Leʻo ʻo e Kau Māʻoniʻoni ʻi he Ngaahi ʻAho Kimui Ní
Talitali Lelei Hoʻo Foki Maí, Kilisitine
Hili ha taʻu ʻe valu mei he mālōlō ʻeku tangataʻeikí, ne u manatu ai ki he ʻofa ʻa e ʻOtuá maʻakú.
Laʻitā ʻo e Temipale London England meia Chris Willis
Ne u taʻu 19 pē ʻi he taimi ne mālōlō ai ʻeku tangataʻeikí ʻi he ʻaho 20 ʻo Sune, 2010. Ko e ʻAho ia ʻo e Ngaahi Tamaí ʻi he ʻIunaiteti Siteití. Naʻe mātuʻaki fakamamahi ʻaupito kiate au e mālōlō ʻeku tangataʻeikí, pea kamata māmālie ke tuku ʻeku ʻalu ki he lotu ne u kau ki aí. ʻE anga fēfē haʻaku ʻalu ki he lotú ʻo kole ki he ʻOtuá ha fakahinohino ka ne ʻikai fanongo mai Ia kiate au ʻi he taimi ne u fuʻu fie maʻu lahi taha ai Iá? Ne u ongoʻi kuó Ne liʻaki au.
Hili ha ngaahi taʻu siʻi mei ai, ne u hiki ki Lonitoni, ʻIngilani, ki ha akoʻanga ʻunivēsiti. ʻI heʻeku luelue ki he ʻapiakó ʻi ha ʻaho momoko mo sinou ʻe taha, ne u fanongo hiva ʻi heʻeku meʻa fanongó ʻi he taimi ne fakalea mai ai ha ongo faifekau mo fakafeʻiloaki mai kinaua.
Ne ʻeke mai ʻe ʻEletā Hetauei mo Poota pe ko e hā ne u fanongo ki aí. ʻI he taimi ne u talaange ai ʻoku ou fanongo ki he mūsika ʻo e Tohi ʻa Molomoná , ne fakaʻohovale kiate kinaua. Ne vahevahe mai leva ʻe he ongo faifekaú ʻena fakamoʻoni ki he tohí, mo ʻomi hano tatau kiate au. ʻI heʻeku kamata ke lau e Tohi ʻa Molomoná, ne u fakatokangaʻi mahalo pē ne ʻomi ʻe he ʻOtuá ha fakaʻilonga kiate au, ʻo talamai kuo taimi ke u tafoki ange kiate Ia—ka ʻi ha founga foʻou.
ʻI he ʻaho hono hokó, ne akoʻi mai ʻe he ongo faifekaú e palani ʻo e fakamoʻuí. ʻI he lolotonga lele ʻa e lēsoní, ne pehē ʻe ʻEletā Poota, “ʻI he ngataʻangá, te tau maʻu ʻa e faingamālie ke toe fakataha ai mo hotau fāmilí.” Ko e tokāteline mālohi taha ia kuó u fanongo ai. Te u toe maʻu ha faingamālie ke fakataha ai mo ʻeku tamaí. Ne u ʻiloʻi he taimi pē ko iá kuó u fie ako lahi ange. Ne kamata ke foki māmālie mai ʻeku ʻofa mo e falala ki he ʻOtuá.
ʻI he ʻaho 15 ʻo ʻEpeleli, 2018, ne u papitaiso ai. Te u manatuʻi maʻu pē e māfana ʻo e vaí. Ne hangē ia ha fāʻofua mai ʻa e ʻOtuá kiate au mo pehē mai, “Ne u ʻofa atu kiate koe, Kilisitine. ʻOku talitali lelei koe.” Naʻe nāunauʻia hono fakamanatuʻi mai ʻo e ʻofa ʻa e ʻOtuá. Naʻe talitali lelei foki au ʻe he Uooti Haiti Paaka ʻUluakí mo tokoniʻi au ʻi hoku hala fonongá.
Kapau ne ke ʻeke mai kiate au he taʻu ʻe hongofulu kuo ʻosí pe te u toe ʻofa he ʻOtuá pe ʻikai, mahalo pē te u talaatu “ʻIkai!” Ka kuo liliu ia ʻi hono akoʻi au fekauʻaki mo e palani ʻo e fakamoʻui ʻa e ʻOtuá.
ʻIkai fuoloa, ne u ʻalu ki he Temipale London England, mo e hingoa ʻeku tangataʻeikí. ʻI he taimi ne papitaiso ai ha tokotaha mo hilifakinima ʻo fakafofongaʻi ʻeku tangataʻeikí, ne u ʻiloʻi kuó u ofi ʻaki ha foʻi sitepu ʻe taha ke u toe fakataha mo ia ha ʻaho.
ʻOku ou ʻilo te u toe fakataha pē mo ʻeku tangataʻeikí. Kuo tupulaki ʻeni ʻeku ʻofa ki he ʻOtuá ʻi he ʻaho kotoa pē.