Mau niu o te ’Evanelia

Tē hina’aro nei tō tātou Metua i te ao ra ’ia ’oa’oa tātou

’A ha’amana’o ai tātou i te fa’anahora’a nō te ’oa’oa a te Atua, e nehenehe tātou e ’ite mai i te ’oa’oa noa atu ē, e mea pa’ari te orara’a.

Te mau fa’ahōho’ara’a ato’a, ’eiaha rā i te pae ’atau roa, nā J. Kirk Richards

Hou tātou ’a fānauhia mai ai i ni’a i te fenua nei, ’ua ora na tātou pā’āto’a i pīha’i iho i te Metua i te ao ra ’ei mau tamari’i vārua nāna. ’Ua vauvau mai ’oia i te hō’ē fa’anahora’a nō te tauturu i tāna mau tamari’i ’ia ha’api’i mai ’e ’ia tupu i te rahi. Nā roto i tāna fa’anahora’a, e nehenehe tātou e riro hau atu mai iāna te hutu ’e ’ia ti’amā nō te fāna’o i te ora mure ’ore. E tupu teie fa’anahora’a nō te mea, ’ua haere mai te tamaiti a te Atua, ’o Iesu Mesia, i te fenua nei nō te mamae nō tā tātou mau hara, hō’ē tusia tei parauhia te tāra’ehara.

’Ua parauhia te fa’anahora’a a te Metua i te ao ra, te fa’anahora’a o

• te ’oa’oa (hi’o Alama 42:8),

• te ora (hi’o Mose 6:62),

• te fa’aora (hi’o Iakoba 6:8), ’aore rā,

• te aroha (hi’o Alama 42:15).

Mai tā teie mau ’īrava ’e te tahi atu e fa’a’ite nei, tē hina’aro nei tō tātou Metua i te ao ra ’ia riro tātou mai iāna, ’ia ho’i iāna ra, ’e ’ia ’oa’oa mau (hi’o Mose 1:39).

E haere mai tātou i ni’a i te fenua nei nō te ha’api’i mai ’e nō te tupu i te rahi.

’Ua tono mai te Atua ia tātou i ni’a i te fenua nei, i reira tātou e fāri’i ai i te hō’ē tino tāhuti (hi’o Genese 1:26–27). E hina’aro tātou i te tino nō te tauturu ia tātou ’ia ’ite i te orara’a i ni’a i te fenua nei.

’Ua ’ite te Atua ē, e’ita tātou e ’oa’oa i te mau taime ato’a. E ’ite tātou i te ’ino’ino, te ’oto ’e tae noa atu i te pohe. Nā roto rā i te mau tāmatara’a o te orara’a, e tauturu mai te Metua i te ao ra ia tātou ’ia ha’api’i mai ’e ’ia tupu i te rahi.

’Ua hōro’a ato’a mai te Atua ia tātou i te ti’amāra’a, te ti’ara’a ’ia mā’iti i rotopū i te maita’i ’e te ’ino. E vaiiho ’oia ia tātou ’ia mā’iti nā roto ia tātou iho i te mea tā tātou e mana’o ra ’e e rave. ’Ua hōro’a mai ’oia ia tātou i te mau pāpa’ira’a mo’a ’e te mau peropheta ora nō te tauturu ia tātou ’ia ha’api’i mai i te mā’iti i te mea maita’i (hi’o Aberahama 3:25).

’A tāmata ’ia riro mai ia Iesu Mesia te huru

’Aita te Atua i tono mai ia tātou i te fenua nei ma te ’ore e hōro’a mai i te hō’ē hi’ora’a ’ia pe’e (hi’o Ioane 13:15). ’Ua tono mai ’oia i tāna tamaiti, ’o Iesu Mesia, nō te fa’a’ite ia tātou i te ’ē’a. Nō te ha’api’i mai nāhea ’ia pe’e iāna, e nehenehe tātou e tai’o i te mau pāpa’ira’a mo’a nō te ha’api’i mai o vai ’oia, ’e e aha tāna i rave i roto i tōna orara’a i ni’a i te fenua nei. E nehenehe ato’a tātou e rave i te mea maita’i roa a’e nō te riro mai te Mesia ra te huru nā roto i te ha’apa’ora’a i te parau a te Atua ’e te herera’a ia vetahi ’ē.

’Ia rave ana’e tātou i te hape, e ani tātou i te fa’a’orera’a hapa, ’e e turu’i i ni’a i te mana o te tāra’ehara a Iesu Mesia nō te tauturu ia tātou ’ia taui. E nehenehe tātou e ’oa’oa mai te mea e tāmata tātou i te mahana tāta’itahi ’ia riro hau atu mai iāna te huru.

E ’ere te pohe i te hope’a

’Ia pohe ana’e tātou, e haere tō tātou vārua i te ao vārua. I reira, e tāmau noa tātou i te ha’api’i mai, ’a fa’aineine ai tātou nō te ti’afa’ahoura’a.

I roto i te ti’afa’ahoura’a, e tāhō’ēhia tō tātou tino ’e te vārua. E maita’i roa tō tātou tino, ’e e’ita tātou e mamae fa’ahou i te pohe ’aore rā, i te ma’i. (Hi’o Alama 11:44–45.) Mai ia Iesu Mesia i pohe na ’e ’ua ora fa’ahou mai, e ora fa’ahou tātou pā’āto’a.

’Ia ha’avā ana’e te Atua ia tātou, e feruri ’oia i tā tātou mau ’ohipa ’e tō tātou mau hina’aro. Mai te mea ’ua tāmata tātou i te ha’apa’o i te mau fa’auera’a ’e i te mau fafaura’a tā tātou i rave i te Metua i te ao ra, e nehenehe ïa ia tātou ’ia ora fa’ahou i pīha’i iho iāna.

Te orara’a i pīha’i iho i te Atua ’e i tō tātou ’utuāfare i te ao ra

I roto i te bāsileia tīrētiēra, e ora tātou i pīha’i iho i te Atua ’e ia Iesu Mesia. E ti’a ato’a ia tātou ’ia ora i reira ’e tō tātou ’utuāfare e a muri noa atu mai te mea ’ua tā’atihia tātou ’ia rātou. E ’itehia ia tātou te hau, te ’oa’oa, ’e te ora (hi’o Mosia 2:41).

E riro tō tātou orara’a i te fenua nei ’ei mea pa’ari i te tahi taime, mai te mea rā e pe’e tātou ia Iesu Mesia, e ’itehia ia tātou te ’oa’oa i roto i teie orara’a ’e te ’oa’oa mure ’ore i roto i te orara’a a muri a’e.

E aha tā te mau pāpa’ira’a mo’a e parau nei nō ni’a i te fa’anahora’a nō te ’oa’oa ?

E mea faufa’a te huru tā tātou e ora nei i tō tātou orara’a. E ha’avā ’e e ha’amāuruuru te Atua ia tātou ’ia au i tō tātou mau mana’o ’e tā tātou mau ’ohipa. (Hi’o Alama 41:3)

’O Sātane te ’enemi o tō tātou ’oa’oa. E fa’ahema ’oia ia tātou ’ia fa’a’ohipa hape i tō tātou orara’a i ni’a i te fenua nei ’e ’ia rave i te hara. ’Ua hina’aro ’oia ’ia vai tātou i roto i te ’ati rahi mai iāna te huru. (Hi’o 2 Nephi 2:27).

Mai te mea e fa’aro’o tō tātou i te fa’anahora’a a te Atua nō tātou, e roa’a ia tātou te hau, noa atu te mau tāmatara’a tā tātou e fa’aruru. E nehenehe tātou e ti’aturi e ora e a muri noa atu i pīha’i iho i te Atua. (Hi’o Te Parau Ha’api’ira’a ’e te mau Parau Fafau 59:23.)

Te mau parau e ha’amana’o

Tē ti’aturi nei mātou ē, e ’oa’oa ’outou i te ha’api’ira’a mai nō ni’a i te fa’anahora’a nō te ’oa’oa. Teie te tahi atu mau parau faufa’a nō te ’evanelia tā ’outou e nehenehe e ha’api’i mai i roto i teie vauvaura’a parau :

Peropheta : E ta’ata tei pi’ihia e te Atua nō te arata’i i te ’Ēkālesia ’e nō te fāri’i i te heheura’a nō te ’Ēkālesia tā’āto’a. (Hi‘o i te mau ’api 11, 30.)

’Itera’a pāpū : Te mau parau mau pae vārua tā ’outou e ti’aturi nei ’e e tīa’i nei. E tae mai te ’itera’a pāpū i roto ia tātou mai te mea e fāri’i tātou i te Vārua Maita’i. (Hi’o ’api 10.)