லியஹோனா மாதாந்தர செய்தி, ஜூலை 2021

நாம் சந்தோஷமாயிருக்க நமது பரலோக பிதா விரும்புகிறார்

தேவனின் மகிழ்ச்சியின் திட்டத்தை நாம் நினைவில் வைத்திருப்பதால், வாழ்க்கை கடினமாக இருக்கும்போது கூட மகிழ்ச்சியைக் காணலாம்.

பிள்ளைகளுடன் கிறிஸ்து

நாம் பூமியில் பிறப்பதற்கு முன்பு, நாம் அனைவரும் பரலோக பிதாவுடன் அவருடைய ஆவி பிள்ளைகளாக வாழ்ந்தோம். அவர் தனது பிள்ளைகள் கற்றுக்கொள்ளவும் வளரவும் திட்டத்தை முன்வைத்தார். அவருடைய திட்டத்தின் மூலம், நாம் அவரைப் போலவே ஆகி, நித்திய ஜீவனை அனுபவிக்க தகுதியுடையவர்களாக முடியும். இந்த திட்டம் சாத்தியமானது, ஏனென்றால் தேவனின் குமாரனாகிய இயேசு கிறிஸ்து நம்முடைய பாவங்களுக்காக பாடுபட பூமிக்கு வந்தார், இது பாவநிவிர்த்தி என்று அழைக்கப்படுகிறது.

பரலோக பிதாவின் திட்டம்

• மகிழ்ச்சியின் திட்டம் (ஆல்மா 42:8 பார்க்கவும்),

• இரட்சிப்பின் திட்டம் (மோசே 6:62 பார்க்கவும்),

• மீட்பின் திட்டம் (யாக்கோபு 6:8), அல்லது

• கருணையின் திட்டம் (ஆல்மா 42:15 பார்க்கவும்) என்று அழைக்கப்படுகிறது.

இவையும் பிற வேதங்களும் காண்பிப்பது போல, நாம் அவரைப் போல ஆகவும், அவரிடம் திரும்பி, உண்மையிலேயே மகிழ்ச்சியாகவும் இருக்க வேண்டும் என்று பரலோக பிதா விரும்புகிறார் (மோசே 1:39 பார்க்கவும்).

நாம் கற்றுக்கொள்ளவும் வளரவும் பூமிக்கு வருகிறோம்

தேவன் நம்மை பூமிக்கு அனுப்பினார், அங்கு நமக்கு ஒரு சரீர உடல் இருக்க முடியும் (ஆதியாகமம் 1:26–27 பார்க்கவும்). பூமியில் வாழ்க்கையை அனுபவிக்க நமக்கு உடல்கள் தேவை

நாம் எப்போதுமே மகிழ்ச்சியாக இருக்க மாட்டோம் என்று தேவன் அறிந்திருக்கிறார். நாம் ஏமாற்றங்கள், வேதனைகள் மற்றும் மரணத்தை கூட அனுபவிக்கிறோம். ஆனால் வாழ்க்கையின் சவால்கள் மூலம், கற்றுக்கொள்ளவும் வளரவும் பரலோக பிதா நமக்கு உதவுகிறார்.

நன்மைக்கும் தீமைக்கும் இடையில் தேர்ந்தெடுக்கும் திறனையும் தேவன் நமக்கு வழங்கினார். நாம் என்ன நினைக்கிறோம், என்ன செய்கிறோம் என்பதை நாமே தேர்ந்தெடுக்க அவர் நம்மை அனுமதிக்கிறார். சரியானதைத் தேர்ந்தெடுக்க கற்றுக்கொள்ள நமக்கு உதவ வேதங்களையும், வாழும் தீர்க்கதரிசிகளையும் அவர் நமக்குக் கொடுத்திருக்கிறார் (ஆபிரகாம் 3:25 பார்க்கவும்).

ஜீவ விருட்சம்

இயேசு கிறிஸ்துவைப் போல இருக்க முயற்சி செய்யுங்கள்

பின்பற்றுவதற்கு ஒரு உதாரணம் இல்லாமல் தேவன் நம்மை பூமிக்கு அனுப்பவில்லை (யோவான் 13:15 பார்க்கவும்). நமக்கு வழியைக் காட்ட அவர் தம்முடைய குமாரனாகிய இயேசு கிறிஸ்துவை அனுப்பினார். அவரை பின்பற்றும் வழி குறித்து அறியவும், அவர் யார் என்பதை அறியவும், பூமியில் அவர் வாழ்ந்த காலத்தில் அவர் என்ன செய்தார் என்பதை அறியவும் வேதங்களை நாம் படிக்கலாம். தேவனுக்குக் கீழ்ப்படிந்து மற்றவர்களை நேசிப்பதன் மூலம் கிறிஸ்துவைப் போல இருக்க நம்மால் முடிந்ததைச் செய்யலாம்.

நாம் தவறு செய்யும்போது, மன்னிப்பு கேட்கிறோம், மாறுவதற்கு இயேசு கிறிஸ்துவின் பாவநிவர்த்தியின் வல்லமையைப் பெறுகிறோம். ஒவ்வொரு நாளும் அவரைப் போல மாற நாம் முயற்சிக்கும்போது நாம் மகிழ்ச்சியாக இருக்க முடியும்.

மரணம் முடிவு அல்ல

நாம் மரிக்கும் போது, நம்முடைய ஆவிகள் ஆவி உலகத்திற்குச் செல்கின்றன. உயிர்த்தெழுதலுக்கு நாம் தயாராகும் போது அங்கே தொடர்ந்து கற்றுக்கொள்கிறோம்.

உயிர்த்தெழுதலின் போது, நம் உடல்களும் ஆவிகளும் மீண்டும் ஒன்றிணைக்கும். நம் உடல்கள் பூரணமாக இருக்கும், மேலும் நாம் ஒருபோதும் மரணம் அல்லது நோயுற மாட்டோம் (ஆல்மா 11:44–45 பார்க்கவும்). இயேசு கிறிஸ்து மரித்து மீண்டும் உயிர்ப்பித்ததைப் போல, நாம் அனைவரும் மீண்டும் வாழ்வோம்.

தேவன் நம்மை நியாயந்தீர்க்கும்போது, அவர் நம்முடைய செயல்களையும் ஆசைகளையும் கருத்தில் கொள்வார். பரலோக பிதாவுக்கு நாம் கொடுத்த கட்டளைகளையும் வாக்குறுதிகளையும் கடைப்பிடிக்க முயற்சித்திருந்தால், நாம் அவருடன் மீண்டும் வாழலாம்.

தேவனுடனும் பரலோகத்திலுள்ள நம் குடும்பங்களுடனுனான வாழ்க்கை

பரலோக ராஜ்யத்தில், நாம் தேவனுடனும் இயேசு கிறிஸ்துவுடனும் வாழ்வோம். நாம் நம் குடும்பங்களுக்கு இணைந்திருந்தால் அவர்களுடன் என்றென்றும் அங்கு வாழ முடியும். நாம் அமைதி, மகிழ்ச்சி மற்றும் நிதானத்தைக் காண்போம் (மோசியா 2:41 பார்க்கவும்).

பூமியில் நம் வாழ்க்கை சில நேரங்களில் கடினமாக இருக்கலாம், ஆனால் நாம் இயேசு கிறிஸ்துவைப் பின்பற்றினால், இந்த வாழ்க்கையில் மகிழ்ச்சியையும், வரவிருக்கும் வாழ்க்கையில் நித்திய மகிழ்ச்சியையும் காணலாம்.

மகிழ்ச்சியின் திட்டத்தைப்பற்றி வேதங்கள் என்ன சொல்லுகின்றன?

நாம் நம் வாழ்க்கையை வாழும் முறை முக்கியமானது. நம்முடைய எண்ணங்களுக்கும் செயல்களுக்கும் ஏற்ப தேவன் நமக்குத் தீர்ப்பளித்து வெகுமதி அளிப்பார் (ஆல்மா 41:3 பார்க்கவும்).

சாத்தான் நம் மகிழ்ச்சிக்கு விரோதி. பூமியிலுள்ள நம் வாழ்க்கையை தவறாகப் பயன்படுத்தவும் பாவம் செய்யவும் அவன் நம்மைத் தூண்டுகிறான். நாம் அவரைப் போலவே பரிதாபமாக மாற வேண்டும் என்று அவன் விரும்புகிறான் (2 நேபி 2:27 பார்க்கவும்).

நமக்கான தேவனின் திட்டத்தில் நமக்கு நம்பிக்கை இருக்கும்போது, நாம் எந்த சோதனைகளை எதிர்கொண்டாலும் சமாதானமாக இருக்க முடியும். தேவனோடு என்றென்றும் வாழ்வதை நாம் எதிர்நோக்கலாம் ( கோட்பாடுகளும் உடன்படிக்கைகளும் 59:23 பார்க்கவும்).

© 2021 by Intellectual Reserve, Inc. All rights reserved. அ.ஐ.நாடுகளில் அச்சிடப்பட்டது. ஆங்கில அங்கீகாரம்: 6/19. மொழிபெயர்ப்பு அங்கீகாரம்: 6/19. Monthly Liahona Message, July 2021 மொழிபெயர்ப்பு. Tamil. 17471 418

அனைத்து கலைப்படைப்புகள்–ஜே. கிர்க் ரிச்சர்ட்ஸ்