Nahaunang Kababayen-an sa Pagpahiuli

Pagsalig sa Ginoo

Ni Brent M. Rogers

Departamento sa Kasaysayan sa Simbahan

Tungod kay nakaila siya sa Ginoo pinaagi sa mga kasulatan, ang lawom nga pagtuo ni Mary Ann Young mipabilin sa iyang mga pagbati nga “malinawon gayod latas sa tanan nga mga unos.”¹

Paghulagway pinaagi ni Toni Oka

Si Mary Ann Angell bulahan nga nagtubo sa usa ka panimalay nga naghatag og importansya sa pagbasa sa kasulatan. Ganahan kaayo siya sa mga pagtulun-an sa Manluluwas.² Nakat-onan niya sa sayong bahin sa iyang kinabuhi nga mahimo niyang madungog ang tingog sa Ginoo pinaagi sa mga kasulatan ug makakaplag og kahupayan sa Iyang mga pagtulun-an.

Nakadungog siya sa gipahiuli nga ebanghelyo ni Jesukristo nga gisangyaw didto sa Rhode Island, USA, niadtong 1831, ug human sa pagbasa sa Basahon ni Mormon, si Mary Ann nakabig ngadto sa ebanghelyo.

Mibalhin siya ngadto sa Kirtland, Ohio, niadtong mga 1833, diin nahimamat niya si Brigham Young, kinsa iyang naminyoan niadtong sayo nga bahin sa 1834. Sulod sa sunod nga 48 ka tuig, latas sa daghang pagbalhin ug mga pagsulay, si Mary Ann Angell Young nagpadayon sa pagpaminaw sa Ginoo pinaagi sa mga kasulatan ug sa pagbutang sa iyang dili matarog nga pagsalig diha Kaniya.

Sama pananglit, ang iyang bana mibiya alang sa usa ka misyon didto sa Great Britain niadtong 1839 human sa 10 ka adlaw lamang nga siya nanganak sa ilang anak nga babaye nga si Alice. Sulod sa 20 ka bulan nga misunod, si Mary Ann ug ang ilang unom ka anak nanglimbasog. Nag-antus sila sa mga sakit ug nagpakabuhi pinaagi sa mais nga pan, gatas, ug pipila ka utanon sa tanaman.³ Nahimo pa ni Mary Ann nga mangita og gamay nga trabaho aron sa pagsuporta sa iyang pamilya ug sa pag-atiman sa iyang kaugalingon ug sa iyang masakiton nga mga anak. Apan ang Ginoo mitabang kanila latas niini nga mga pagsulay. “Kana usa ka mahinungdanon nga butang,” misulat siya sa iyang bana, nga “mosalig sa Ginoo.”⁴

Misalig sa iyang kahibalo sa kasulatan, si Mary Ann ingon og nakasabot uban sa lawom nga pagtuo nga ang Ginoo anaa kanunay uban kaniya, nahigugma kaniya, ug nakasabot kaniya, ilabi na sa iyang daghang pagsulay. “Hinaot ang Ginoo mogiya kanato sa tanang butang ug mamulong og kahupayan atol sa kinangitngitan ug kinalisoran nga mga panahon” mao ang iyang pag-ampo.⁵

Mubo nga mga sulat

1. Sulat ni Mary Ann Angell Young ngadto kang Brigham Young, Hunyo 30, 1844, Brigham Young Office Files, 1832–1878, Church History Library, Salt Lake City (CHL).

2. Tan-awa sa “Biography of Mrs. Mary Ann Young,” Woman’s Exponent, Sept. 1, 1887, 53–54; Emmeline B. Wells, “In Memoriam,” Woman’s Exponent, Hulyo 15, 1882, 28–29.

3. Tan-awa sa Matthew C. Godfrey, “‘You Had Better Let Mrs Young Have Any Thing She Wants’: What a Joseph Smith Pay Order Teaches about the Plight of Missionary Wives in the Early Church,” BYU Studies, vol. 58, no. 2 (2019), 63–64.

4. Sulat ni Mary Ann Angell Young ngadto kang Brigham Young, Abr. 15, 1841, Brigham Young Office Files, 1832–1878, CHL.

5. Sulat ni Mary Ann Angell Young ngadto kang Brigham Young, Mar. 21, 1840, George W. Thatcher Blair Collection, 1837–1988, CHL.

Paghulagway pinaagi ni Toni Oka