Te reo o te feiā mo’a i te mau mahana hope’a nei
Ha’amaita’i i tō’u mau tupuna
I tō’u fāri’ira’a i tō’u ha’amaita’ira’a patereāreha, ’ua ’ī tō’u ’ā’au i te here nō tō’u mau tupuna.
Hōho’a nā Richard M. Romney
’Ua fānauhia vau i Cameroun, te fenua o tō’u mau tupuna. I muri iho, ’ua reva vau i Farani, i reira vau i te orara’a, i haere ai i te ha’api’ira’a, ’e i rave ai i te ’ohipa ’ei tuati ma’i i roto i te mau fare ma’i e rave rahi i Paris. I teienei, tē ora nei au i Montreal, i reira vau e ’ohipa ai ’ei tuati ma’i.
E rave rahi matahiti tō’u ’imira’a i te ’Ēkālesia mau a Iesu Mesia. I tō’u fārereira’a i te mau misiōnare i Paris, ’ua fa’a’ite pāpū mai te Vārua Maita’i iā’u ē, ’ua ’itehia iā’u te mea tā’u i ’imi na—Te ’Ēkālesia a Iesu Mesia i te Feiā Mo’a i te mau Mahana Hope’a nei. ’Ua ’ī roa vau i te ’oa’oa, i te mana’o ē, ’ua ti’a iā’u ’ia pārahi i te ao ra ! ’Ua hina’aro pāpū vau e ora hope roa i te ’evanelia.
’Ua ha’api’ihia vau ’ia ’imi i tō’u mau tupuna ’e ’ia rave i te mau ’ōro’a nō rātou i roto i te hiero. I tō’u fāri’ira’a i tō’u ha’amaita’ira’a patereāreha, ’ua parauhia mai iā’u ē, e riro vau ’ei fa’aora i ni’a i te mou’a o Ziona ’e e ’āfa’i mai i te fa’aorara’a i tō’u ’utuāfare. ’Ua ’ī tō’u ’ā’au i te here nō rātou ; e’ita tā’u e nehenehe e fa’aru’e ia rātou. Mai taua taime ra, ’ua rave au i te ’ohipa ma te tu’utu’u ’ore i ni’a i te ’ā’amu ’utuāfare ’e te tuatāpapara’a tupuna.
’Ua ’ite tāmau noa vau ē, ’ua fānauhia vau i roto i te hō’ē ’utuāfare ari’i nō Cameroun, te ’utuāfare Bamoun. Tē parau nei te hīro’a tumu paraparau ’e te ’ā’amu tupuna ē, nō Assyria mai teie mau ta’ata, ’e ’ua ano’i i te tahi atu mau ta’ata i roto i tō rātou mau tere e fa’aea i te mau fenua ’e’ē. ’Ua tāpe’a noa rātou i tō rātou tuatāpapara’a tupuna ’e ’ua pāpa’i i tō rātou ’ā’amu e tae roa i te matahiti 1300 i muri a’e i te pohera’a o te Mesia. Tei roto te mau parau i te vaira’a buka o te aorai o te ari’i. I roto i te tahi atu mau ’ā’amu e rave rahi, tē fa’ati’a ra rātou i te ’ā’amu o tō’u pāpā rū’au Fon gouhouo, i te pae o tō’u māmā, tei fa’atere ari’i mai te matahiti 1818 e tae atu i te matahiti 1863.
’Ua ti’a iā’u ’ia ho’i i tō’u fenua ’āi’a, ’e ’ei melo nō te ’utuāfare Bamoun, ’ua ti’a iā’u ’ia hi’o i teie mau parau. ’Ua haere ato’a vau e fārerei i te ari’i, ’e ’ua fārerei i te tahi atu mau huimana fa’atere o te hau, ’e ’ua paraparau vau i te feiā fa’atere nō ni’a i te ’Ēkālesia ’e tōna ’ana’anatae i roto i te ’ā’amu ’utuāfare. Māuruuru i te ’evanelia i fa’aho’ihia mai, tē ’oa’oa nei au i te mea ē, e nehenehe tā’u e rave i tā’u tuha’a nō te ha’amaita’i i tō’u fenua ai’a ’e tō’u mau tupunua.