau ta’ata e rave rahi. Tē tāvini ra vau ’ei peresideni misiōni i roto i te misiōni nō Peresiria Porto Alegre ’Apatoa. ’Ua ro’ohia te hō’ē o tā mātou mau misiōnare i te hō’ē ma’i tei pi’ihia te ’utu rāpiti, ’o tei ’ore roa i rapa’auhia. ’Ia paraparau mai ’oia, e haere te aho nā roto i tōna vaha ’e e matara nā roto mai i tōna ihu. E mea fifi roa nō vetahi ’ē ’ia hāro’aro’a iāna.

’Ua parau mai teie misiōnare ’āpī iā’u ē ’ua pure ’oia nō ni’a i tōna fifi. ’Ua parau mai ’oia ē, ’ua muhumuhu mai te Vārua ē e tauturu vau iāna ’ia ’ite mai i te hō’ē pāhonora’a. ’Ua fa’auru tōna fa’aro’o ’ōhie, te pāpū iā’u. ’Ua fāriu atu vau i ni’a i te Atua nō te ’ite mai i te hō’ē rāve’a.

’O te hō’ē tāpūra’a ’ōhie e ti’a e fa’a’āfaro i te fifi, terā rā, e ’ere te tāpūra’a i te hō’ē fa’anahora’a ’ōhie. Mai te mea e rave mātou i te reira i te hō’ē vāhi e ’ere nā te hau, e mea moni rahi roa ïa nō te ’utuāfare o teie misiōnare. I te tahi atu pae, te fa’a’ohipara’a i te rāve’a rapa’aura’a a te hau e tītau te reira i te mau fārereira’a e rave rahi ’e e ha’apau te reira i te mau ’āva’e e toe ra nō tāna misiōni.

Te fa’aro’o o tō’u hoa fa’aipoipo

I te mau taime ato’a e misiōni fifi tā’u e fa’aoti, e turu’i au i ni’a i te fa’aro’o ’e te tauturu a tā’u vahine. ’Ua tātara atu vau iāna i te fifi o teie misiōnare ’e ’ua ani iāna ’ia paraparau atu i te feiā nō te fare ma’i a te hau o te fenua. Tē vai rā ānei te hō’ē rāve’a ’ia ravehia te tāpūra’a ma te tāmoni ’ore ’e i roto i te hō’ē tau i fa’anahohia ?

I muri mai i te purera’a nō te ani i te tauturu, ’ua haere atu tā’u vahine i te fare ma’i. ’Ua ti’a ’oia i roto i te hō’ē rēni roa nō te mau ta’ata e tīa’i ra nō te ’āparau atu i te hō’ē ti’a. ’A nu’u noa ai te rēni tīa’ira’a, ’ua nehenehe i tā’u vahine e fa’aro’o e mea nāhea te mau ’ohipa i mua iāna i te ravehia. Tei matauhia, ’ia ho’i mai te mau ta’ata i roto e ono ’āva’e nō te hō’ē fārereira’a, i te tahi taime e hau atu.

’Ua ’ite tā’u vahine ē e taime roa roa nō tā māua misiōnare. E au ra ’ua tura’ihia ’oia e fa’aru’e i te rēni ’e ’ia haere nā roto i te tahi atu ’ōpani. I reira, ’ua fārerei atu ’oia i te tahi atu rave ’ohipa o te fare ma’i. ’Ua fa’a’ite atu tā’u vahine ’o vai oia ’e ’ua fa’ata’a atu i te hina’aro o tā māua misiōnare.

’Ua parau mai te rave ’ohipa iāna ’ia paraparau ’āfaro atu i te taote tāpū, tei roto i te fare ma’i i taua mahana ra nō te hō’ē tāpūra’a i ni’a i te tahi atu tahua. ’Ua fa’ata’a atu tā’u vahine i te taote tāpū e aha te ’ohipa a te mau misiōnare ’e e nāhea teie misiōnare i te ha’amaita’ihia mai te mea e tāpūhia ’oia nō te fa’a’āfaro i tōna ’utu rāpiti.

’Ua uiui mai te taote tāpū i te tahi mau uira’a. I muri iho ’ua parau mai ’oia, « e nehenehe ānei tātou e fa’anaho i te tāpūra’a i roto i nā hepetoma e piti e haere mai nei ? » ’Ua fa’a’ī hope ’oia i te hō’ē parau nō te fare ma’i tei fa’ata’a ē, ’ua riro teie tāpūra’a ’ei maita’i nō te huira’atira ’e e nāna iho e ha’apa’o i te reira. ’Ua hōro’a atu ’oia i te parau i tōna tauturu ’e ’ua ani iāna ’ia fa’anaho mai i te tai’o mahana.

’Ahuru mahana i muri mai, ’ua tāpū te taote i tā māua misiōnare. ’Aita i maoro roa, ’ua ho’i mai teie misiōnare i roto i te ’āua, ma te ’oa’oa ’e te paraparau pāpū i te reo. Ma te ’ana’anatae i fa’a’āpīhia, ’ua ’ite ’oia ē ’ua arata’i te Fatu iāna.

’Ua riro te ’ohipa i tupu i teie misiōnare ’ei hō’ē ’itera’a pāpū ē tē fa’aro’o mai nei tō tātou Metua i tā tātou mau pure ’e tē arata’i nei ia tātou nā te rima.

’Aita ana’e te Atua, e mea faufa’a ’ore tātou

’Ia parauhia ma te pae vārua, e au tātou mai te mau tamari’i ri’i. ’Aita tātou e māramarama nei i te mau ha’amaita’ira’a rahi tā te Metua i te ao ra i fa’aineine nō tātou. ’A tupu ai tātou i te pae tino, e ha’amata tātou i te hāro’aro’a hau atu nō ni’a i te mau ture o te tahuti nei ’o tē arata’i nei i tō tātou orara’a. ’Eiaha roa atu rā tātou e vaiiho i te ’ite tahuti ’ia riro ’ei mea faufa’a hau atu i te māramaramara’a i te mau ha’amaita’ira’a rahi tā te Metua i te ra’i i fa’aherehere nō tātou.

’Ua fāri’i o Mose, te hō’ē peropheta rahi nō te Faufa’a Tahito, i te hō’ē ’itera’a tei fa’a’ite iāna ē, e mea iti mau tāna i ’ite. I muri a’e i tōna « ’itera’a i te ao nei ’e i te mau hope’ara’a, ’e te mau tamari’i ato’a a te ta’ata nei e vai ra ’e tei hāmanihia ; mai te reira ato’a ’ua māere rahi ’e ’ua uiui ’oia iāna iho ». I muri mai, ’ua unuhi atu ra te Atua. ’Ua vai noa atu ra Mose ’ōna ana’e iho, ’e topa ihora ’oia i ni’a i te fenua nei.

« E i muri a’e ra nā hora e rave rahi ra ’ua roa’a fa’ahou mai ra tō Mose pūai mai tō te ta’ata ra ; ’e ’ua parau ihora ’oia iāna iho : I teienei, nō reira vau i ’ite ai ē e mea faufa’a ’ore te ta’ata nei, mai tei ’ore roa i mana’ohia e au ra » (Mose 1:8–10).

’Āhiri te Fatu i fa’a’ite mai ia tātou i te mau mea ato’a e ti’a ia tātou ’ia rave mā tōna mana, e riro mau tātou i te tīhemohia. Mai ia Mose, e ’ite tātou ē, ’aita ana’e te Atua, e mea faufa’a ’ore tātou.

Ta’ahira’a i muri mai i te tahi ta’ahira’a

’Ahiri rā i te tīhemora’a ia tātou, e arata’i te Fatu ia tātou i ni’a i te ta’ahira’a i muri mai i te ta’ahira’a. E fa’ati’a te reira ia tātou ’ia rave rahi atu ā i tā tātou e ’ore e nehenehe e rave ’o tātou ana’e.

« E ’ere hoi tō’u ra mana’o i tō ’outou ra mana’o ; e ’ere ho’i tō ’outou ra haere’a i tō’u ra haere’a, tē nā reira mai ra Iehova.

« Mai te ra’i nei ho’i e teitei rahi tōna i tō te fenua, ’oia ato’a tō’u ra haere’a, e teitei ïa i tō ’outou haere’a, ’e tō’u ra mau mana’o i tō ’outou ra mau mana’o » (Isaia 55:8–9).

Mai tā te Fatu i parau i roto i Te Parau Ha’api’ira’a ’e te mau Parau Fafau 78:18, e « ’ore roa e noa’a i te mau mea ato’a i teienei » ia tātou. ’E’ita e nehenehe ia tātou ’ia hāro’aro’a i te mau mea ato’a tāna e māramarama nei. E aha ïa te ti’a ia tātou ’ia rave ? Tē pāhono nei te Fatu : « ’ia ’oa’oa ! »

Te haerera’a nā te ’ē’a o te fafaura’a ma te ’oa’oa ’oia ho’i ’ia vai ha’eha’a noa, mai te hō’ē tamari’i ri’i. E ti’a ia tātou ’ia hina’aro ’ia ha’api’ihia ’e ’ia arata’ihia e te Metua (hi’o Te Parau Ha’api’ira’a ’e te mau Parau Fafau 112:10). Nō te fifi rahi o te orara’a e’ita tā tātou e nehenehe e ha’avī i te mau mea ato’a o tō tātou tere. ’E e’ita tā tātou e nehenehe e māramarama i te mau mea ato’a tā tātou, ’aore rā tā tō tātou mau ta’ata i herehia, e rātere nei i te fenua nei.

Terā rā mai te mea e ti’aturi tātou i te Fatu ’e e fa’ati’a tātou iāna ’ia arata’i ia tātou i te rima, e nehenehe tā tātou e rave rahi atu ā i roto i tōna bāsileia hau atu i tā tātou e nehenehe e feruri. E nehenehe tātou e ha’amaita’i rahi atu ā i te orara’a o te mau tamari’i a tō tātou Metua i te ao ra. E nehenehe tātou e ’ite rahi atu ā i te rima o te Fa’aora i roto i tō tātou orara’a. E nehenehe tātou e fāri’i rahi atu ā i te māuruuru nō tōna aroha ’e tōna here hope ’ore.

Tō ’outou mau ha’amaita’ira’a

I te pae hope’a, e arata’i te Fatu ia tātou ma te fa’aha’amana’o ia tātou ē, « tei ia ’outou nā te bāsileia ’e te mau ha’amaita’ira’a nō te tau ato’a, ’e te mau tao’a nō te tau mure ’ore ra » (Te Parau Ha’api’ira’a ’e te mau Parau Fafau 78:18).

E ho’i mai au i ni’a i te hi’ora’a o tā’u misiōnare. ’Ua arata’ihia ’oia nō te ani i te tauturu ’e ’ua ha’amaita’ihia ’oia ma te hō’ē tāpūra’a ’o tei fa’ati’a iāna i teienei ’ia paraparau pāpū maita’i. I muri iho, ’ua arata’ihia ’oia i te feiā ra tei ineine nō te fāri’i i te ’evanelia ’e tō te reira mau ha’amaita’ira’a, mai te bāpetizora’a. Tē hi’o ato’a nei au i te hi’ora’a o tā’u vahine fa’aipoipo. ’Ua tupu tōna ’itera’a pāpū i te rahi ’a arata’i ai te Fatu iāna. I muri mai, ’ua ’īriti te Fatu i te mau ha’amāramarama o te ra’i ’e ’ua nīni’i mai i te hō’ē ha’amaita’ira’a.

Tē ’oa’oa nei au i te mea ē, ’ua ti’a iā’u ’ia ’ohipa ’e teie misiōnare ’āpī, tei ’ī i te hō’ē fa’aro’o ’ōhie ’e te pūai. ’E tē ’oa’oa nei au i te mea ē, e nehenehe au e ora e a muri noa atu ’e tā’u vahine, ’o tē fa’a’ite nei i te hō’ē hi’ora’a nō te fa’ati’a i te Fatu ’ia arata’i iāna.

’Oia mau nō tātou te bāsileia ’e te mau ha’amaita’ira’a.

E arata’i te Fatu ia tātou i ni’a i te ta’ahira’a i muri mai i te ta’ahira’a. E fa’ati’a te reira ia tātou ’ia rave rahi atu ā i tā tātou e ’ore e nehenehe e rave ’o tātou ana’e.