Digital Lamang: Mga Hulagway sa Hugot nga Pagtuo
Panahon alang sa Simbahan!
Ang “anghel” nga mga misyonaryo kinsa nagpursiger sa pagtudlo kanamo sa ebanghelyo ni Jesukristo nakatabang kanamo nga makakaplag og gugma sa Langitnong Amahan ug sa kinabuhi nga puno sa mga panalangin.
Gilitratohan ni Leslie Nilsson
Dihang ang mga full-time nga mga misyonaryo misugod sa pagtudlo kanamo, ako nagduha-duha ug ang akong bana palaaway. Dili gayod kami gusto makadungog sa ebanghelyo, apan sila determinado kaayo sa pagtudlo kanamo nga kami nasayod nga sila dili moundang.
Usa ka Sabado sa gabii ang akong bana, si Javier, ug ako mitambong sa party nga milungtad og lawom nang gabii. Tungod kay nagpuwaw kami, nangatulog ug nakalimot kami kabahin sa imbitasyon gikan sa mga misyonaryo sa pagtambong sa simbahan uban kanila sa mosunod nga adlaw.
Nakadungog kami nila nga nanuktok sa among pultahan sa Dominggo sa buntag, si Javier ug ako miingon sa usag usa nga magpakaaron-ingnon kita nga nangatulog pa gihapon ug ibaliwala lang sila.”
Apan ang mga misyonaryo mipadayon sa pagpanuktok. Sa kataposan misangpit sila “Brother ug Sister Vasquez, kahibalo mi nga naa mo diha. Kon dili kamo mangabli sa pulthan, moambak lang mi sa inyong bongbong ug tabangan mo nga maandam alang sa simbahan!”
Nasayod kami nga nagpasiaw lang sila, apan nakahukom kami nga mobangon, giablihan ang pultahan, ug magpakaaron-ingnon nga wala kami nakadungog kanila. Migawas kami nga nanglugod sa among mga mata kunohay mao pay among pagmata. Nasayod sila nga nagpakaaron ingon lang kami apan wala lang silay gisulti.
“Kon kamo andam na,” miingon sila, “moadto kita sa chapel.”
Among giandam ang among kaugalingon ug ang among duha ka anak, ug miadto kami. Sa simbahan nianang adlawa natandog kami sa Espiritu Santo. Sukad adto, wala na gayod kami makapalta og miting. Sa adlaw nga kami gibunyagan, Oktubre 17, 1976, mao ang pinakamalipayong adlaw sa among kinabuhi. Ang pagkahimong miyembro sa Simbahan nakausab gayod kanamo.
Alang kanamo, kadtong mga misyonaryo—sila si Elder Reed Harris ug Elder Marty Kemsley—sama sa duha ka anghel. Sa dihang sila mitudlo kanamo kon unsaon sa paghimo og family home evening, sila midala sa ilang tibuok zone. Sa bisan unsang paagi nahimo ra namo nga masulod ang tanang misyonaryo sa gamay namo nga balay. Ang unang himno nga among gikanta mao ang “Gugma sa Panimalay.” Kanunay namo nga mahinumdoman kon unsa ang among gibati niana.
Sa kadugayan, si Elder Harris nangutana kanamo, “Nasayod ba kamo nganong pursigido kaayo kami sa pagtudlo kaninyo, ug sa pagdala kaninyo sa simbahan?” Dayon mitubag siya, “Tungod kay nasayod kami nga mahimo kamong mga lider sa Simbahan.”
Dili gayod kami makalimot niana. Sukad sa among bunyag, nakabaton kami og daghang oportunidad aron maningkamot sa pagsunod sa Manluluwas samtang kami miserbisyo sa mga anak sa Langitnong Amahan. Nakaserbisyo ko diha sa daghang mga posisyon sa pagpangulo, lakip na isip presidente sa Relief Society ug presidente sa Young Women. Si Javier miserbisyo isip presidente sa elders quorom, kaduha isip bishop, ug isip presidente sa stake.
Bag-ohay lang miserbisyo kami og full-time nga Humanitarian nga misyon didto sa Bolivia. Kana nga calling nakahatag kanamo og panalangin sa paghimamat og daghang maanindot nga mga kaigsoonan, sa pagpaambit sa among hugot nga pagtuo ni Jesukristo, ug sa paghatag og gugma, tabang, ug tawhanong tabang ngadto sa pipila sa among labing tabangunon nga mga tawo ug mga dapit sa among nasod.
Dili pa lang dugay, human sa 42 ka tuig isip mga miyembro sa Simbahan, amoa gayod nga natultolan kadtong usa niadtong mapugsanong mga misyonaryo kinsa midala kanamo ngadto sa ebanghelyo. Si Reed Harris nagserbisyo isip presidente sa misyon sa Chile. Emosyonal kaming nagkaistoryahanay sa telepono. Naghilak kami samtang nag-istorya kabahin sa among mga pamilya ug sa among mga kinabuhi diha sa ebanghelyo. Mipasalamat kami kaniya alang sa unsay nahatag sa ebanghelyo kanamo—usa ka himsog nga kinabuhi, gugma sa atong Langitnong Amahan, ug usa ka kinabuhi nga puno sa mga panalangin.